SANG Septiembre 6, 1926, ang Hapones nga pilgrim (nagalakbay nga manugtatap) sa Estados Unidos nagbalik sa Japan subong misyonero. Ang nag-abiabi sa iya amo ang nagaisahanon nga nagasuskriber sang The Watch Tower, nga amo ang nagsugod sang isa ka grupo sa pagtuon sang Biblia sa Kobe. Ang mga Estudyante sang Biblia naghiwat sang ila una nga asembleya sang Enero 2, 1927, sa sina nga siudad. Treintay seis tanan ang nagtambong, kag walo ang nabawtismuhan. Maayo gid yadto nga panugod, pero paano malab-ot sining gamay nga grupo ang 60 milyones ka pumuluyo sang Japan nga kinahanglan makakita sang kapawa sang kamatuoran sa Biblia?

Sang Mayo 1927, ginsugdan sang maisugon nga mga Estudyante sang Biblia ang kampanya sa pagpanaksi sa publiko para ipahibalo ang mga lektyur sa Biblia. Para sa una nga pamulongpulong, nga hiwaton sa Osaka, ang mga kauturan nagbutang sing mga karatula sa dalan kag dalagku nga mga billboard sa bilog nga siudad kag nagpadala sing 3,000 ka imbitasyon sa prominente nga mga tawo. Nagpanagtag sila sing 150,000 ka handbill kag nagpasayod sang pamulongpulong sa panguna nga mga pamantalaan sa Osaka kag sa 400,000 ka tiket sang tren. Sa adlaw mismo sang pamulongpulong, duha ka eroplano ang naglupad sa ibabaw sang siudad kag nagsabwag sing 100,000 ka handbill. Napuno ang Osaka Asahi Hall sang mga 2,300 ka tumalambong agod mamati sa pamulongpulong nga “Ang Ginharian sang Dios Malapit Na.” Mga isa pa ka libo ang ginsilingan nga indi na sila makasulod kay gutok na. Pagkatapos sang pamulongpulong, sobra 600 sa nagtambong ang nagpabilin para sa pamangkot kag sabat nga sesyon. Pagkasunod nga binulan, naghiwat sing base sa Biblia nga mga pamulongpulong sa Kyoto kag sa iban pa nga siudad sa nakatundan sang Japan.

Sang Oktubre 1927, ang mga Estudyante sang Biblia naghimo sing kahimusan para sa mga pamulongpulong sa Tokyo. Ginpadal-an liwat sing imbitasyon ang prominente nga mga indibiduwal—lakip na ang primer ministro, mga miembro sang parlamento, kag mga lider sang relihion kag militar. Gingamit ang mga poster, pasayod sa pamantalaan, subong man ang 710,000 ka handbill, kag 4,800 ang kabilugan nga nagtambong sa tatlo ka lektyur sa kapital sang Japan.

Ang mga colporteur (payunir) may importante nga papel sa pagpalab-ot sang mensahe sang Ginharian sa mga puluy-an. Si Matsue Ishii, nga isa sa una nga mga colporteur sa Japan, kag ang iya bana, nga si Jizo, nagkobre sa 75 porsiento nga bahin sang pungsod, halin sa Sapporo sa pinakaaminhan pakadto sa Sendai, Tokyo, Yokohama, Nagoya, Osaka, Kyoto, Okayama, kag Tokushima. Si Utod Ishii kag ang may edad na nga utod nga babayi nga si Sakiko Tanaka, nagasuksok sing pormal nga kimono kon nagakadto sa mataas nga mga opisyal sang gobierno. Ang isa sa ila nangabay sing 300 ka set sang libro nga The Harp of God kag Deliverance nga ibutang sa librarya sang bilangguan.

 Sanday Katsuo kag Hagino Miura nagbaton sing mga libro halin kay Utod Ishii kag nakita nila ang kamatuoran. Nabawtismuhan sila sang 1931 kag nangin mga colporteur. Sanday Haruichi kag Tane Yamada, kag ang madamo pa nila nga paryente, nagbaton sing mensahe sang Ginharian antes sang tuig 1930. Ang mag-asawa nga Yamada nangin mga colporteur, kag ang ila bata nga babayi nga si Yukiko nangin Bethelite sa Tokyo.

Tama ka mahal sang salakyan sadto kag kalaw-ay sang mga dalan. Gani si Kazumi Minoura kag ang iban pa nga pamatan-on nga colporteur naggamit sing balay nga salakyan nga wala sing makina. Gintawag nila ini nga Jehu subong pag-ilog sa ngalan sang Israelinhon nga nagamaneho sang kangga kag nangin hari sang Israel. (2 Hari 10:15, 16) Ang tatlo ka Daku nga Jehu, nga ang tagsa nagalaba sing 2.2 ka metro, nagasangkad sing 1.9 ka metro, kag nagataas sing 1.9 ka metro, kag makasakay sing asta sa anom ka payunir. Dugang pa, may 11 ka ginaguyod sang bisikleta nga Baby Jehu nga masakyan sang duha ka tawo nga ginhimo sa sanga talatapan sang Japan. Si Kiichi Iwasaki, nga nagbulig sa paghimo sing mga Jehu, naghinumdom, “Ang kada Jehu may tolda kag baterya para magsuplay sang kuryente sa mga suga.” Ginpasiga sang mga colporteur ang kapawa sang kamatuoran sa bug-os nga Japan, nga nagatulod kag nagaguyod sang mga Jehu pataklad kag padulhog sa mga bukid kag sa mga nalupyakan sugod sa naaminhan nga Hokkaido pakadto sa Kyushu sa bagatnan.

Ang colporteur nga si Ikumatsu Ota nagsiling: “Pag-abot namon sa isa ka banwa, ginaplastar namon ang Jehu sa higad sang suba ukon sa wayang. Ginakadtuan namon anay ang prominente nga mga tawo sa sina nga banwa, pareho sang meyor, kag dayon nagapamalaybalay kami para itanyag ang aton literatura. Kon makadtuan namon ang tanan sa sina nga banwa, masaylo naman kami sa sunod.”

Amo ato ang “adlaw sang magamay nga mga butang” sang ang grupo sang 36 ka Estudyante sang Biblia sa Kobe naghiwat sang ila una nga asembleya. (Zac. 4:10) Pagligad lang sang lima ka tuig—sang 1923—103 ka colporteur kag manugbantala ang nagreport sang hilikuton, nga nakapahamtang sing sobra sa 14,000 ka libro. Sa karon, may naorganisar sing maayo nga pangpubliko nga pagpanaksi sa mga siudad sang Japan, kag halos 220,000 ka manugbantala ang nagapasilak sang ila kapawa sa bilog nga Pungsod nga Ginabutlakan sang Adlaw.—Halin sa amon archive sa Japan.