Mga Pamangkot Gikan sa mga Bumalasa

Ngaa naakig si Moises sa mga anak ni Aaron nga sanday Eleazar kag Itamar sa tapos napatay ang ila mga utod nga sanday Nadab kag Abihu, kag paano nadula ang iya kaakig?—Lev. 10:16-20.

Wala madugay sa tapos matukod ang kahimusan sang pagkasaserdote, ginpatay ni Jehova ang mga anak ni Aaron nga sanday Nadab kag Abihu bangod naghalad sila sa atubangan Niya sing kalayo nga di-balaan. (Lev. 10:1, 2) Ginsilingan ni Moises ang nabilin nga mga anak ni Aaron nga indi maglalaw sa ila napatay nga mga utod. Apang, naakig si Moises kay Eleazar kag kay Itamar bangod wala nila ginkaon ang kanding nga halad-tungud-sa-sala. (Lev. 9:3) Ngaa amo sini ang reaksion ni Moises?

Suno sa kasuguan nga ginhatag ni Jehova kay Moises, dapat kaunon sang naghalad nga saserdote ang bahin sang halad-tungud-sa-sala sa luwang sang layanglayang nga tilipunan. Sa paghimo sina, ginapakita niya nga sia ang manabat sa mga sala sadtong mga naghalad. Apang, kon ang dugo sang halad gindala na sa Balaan nga Duog nga amo ang una nga hulot sang santuaryo, ang halad indi na dapat pagkaunon. Sa baylo, dapat ini sunugon.—Lev. 6:24-26, 30.

Ginapakita sini nga sa tapos sadto nga trahedya, luyag ni Moises nga mapat-od nga ang tanan nga sugo ni Jehova matuman. Sang nahibaluan niya nga ginsunog na ang kanding nga halad-tungud-sa-sala, naakig sia kag ginpamangkot sanday Eleazar kag Itamar kon ngaa wala nila ginkaon ang halad, kay ang dugo sini wala man gindala sa atubangan ni Jehova sa Balaan nga Duog.—Lev. 10:17, 18.

Si Aaron amo ang nagsabat kay Moises, kay sia ang nagpahanugot sa ginhimo sining nabilin nga mga saserdote. Bangod sa kamatayon sang iya duha ka anak, mahimo nga nagduhaduha si Aaron kon bala nagakaigo pa nga kaunon sang mga saserdote ang halad-tungud-sa-sala sina nga adlaw. Ayhan nagbatyag sia nga ang ila pagkaon sini indi makapahamuot kay Jehova, bisan pa wala sila sing labot sa sala nga ginhimo nanday Nadab kag Abihu.—Lev. 10:19.

Mahimo nangatarungan si Aaron nga sang nag-umpisa ang iya pamilya sa pagtuman sang ila hilikuton subong saserdote, nagahalong gid sila nga masunod bisan ang pinakagamay nga detalye agod mapahamut-an ang Dios. Apang, ang ngalan ni Jehova ginpakahuy-an nanday Nadab kag Abihu, gani nagdabdab ang kaakig sang Dios batok sa ila. Bangod sini, mahimo naghunahuna si Aaron nga indi nagakaigo nga magkaon sang balaan nga halad ang katapo sang pamilya sang saserdote nga nakasala.

Mahimo nga ginbaton ni Moises ang sabat sang iya utod, kay ang teksto nagasiling: “Sang nabatian ina ni Moises, nagpahamuut ini sa iya.” (Lev. 10:20) Maathag nga nahamuot man si Jehova sa sabat ni Aaron.