1. Ano ang makabulig sa aton agod makapabilin nga nagabantay kag makabatas sa mga pagtilaw?

ANG makakulugmat nga mga hitabo mahanabo sa indi madugay. Ginapamatud-an ini sang katumanan sang mga tagna sa Biblia, gani dapat gid nga magpadayon kita sa pagbantay. Ano ang makabulig sa aton? Si apostol Pablo nagsiling nga kinahanglan naton ‘ituon ang aton mga mata sa mga butang nga indi makita.’ Huo, dapat naton dumdumon ang aton padya nga kabuhi nga walay katapusan, sa langit man ukon sa duta. Base sa konteksto, ginsulat ini ni Pablo para palig-unon ang iya mga masigkatumuluo nga hunahunaon pirme ang makalilipay nga resulta sang ila katutom. Kon himuon nila ini, mabatas nila ang mga pagtilaw kag paghingabot.—2 Cor. 4:8, 9, 16-18; 5:7.

2. (a) Agod magpabilin nga malig-on ang aton paglaum, ano ang dapat naton himuon? (b) Ano ang binagbinagon naton subong kag sa masunod nga artikulo?

² Ginapakita sang laygay ni Pablo ang isa ka importante nga prinsipio: Agod magpabilin nga malig-on ang aton paglaum, dapat naton hunahunaon ang mga butang nga malapit na lang mahanabo. Dapat kita magkonsentrar sa importante nga mga hitabo nga wala pa naton makita. (Heb. 11:1; 12:1, 2) Gani, binagbinagon naton subong kag sa masunod nga artikulo ang napulo ka hitabo sa palaabuton nga naangot sa aton paglaum nga kabuhi nga walay katapusan.

3. (a) Ano nga hitabo sa palaabuton ang ginsambit sa 1 Tesalonica 5:2, 3? (b) Ano ang himuon sang pulitikal nga mga manuggahom, kag sin-o ang mahimo nga magaupod sa ila?

³ Ang isa sa mga hitabo sa palaabuton ginsambit ni Pablo sa iya sulat sa mga taga-Tesalonica. (Basaha ang 1 Tesalonica 5:2, 3.) Ginpadaku niya ang “adlaw ni Jehova.” Ang “adlaw ni Jehova” nga ginsambit diri nagapatuhoy sa  hut-ong sang tion nga magasugod sa kalaglagan sang butig nga relihion kag matapos sa inaway sa Armagedon. Pero antes magsugod ang adlaw ni Jehova, ang mga lider sang kalibutan magasiling sing “Paghidait kag kalig-unan!” Mahimo ini magpatuhoy sa isa ka hitabo ukon sa nagasundanay nga mga hitabo. Ang mga pungsod mahimo maghunahuna nga malapit na lang nila masolbar ang ila dalagku nga mga problema. Kamusta naman ang mga lider sang relihion? Bangod bahin sila sang kalibutan, posible nga magaupod sila sa pulitikal nga mga manuggahom. (Bug. 17:1, 2) Gani, ang mga klerigo mangin pareho sa butig nga mga manalagna sa Juda sang una. Si Jehova nagsiling parte sa ila: “Nagasiling [sila], ‘Paghidait, paghidait,’ nga wala sing paghidait.”—Jer. 6:14; 23:16, 17.

4. Indi pareho sang kalabanan nga tawo, ano ang nahangpan naton?

⁴ Bisan sin-o man ang makigbahin sa pagsiling sing “Paghidait kag kalig-unan!” ini nga hitabo mangin tanda sang pagsugod sang adlaw ni Jehova. Gani si Pablo nagsiling: “Mga kauturan, wala kamo sa kadudulman, kag indi kamo kaangay sang mga kawatan nga maabtan sina nga adlaw, kay kamo tanan mga anak sang kapawa.” (1 Tes. 5:4, 5) Indi pareho sang kalabanan nga tawo, nahangpan naton paagi sa Kasulatan ang kahulugan sang mga hitabo subong. Paano matuman ang tagna parte sa pagsiling sing “Paghidait kag kalig-unan”? Hulaton naton ini kag bantayan. Amo nga dapat kita mangin determinado nga “magpabilin . . . nga nagamata kag nagahupot sang aton kaligdong.”—1 Tes. 5:6; Sof. 3:8.

5. (a) Paano magasugod ang “dakung kapipit-an”? (b) Sin-o ang “reyna” nga wala nagpaabot nga malaglag?

⁵ Ano pa nga hitabo nga wala pa naton makita ang masunod nga mahanabo? Si Pablo nagsiling: “Sa tion nga magsiling sila: “Paghidait kag kalig-unan!” nian magaabot sa ila ang hinali nga kalaglagan.” Ang una nga bahin sining “hinali nga kalaglagan” amo ang pagsalakay sa “Babilonia nga Daku,” ang bug-os kalibutan nga emperyo sang butig nga relihion, nga ginatawag man “makihilawason.” (Bug. 17:5, 6, 15) Ini nga pagsalakay batok sa tanan nga butig nga relihion, lakip ang Cristiandad, mangin panugod sang “dakung kapipit-an.” (Mat. 24:21; 2 Tes. 2:8) Madamo ang makibot sa sini. Ngaa? Bangod bisan sa sina nga tion, ginakabig gihapon sang makihilawason ang iya kaugalingon nga “isa ka reyna” nga “indi gid . . . maglalaw.” Pero marealisar niya nga nagsala sia kay hinali sia nga laglagon, nga daw sa sulod lang sang “isa ka adlaw.”—Bug. 18:7, 8.

6. Sin-o ang magalaglag sa butig nga relihion?

 ⁶ Ginasugid sang Pulong sang Dios nga ang magasalakay sa makihilawason amo ang “mabangis nga sapat” nga may “napulo ka sungay.” Ginapakita sang pagtuon sa tulun-an sang Bugna nga ang mabangis nga sapat amo ang Nasyones Unidas. “Ang napulo ka sungay” nagarepresentar sa tanan nga pulitikal nga kagamhanan karon nga nagasuporta sa sining “duag-eskarlata nga mabangis nga sapat.” * (Bug. 17:3, 5, 11, 12) Daw ano ka grabe ang pagsalakay sa makihilawason? Ang mga pungsod nga miembro sang Nasyones Unidas magakuha sang iya manggad, magabuyagyag sa iya kalautan, magalamon sa iya, kag “magasunog sa iya sing bug-os.” Amo na ini ang iya katapusan.—Basaha ang Bugna 17:16.

7. Ano ang mangin kabangdanan sang pagsalakay sang “mabangis nga sapat”?

⁷ Ginapakita man sang tagna sa Biblia ang mangin kabangdanan sini nga pagsalakay. Ibutang ni Jehova sa tagipusuon sang pulitikal nga mga manuggahom “ang paghimo sang iya hunahuna,” nga amo ang paglaglag sa makihilawason. (Bug. 17:17) Ang mga relihion nga nagasulsol sing inaway padayon nga magapagamo sa kalibutan; gani para sa mga manuggahom, ang paglaglag sa makihilawason makapaayo sa ila pungsod. Kon magsalakay na ang mga manuggahom, magapensar sila nga ginahimo nila ang ila “isa ka hunahuna.” Pero ang matuod, mangin instrumento sila sang Dios sa paglaglag sa tanan nga butig nga relihion. Gani ang matabo, salakayon sang isa ka bahin sang sistema ni Satanas ang isa pa ka bahin sang iya sistema, kag wala sia sing mahimo para punggan ini.—Mat. 12:25, 26.

8. Ano ang ginalaragway sang pagsalakay ni “Gog, sa duta sang Magog”?

⁸ Sa tapos malaglag ang butig nga relihion, ang mga alagad sang Dios padayon nga ‘magapuyo sing malig-on’ kag “wala sing mga kuta.” (Ezeq. 38:11, 14) Ano ang matabo sa sining wala sing pangapin nga katawhan nga padayon nga nagasimba kay Jehova? Maathag nga salakayon sila sang “madamu nga mga katawohan.” Ini nga hitabo ginalaragway sang Pulong sang Dios subong pagsalakay ni “Gog, sa duta sang Magog.” (Basaha ang Ezequiel 38:2, 15, 16.) Paano naton dapat tamdon ini nga pagsalakay?

9. (a) Ano ang panguna nga ginakabalak-an sang mga Cristiano? (b) Ano ang dapat naton himuon karon para magbakod ang aton pagtuo?

⁹ Bisan pa nahibaluan na naton ini nga pagsalakay sa katawhan sang Dios, wala kita nagakabalaka sing tuman. Ang aton panguna  nga ginakabalak-an indi ang aton kaluwasan, kundi ang pagpakabalaan sa ngalan ni Jehova kag ang pagbindikar sa iya pagkasoberano. Ang matuod, sobra 60 ka beses nga nagsiling si Jehova: “Makilala ninyo nga Ako amo [si Jehova].” (Ezeq. 6:7) Gani, ginakalangkagan gid naton ang katumanan sining talalupangdon nga bahin sang tagna ni Ezequiel, nga nagasalig nga “nahibaluan ni Jehova kon paano luwason ang mga tawo nga may diosnon nga debosyon gikan sa pagtilaw.” (2 Ped. 2:9) Samtang wala pa ini, luyag naton pirme pabakuron ang aton pagtuo agod mahuptan ang aton integridad kay Jehova ano man nga pagtilaw ang aton maagyan. Ano ang dapat naton himuon? Dapat kita mangamuyo, magtuon sa Pulong sang Dios kag magpamalandong sa sini, kag magpaambit sa iban sang mensahe sang Ginharian. Paagi sa sini, ginapalig-on naton ang aton paglaum nga kabuhi nga walay katapusan, pareho sang “angkla.”—Heb. 6:19; Sal. 25:21.

10, 11. Ano ang mangin tanda sa pag-umpisa sang Armagedon, kag ano ang mahanabo sa sina nga tion?

¹⁰ Anong makakulugmat nga butang ang mahanabo sa pagsalakay sa katawhan ni Jehova? Si Jehova, paagi kay Jesus kag sa mga hangaway sa langit, magapasilabot para sa Iya katawhan. (Bug. 19:11-16) Ini nga pagpasilabot mangin “inaway sang daku nga adlaw sang Dios nga Labing Gamhanan,” ang Armagedon.—Bug. 16:14, 16.

¹¹ Parte sini nga inaway, si Jehova nagsiling paagi kay Ezequiel: “Magatawag ako sing espada batok sa iya sa tanan ko nga bukid, nagasiling ang Ginoong DIOS; ang espada sang tagsa ka tawo manginbatok sa iya utud.” Gani, ang mga magadampig kay Satanas magasalasala, kag sila mismo ang magailinaway. Maagyan man nila ang daku nga kahalitan. Si Jehova nagsiling: “Magapaulan ako [kay Gog] kag sa iya mga guban kag sa madamung mga katawohan nga upud sa iya . . . sing kalayo kag azufre.” (Ezeq. 38:21, 22) Ano ang mangin resulta sining pagpasilabot sang Dios?

12. Ano ang mapilitan nga himuon sang mga pungsod?

¹² Marealisar sang mga pungsod nga nalutos sila bangod sang mando ni Jehova. Pareho sang natabo sa mga Egiptohanon nga naglagas sa mga Israelinhon sa Pula nga Dagat, ang puersa ni Satanas magasinggit sa kapaslawan: “Ang GINOO nagapakig-away tungud sa ila”! (Ex. 14:25) Huo, mapilitan ang mga pungsod nga kilalahon si Jehova. (Basaha ang Ezequiel 38:23.) Daw ano na kita kalapit sa pagsugod sini nga mga hitabo?

13. Ano ang natun-an naton parte sa ikalima nga bahin sang larawan nga ginlaragway ni Daniel?

¹³ Ginabuligan kita sang isa ka tagna sa tulun-an sang Daniel para mahibaluan kon sa diin na kita sa lakat sang tion. Ginlaragway ni Daniel ang isa ka larawan sang tawo nga human sa lainlain nga metal. (Dan. 2:28, 31-33) Ginarepresentar sini ang nagasundanay nga mga kagamhanan sa kalibutan nga nakaapektar sing daku sa katawhan sang Dios, sadto kag subong. Ini amo ang Babilonia, Medo-Persia, Gresya, Roma—kag ang katapusan amo ang kagamhanan sa kalibutan sa aton tion. Ginapakita sang pagtuon sa tagna ni Daniel nga ining katapusan nga kagamhanan ginarepresentar sang tiil kag mga tudlo sang larawan. Sang Bug-os Kalibutan nga Inaway I, ang Britanya kag Estados Unidos nagtukod sing pinasahi nga pag-updanay. Huo, ang ikalima nga bahin sang larawan amo ang Anglo-Amerikano nga Kagamhanan sa Kalibutan. Bangod ang tiil amo ang katapusan nga bahin sang larawan, wala na sing iban pa nga kagamhanan sang tawo nga magaluntad sa kalibutan. Ang tiil kag mga tudlo sini nga human sa salsalon kag daga nagapakita nga ang Anglo-Amerikano nga kagamhanan mahuyang.

14. Ano ang kagamhanan sa kalibutan kon mag-abot na ang Armagedon?

¹⁴ Ginapakita man sini nga tagna nga ang Ginharian sang Dios, nga ginarepresentar sang daku nga bato, natiphag halin sa bukid sang pagkasoberano ni Jehova sang 1914. Sa karon, ina nga bato nagadalidali na sa pag-igo sa tiil sang larawan. Sa Armagedon, ang tiil kag ang bilog nga larawan pagadugmukon. (Basaha ang Daniel 2:44, 45.) Gani, ang Anglo-Amerikano amo gihapon ang kagamhanan sa kalibutan pag-abot sang Armagedon. Makalilipay gid masaksihan ang bug-os nga katumanan sini nga tagna! * Pero ano ang himuon ni Jehova kay Satanas?

15. Pagkatapos sang Armagedon, ano ang matabo kay Satanas kag sa iya mga demonyo?

¹⁵ Una, masaksihan ni Satanas kon paano amat-amat nga malaglag ang tanan niya nga organisasyon sa duta. Dayon, sia na ang madason. Ginsulat ni apostol Juan ang masunod nga matabo. (Basaha ang Bugna 20:1-3.) Si Jesucristo—ang “anghel . . . nga may yabi sang kadadalman”—magadakop kay Satanas kag sa iya mga demonyo. Itagbong niya sila sa kadadalman kag ihunong didto sa sulod sang isa ka libo ka tuig. (Luc. 8:30, 31; 1 Juan 3:8) Amo ini ang una nga bahin sang pagdugmok sa ulo sang man-ug. *—Gen. 3:15.

16. Ano ang kahimtangan ni Satanas sa “kadadalman”?

¹⁶ Ano ang “kadadalman” diin itagbong si Satanas kag ang iya mga demonyo? Ang Griego nga tinaga nga a′bys·sos nga gingamit ni Juan nagakahulugan sing “tuman kadalom.” Gin-translate man ini nga “indi matungkad, wala sing dulunan,” kag “wala sing katapusan.” Gani isa ini ka duog nga indi malab-ot sang bisan sin-o, luwas kay Jehova kag sa iya gintangdo nga anghel “nga may yabi sang kadadalman.” Didto, daw pareho lang nga patay si Satanas. Wala gid sia sing mahimo amo nga “indi na niya mapatalang pa ang mga pungsod.” Huo, ang “nagangurob nga leon” pahipuson!—1 Ped. 5:8.

17, 18. (a) Ano nga mga hitabo nga wala pa naton nakita ang nabinagbinag na naton? (b) Pagkatapos sini nga mga hitabo, ano ang maeksperiensiahan naton?

¹⁷ Malapit na gid lang ang importante kag makakulugmat nga mga hitabo. Ginakalangkagan naton nga makita kon paano matuman ang pagsinggit sang “Paghidait kag kalig-unan!” Masaksihan naton ang kalaglagan sang Babilonia nga Daku, ang pagsalakay ni Gog sang Magog, kag ang inaway sa Armagedon. Dayon itagbong si Satanas kag ang iya mga demonyo sa kadadalman. Pagkatapos sini nga mga hitabo, kon madula na ang tanan nga kalautan, magasulod kita sa bag-o nga kahimtangan—ang Milenyo nga Paggahom ni Cristo, diin maeksperiensiahan naton ang “kabuganaan sang paghidait.”—Sal. 37:10, 11.

¹⁸ Luwas sa lima ka hitabo nga aton nabinagbinag, may iban pa nga “butang nga indi makita” nga sa sini dapat naton ‘ituon ang aton mga mata.’ Binagbinagon ini sa masunod nga artikulo.