Binagbinaga ang kahimtangan sang nagsiling si Jesus parte sa pagkadiminyo. Sang nagpalapit sa iya ang mga Fariseo kag namangkot parte sa diborsio, gin-athag ni Jesus ang talaksan ni Jehova sa pag-asawahay. Bisan pa gintugutan sang Kasuguan ang isa ka lalaki nga maghimo sing sulat sa pagbulagay kon natukiban niya nga may “butang nga makahuluya” sa iya asawa, indi amo sini ang kahimtangan sa ginsuguran. (Deut. 24:1, 2) Dayon si Jesus nagsiling: “Ang bisan sin-o nga magdiborsio sa iya asawa, luwas lamang kon nakighilawas ang iya asawa, kag magpangasawa sang iban nagapanghilahi.”—Mat. 19:3-9.

Pagkabati sini, ang iya mga disipulo nagsiling: “Kon amo ina ang kahimtangan sang mag-asawa, maayo pa nga indi magpangasawa.” Nagsabat si Jesus: “Indi tanan nga tawo makahatag sang lugar sa sini sa ila kabuhi, kundi ang mga may dulot lamang. Ang iban wala magpangasawa bangod sa depekto sang ginpanganak sila, kag ang iban bangod ginkapon sila sang mga tawo; apang ang iban wala magpangasawa bangod sa ginharian sang langit. Sia nga makahatag sang lugar sa sini sa iya kabuhi, maghimo sini.”—Mat. 19:10-12.

Ang iban nangin literal nga mga eunuco bangod may depekto sila sang ginpanganak sila ukon bangod sa isa ka aksidente. May iban nga nagdesisyon nga himuon ang ila kaugalingon nga eunuco pero indi sa literal nga paagi. Puede sila mangasawa, pero ginpunggan nila ang ila kaugalingon kag nagpabilin nga di-minyo “bangod sa ginharian sang langit.” Pareho kay Jesus, ginpili nila nga mangin di-minyo para makakonsentrar sa pag-alagad sa Ginharian. Wala sila natawo nga may dulot sang pagkadiminyo ukon nakabaton sina nga dulot. Nagahatag sila sing lugar sa sini, buot silingon, hungod nila nga ginbaton ini nga dulot.

Para ipadaku ang ginsiling ni Jesus, si apostol Pablo nagpaathag nga ang pag-alagad sang tanan nga Cristiano—minyo ukon di-minyo—ginabaton sang Dios. Pero ang mga ‘determinado sa ila tagipusuon’ nga magpabilin nga di-minyo “nagahimo sing mas maayo pa.” Paano? Kinahanglan bahinon sang mga minyo ang ila tion kag kusog para pahamut-an kag atipanon ang ila tiayon. Sa pihak nga bahin, ang di-minyo nga mga Cristiano makapokus sa ila pag-alagad sa Dios. Ginakabig nila ini nga “dulot” halin sa Dios.—1 Cor. 7:7, 32-38.

Gani ginapakita sang Kasulatan nga ang isa ka Cristiano wala nakabaton sang dulot nga pagkadiminyo sa misteryoso nga paagi. Sa baylo, napalambo niya ini paagi sa pagpabilin nga di-minyo para makabulig sa pagpauswag sang intereses sang Ginharian nga wala sing tublag. Madamo karon ang namat-od nga magpabilin nga di-minyo bangod sini nga rason, kag ginapalig-on sila sang iban.