SANG nagbiya ang katawhan sang Dios sa Babilonia sang 537 B.C.E., ginhatagan sing atension ni Jehova ang ila ruta pakadto sa Jerusalem. Ginsilingan niya sila: “Amana ninyo ang dalanon sang katawohan; tampoki, tampoki ang dalan nga daku, pamuluta ang mga bato.” (Isa. 62:10) Handurawa kon paano ini mahimo gintuman sang pila ka Judiyo. Ayhan may mga nagauna para magkay-o sing dalan, nga ginatampukan ang mga batsi kag ginatapan ang duta. Makabulig gid ini sa ila mga kauturan nga nagasunod sa ila pabalik sa ila dutang natawhan.

Mahimo naton ini magamit para iilustrar ang banas padulong sa espirituwal nga mga tulumuron. Luyag ni Jehova nga ang tanan niya nga alagad magalakat sa sina nga banas nga wala sing bisan ano nga balagbag. Ang iya Pulong nagalaygay sa aton: “Tapana ang banas sang imo mga tiil, kag palig-ona ang tanan mo nga dalanon.” (Hulu. 4:26) Pamatan-on ka man ukon indi, makita mo ang kaalam sa sini nga laygay sang Dios.

Ayhan nabatian mo nga ang mga tawo nagasiling sing subong sini parte sa isa ka tin-edyer: ‘Kadamo sing oportunidad para sa iya’ ukon, ‘Mangin madinalag-on gid na sia.’ Sa kabilugan, ang mga pamatan-on maayo sing panglawas, kadasig makatuon, kag gusto gid magmadinalag-on. Husto gid ang ginasiling sang Biblia: “Ang himaya sang mga pamatan-on nga lalaki amo ang ila kusug.” (Hulu. 20:29) Ang pamatan-on nga nagagamit sang iya mga talento kag kusog para alagaron si Jehova makalab-ot sang espirituwal nga mga tulumuron kag mangin matuod nga malipayon.

Pero subong sang nakita mo, ang mga abilidad sang aton mga pamatan-on ginapabaloran gid sang kalibutan. Ang isa ka Saksi nga pamatan-on nga maayo gid sa eskwelahan mahimo hayluhon sang iya guid­ance coun­sel­or, manunudlo, ukon pareho nga estudyante nga magkuha sing mas mataas nga edukasyon para magmadinalag-on sa sining sistema sang mga butang. Ukon ang isa ka Cristianong pamatan-on nga maayo gid nga atleta, mahimo kumbinsihon sang mga re­cruit­er nga tinguhaan ang karera sa sports. Natabo na bala ini sa imo, ukon may kilala ka nga nakaeksperiensia sini? Ano ang makabulig sa isa ka Cristiano nga makadesisyon sing maalamon?

Ang mga panudlo sang Biblia makabulig sa isa para mangin handa sa paglakat sa pinakamaayo nga dalanon sang kabuhi. “Dumduma man ang imo Manunuga sa mga adlaw sang imo pagkapamatan-on,” siling sang Manugwali 12:1. Paano mo ukon sang imo kilala nga pamatan-on ‘madumdom ang Manunuga’ sa pinakamaayo nga paagi?

Binagbinaga ang natabo kay ­Eric * nga taga-Katundan nga Aprika. Nanamian gid sia maghampang sang soc­cer. Sang 15 anyos sia, napilian sia nga maghampang sa ­team sang ila pungsod. Buot silingon, mapaabot na niya sadto pa nga makabaton sia sing pinakamaayo nga paghanas sa Europa, kag mahimo sia mangin propesyonal sa sini sa ulihi. Pero paano nakaapektar sa iya ang laygay nga ‘dumdumon ang iya Manunuga’? Kag ano ang matun-an mo sa sini kag sang pila mo ka abyan?

Sang nagaeskwela si ­Eric, nagtuon sia sa Biblia upod sa mga Saksi ni Jehova. Gani natun-an niya nga permanente nga solbaron sang iya Manunuga ang mga problema sang katawhan. Narealisar ni ­Eric nga importante gid nga gamiton niya ang iya tion kag kusog sa paghimo sang kabubut-on sang Dios. Bangod sini, nagdesisyon sia nga untatan na ang pagpanikasog nga mangin propesyonal sa sports. Sa baylo, nagpabawtismo sia kag nagkonsentrar sa espirituwal nga mga buluhaton. Sang ulihi, nangin ministeryal sia kag nakabaton sing imbitasyon nga mag-eskwela sa Bi­ble ­School ­for Sin­gle Broth­ers.

Kon ginpadayon ni ­Eric ang iya karera sa sports, mahimo nangin bantog sia kag manggaranon. Pero narealisar niya ang kamatuoran sang prinsipio sa Biblia: “Ang pagkabutang sang manggaranon amo ang iya banwa nga mabakud, kag subong sang kuta nga mataas sa iya painoino.” (Hulu. 18:11) Huo, ang seguridad nga matigayon sang tawo paagi sa manggad ilusyon lamang. Dugang pa, ang mga nagapanikasog sa pagtigayon sang manggad masami nga “nagabuno sang ila kaugalingon sang madamo nga kasakit.”—1 Tim. 6:9, 10.

Madamo nga pamatan-on ang nakasapo sing kalipay kag kalig-unan paagi sa pagsulod sa bug-os tion nga pag-alagad. Si ­Eric nagsiling: “Nag-entra ako sa daku nga ­‘team’ sang mga bug-os tion nga alagad ni Jehova. Amo ini ang pinakamaayo nga ­team, kag nagapasalamat gid ako kay Jehova nga ginpakita niya sa akon ang lamang nga dalan padulong sa matuod nga kalipay kag kadalag-an sa kabuhi.”

Kamusta ka? Imbes nga panikasugan ang kalibutanon nga mga tulumuron, ngaa indi mo pagpabakuron ang ‘imo mga dalanon’ para kay Jehova paagi sa pagpayunir?—Tan-awa ang kahon nga “ Mga Benepisyo nga Indi Matigayon sa Unibersidad.”

Sang nagbisita ang isa ka mag-asawa sa sanga talatapan sa Estados Unidos, nabatyagan gid nila ang kalipay sang mga Bethelite nga nagaalagad kay Jehova didto. Sang ulihi, ang sister nagsulat: “Katawhay gid katama sang amon kabuhi.” Gani, nagdesisyon ang mag-asawa nga ihatag ang ila tion kag kusog para sa dugang nga mga pribilehiyo sa pag-alagad.

Sadto nga tion, daw kadaku gid nga pagbag-o ang gusto himuon sang mag-asawa. Pero isa ka bes, ginpamalandungan nila ang teksto sina nga adlaw. Naghalin ini sa Juan 8:31, diin mabasa ang ginsiling ni Jesus: “Kon magpabilin kamo sa akon pulong, mga disipulo ko gid kamo.” Sa pagdumdom sini, nagsiling sila: “Ano man ang amon himuon para pasimplehon ang amon kabuhi, may pulos gid ini nga pagsakripisyo.” Ginbaligya nila ang ila daku nga balay, ginbuhinan ang ila mga palas-anon, kag nagsaylo sa kongregasyon nga nagakinahanglan sing bulig. Nagapayunir na sila karon, nagabulig sa pagtukod sang mga King­dom ­Hall, kag nagaboluntaryo sa distrito nga mga kombension. Ano ang ila nabatyagan? “Grabe gid ang amon kalipay bangod sa simple nga kabuhi, nga nagahimo sang kon ano ang ginapalig-on sang organisasyon ni Jehova sa aton.”

Si Solomon nagsulat: “Itolok ang imo mga mata sing matadlong sa unhan, kag itolok ang imo mga ilalakub sing matadlong sa una nimo.” (Hulu. 4:25) Kaangay sang drayber nga nagatulok sa unahan, likawan man naton ang mga balabag sa aton pagpahamtang sing espirituwal nga mga tulumuron kag sa paglab-ot sini.

Ano nga espirituwal nga mga tulumuron ang mahimo mo mapahamtang kag lab-uton? Maayo gid ang pagsulod sa bug-os tion nga pag-alagad. Ang isa pa amo ang pag-alagad sa malapit nga kongregasyon nga nagakinahanglan sang eksperiensiado nga mga manugbantala para magbulig sa daku nga teritoryo. Ukon sa isa ka kongregasyon nga madamo sing maayo nga manugbantala pero kulang ang mga gulang kag ministeryal nga alagad. Mahimo ka bala makabulig sa isa sini nga mga paagi? Puede mo istoryahon ang manugtatap sang sirkito para mahibaluan mo kon mahimo ka makabulig. Kon gusto mo magbulig sa iban nga pungsod, mahimo ka makapangayo sing mga impormasyon parte sa mga kongregasyon nga nagakinahanglan sing bulig. *

Balikan naton ang narekord sa Isaias 62:10. Mahimo nga ang pila ka Judiyo nanikasog gid para matapan kag mahawanan ang dalan pakadto sa ila dutang natawhan agod ang katawhan sang Dios makalab-ot sa ila destinasyon. Kon nagapanikasog ka para malab-ot ang mga tulumuron sa sagrado nga pag-alagad, indi mangampo. Sa bulig sang Dios, mahimo mo man ini malab-ot. Padayon nga mangayo kay Jehova sing kaalam samtang ginatinguhaan mo nga kuhaon ang mga balagbag sa imo atubangan. Sa paghimo sini, mahimo mo makita kon paano ka niya buligan sa ‘pagtapan sang banas sang imo mga tiil.’—Hulu. 4:26.