Paano Kita Dapat Makig-angot sa Iban?

“Ang luyag ninyo nga himuon sang mga tawo sa inyo, himua man ninyo ini sa ila.”​—LUC. 6:31.

1, 2. (a) Ano ang Sermon sa Bukid? (b) Ano ang binagbinagon naton sa sini kag sa masunod nga artikulo?

SI Jesucristo amo gid ang Daku nga Manunudlo. Sang ginpadakop sia sang iya mga kaaway, nagbalik ang mga madakop tani sa iya nga wala madala si Jesus. Nagsiling sila: “Wala pa gid sing tawo nga nakahambal kaangay sini.” (Juan 7:32, 45, 46) Ang Sermon sa Bukid amo ang isa sa talalupangdon nga pamulongpulong ni Jesus. Mabasa ini sa kapitulo 5 tubtob 7 sang Ebanghelyo ni Mateo, kag ang kaanggid sini nga impormasyon mabasa sa Lucas 6:20-49. *

² Ayhan ang pinakabantog nga dinalan sa sini nga sermon amo ang ginatawag sang kalabanan nga Bulawanon nga Talaksan. May kaangtanan ini sa aton pagpakig-angot sa iban. “Ang luyag ninyo nga himuon sang mga tawo sa inyo, himua man ninyo ini sa ila,” siling ni Jesus. (Luc. 6:31) Naghimo si Jesus sing maayo para sa mga tawo. Gin-ayo niya ang mga masakiton kag ginbanhaw pa gani ang mga patay. Apang, nakabenepisyo pa gid ining mga tawo sang ginbaton nila ang maayong balita nga gintudlo ni Jesus sa ila. (Basaha ang Lucas 7:20-22.) Nalipay man kita nga mga Saksi ni Jehova nga makigbahin sa pagbantala sang Ginharian. (Mat. 24:14; 28:19, 20) Binagbinagon naton sa sini kag sa masunod nga artikulo ang mga pinamulong ni Jesus tuhoy sa sining hilikuton kag ang iban pa nga mga topiko sa Sermon sa Bukid may kaangtanan sa kon paano kita dapat makig-angot sa iban.

Mangin Malulo

3. Ano ang kalulo?

³ Si Jesus nagsiling: “Malipayon ang mga malulo, kay magapanubli sila sang duta.” (Mat. 5:5) Ginapakita sang Kasulatan nga ang kalulo wala sing kaangtanan sa kaluyahon. Kundi isa ini ka kalmado nga panimuot nga luyag sang Dios nga ipakita naton. Makita ini sa aton pagpakig-angot sa iban. Halimbawa, ‘wala kita nagabalos sing malaut sa malaut kay bisan sin-o.’​—Roma 12:17-19.

4. Ngaa malipayon ang mga malulo?

⁴ Ang mga malulo malipayon bangod “magapanubli sila sang duta.” Si Jesus nga “malulo kag mapainubuson sing tagipusuon” amo ang panguna nga Manunubli sang duta bangod sia ang ‘gintangdo nga magapanubli sang tanan nga butang.’ (Mat. 11:29; Heb. 1:2; Sal. 2:8) Gintagna sang Biblia nga may kaupod nga gumalahom sa langitnon nga Ginharian ang Mesianikong “anak sang tawo.” (Dan. 7:13, 14, 21, 22, 27) Ang 144,000 ka malulo nga mga hinaplas magapanubli man sang duta bangod “kaupod [sila] nga mga manunubli ni Cristo.” (Roma 8:16, 17; Bug. 14:1) Ang iban nga mga malulo magakabuhi sing walay katapusan sa dutan-on nga bahin sang Ginharian.​—Sal. 37:11.

5. Ano ang epekto sa aton kon mangin malulo kita kaangay ni Jesus?

⁵ Kon matigdas kita ukon mapintas mahimo indi kita maluyagan sang iban ukon magapalayo pa gani sila sa aton. Apang kon malulo kita kaangay ni Cristo mapalig-on naton ang iban kag mahapos nila kita palapitan. Ang kalulo bunga sang aktibo nga puersa sang Dios nga mapabanaag naton kon ‘nagakabuhi kita kag nagalakat suno sa espiritu.’ (Basaha ang Galacia 5:22-25.) Pat-od gid nga luyag naton nga mangin isa sa mga malulo nga tawo nga ginatuytuyan sang balaan nga espiritu sang Dios!

Malipayon Gid ang mga Maluluy-on!

6. Ano ang mga kinaiya sang “maluluy-on” nga tawo?

⁶ Sa iya Sermon sa Bukid, si Jesus nagsiling:  “Malipayon ang mga maluluy-on, kay pakitaan sila sing kaluoy.” (Mat. 5:7) “Ang mga maluluy-on” mainawaon kag nagapakita sing konsiderasyon sa mga kubos. Gin-ayo ni Jesus ang mga masakiton bangod “naluoy” sia ukon “napahulag sang kaluoy” sa ila. (Mat. 14:14; 20:34) Gani, ang kaluoy kag konsiderasyon dapat magpahulag sa aton nga buligan ang iban.​—Sant. 2:13.

7. Bangod naluoy si Jesus sa mga tawo, ano ang iya ginhimo?

⁷ Bisan pa luyag na tani ni Jesus nga magpahuway, ginpaiway niya ini kay sang maabtan niya ang daku nga kadam-an “napahulag sia sang kaluoy sa ila, bangod subong sila sang mga karnero nga wala sing manugbantay.” Gani, “nagpanudlo sia sa ila sang madamo nga butang.” (Mar. 6:34) Mangin malipayon man kita kon ipaambit naton sa iban ang mensahe sang Ginharian kag isugid sa ila kon daw ano ka maluluy-on ang Dios.

8. Ngaa malipayon ang mga maluluy-on?

⁸ Malipayon ang mga maluluy-on kay pakitaan man sila sing “kaluoy.” Kon kaluuyan naton ang mga tawo, sa masami kaluuyan man nila kita. (Luc. 6:38) Si Jesus nagsiling pa: “Kon patawaron ninyo ang mga tawo sang ila mga paglapas, ang inyo langitnon nga Amay magapatawad man sa inyo.” (Mat. 6:14) Busa, malipayon ang mga maluluy-on kay sila lamang ang kahamut-an kag patawaron sang Dios.

Kon Ngaa Malipayon ang mga “Makihidaiton”

9. Ano ang himuon naton kon mahidaiton kita?

⁹ Ginhinambitan ni Jesus ang isa pa ka rason agod mangin malipayon sang magsiling sia: “Malipayon ang mga makihidaiton, kay tawgon sila nga ‘mga anak sang Dios.’” (Mat. 5:9) Kon mahidaiton kita, indi kita mag-entra ukon indi naton pagkunsintihon ang mapasipalahon nga paghambalanay nga mahimo bangdan sang ‘pagbulag sang mahirup nga mga abyan.’ (Hulu. 16:28) Sa pulong man ukon sa buhat, dapat mangin mahidaiton kita sa mga tawo sa sulod kag sa gua sang Cristianong kongregasyon. (Heb. 12:14) Dapat manikasog gid kita nga mangin mahidaiton agod matigayon naton ang maayo nga kaangtanan kay Jehova nga Dios.​—Basaha ang 1 Pedro 3:10-12.

10. Ngaa malipayon ang mga “makihidaiton”?

¹⁰ Si Jesus nagsiling nga malipayon ang mga “makihidaiton, kay tawgon sila nga ‘mga anak sang Dios.’” Bangod nagatuo ang mga hinaplas nga mga Cristiano kay Jesus subong ang Mesias, nakabaton sila sang “kinamatarong nga mangin mga anak sang Dios.” (Juan 1:12; 1 Ped. 2:24) Kamusta naman ang mahidaiton nga “iban nga mga karnero” ni Jesus? Si Jesus mangin ila “Dayon nga Amay” sa sulod sang iya Isa ka Libo ka Tuig nga Paggahom upod sa masigkamanunubli niya sa langit. (Juan 10:14, 16; Isa. 9:6, NW; Bug. 20:6) Sa tapos sang iya Milenyo nga Paggahom, ining mahidaiton nga mga tawo mangin matuod nga mga anak sang Dios sa duta.​—1 Cor. 15:27, 28.

11. Paano naton pakig-angutan ang iban kon magpatudlo kita sa “kaalam nga gikan sa hitaas”?

¹¹ Agod mangin suod kita kay Jehova, “ang Dios sang paghidait,” dapat naton ilugon ang iya mga kinaiya lakip na ang pagkamahidaiton. (Fil. 4:9) Kon magpatudlo kita sa “kaalam nga gikan sa hitaas,” mapahulag kita nga pakig-angutan  ang iban sing mahidaiton. (Sant. 3:17) Sa amo, mangin malipayon kita.

“Paiwaga ang Inyo Kapawa”

12. (a) Ano ang ginsiling ni Jesus tuhoy sa espirituwal nga kapawa? (b) Paano naton mapaiwag ang aton kapawa?

¹² Ang pinakamaayo nga paagi sa pagpakig-angot sa mga tawo amo ang pagbulig sa ila nga makabaton sing espirituwal nga kapawa gikan sa Dios. (Sal. 43:3) Ginsilingan ni Jesus ang iya mga disipulo nga sila “ang kapawa sang kalibutan” kag ginpalig-on niya sila nga paiwagon ang ila kapawa agod makita sang mga tawo ang ila “maayong mga buhat.” Kon himuon nila ini mahangpan “sang mga tawo” ang kamatuoran kag makabenepisyo ang katawhan. (Basaha ang Mateo 5:14-16.) Mapaiwag man naton karon ang aton kapawa paagi sa paghimo sing maayo sa aton isigkatawo kag sa pagbantala sing maayong balita “sa bug-os nga kalibutan,” buot silingon, “sa tanan nga pungsod.” (Mat. 26:13; Mar. 13:10) Isa gid ini ka daku nga pribilehiyo!

13. Ngaa madali kita matalupangdan sang mga tawo?

¹³ “Ang siudad indi matago kon nahamtang sa ibabaw sang bukid,” siling ni Jesus. Ang siudad nga yara sa ibabaw sang bukid madali makita. Sing kaanggid, madali man kita matalupangdan subong mga manugbantala sang Ginharian bangod sa aton maayong mga buhat kag mga kinaiya subong sang pagkamakatarunganon kag pagkaputli.​—Tito 2:1-14.

14. (a) Ilaragway ang suga sang unang siglo. (b) Ngaa indi naton dapat pag-ibutang sa idalom sang “sulukban” ang aton espirituwal nga kapawa?

¹⁴ Nagsiling si Jesus nga ang nasindihan nga suga indi dapat pag-ibutang sa idalom sang sulukban kundi ibutang ini sa ibabaw sang tulungtungan agod mag-iwag sa tanan nga yara sa balay. Ang suga sang unang siglo human sa daga kag may pabilo ini nga nagasuyop sa likido (masami lana sang olibo) kaangay sang aton kingki sa karon nga ginasudlan sang gas. Masami ini ginabutang sa kahoy ukon salsalon nga tulungtungan agod ‘mag-iwag sa tanan nga yara sa balay.’ Kon magsindi ang mga tawo sang suga wala nila ini ginabutang sa “idalom sang sulukban.” Sing kaanggid, indi man luyag ni Jesus nga taguon sang iya mga disipulo ang ila espirituwal nga kapawa sa malaragwayon nga sulukban. Gani, dapat naton paiwagon ang aton kapawa kag indi naton pagtaguon ang kamatuoran sa Biblia bisan pa ginapamatukan ukon ginahingabot kita.

15. Ano ang epekto sang aton “maayong mga buhat” sa iban?

¹⁵ Sa tapos mahinambitan ni Jesus ang nagaiwag nga suga ginsilingan niya ang iya mga disipulo: “Sing kaanggid paiwaga ang inyo kapawa sa atubangan sang mga tawo, agod makita nila ang inyo maayong mga buhat kag maghimaya sa inyo Amay nga yara sa langit.” Bangod sa aton “maayong mga buhat” ang iban ‘naghimaya’ sa Dios kag nangin mga sumulunod niya. Daw ano ini nga pagpalig-on sa aton nga magpadayon nga ‘magsiga subong mga suga sa kalibutan’!​—Fil. 2:15.

16. Bangod mga “kapawa [kita] sang kalibutan” ano ang dapat naton himuon?

¹⁶ Bangod mga “kapawa [kita] sang kalibutan” dapat naton ibantala ang Ginharian kag maghimo sing mga disipulo. Apang may yara pa ginapahimo sa aton. “Padayon kamo nga maglakat subong mga anak sang kapawa,” siling ni apostol Pablo “kay ang mga bunga  sang kapawa nagalakip sang tanan nga sahi sang pagkamaayo kag pagkamatarong kag kamatuoran.” (Efe. 5:8, 9) Dapat mangin halimbawa kita sa diosnon nga paggawi kag dapat naton sundon ang laygay ni apostol Pedro: “Hupti nga maayo ang inyo paggawi sa tunga sang mga pungsod, agod bisan nagahambal sila batok sa inyo nga malauton kamo, himayaon nila ang Dios sa adlaw sang iya pag-usisa bangod sang inyo maayong mga buhat nga nasaksihan mismo nila.” (1 Ped. 2:12) Apang ano ang himuon mo kon naglainay kamo sing buot sang isa ka utod?

‘Makighidait Ka sa Imo Utod’

17-19. (a) Ano ang “dulot” nga ginsambit sa Mateo 5:23, 24? (b) Daw ano ka importante ang pagpakighidait sa utod, kag paano ini ginpakita ni Jesus?

¹⁷ Sa iya Sermon sa Bukid, ginpaandaman ni Jesus ang iya mga disipulo batok sa paghupot sing kaakig kag dumot sa iya utod. Sa baylo dapat makighidait sila gilayon sa ila utod. (Basaha ang Mateo 5:21-25.) Talupangda sing maayo ang laygay ni Jesus. Kon nagadala ka sang imo dulot sa halaran kag madumduman mo didto nga ang imo utod may butang nga batok sa imo, ano ang himuon mo? Dapat bayaan mo ang imo dulot sa atubangan sang halaran kag makighidait ka anay sa imo utod. Nian, sa pagbalik mo mahimo mo na ihalad ang imo dulot.

¹⁸ Ang “dulot” amo sa masami ang halad nga ginahalad sang isa sa templo ni Jehova. Importante gid ang paghalad sing sapat kay bahin ini sang pagsimba sang Israel nga ginsugo sang Dios sa ila sa idalom sang Mosaikong Kasuguan. Apang kon nadumduman mo nga naglain ang buot sang imo utod sa imo, mas importante nga makighidait ka anay sa iya. “Bayai ang imo dulot sa atubangan sang halaran, kag maglakat ka,” siling ni Jesus. “Makighidait ka anay sa imo utod, kag sa pagbalik mo, ihalad ang imo dulot.” Mas importante ang pagpakighidait sa aton utod sangsa pagtuman sa Kasuguan.

¹⁹ Wala sing ginapatuhuyan si Jesus nga partikular nga halad ukon espesipiko nga sala. Busa, kon madumduman sang isa nga naglain ang buot sang iya utod sa iya, indi sia anay maghalad. Kon ang halad isa ka buhi nga sapat, dapat ibilin ini anay “sa atubangan sang halaran” sang halad nga sinunog sa luwang sang templo sang saserdote. Sa tapos nga mahusay ang problema, balikan sang nakasala ang iya dulot kag ihalad ini.

20. Kon naakig kita sa aton utod, ngaa dapat naton ini husayon gilayon?

²⁰ Ang aton kaangtanan sa aton utod ginatamod ni Jehova nga importante nga bahin sang matuod nga pagsimba. Wala sing pulos ang mga halad nga sapat kay Jehova kon ang nagahalad sini may indi maayo nga kaangtanan sa iya isigkatawo. (Miq. 6:6-8) Gani ginsilingan ni Jesus ang iya mga disipulo nga “makighusay gilayon.” (Mat. 5:25) Sing kaanggid, si Pablo nagsulat: “Kon mangakig kamo, indi kamo magpakasala; indi pagpatunuri sang adlaw nga akig kamo, kag  indi paghatagi sing duog ang Yawa.” (Efe. 4:26, 27) Bisan pa may rason kita nga maakig, dapat husayon naton ini gilayon agod nga indi magdugay ang aton kaakig kag indi kita paghingalitan sang Yawa.​—Luc. 17:3, 4.

Magpakita Pirme sing Pagtahod sa Iban

21, 22. (a) Paano naton masunod ang laygay ni Jesus nga bag-o lang naton nabinagbinag? (b) Ano ang binagbinagon naton sa masunod nga artikulo?

²¹ Ang pagbinagbinag sa mga pinamulong ni Jesus sa iya Sermon sa Bukid magabulig sa aton nga pakig-angutan ang iban sing mainayuhon kag matinahuron. Bisan pa di-himpit kita, masunod naton ang laygay ni Jesus bangod sila sang aton langitnon nga Amay wala man nagapaabot sing kapin sangsa aton masarangan. Paagi sa pangamuyo, sinsero nga panikasog kag pagpakamaayo ni Jehova nga Dios, mangin malulo kita, maluluy-on kag mahidaiton. Kon ipabanaag naton ang espirituwal nga kapawa mahimaya naton si Jehova. Kag kon mag-utwas gid man ang mga di-paghangpanay, makapakighidait kita sa aton utod.

²² Agod kahamut-an ni Jehova ang aton pagsimba dapat pakig-angutan naton sing nagakaigo ang aton isigkatawo. (Mar. 12:31) Binagbinagon naton sa masunod nga artikulo ang iban pa nga mga pinamulong ni Jesus sa iya Sermon sa Bukid nga magabulig sa aton nga magpadayon nga maghimo sing maayo sa iban. Sa tapos mapamalandungan ang bag-o lang nahinambitan nga mga punto gikan sa talalupangdon nga pamulongpulong ni Jesus, mahimo naton pamangkuton ang aton kaugalingon, ‘Paano ko ginapakig-angutan ang iban?’

[Footnote]

Ano ang Imo Sabat?

• Ano ang kahulugan nga mangin malulo?

• Ngaa malipayon ang mga “maluluy-on”?

• Paano naton mapaiwag ang aton kapawa?

• Ngaa dapat kita ‘makighidait gilayon sa aton utod’?

[Mga Pamangkot sa Pagtinuon]

[Piktyur sa pahina 4]

Ang isa ka importante nga paagi agod mapaiwag naton ang aton kapawa amo ang pagbantala sang mensahe sang Ginharian

[Piktyur sa pahina 5]

Dapat mangin halimbawa ang mga Cristiano sa diosnon nga paggawi

[Piktyur sa pahina 6]

Himua ang imo bug-os nga masarangan sa pagpakighidait sa imo utod