Magkasadya Kita!

SAMTANG nagaligad ang tion, ang pagtigayon sing kalipay labi man nga nagabudlay. Para sa madamo, daw imposible na subong ang pagpaambit sang makapalig-on nga mga panghunahuna. Bangod sa moderno nga pagkabuhi ilabi na sa dalagku nga mga siudad, madamo ang nagapain sang ila kaugalingon kag nagaisahanon.

“Ang kasubo kinaandan na,” siling ni Alberto Oliverio, isa ka propesor sa Psychobiology, kag “wala sing duhaduha nga ang kabuhi sa siudad amo ang kabangdanan sang pag-isahanon. Sa masami, ini ang rason nga indi na naton matalupangdan ang kabuhi sang aton kaupod sa opisina, kaingod, ukon ang mga checkout clerk nga nagaobra sa supermarket malapit sa aton.” Ini nga pag-isahanon masami nagaresulta sang depresyon.

Apang tuhay ang kahimtangan kag panimuot sa tunga sang mga masigka-Cristiano. Si apostol Pablo nagsulat: “Magkasadya kamo pirme.” (1 Tes. 5:16) Madamo sing rason nga magkalipay kag magkasadya kita sing tingob. Ginasimba naton ang Labing Mataas nga Dios, si Jehova;  nahangpan naton ang kamatuoran sa Biblia; may paglaum kita nga kaluwasan kag dayon nga kabuhi; kag ginabuligan naton ang iban nga makatigayon sing amo man nga pagpakamaayo.—Sal. 106:4, 5; Jer. 15:16; Roma 12:12.

Ang pagkalipay kag pagpaambit sang kasadya mga kinaiya sang matuod nga mga Cristiano. Gani indi kita matingala nga si Pablo nagsulat sa mga taga-Filipos: “Nagakalipay ako kag nagakasadya upod sa inyo tanan. Karon sa amo man nga paagi magkalipay man kamo kag magkasadya upod sa akon.” (Fil. 2:17, 18) Sa sining malip-ot lang nga pinamulong ni Pablo, duha ka beses nga ginsambit niya nga magkalipay kag magkasadya sa isa kag isa.

Siempre, dapat likawan sang mga Cristiano ang bisan ano nga huyog nga painon ang kaugalingon. Indi mahimo sang isa nga magkasadya upod sa iya mga masigkatumuluo kon ginapain niya ang iya kaugalingon. Gani paano naton masunod ang laygay ni Pablo nga ‘padayon nga magkasadya sa Ginuo’ upod sa aton mga kauturan?—Fil. 3:1.

Magkasadya Upod sa mga Masigkatumuluo

Sang ginsulatan ni Pablo ang mga taga-Filipos, mahimo nga bilanggo sia sa Roma bangod sang iya pagbantala. (Fil. 1:7; 4:22) Apang wala sia magluya sa ministeryo. Sa baylo, nagkasadya sia sa pag-alagad kay Jehova sing bug-os kag sa ‘pagbubo sa iya kaangay sang isa ka dulot nga ilimnon.’ (Fil. 2:17) Ginapakita ni Pablo nga ang kalipay wala nasandig sa kahimtangan sang isa. Bisan nabilanggo, sia nagsiling: “Padayon ako nga magakasadya.”—Fil. 1:18.

Gintukod ni Pablo ang kongregasyon sa Filipos kag ginpalangga niya ang mga kauturan. Nahibaluan niya nga ang pagpaambit sang iya kalipay sa pag-alagad kay Jehova makapalig-on man sa iban. Gani nagsulat sia: “Karon luyag ko nga mahibaluan ninyo, mga kauturan, nga ang nahanabo sa akon nagresulta sa pag-uswag sang maayong balita sa baylo nga punggan ini, amo nga ang akon mga gapos may kaangtanan kay Cristo nahibaluan sing dayag sang tanan nga Guardia sang Pretorio kag sang tanan nga iban pa.” (Fil. 1:12, 13) Ang isa ka paagi nga ginpakita ni Pablo nga nalipay sia kag nagakasadya upod sa mga kauturan amo ang pagsugid sining makapalig-on nga eksperiensia. Gani dapat magkalipay man ang mga taga-Filipos upod kay Pablo. Agod mahimo nila ini, dapat nga indi sila magluya bangod sa naeksperiensiahan ni Pablo. Sa baylo, kinahanglan nila ilugon ang iya halimbawa. (Fil. 1:14; 3:17) Dapat padayon man nila nga ipangamuyo si Pablo kag sakdagon sia suno sa ila masarangan.—Fil. 1:19; 4:14-16.

 Malipayon man bala kita pareho ni Pablo? Ginapanikasugan man bala naton nga makita ang positibo nga bahin sang aton kabuhi kag sang aton ministeryo? Kon nagapakig-upod kita sa aton mga kauturan, maayo nga magkasadya kita parte sa pagbantala. Indi na kinahanglan nga maghulat kita sang talalupangdon nga mga eksperiensia agod magkasadya. Mahimo napukaw naton ang interes sang tagbalay sa mensahe sang Ginharian paagi sa epektibo nga introduksion ukon pangatarungan. Ayhan maayo ang aton pagpakigsugilanon sa tagbalay parte sa isa ka teksto sa Biblia. Ukon mahimo nakilala lang kita sa teritoryo subong mga Saksi ni Jehova, kag nangin maayo na ini nga panaksi. Ang pagpaambit sini nga mga eksperiensia isa ka paagi agod magkasadya kita sing tingob.

Madamo sa katawhan ni Jehova ang padayon nga nagasakripisyo sa pagbantala. Ang mga payunir, nagalakbay nga manugtatap, Bethelite, misyonero, kag mga international servant nagakasadya sa ila bug-os tion nga pag-alagad. Nalipay man bala kita para sa ila? Gani ipakita naton ang aton pagpasalamat sa sining pinalangga naton nga “mga masigkamanugpangabudlay para sa ginharian sang Dios.” (Col. 4:11) Palig-unon naton sila kon kaupod naton sila sa mga miting ukon sa mga asembleya. Mailog man naton ang ila kakugi. May “kahigayunan” kita nga makapamati sang ila mga eksperiensia kag makapalig-on nga mga pinamulong kon abiabihon naton sila, subong sang pag-agda sa ila nga magkaon upod sa aton.—Fil. 4:10.

Magkasadya Upod sa mga May Pagtilaw

Ang pagbatas sang paghingabot kag paglandas sang mga pagtilaw nakapalig-on kay Pablo nga mangin determinado nga magpabilin nga matutom kay Jehova. (Col. 1:24; Sant. 1:2, 3) Bangod nahibaluan niya nga ang mga kauturan sa Filipos mahimo makaatubang sing amo man nga mga pagtilaw kag mapalig-on sa iya pagbatas, nagkasadya sia upod sa ila. Gani nagsulat sia: “Ginhatag sa inyo ang pribilehiyo tungod kay Cristo, indi lamang agod magtuo kamo sa iya, kundi agod mag-antos man kamo tungod sa iya. Kay nagapanikasog man kamo subong sang nakita ninyo sa akon kag subong sang nabatian ninyo karon tuhoy sa akon.”—Fil. 1:29, 30.

Ginapamatukan man ang mga Cristiano sa ila pagbantala subong. Kon kaisa masingki ini, apang kon kaisa malalangon. Mahimo sayop ini nga mga panumbungon sang mga apostata, pag-ipit sang mga katapo sang pamilya, kag pagyubit sang mga kaupod ukon mga kaeskwela. Si Jesus nagpaandam nga ining mga pagtilaw indi dapat magpakibot ukon magpaluya sa aton. Sa baylo, mga rason ini sa pagkasadya. Sia nagsiling: “Malipayon kamo kon ang mga tawo nagapakahuya kag nagahingabot sa inyo kag binutig nga nagahambal batok sa inyo sang tanan nga sahi sang kalautan tungod sa akon. Magkasadya kamo kag magtumbo sa kalipay, kay daku ang inyo padya sa langit.”—Mat. 5:11, 12.

Indi kita dapat mahadlok kon mabalitaan naton ang masingki nga paghingabot sa aton mga kauturan sa iban nga pungsod. Sa kabaliskaran, dapat magkalipay kita bangod nagbatas sila. Ilakip naton sila sa aton pangamuyo, kag pangabayon si Jehova nga sakdagon ang ila pagtuo kag pagbatas. (Fil. 1:3, 4) Bisan diutay lang ang aton mahimo para sa sining pinalangga naton nga mga utod, may mabulig kita sa mga bag-uhan sa aton kongregasyon nga nagaatubang sing mga pagtilaw. Mapakita naton ang aton interes kag pagsakdag sa ila. Mahimo kita magkalipay upod sa ila paagi sa pag-agda sa ila kon kaisa sa aton Pangpamilya nga Pagsimba, pag-upod sa ila sa pagbantala, kag paghinguyang sing tion upod sa ila sa paglingawlingaw.

Madamo kita sing rason nga magkasadya sing tingob! Likawan naton ang panimuot sang kalibutan nga ginapain ang kaugalingon. Magpadayon kita sa pagpaambit sang aton kalipay sa aton mga kauturan. Sa paghimo sini, indi lamang kita makaamot sa gugma kag paghiusa sa kongregasyon kundi magakasadya man kita sing bug-os sa Cristianong paghiliutod. (Fil. 2:1, 2) Huo, “magkasadya kamo pirme sa Ginuo,” kay si Pablo nagpalig-on: “Sa liwat ginasiling ko, Magkasadya kamo!”—Fil. 4:4.

[Picture Credit Line sa pahina 6]

Globe: Courtesy of Replogle Globes