Magsalig kay Jehova Samtang Nagahilapit ang Katapusan

“Magsalig kamo kay Jehova sa tanan nga tion.”—ISA. 26:4, NW.

1. Ano ang kinatuhayan sang mga alagad sang Dios kag sang mga tawo sa kalibutan?

MINILYON ka tawo sa karon ang wala na nakahibalo kon sin-o ang ila dapat saligan, ayhan bangod pila na ka beses nga naguba ang ila pagsalig. Tuhay gid ang mga alagad ni Jehova! May ihibalo sila gikan sa Dios kag nahangpan nila nga indi sila dapat magsalig sa sini nga kalibutan ukon “sa mga dungganon.” (Sal. 146:3, NW) Ginatugyan nila ang ila kabuhi kag palaabuton kay Jehova kay nakahibalo sila nga ginahigugma niya sila kag ginatuman gid niya ang iya Pulong.—Roma 3:4; 8:38, 39.

2. Paano ginpamatud-an ni Josue nga masaligan gid ang Dios?

² Si Josue nagpamatuod nga masaligan gid ang  Dios. Sang tigulang na sia, ginsilingan niya ang iya mga masigka-Israelinhon: “Nakahibalo kamo sa bug-os ninyo nga mga tagiposoon kag sa bug-os ninyo nga mga kalag, nga wala sing isa ka butang nga nakulang sa tanan nga butang nga maayo nga ginpamolong nahanungud sa inyo sang GINOO nga inyo Dios; ang tanan nahanabu sa inyo.”—Jos. 23:14.

3. Ano ang ginasugid sang ngalan sang Dios tuhoy sa iya?

³ Ginatuman ni Jehova ang iya mga saad indi lamang bangod ginahigugma niya ang iya mga alagad kundi ilabi na tungod sa iya ngalan. (Ex. 3:14; 1 Sam. 12:22) Ang introduksion sang The Emphasized Bible, ni J. B. Rotherham, nagsiling tuhoy sa ngalan sang Dios: “Isa [ini] ka dalayawon nga saad; ang ikasarang sang Dios nga magpasibu sa bisan ano nga kahimtangan, kabudlayan, kinahanglanon . . . Isa [ini] ka saad, . . . isa ka pagpahayag, isa ka handumanan, isa ka pangako. Mangin matutom gid ang Dios sa sini nga Ngalan; indi gid Sia mahuy-an sa pagdala sini.”

4. (a) Ano ang ginapalig-on sa aton sang Isaias 26:4? (b) Ano ang binagbinagon naton sa sini nga artikulo?

⁴ Pamangkuta ang imo kaugalingon: ‘Kilala ko gid bala si Jehova amo nga nagasalig ako sa iya sing bug-os? Masanag bala ang akon palaabuton bangod nahibaluan ko nga ang Dios amo ang may kontrol?’ Ang Isaias 26:4 (NW) nagasiling: “Magsalig kamo kay Jehova sa tanan nga tion, kay si Jah Jehova amo ang Igang sa walay katubtuban.” Huo, ang Dios wala na karon nagapasilabot sa mga tawo paagi sa milagro kaangay sa ginhimo niya sang panahon sang Biblia. Apang, subong “ang Igang sa walay katubtuban,” masaligan naton sia “sa tanan nga tion.” Paano ginabuligan sang Dios ang iya matutom nga mga sumilimba sa karon? Binagbinagon naton ang tatlo ka paagi: Ginapabakod niya kita sa pagbato sa pagsulay kon mangayo kita sing bulig sa iya, ginapalig-on niya kita kon wala kita ginasapak sang mga tawo ukon direkta nga ginapamatukan, kag ginahatagan niya kita sang kusog kon madamo kita sang ginakabalak-an. Samtang ginabinagbinag naton ang kada isa sa sini, pamalandungi kon paano mo mapabakod ang imo pagsalig kay Jehova.

Kon Ginasulay sa Paghimo sang Sala

5. Sa ano labi nga matilawan ang aton pagsalig sa Dios?

⁵ Mahapos lang magsalig kay Jehova kon tuhoy sa iya saad nga Paraiso ukon pagkabanhaw—mga butang nga aton ginakalangkagan. Apang mas mabudlay magsalig sa iya kon tuhoy sa moral nga mga talaksan, nga mangin kumbinsido sa aton tagipusuon nga ang pagsunod sa iya mga talaksan husto kag amo ang nagahatag sang matuod nga kalipay. Si Hari Solomon naglaygay: “Salig sa GINOO sa bug-os mo nga tagiposoon, kag dili magsandig sa imo kaugalingon nga paghangup. Sa tanan mo nga dalanon kilalaha sia, kag magatuytuy sia sa imo mga banas.” (Hulu. 3:5, 6) Talupangda nga ginsambit ang mga tinaga nga “dalanon” kag “mga banas.” Huo, dapat naton ipakita nga nagasalig kita sa Dios indi lamang kon tuhoy sa aton Cristianong paglaum kundi sa aton bug-os nga pagkabuhi. Paano naton mapakita ina nga pagsalig kon makaatubang kita sang mga pagsulay?

6. Paano naton mapabakod ang aton determinasyon nga isikway ang malain nga panghunahuna?

⁶ Ang paglikaw sa malain nagasugod sa hunahuna. (Basaha ang Roma 8:5; Efeso 2:3.) Gani,  paano mo mapabakod ang imo determinasyon nga isikway ang malain nga panghunahuna? Binagbinaga ining lima ka paagi: 1. Mangayo sing bulig sa Dios paagi sa pangamuyo. (Mat. 6:9, 13) 2. Pamalandungi ang mga halimbawa sa Biblia sang mga nagpamati kay Jehova kag sang mga wala nagpamati sa iya kag talupangda kon ano ang nangin resulta. * (1 Cor. 10:8-11) 3. Binagbinaga ang halit nga matuga sang sala sa imo hunahuna kag balatyagon kag amo man sa imo mga pinalangga. 4. Hunahunaa kon ano ang batyagon sang Dios kon ang iya alagad maghimo sang mabug-at nga sala. (Basaha ang Salmo 78:40, 41.) 5. Handurawa ang kalipay ni Jehova kon makita niya nga ginasikway sang iya matutom nga alagad ang malain kag ginahimo kon ano ang husto, sa publiko man ukon sa pribado. (Sal. 15:1, 2; Hulu. 27:11) Mapakita mo man nga nagasalig ka kay Jehova.

Kon Wala Ginasapak kag Ginapamatukan

7. Ano nga mga pagtilaw ang naatubang ni Jeremias, kag ano ang ginbatyag niya kon kaisa?

⁷ Madamo nga kauturan ang nagaalagad sa mabudlay gid nga mga teritoryo. Si manalagna Jeremias nag-alagad sa amo sina anay nga kahimtangan—sa magamo nga ginharian sang Juda sang malapit na ini laglagon. Adlaw-adlaw nga ginatilawan ang iya pagsalig kay Jehova samtang ginapahayag niya ang mensahe sang paghukom sang Dios. Nag-abot pa gani sa punto nga bisan ang iya mainunungon nga sekretaryo nga si Baruc nakabatyag sing kalapyo. (Jer. 45:2, 3) Ginluyahan man bala sing buot si Jeremias? Huo, may mga tion nga naluyahan man sia. “Pinakamalaut ang adlaw nga natawo ako!” tuaw niya. “Ngaa bala naggowa ako sa tiyan sa pagtan-aw sang kabudlayan kag sang kasubo, nga ang akon mga adlaw maubus sa kahuya?”—Jer. 20:14, 15, 18.

8, 9. Nahisuno sa Jeremias 17:7, 8 kag Salmo 1:1-3, ano ang dapat naton himuon agod padayon kita nga makapamunga?

⁸ Apang, si Jeremias wala nangampo. Padayon sia nga nagsalig kay Jehova. Subong resulta, naeksperiensiahan niya ang katumanan sang pinamulong ni Jehova nga narekord sa Jeremias 17:7, 8: “Bulahan ang tawo nga nagasalig sa GINOO, nga ang iya pagsalig amo ang GINOO. Kay manginsubong sia sang kahoy nga natanum sa luyo sang mga tubig, nga nagapakalapkap sang iya mga gamut sa ubay sang suba, kag indi mahadluk kon mag-abut ang kainit, kay ang iya dahon manginhilaw, kag indi maghimud-os sa tuig sang tingadlaw, kay indi mag-untat sa pagpamunga.”

⁹ Kaangay sang madabong nga kahoy nga “natanum sa luyo sang mga tubig” ukon sa natubigan nga katamnan, si Jeremias ‘wala gid nag-untat sa pagpamunga.’ Wala sia nagpaimpluwensia sa mga nagayaguta sa iya. Sa baylo, nagpabilin sia sa Tuburan sang nagahatag-kabuhi nga “tubig” kag gintuman ang tanan nga ginsiling ni Jehova sa iya. (Basaha ang Salmo 1:1-3; Jer. 20:9) Isa gid ka maayo nga halimbawa si Jeremias para sa aton, ilabi na sa mga nagaalagad sa mabudlay nga mga teritoryo! Kon amo man sina ang imo kahimtangan, padayon ka nga magsandig kay Jehova kay buligan ka niya nga makabatas samtang ‘ginapahayag mo sing dayag ang iya ngalan.’—Heb. 13:15.

10. Ano nga mga pagpakamaayo ang aton natigayon, kag ano ang dapat naton ipamangkot sa aton kaugalingon?

¹⁰ Agod makabatas kita sa sining katapusan nga mga adlaw, ginahatagan kita ni Jehova sang bugana nga espirituwal nga bulig. Nalakip sa sini ang kompleto nga Pulong sang Dios nga sibu nga ginbadbad sa madamo nga lenguahe. Nag-aman sia sang bugana kag suno sa tion nga espirituwal nga pagkaon paagi sa matutom kag mainandamon nga ulipon. Kag ginhatagan niya kita sang makapalig-on nga mga kauturan nga makaupod naton sa tion sang mga miting kag mga asembleya. Ginapanginpuslan mo bala sing bug-os ini nga mga aman? Ang tanan nga nagahimo sini “magaamba sa kalipay sang tagiposoon.” Apang ang mga wala nagapamati sa Dios “magahibi sa kasubo sang tagiposoon, kag magahaya sa kagamo sang espiritu.”—Isa. 65:13, 14.

Kon Nagaatubang sa mga Kabalaka

11, 12. Bangod sa mga problema sa kalibutan, ano ang maalamon nga himuon naton?

¹¹ Subong sang gintagna, naeksperiensiahan  sang mga tawo sa karon ang nagabaha nga kailo. (Mat. 24:6-8; Bug. 12:12) Kon may literal nga baha, kinaandan na nga ang mga tawo nagasaka sa mga atop ukon nagapalagyo sa bisan ano nga mataas nga lugar. Sing kaanggid, samtang nagadamo ang problema sang kalibutan, minilyon ang nagadangop sa ginakabig sang mga tawo nga mataas nga lugar—ang pinansial, pulitikal, ukon relihioso nga mga institusyon, subong man sa siensia kag teknolohiya. Apang wala sang bisan isa sa sini ang makahatag sing matuod nga kalig-unan. (Jer. 17:5, 6) Sa pihak nga bahin, ang mga alagad ni Jehova may yara masaligan nga dalangpan—“ang Igang sa walay katubtuban.” (Isa. 26:4, NW) Ang salmista nagsiling: “[Si Jehova] ang akon igang kag akon kaluwasan, sia ang akon mataas nga torre.” (Basaha ang Salmo 62:6-9.) Paano kita makadangop sa sini nga Igang?

¹² Nagadangop kita kay Jehova kon ginatuman naton ang iya Pulong, nga sa masami tuhay sa tawhanon nga kaalam. (Sal. 73:23, 24) Halimbawa, ang mga tawo nga naimpluwensiahan sang tawhanon nga kaalam mahimo magsiling: ‘Makaisa ka lang mabuhi; pagustuhi ang imo kaugalingon.’ ‘Kuha ka sang maayo nga kurso.’ ‘Padamua ang imo kuarta.’ ‘Bakla ini, bakla ina.’ ‘Maglakbay; libuta ang kalibutan.’ Sa pihak nga bahin, makita ang diosnon nga kaalam sa sini nga laygay: “Ang mga nagagamit sang kalibutan [mangin] subong sang mga wala nagagamit sini sing bug-os; kay ang danyag sini nga kalibutan nagabag-o.” (1 Cor. 7:31) Sing kaanggid, ginapalig-on kita ni Jesus nga unahon pirme ang intereses sang Ginharian agod makatipon kita sang “mga bahandi sa langit,” nga amo ang magapabilin sing dayon.—Mat. 6:19, 20.

13. Base sa 1 Juan 2:15-17, ano ang dapat naton ipamangkot sa aton kaugalingon?

¹³ Ang imo bala panimuot sa “kalibutan” kag sa “mga butang sa kalibutan” nagapakita nga bug-os ang imo pagsalig sa Dios? (1 Juan 2:15-17) Mas importante bala sa imo ang espirituwal nga mga manggad kag pribilehiyo sa pag-alagad sangsa mga butang nga ginatanyag sang kalibutan? (Fil. 3:8) Ginatinguhaan mo bala nga mahuptan ang ‘simple nga mata’? (Mat. 6:22) Siempre pa, indi luyag sang Dios nga patumbayaan mo ang imo pamilya. (1 Tim. 5:8) Apang nagapaabot sia nga magsalig ka sing bug-os sa iya—indi sa nagatagumatayon nga kalibutan ni Satanas.—Heb. 13:5.

14-16. Paano nakabenepisyo ang pila sa paghupot sang ‘simple nga mata’ kag sa pag-una sang intereses sang Ginharian?

¹⁴ Binagbinaga ang halimbawa nanday Richard kag Ruth nga may tatlo ka kabataan. “Nabatyagan ko nga madamo pa ako sang sarang mahimo para kay Jehova,” siling ni Richard. “Maayo ang amon pangabuhi apang diutay lang nga tion ang ginahatag ko sa Dios. Sa tapos namon ini mapangamuyo kag mabinagbinag, nagdesisyon kami ni Ruth nga mangabay ako sa akon superbisor nga kon puede apat ka adlaw na lang ako nga magtrabaho kada semana—bisan pa yara sa krisis ang amon pungsod. Ginpasugtan ako, kag isa na ka bulan nga amo sini ang akon iskedyul.” Ano na karon ang ginabatyag ni Richard?

¹⁵ “Nagnubo sing 20 porsiento ang akon sueldo,” siling niya, “apang may ekstra na ako nga 50 ka adlaw sa isa ka tuig nga makaupod ko ang akon pamilya kag mahanas ang akon kabataan. Doble na ang akon tion sa pag-alagad sa latagon, tatlo na ka pilo ang kadamuon sang akon ginatun-an sa Biblia, kag madamo na ako sing tion para sa kongregasyon. Kag bangod may tion na ako para sa kabataan, makaauxiliary payunir na  si Ruth sa pulupanag-on. Determinado ako nga huptan ini nga iskedyul tubtob posible.”

¹⁶ Sanday Roy kag Petina nga may anak nga wala pa sing pangabuhi, nagbuhin sang ila tion para sa sekular nga trabaho agod makaalagad sing bug-os tion. “Tatlo na lang ka adlaw ang akon trabaho kada semana,” siling ni Roy, “kag duha ka adlaw na lang ang kay Petina. Nagsaylo man kami sa apartment nga mas mahapos imentinar. Mga payunir na kami antes makatigayon sang mga anak, kag wala gid nadula ang amon handum nga magpayunir. Gani sang nagdalagku na ang amon kabataan, nagbalik kami sa bug-os tion nga pag-alagad. Indi gid mabayluhan sang kuarta ang mga pagpakamaayo nga amon nabaton.”

Tuguti “ang Paghidait sang Dios” nga Mag-amlig sa Imo Tagipusuon

17. Paano ka napalig-on sang Kasulatan bisan pa nagakabuhi ka sa kalibutan nga wala sing kasiguruhan?

¹⁷ Wala kita nakahibalo kon ano ang matabo buas, kay “ang tion kag ang wala ginapaabot nga hitabo nagakatabo” sa aton tanan. (Man. 9:11, NW) Apang, indi kita dapat madulaan sang kalinong sa hunahuna bangod lamang wala naton nahibaluan kon ano ang matabo buas, kaangay sang ginabatyag sang mga tawo nga wala sing suod nga kaangtanan sa Dios. (Mat. 6:34) Si apostol Pablo nagsulat: “Indi kamo magkabalaka sa bisan ano nga butang, kundi sa tanan nga butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay; kag ang paghidait sang Dios nga nagalabaw sa tanan nga panghunahuna magabantay sang inyo tagipusuon kag sang inyo ikasarang sa paghunahuna.”—Fil. 4:6, 7.

18, 19. Paano kita ginapalig-on sang Dios? Iilustrar.

¹⁸ Madamo nga kauturan ang nakabatyag sang nasulod nga kalinong kag paghidait gikan kay Jehova sang nag-atubang sila sang mabudlay nga mga kahimtangan. Ang isa ka utod nga babayi nagsiling: “Sulitsulit ako nga ginapilit sang doktor nga magpatughong sang dugo. ‘Nag-anuano ka imo ngaa indi ka magpatughong sang dugo?’ ang una niya nga ‘tamyaw’ sa akon. Sulitsulit ako nga nangamuyo kay Jehova, kag nakabatyag ako sang nasulod nga kalinong. Nangin mabakod ako kaangay sang igang. Bisan pa maluya ako bangod kulang ako sa dugo, napaathag ko sing maayo ang akon Makasulatanhon nga tindog.”

¹⁹ Kon kaisa, ang Dios nagaaman sing bulig paagi sa aton mga kauturan ukon paagi sa espirituwal nga pagkaon sa nagakaigo nga tion. Mahimo nakabati ka sang isa ka utod nga nagsiling: “Amo gid ini nga artikulo ang kinahanglan ko. Ginsulat gid ini para sa akon!” Huo, bisan ano man ang aton kahimtangan ukon kinahanglanon, pamatud-an gid ni Jehova ang iya gugma sa aton kon magsalig kita sa iya. Isa pa, “mga karnero” niya kita, kag ginatawag kita sa iya ngalan.—Sal. 100:3; Juan 10:16; Binu. 15:14, 17.

20. Ngaa ang mga alagad ni Jehova magapuyo sing malig-on kon laglagon na ang kalibutan ni Satanas?

²⁰ Sa nagahilapit nga “adlaw sang kasingkal sang GINOO,” ang tanan nga butang nga ginasaligan sang kalibutan ni Satanas pagalaglagon. Ang bulawan, pilak, kag ang iban pa nga bilidhon nga mga butang indi makahatag sing kalig-unan. (Sof. 1:18; Hulu. 11:4) Ang lamang nga dalangpan amo ang aton “Igang sa walay katubtuban.” (Isa. 26:4, NW) Gani ipakita naton karon ang aton bug-os nga pagsalig kay Jehova paagi sa pagtuman sa iya matarong nga mga dalanon, paagi sa pagpahayag sang mensahe sang Ginharian bisan pa wala kita ginasapak ukon ginapamatukan, kag paagi sa pagtugyan sang aton tanan nga kabalaka sa iya. Kon himuon naton ini, pat-od gid nga “magapuyo [kita] sing malig-on kag magamalinong, sa wala sing kahadluk sa malaut.”—Hulu. 1:33.

[Nota]

Mapaathag Mo Bala?

Paano naton mapakita nga nagasalig kita sa Dios

• kon ginasulay sa paghimo sang sala?

• kon wala ginasapak ukon ginapamatukan?

• kon nagaatubang sa mga kabalaka?

[Mga Pamangkot sa Pagtinuon]

[Retrato sa pahina 13]

Ang pagsunod sa mga talaksan sang Dios nagadul-ong sa kalipay

[Retrato sa pahina 15]

Si “Jehova amo ang Igang sa walay katubtuban”