May Maayong Balita nga Kinahanglan sang Tanan
May Maayong Balita nga Kinahanglan sang Tanan
“Ang maayong balita; sa katunayan, amo . . . ang gahom sang Dios sa pagluwas.”—ROMA 1:16.
1, 2. Ngaa ginabantala mo ang “maayong balita sang ginharian,” kag ano nga mga punto ang ginapadaku mo?
‘NALIPAY gid ako nga isugid ang maayong balita kada adlaw.’ Mahimo nga nabatyagan ukon nahambal mo man ini. Subong matutom nga Saksi ni Jehova, nakahibalo ka nga importante gid nga ibantala “ining maayong balita sang ginharian.” Mahimo pa gani nga saulado mo ang tagna ni Jesus parte sa sini.—Mat. 24:14.
2 Kon ginabantala mo ang “maayong balita sang ginharian,” ginapadayon mo ang ginsugdan ni Jesus. (Basaha ang Lucas 4:43.) Sigurado ginasugid mo nga sa indi madugay magapasilabot ang Dios sa ginahimo sang mga tawo. Tapuson niya ang butig nga relihion kag ang kalautan paagi sa “dakung kapipit-an.” (Mat. 24:21) Mahimo nga ginapadaku mo man nga ipasag-uli sang Ginharian sang Dios ang Paraiso sa duta agod magluntad ang paghidait kag kalipay. Ang matuod, ang “maayong balita sang ginharian” bahin sang ‘maayong balita nga ginpahayag nga daan kay Abraham, nga amo: “Paagi sa imo pakamaayuhon ang tanan nga pungsod.”’—Gal. 3:8.
3. Ngaa makasiling kita nga ginpadaku gid ni Pablo ang maayong balita sa tulun-an sang Roma?
3 Apang, mahimo bala nga indi naton mapatalupangod ang panguna nga aspekto sang maayong balita nga kinahanglan sang mga tawo? Sa iya sulat sa mga taga-Roma, kaisa lang ginsambit ni apostol Pablo ang tinaga nga “ginharian,” apang 12 ka beses ang ekspresyon nga “maayong balita.” (Basaha ang Roma 14:17.) Ano nga aspekto sang maayong balita ang pirme ginasambit ni Pablo sa sini nga tulun-an? Ngaa importante gid ini? Kag ngaa dumdumon gid naton ini kon nagabantala kita sang “maayong balita sang Dios” sa aton teritoryo?—Mar. 1:14; Roma 15:16; 1 Tes. 2:2.
Ang Kinahanglan sang mga Taga-Roma
4. Ano ang ginbantala ni Pablo sang una niya nga pagkabilanggo sa Roma?
4 Importante gid nga tandaan naton ang mga topiko nga ginpaambit ni Pablo sang una niya nga pagkabilanggo sa Roma. Mabasa naton nga sang ginbisitahan sia sang pila ka Judiyo, ‘nagpanaksi sia sing maid-id tuhoy sa (1) ginharian sang Dios kag naggamit sing makabuluyok nga pangatarungan sa ila tuhoy (2) kay Jesus.’ Ano ang resulta? “Ang pila nagpati sa mga butang nga ginsiling; ang iban indi magpati.” Pagkatapos sini, ‘ginbaton niya sing mainayuhon ang tanan nga nagduaw sa iya, nga nagabantala sa ila sang (1) ginharian sang Dios kag nagapanudlo nahanungod (2) kay Ginuong Jesucristo.’ (Binu. 28:17, 23-31) Ginpatalupangod ni Pablo ang Ginharian sang Dios. Apang ano pa ang iya ginpadaku? Ang sentro sang Ginharian—ang papel ni Jesus sa katuyuan sang Dios.
5. Ano nga kinahanglanon ang ginpadaku ni Pablo sa tulun-an sang Roma?
5 Kinahanglan nga makilala sang tanan si Jesus kag magtuo sa iya. Amo sina ang ginpadaku ni Pablo sa tulun-an sang Roma. Sa una nga bahin sini, nagsulat sia tuhoy sa “Dios, nga sa iya nagahimo ako sang sagrado nga pag-alagad sing bug-os may kaangtanan sa maayong balita tuhoy sa iya Anak.” Nagdugang sia: “Wala ko ginakahuya ang maayong balita; sa katunayan, amo ini ang gahom sang Dios sa pagluwas sa tagsatagsa nga may pagtuo.” Dayon ginpatuhuyan niya ang tion “nga hukman sang Dios paagi kay Cristo Jesus ang likom nga mga butang sang katawhan, suno sa maayong balita nga akon ginapahayag.” Kag nagsugid sia: “Nabantala ko sing bug-os ang maayong balita tuhoy sa Cristo * halin sa Jerusalem kag sa palibot tubtob sa Ilirico.” (Roma 1:9, 16; 2:16; 15:19) Sa banta mo, ngaa ginpadaku gid ni Pablo si Jesucristo sa mga taga-Roma?
6, 7. Paano mahimo nagsugod ang kongregasyon sa Roma kag sin-o ang mga katapo sini?
6 Wala naton mahibaluan kon paano nagsugod ang kongregasyon sa Roma. Ang mga Judiyo ukon mga proselita bala nga nagtambong sang Pentecostes 33 C.E., nangin mga Cristiano na sang nagbalik sila sa Roma? (Binu. 2:10) Ukon ang Cristianong mga negosyante kag manuglakbay bala ang nagpalapnag sang kamatuoran sa Roma? Diin man sa sini, sang ginsulat ni Pablo ang tulun-an sang Roma sang mga 56 C.E., madugay na nga may kongregasyon didto. (Roma 1:8) Sin-o ang mga katapo sang kongregasyon?
7 Ang iban mga Judiyo. Gintamyaw ni Pablo sanday Andronico kag Junias nga “akon mga paryente,” nga mahimo paryente niya nga mga Judiyo man. Ang mag-asawa nga sanday Aquila kag Priscila sa Roma nga manughimo sing tolda, mga Judiyo man. (Roma 4:1; 9:3, 4; 16:3, 7; Binu. 18:2) Apang madamo nga kauturan nga gintamyaw ni Pablo ang mahimo mga Gentil. Ang iban sa ila “yara sa panimalay ni Cesar,” nga buot silingon mga ulipon kag mga opisyal ni Cesar.—Fil. 4:22; Roma 1:6; 11:13.
8. Anong masubo nga sitwasyon ang ginaatubang sang mga taga-Roma?
8 Ang mga Cristiano sa Roma nagaatubang sang masubo nga sitwasyon nga pareho man sa aton. Si Pablo nagsiling: “Ang tanan nakasala kag wala makalab-ot sa himaya sang Dios.” (Roma 3:23) Maathag nga dapat batunon sang tanan nga makabasa sang sulat ni Pablo nga mga makasasala sila, kag kinahanglan nila magtuo sa paagi sang Dios agod malampuwasan ina nga sitwasyon.
Pagkilala nga Makasasala
9. Suno kay Pablo, ano ang posible nga resulta sang maayong balita?
9 Sa una nga bahin sang iya sulat sa Roma, ginpadaku ni Pablo ang makatilingala nga resulta sang maayong balita nga iya pirme ginasambit: “Wala ko ginakahuya ang maayong balita; sa katunayan, amo ini ang gahom sang Dios sa pagluwas sa tagsatagsa nga may pagtuo, una sa Judiyo kag subong man sa Griego.” Huo, posible ang kaluwasan apang kinahanglan ang pagtuo suno sa kamatuoran nga ginkutlo sa Habacuc 2:4: “Ang isa nga matarong—paagi sa pagtuo magakabuhi sia.” (Roma 1:16, 17; Gal. 3:11; Heb. 10:38) Apang ano ang papel sang maayong balita, nga nagadul-ong sa kaluwasan kon “ang tanan nakasala”?
10, 11. Ngaa mahangpan sang iban ang buot silingon sang Roma 3:23, kag ngaa may iban nga indi makahangop sini?
10 Indi mapalambo sang isa ang nagaluwas kabuhi nga pagtuo kon indi niya anay pagbatunon nga makasasala sia. Ini nga ideya indi bag-o sa mga nagapati sa Dios kag sa Biblia. (Basaha ang Manugwali 7:20.) Nagaugyon man sila ukon nagaduhaduha, nahangpan nila ang buot silingon ni Pablo sang sia nagsiling: “Ang tanan nakasala.” (Roma 3:23) Apang sa aton pagministeryo, mahimo kita makasalapo sang mga tawo nga wala makahangop sini.
11 Sa iban nga pungsod, may mga tawo nga wala makahibalo nga nabun-ag sila nga makasasala, nga napanubli nila ini. Mahimo nahibaluan nila nga nagasayop sila, may malain nga kinaiya, kag nagahimo sing malain nga mga butang kag amo man ang iban. Apang bangod sang ila gindak-an, wala nila mahangpan kon ngaa amo sila sina. Ang matuod, sa pila ka lenguahe, kon magsiling ka nga ang isa makasasala, abi sang iban kriminal sia ukon may ginlapas nga kasuguan. Maathag nga ini nga mga tawo indi dayon makahangop sang buot silingon ni Pablo nga makasasala sila.
12. Ngaa madamo ang wala nagapati nga makasasala ang tanan?
12 Bisan sa mga pungsod nga nagapati kay Cristo, madamo ang wala nagapati nga makasasala sila. Ngaa? Kay bisan pa nagasimba sila, abi nila uluistorya lang ang ginasiling sang Biblia parte kanday Adan kag Eva. Ang iban nagdaku nga wala nagapati sa Dios. Bangod sini, indi nila mahangpan nga may Supremo nga Persona nga nagahatag sing moral nga mga talaksan kag ang pagsupak sa sining mga talaksan nagakahulugan sing sala. Gani, kaangay sila sang mga tawo sang unang siglo nga suno kay Pablo ‘wala sing paglaum kag wala sing Dios sa kalibutan.’—Efe. 2:12.
13, 14. (a) Ano ang isa ka rason kon ngaa indi makabalibad ang mga wala nagapati sa Dios kag sa sala? (b) Ano ang kahimtangan sadtong mga wala nagapati?
13 Sa sulat ni Pablo sa Roma, naghatag sia sing duha ka rason kon ngaa halin sadto asta subong, indi puede ibalibad ang gindak-an. Ang una nga rason amo nga ang mga tinuga nagapamatuod nga may Manunuga. (Basaha ang Roma 1:19, 20.) Nagahisanto ini sa sulat ni Pablo sa mga Hebreo sang didto sia sa Roma: “Ang tagsa ka balay may nagtukod, apang sia nga nagtukod sang tanan nga butang amo ang Dios.” (Heb. 3:4) Ini nga argumento magamit man agod pamatud-an nga may Manunuga nga nagtukod, ukon nagpaluntad sang bug-os nga uniberso.
14 Gani, may rason gid si Pablo sang nagsulat sia sa mga taga-Roma nga ang tanan—lakip ang mga Israelinhon sadto—nga nagasimba sa wala sing kabuhi nga mga diosdios “indi makabalibad.” Indi man makabalibad ang mga nagahimo sing imoral nga mga buhat. (Roma 1:22-27) Diri ginbase ni Pablo ang ginsiling niya nga “ang mga Judiyo kag ang mga Griego yara tanan sa idalom sang sala.”—Roma 3:9.
Ang Isa nga “Nagapanaksi”
15. Sin-o ang may konsiensia, kag ano ang epekto sini?
15 Ginapakita man sang tulun-an sang Roma ang ikaduha nga rason kon ngaa dapat batunon sang mga tawo nga makasasala sila kag kinahanglan luwason sa sini nga sitwasyon. Tuhoy sa kasuguan sang Dios sa Israel sadto, si Pablo nagsulat: “Ang tanan nga nakasala sa idalom sang kasuguan pagahukman paagi sa kasuguan.” (Roma 2:12) Ginpadayon niya ang iya argumento paagi sa pagsiling nga ang mga tawo sang pungsod ukon mga tribo nga wala makahibalo sang kasuguan sang Dios “kinaugali nga nagahimo sang mga butang sang kasuguan.” Ngaa ginadili man nila ang incesto, pagpatay, kag pagpangawat? Ginsugid ni Pablo ang rason: May konsiensia sila.—Basaha ang Roma 2:14, 15.
16. Ngaa bisan may konsiensia ang isa, indi ini garantiya nga indi sia makasala?
16 Mahimo nakita mo nga bisan may konsiensia ang isa nga nagapanghikot subong saksi sa sulod niya, indi buot silingon nga ginasunod niya ini. Amo sina ang natabo sa Israel sadto. Bisan pa ang mga Israelinhon may hatag-Dios nga konsiensia kag may mga kasuguan batok sa pagpangawat kag pagpakighilahi, masami nila ginasupak ang ila konsiensia kag ang Kasuguan ni Jehova. (Roma 2:21-23) Doble ang ila sala kag sigurado gid nga makasasala, kay wala nila ginsunod ang mga talaksan kag kabubut-on sang Dios. Ginguba gid sini ang ila kaangtanan sa ila Magbubuhat.—Lev. 19:11; 20:10; Roma 3:20.
17. Ano nga pagpalig-on ang masapwan naton sa tulun-an sang Roma?
17 Ang ginbinagbinag naton sa tulun-an sang Roma nagapakita nga masubo gid ang sitwasyon sang tanan nga tawo, lakip kita, sa atubangan sang Labing Gamhanan. Pero indi lang amo sini ang ginsiling ni Pablo. Ginkutlo niya ang ginhambal ni David sa Salmo 32:1, 2, paagi sa pagsiling: “Malipayon ang mga ginpasaylo sa ila malinapason nga mga buhat kag gintabunan ang ila mga sala; malipayon ang tawo nga ang iya sala indi na pag-isipon ni Jehova.” (Roma 4:7, 8) Huo, naghimo ang Dios sing legal nga paagi agod mapatawad ang aton mga sala.
Maayong Balita nga Nasentro kay Jesus
18, 19. (a) Ano nga aspekto sang maayong balita ang ginpadaku ni Pablo sa mga taga-Roma? (b) Agod matigayon ang mga pagpakamaayo sang Ginharian, ano ang dapat naton kilalahon?
18 Mahimo magsiling ka, “Maayo gid ina nga balita!” Ginapahanumdom sini sa aton ang aspekto sang maayong balita nga ginpadaku ni Pablo sa tulun-an sang Roma. Subong sang nasambit na, si Pablo nagsulat: “Wala ko ginakahuya ang maayong balita; sa katunayan, amo ini ang gahom sang Dios sa pagluwas.”—Roma 1:15, 16.
19 Ining maayong balita nasentro sa papel ni Jesus sa katumanan sang katuyuan sang Dios. Mapaabot ni Pablo ang “adlaw nga hukman sang Dios paagi kay Cristo Jesus ang likom nga mga butang sang katawhan, suno sa maayong balita.” (Roma 2:16) Sa pagsiling sini, wala niya ginapakadiutay ang “ginharian ni Cristo kag sang Dios” ukon ang himuon sang Dios paagi sa Ginharian. (Efe. 5:5) Kundi, ginapakita niya nga agod matigayon naton ang mga pagpakamaayo sang Ginharian sang Dios, dapat naton kilalahon nga (1) makasasala kita sa pagtamod sang Dios kag (2) kon ngaa dapat kita magtuo kay Jesucristo agod mapatawad ang aton mga sala. Kon mahangpan sang isa kag batunon ini nga mga aspekto sang katuyuan sang Dios kag makita niya ang matahom nga paglaum nga ihatag sini, makasiling gid sia, “Maayo gid ina nga balita!”
20, 21. Sa aton ministeryo, ngaa dapat naton dumdumon ang maayong balita nga ginpadaku sa tulun-an sang Roma, kag ano ang posible nga resulta?
20 Dapat gid naton dumdumon ini nga aspekto sang maayong balita kon nagabantala kita. Parte kay Jesus, ginkutlo ni Pablo ang ginsiling ni Isaias: “Wala sing bisan sin-o nga nagapasad sang iya pagtuo sa iya ang malugaw-an.” (Roma 10:11; Isa. 28:16) Ining mensahe indi bag-o sa mga tawo nga pamilyar sa ginasiling sang Biblia parte sa sala. Apang para sa iban, bag-o ini kay wala ini mahibaluan ukon ginapatihan sa ila kultura. Kon ini nga mga tawo magpati na sa Dios kag magsalig sa Kasulatan, dapat naton ipaathag sa ila ang papel ni Jesus. Ipaathag sang masunod nga artikulo kon paano ginpasangkad sa Roma kapitulo 5 ini nga aspekto sang maayong balita. Ang imo matun-an sa sini magamit mo sa imo ministeryo.
21 Makalilipay gid ang pagbulig sa mga interesado nga mahangpan ang maayong balita nga sulitsulit nga ginasambit sa tulun-an sang Roma, ang maayong balita nga ‘sa katunayan, amo ang gahom sang Dios sa pagluwas sa tagsatagsa nga may pagtuo.’ (Roma 1:16) Magluwas nga padyaan kita, makita pa naton ang pag-ugyon sang iban sa pinamulong ni Pablo sa Roma 10:15: “Daw ano katahom sang mga tiil sang mga nagapahayag sang maayong balita tuhoy sa maayo nga mga butang!”—Isa. 52:7.
[Nota]
^ par. 5 Ini nga mga ekspresyon makita man sa iban nga inspirado nga tulun-an.—Mar. 1:1; Binu. 5:42; 1 Cor. 9:12; Fil. 1:27.
Madumduman Mo Bala?
• Ano nga aspekto sang maayong balita ang ginapadaku sa tulun-an sang Roma?
• Ano nga kamatuoran ang dapat naton ipahangop sa iban?
• Paano mangin pagpakamaayo sa aton kag sa iban ang “maayong balita tuhoy sa Cristo”?
[Mga Pamangkot sa Pagtinuon]
[Blurb sa pahina 8]
Ang maayong balita nga ginpadaku sa tulun-an sang Roma nagalakip sang importante nga papel ni Jesus sa katuyuan sang Dios
[Retrato sa pahina 9]
Tanan kita nabun-ag nga may makamamatay nga depekto—ang sala!
