“Magdalagan . . . nga Maagom Ninyo Ini”

“Magdalagan kamo sa paagi nga maagom ninyo ini.”—1 COR. 9:24.

1, 2. (a) Ano ang gingamit ni Pablo sa pagpalig-on sa Hebreong mga Cristiano? (b) Ano ang ginlaygay sa mga alagad sang Dios?

SA IYA sulat sa mga Hebreo, naggamit si apostol Pablo sing paglaragway agod palig-unon ang iya mga masigka-Cristiano. Ginpahanumdom niya sila nga indi lang sila ang nagadalagan sa palumba sang kabuhi. Ginapalibutan sila sang ‘daku nga panganod sang mga saksi,’ nga nagmadinalag-on sa palumba. Ang pagdumdom sa katutom kag pagpanikasog sining mga nauna na makapalig-on sa Hebreong mga Cristiano nga magpadayon sa palumba.

² Sa nagligad nga artikulo, ginbinagbinag naton ang pila sa “panganod sang mga saksi.” Sila tanan nagpakita sang malig-on nga pagtuo amo nga nakapabilin sila nga matutom sa Dios, nga daw subong bala nga gintapos nila ang palumba. May matun-an kita sa ila kadalag-an. Subong sang ginsambit sa sina nga artikulo, naglaygay si Pablo sa iya mga masigkaulipon, lakip kita: “Isikway man naton ang tagsa ka kabug-atan kag ang sala nga madali nagasalawid sa aton, kag magdalagan kita nga may pagbatas sang dalaganon nga ginabutang sa aton atubangan.”—Heb. 12:1.

3. Ano ang ginapadaku ni Pablo sang ginsambit niya ang Griego nga mga manugdalagan?

 ³ Kon parte sa palumba sa dalagan, nga isa sadto ka popular nga paindisanay, ang libro nga Backgrounds of Early Christianity nagasiling nga “ang mga Griego nagaehersisyo kag nagapalumba nga hublas.” * Ginauba sang mga manugdalagan ang bisan ano nga makapahinay sa ila. Bisan pa daw nalainan kita ukon nabastusan sa sini, ginahimo nila ini kay gusto gid nila magdaug. Ginapadaku lang ni Pablo nga kon luyag sang isa nga matigayon ang padya sa palumba sa kabuhi, importante gid nga ibilin niya ang bisan ano nga makapahinay sa iya pagdalagan. Ini nga laygay praktikal gid sa mga Cristiano sadto, kag amo man subong. Ano nga mga kabug-atan ang makaupang sa aton sa pagtigayon sang padya?

Isikway ang Tagsa ka Kabug-atan

4. Ano ang ginakawilihan sang mga tawo sang adlaw ni Noe?

⁴ Naglaygay si Pablo nga ‘isikway ang tagsa ka kabug-atan.’ Nalakip sa sini ang bisan ano nga butang nga makaupang sa aton nga makakonsentrar kag makadalagan sa aton bug-os nga masarangan. Ano ining mga kabug-atan? Parte kay Noe nga isa sang mga halimbawa nga ginsambit ni Pablo, madumduman naton ang ginsiling ni Jesus: “Subong sang nahanabo sa mga adlaw ni Noe, amo man sa mga adlaw sang Anak sang tawo.” (Luc. 17:26) Ang ginatumod ni Jesus indi lamang ang wala sing tupong nga kalaglagan nga magaabot kundi pati man ang pagkabuhi sang mga tawo. (Basaha ang Mateo 24:37-39.) Sang adlaw ni Noe, ang kalabanan wala sing interes sa Dios kag wala nagapanikasog nga pahamut-an sia. Ano ang nagawili sa ila? Ang kinaandan nga mga butang subong sang pagkaon, pag-inom, kag pagminyo. Ang problema kay “wala sila magsapak,” subong sang ginsiling ni Jesus.

5. Ano ang makabulig sa aton nga matapos ang palumba sing madinalag-on?

⁵ Pareho nanday Noe kag sang iya pamilya, madamo man kita sing hilikuton sa kada adlaw. Dapat mangita kita sing palangabuhian kag atipanon ang aton kaugalingon kag ang aton pamilya. Daku nga tion, kusog, kag kagastuhanan ang kinahanglanon sa sini. Labi kita nga nagakabalaka sa aton matag-adlaw nga kinahanglanon kon tigpiligado. Subong dedikado nga mga Cristiano, may importante pa kita nga mga responsibilidad sa Dios. Nagabantala kita, nagahanda kag nagatambong sa mga miting, kag ginapabakod ang aton espirituwalidad paagi sa personal nga pagtuon kag pangpamilya nga pagsimba. Bisan pa tuman kadamo ang hilikuton ni Noe sa pag-alagad sa Dios, “amo gid ini ang ginhimo niya.” (Gen. 6:22, NW) Agod makatapos kita sa Cristianong palumba, dapat buhinan naton ang mga kabug-atan, kag ibilin ang indi kinahanglanon.

6, 7. Ano nga laygay ni Jesus ang dapat naton dumdumon?

⁶ Ano ang buot silingon ni Pablo sang nagsiling sia nga isikway “ang tagsa ka kabug-atan”? Matuod nga indi naton masikway ang tanan naton nga responsibilidad. Parte sa sini, dumdumon naton ang ginsiling ni Jesus: “Indi gid kamo magkabalaka kag magsiling, ‘Ano ang  aton kaunon?’ ukon, ‘Ano ang aton imnon?’ ukon, ‘Ano ang aton ipanapot?’ Kay ini tanan amo ang mga butang nga maukod nga ginatinguhaan nga maagom sang mga pungsod. Bangod nahibaluan sang inyo langitnon nga Amay nga kinahanglan ninyo ini tanan nga butang.” (Mat. 6:31, 32) Ginapahangop sang ginsiling ni Jesus nga bisan ang kinaandan nga mga butang subong sang pagkaon kag panapton mahimo mangin kabug-atan ukon kasandaran kon indi pag-ibutang sa lugar.

⁷ Talupangda ang ginsiling ni Jesus: “Nahibaluan sang inyo langitnon nga Amay nga kinahanglan ninyo ini tanan nga butang.” Ginapahangop sini nga ang aton langitnon nga Amay, si Jehova, magahimo sang iya bahin sa pag-atipan sang aton mga kinahanglanon. Pat-od nga “ini tanan nga butang” mahimo nga tuhay sa gusto naton. Pero ginsilingan kita nga indi mabalaka sa “mga butang nga maukod nga ginatinguhaan nga maagom sang mga pungsod.” Ngaa? Ginlaygayan sang ulihi ni Jesus ang iya mga tagpalamati: “Mag-andam kamo nga ang inyo tagipusuon indi gid mabug-atan sang sobra nga pagkaon kag sobra nga pag-inom kag mga kabalaka sa kabuhi, kag ina nga adlaw magaabot sa inyo sing hinali subong sang siod.”—Luc. 21:34, 35.

8. Ngaa subong na ang tion nga ‘isikway naton ang tagsa ka kabug-atan’?

⁸ Halos kitaon na ang inangan. Kanugon gid kon indi kita makalab-ot sa sini kay kadamo sang aton ginabakintol nga indi man kinahanglanon! Gani maalamon gid ang laygay ni Pablo: “Isa ini ka paagi nga makaganar sing daku, ining diosnon nga debosyon nga may pagkakontento.” (1 Tim. 6:6) Kon sundon naton ang laygay ni Pablo, mas mahapos naton nga madaug ang padya.

“Ang Sala nga Madali Nagasalawid sa Aton”

9, 10. (a) Ano ang ginapatuhuyan sang “sala nga madali nagasalawid sa aton”? (b) Paano ini makasalawid sa aton?

⁹ Dugang pa sa “tagsa ka kabug-atan,” ginsambit man ni Pablo ang pagsikway sa “sala nga madali nagasalawid sa aton.” Ano ini? Ang Griegong tinaga nga ginbadbad nga “madali nagasalawid” sa sini lang nga bersikulo mabasa sa Biblia. Ang iskolar nga si Albert Barnes nagsiling: “Ang manugdalagan wala nagasuksok sing panapton nga mahimo magsabod sa iya mga tiil samtang nagadalagan. Amo man sini ang himuon sang Cristiano, dapat isikway niya ang bisan ano nga makapasalawid sa iya.” Paano makasalawid ang isa ka Cristiano, nga mahimo magguba ukon magpaluya sang iya pagtuo?

¹⁰ Indi insigida nga madula ang pagtuo sang isa ka Cristiano. Mahimo nga amat-amat ini kag indi matalupangdan. Sa una nga bahin sang sulat ni Pablo, nagpaandam sia batok sa katalagman nga “maanod palayo” kag ‘matubuan sang malaut nga tagipusuon nga wala sing pagtuo.’ (Heb. 2:1; 3:12) Kon ang panapton sang manugdalagan magsabod sa iya mga tiil, matumba gid sia. Posible ini matabo kon balewalaon niya ang paandam nga indi magsuksok sang bayo nga puede magsalawid sa iya. Paano niya ini mabalewala? Mahimo wala sia nagahalong ukon sobra sa kompiansa ukon may nawilihan sia. Ano ang aton matun-an sa laygay ni Pablo?

11. Ano ang mahimo makadula sang aton pagtuo?

¹¹ Dapat naton dumdumon nga ang aton mga ginabuhat amo ang mahimo makadula sang aton pagtuo. Parte sa “sala nga madali nagasalawid sa aton,” ang isa ka iskolar nagsiling nga “mas mabaskog ang sala bangod sa aton sitwasyon, kasuguan, kag kaupdanan.” Buot silingon nga may daku nga impluwensia sa aton ang aton palibot, mga kaluyahon, kag mga kaupod. Mahimo sini mapaluya ukon madula ang aton pagtuo.—Mat. 13:3-9.

12. Ano nga pahanumdom ang aton pamatian agod indi madula ang aton pagtuo?

¹² Padayon kita nga ginapahanumdom sang matutom kag mainandamon nga ulipon nga maghalong sa aton ginatan-aw kag ginapamatian, buot silingon, ang aton ginapasulod sa  aton tagipusuon kag hunahuna. Ginpaandaman kita sa katalagman nga masalawid sang pagtinguha sang kuarta kag mga pagkabutang. Mahimo kita mawili sa makagalanyat nga kalingawan ukon sa wala untat nga bag-o nga mga gadyet. Sayop gid nga hunahunaon nga ini nga pahanumdom tuman ka estrikto ukon para lang sa iban, nga daw indi kita apektado sang katalagman. Ang kalibutan ni Satanas nagagamit sing malalangon nga mga pahito agod masalawid kita. Nadula sang iban ang ila pagtuo bangod nangin di-mahalungon sila, sobra ang kompiansa, kag nawili sa mga butang sa kalibutan. Kon matabo ini sa aton, mahimo naton madula ang padya nga kabuhi.—1 Juan 2:15-17.

13. Paano naton maamligan ang aton kaugalingon batok sa makahalalit nga mga impluwensia?

¹³ Kada adlaw, kaupod naton ang mga tawo nga nagapadaku sang mga tulumuron, moral, kag panghunahuna sang kalibutan. (Basaha ang Efeso 2:1, 2.) Apang depende sa aton kon tubtob diin naton sila tugutan nga mag-impluwensia sa aton. Ang “hangin” nga ginsiling ni Pablo makamamatay. Dapat pirme kita magbantay nga indi mapuot kay basi indi naton matapos ang palumba. Ano ang makabulig sa aton nga makapadayon? Mailog naton si Jesus, ang aton himpit kag nagapanguna nga manugdalagan. (Heb. 12:2) Yara man ang halimbawa ni Pablo, kay ginkabig niya ang iya kaugalingon nga lakip sa Cristianong palumba kag ginpalig-on niya ang iya mga masigkatumuluo nga ilugon sia.—1 Cor. 11:1; Fil. 3:14.

“Maagom Ninyo Ini”—Paano?

14. Paano gintamod ni Pablo ang iya pagpakigbahin sa palumba?

¹⁴ Paano gintamod ni Pablo ang iya pagpakigbahin sa palumba? Sa iya katapusan nga pagpakighambal sa mga gulang sa Efeso, sia nagsiling: “Wala ko ginakabig ang akon kalag nga mahal sa akon, agod lamang matapos ko ang akon dalaganon kag ang ministeryo nga akon nabaton kay Ginuong Jesus.” (Binu. 20:24) Handa sia nga isakripisyo ang tanan, lakip ang iya kabuhi, agod matapos ang palumba. Para kay Pablo, wala sing pulos ang tanan niya nga panikasog parte sa maayong balita  kon indi sia makatapos. Apang wala sia magsalig nga sigurado na gid sia nga magdaug. (Basaha ang Filipos 3:12, 13.) Nakasiling lamang sia sini sang madali na lang sia mapatay: “Nakapakig-away na ako sang maayo nga pagpakig-away, nadalagan ko na ang dalaganon tubtob sa katapusan, natuman ko na ang pagtuo.”—2 Tim. 4:7.

15. Paano ginpalig-on ni Pablo ang iya mga masigkamanugdalagan?

¹⁵ Dugang pa, handum gid ni Pablo nga ang iya mga masigka-Cristiano indi mag-untat kundi makatapos sa palumba. Halimbawa, ginpalig-on niya ang mga Cristiano sa Filipos nga mangabudlay sing lakas para sa ila kaluwasan. Dapat sila “padayon nga nagapanguyapot sing hugot sa pulong sang kabuhi.” Sia nagpadayon: “Agod may kabangdanan ako sa paghugyaw sa adlaw ni Cristo, nga wala ako magdalagan sing wala pulos ukon lakas nga magpangabudlay sing wala pulos.” (Fil. 2:16) Ginpalig-on man niya ang mga Cristiano sa Corinto: “Magdalagan kamo sa paagi nga maagom ninyo [ang padya].”—1 Cor. 9:24.

16. Ngaa dapat mangin maathag sa aton ang tulumuron, ukon padya?

¹⁶ Sa malawig nga mga palumba pareho sang maraton, indi dayon makita ang inangan. Apang sa bug-os nga palumba, amo lang sini ang ginahunahuna sang mga nagadalagan. Labi nga nagaathag ini sa iya samtang nagalapit sia. Dapat amo man sini sa aton palumba. Ang tulumuron, ukon padya, dapat mangin matuod sa aton. Makabulig ina agod matigayon naton ang padya.

17. Ano ang papel sang pagtuo para masentro ang igtalupangod sa padya?

¹⁷ Si Pablo nagsulat: “Ang pagtuo amo ang masaligan nga pagpaabot sa mga butang nga ginalauman, ang maathag nga pagpasundayag sang mga katunayan bisan indi makita.” (Heb. 11:1) Sanday Abraham kag Sara handa nga magbiya sa ila komportable nga pagkabuhi kag magpuyo subong “dumuluong sa duta.” Ano ang nakabulig sa ila? “Nakita nila [ang katumanan sang mga saad sang Dios] gikan sa malayo.” Ginsikway ni Moises ang “umalagi nga pagpangalipay sa sala” kag ang mga “bahandi sang Egipto.” Paano sia nakatigayon sang pagtuo kag kabakod nga himuon ini? “Gintulok niya sing maayo ang balos nga padya.” (Heb. 11:8-13, 24-26) Nahangpan naton kon ngaa gin-umpisahan ni Pablo ang paglaragway sining mga tawo sa ekspresyon nga “bangod sa pagtuo.” Nabuligan sila sang pagtuo nga batason ang mga pagtilaw kag kabudlayan kag makita kon ano ang ginahimo sang Dios tungod sa ila kag ang pagahimuon pa niya.

18. Ano ang dapat naton himuon agod masikway ang “sala nga madali nagasalawid sa aton”?

¹⁸ Paagi sa pagpamalandong sa mga tawo sang pagtuo nga ginsambit sa Hebreo kapitulo 11 kag pag-ilog sa ila halimbawa, mapalambo naton ang pagtuo kag masikway ang “sala nga madali nagasalawid sa aton.” (Heb. 12:1) Subong man, “hunahunaon naton ang isa kag isa agod pahulagon sa gugma kag sa maayong mga buhat” paagi sa pagtipon upod sa mga tawo nga pareho sing pagtuo sa aton.—Heb. 10:24.

19. Ano ang masiling mo sa pagsentro sang igtalupangod sa padya?

¹⁹ Malapit na lang matapos ang palumba. Makita na naton ang inangan. Paagi sa pagtuo kag bulig ni Jehova, ‘masikway man naton ang tagsa ka kabug-atan kag ang sala nga madali nagasalawid sa aton.’ Huo, makadalagan kita sa paagi nga matigayon naton ang padya—ang mga pagpakamaayo nga ginsaad sang aton Dios kag Amay, si Jehova.

[Nota]

Madumduman Mo Bala?

• Ano ang nalakip sa pagsikway sang “tagsa ka kabug-atan”?

• Ano ang mahimo makadula sang pagtuo sang isa ka Cristiano?

• Ngaa dapat naton isentro ang aton igtalupangod sa padya?

[Mga Pamangkot sa Pagtinuon]

[Retrato sa pahina 23]

Ano ang “sala nga madali nagasalawid sa aton,” kag paano ini makasalawid sa aton?