Handa Ka na Bala Para sa Adlaw ni Jehova?
Handa Ka na Bala Para sa Adlaw ni Jehova?
“Ang daku nga adlaw ni Jehova malapit na. Malapit na ini, kag nagadalidali ini sing tama.”—SOFONIAS 1:14, NW.
1-3. (a) Ano ang ginasiling sang Biblia tuhoy sa adlaw ni Jehova? (b) Ano nga “adlaw ni Jehova” ang ginapaabot naton?
ANG daku nga adlaw ni Jehova indi 24 oras. Isa ini ka malawig nga panahon nga sa sini nga tion hukman sang Dios ang mga malauton. Dapat lang nga kahadlukan sang di-diosnon nga mga tawo ina nga adlaw sang kadudulman, kasingkal, mabangis nga kaakig, kalisod, kag kamingaw. (Isaias 13:9; Amos 5:18-20; Sofonias 1:15) “Kailo sang adlaw,” siling sang tagna ni Joel, “bangod ang adlaw ni Jehova malapit na, kag kaangay sang pagpang-ati gikan sa Isa nga Labing Gamhanan ini magaabot!” (Joel 1:15, NW) Apang, sa sina nga daku nga adlaw, luwason sang Dios ang “mga matadlong sa tagiposoon.”—Salmo 7:10.
2 Ang ekspresyon nga “adlaw ni Jehova” nagapatuhoy sa paghukom sang Dios sa nanuhaytuhay nga mga tion. Halimbawa, nag-abot ang “adlaw ni Jehova” sa mga pumuluyo sang Jerusalem sang nagsalakay ang mga Babilonianhon sang 607 B.C.E. (Sofonias 1:4-7, NW) Natabo man ini sang 70 C.E. sang gingamit sang Dios ang mga Romano agod hukman ang pungsod sang mga Judiyo nga nagsikway sa iya Anak. (Daniel 9:24-27; Juan 19:15) Ginatagna man sang Biblia ang “adlaw ni Jehova” nga ‘magapakig-away sia batok sa tanan nga mga pungsod.’ (Zacarias 14:1-3) Sa idalom sang pagtuytoy sang balaan nga espiritu, gin-angot ni apostol Pablo ina nga adlaw sa presensia ni Cristo, nga nagsugod sang naghari si Jesus sa langit sang 1914. (2 Tesalonica 2:1, 2) Bangod nagapadulong ang adlaw ni Jehova, nagakaigo gid ang tuigan nga teksto sang mga Saksi ni Jehova para sa 2007. Ginkuha ini sa Sofonias 1:14, (NW) nga nagasiling: “Ang daku nga adlaw ni Jehova malapit na.”
3 Bangod malapit na ang daku nga adlaw sang Dios, karon na ang tion nga dapat nakahanda ka. Paano ikaw mangin handa para sa sina nga adlaw? Dapat ka bala maghimo sing dugang pa nga mga tikang agod mangin handa ka para sa adlaw ni Jehova?
Pamatud-i Ninyo nga Handa Kamo
4. Para sa ano nga daku nga pagtilaw naghanda si Jesus?
4 Sa iya tagna tuhoy sa katapusan sang sistema sang mga butang, ginsilingan ni Jesucristo ang iya mga disipulo: “Pamatud-i man ninyo nga handa kamo.” (Mateo 24:44, NW) Sang ginsiling ini ni Jesus, nakahanda man sia sadto para sa isa ka daku nga pagtilaw—ang iya kamatayon subong isa ka halad nga gawad. (Mateo 20:28) Ano ang matun-an naton gikan sa paghanda ni Jesus?
5, 6. (a) Paano ang gugma sa Dios kag sa mga tawo nagabulig sa aton nga mangin handa para sa adlaw ni Jehova? (b) Tuhoy sa gugma sa isigkatawo, ano nga halimbawa ang ginpakita ni Jesus?
5 Bug-os tagipusuon nga ginhigugma ni Jesus si Jehova kag ang Iya matarong nga mga talaksan. Tuhoy kay Jesus, ang Hebreo 1:9 nagasiling: “Ginhigugma mo ang pagkamatarung kag gindumtan ang kalautan; busa ang Dios, ang imo Dios, naghaplas sa imo sang lana sang kalipay labaw sa imo mga kaupud.” Bangod ginhigugma niya ang iya langitnon nga Amay, nagpabilin si Jesus nga matutom sa iya. Kon higugmaon naton ang Dios sing subong man sini kag tumanon naton ang iya mga kasuguan, amligan niya kita. (Salmo 31:23) Ini nga gugma kag pagkamatinumanon magabulig sa aton agod mangin handa kita para sa daku nga adlaw ni Jehova.
6 Ang gugma sa mga tawo isa ka talalupangdon nga kinaiya ni Jesus. Sa pagkamatuod, “naluoy sia sa ila, kay ginpanitan sila kag nag-alaplaag kaangay sa mga karnero nga wala sing manugbantay.” (Mateo 9:36, NW) Gani, ginbantala ni Jesus ang maayong balita sa mga tawo, subong nga ginapahulag man kita sang gugma nga ibantala ang mensahe sang Ginharian sa aton mga isigkatawo. Bangod sang gugma sa Dios kag sa aton isigkatawo, padayon kita nga aktibo subong Cristiano nga mga ministro kag nagabulig ini sa aton sa paghanda para sa daku nga adlaw ni Jehova.—Mateo 22:37-39.
7. Samtang ginahulat naton ang adlaw ni Jehova, ngaa mahimo kita mangin malipayon?
7 Nalipay si Jesus sa paghimo sang kabubut-on ni Jehova. (Salmo 40:8) Kon amo kita sini, malipay man kita sa sagrado nga pag-alagad sa Dios. Kaangay ni Jesus, mangin maalwan kita, kag magapahalipay gid ini sa aton. (Binuhatan 20:35) Huo, “ang kalipay ni Jehova amo ang [aton] kuta.” Nian, handa gid kita para sa daku nga adlaw sang Dios.—Nehemias 8:10, NW.
8. Ngaa dapat kita magpalapit kay Jehova paagi sa pangamuyo?
8 Ang hugot nga pangamuyo sa Dios nagbulig kay Jesus sa paghanda para sa mga pagtilaw sa iya pagtuo. Nangamuyo sia sang ginbawtismuhan sia ni Juan. Nangamuyo si Jesus sa bug-os nga gab-i sang ginpili niya ang iya mga apostoles. (Lucas 6:12-16) Kag sin-o bala ang indi matandog kon mabasa niya sa Biblia ang tinagipusuon nga mga pangamuyo ni Jesus sang katapusan nga gab-i sang iya kabuhi sa duta? (Marcos 14:32-42; Juan 17:1-26) Pirme ka bala nagapangamuyo, kaangay ni Jesus? Magpalapit pirme kay Jehova, indi magdalidali kon nagapangamuyo ka, pangayua ang pagtuytoy sang balaan nga espiritu, kag kon mangin maathag gani nga ang isa ka butang pagtuytoy sang balaan nga espiritu, batuna ina dayon. Importante gid ang mabakod nga kaangtanan sa aton langitnon nga Amay sa sining ital-ital nga tion nga malapit na ang daku nga adlaw sang Dios. Gani, magpalapit gid kay Jehova paagi sa pangamuyo.—Santiago 4:8.
9. Daw ano ka importante ang pagtinguha nga pakabalaanon ang ngalan ni Jehova?
9 Ang pagtinguha ni Jesus nga pakabalaanon ang ngalan ni Jehova nagbulig man sa iya nga mangin handa para sa mga pagtilaw nga gin-atubang niya. Gintudluan pa gani niya ang iya mga sumulunod nga kon mangamuyo sila sa Dios dapat nila ilakip ang pangabay nga: “Pakabalaanon ang imo ngalan.” (Mateo 6:9) Kon handum naton nga pakabalaanon, ukon kilalahon nga sagrado ang ngalan ni Jehova, indi gid kita maghimo sing bisan ano nga magadala sing kahuy-anan sa iya ngalan. Nian, handa na kita para sa daku nga adlaw ni Jehova.
Dapat Ka Bala Maghimo Sing Pila ka Pagbag-o?
10. Ngaa nagakaigo nga usisaon naton ang aton kabuhi?
10 Kon maabot buas ang adlaw ni Jehova, handa ka na gid bala? Dapat naton usisaon ang aton kabuhi kon bala may mga buhat kita ukon mga panimuot nga kinahanglan bag-uhon. Bangod malip-ot lang kag walay kasiguruhan ang kabuhi karon sang tawo, dapat kita mangin alisto sa espirituwal kada adlaw. (Manugwali 9:11, 12; Santiago 4:13-15) Gani, binagbinagon naton ang pila ka butang sa aton kabuhi nga dapat naton talupangdon.
11. Ano ang imo tulumuron tuhoy sa pagbasa sing Biblia?
11 Ang isa ka importante nga butang amo ang ginalaygay sang ‘matutom nga ulipon’ nga basahon ang Biblia adlaw-adlaw. (Mateo 24:45) Mahimo mo mangin tulumuron nga basahon nga may pagpamalandong ang Biblia halin sa Genesis tubtob sa Bugna kada tuig. Kon makabasa ka sing mga apat ka kapitulo kada adlaw, matapos mo ang 1,189 ka kapitulo sang Biblia sa isa ka tuig. Obligado gid anay ang tagsa ka hari sa dumaan nga Israel nga basahon ang Kasuguan ni Jehova “sa tanan nga adlaw sang iya kabuhi.” Mahimo gid nga ginhimo man ini ni Josue. (Deuteronomio 17:14-20; Josue 1:7, 8) Importante man nga basahon sang mga gulang sa kongregasyon ang Pulong sang Dios adlaw-adlaw, kay magabulig ini sa ila sa pagpaalinton sing “makapapagros nga panudlo”!—Tito 2:1, NW.
12. Bangod malapit na ang adlaw ni Jehova, dapat mapahulag ka nga himuon ang ano?
12 Bangod malapit na ang adlaw ni Jehova, dapat mapahulag ka nga magtambong sa Cristiano nga mga miting sing regular kag magpakigbahin sa sini kon mahimo. (Hebreo 10:24, 25) Paagi sa sini, mahanas ang imo ikasarang subong manugbantala sang Ginharian nga nagatinguha sa pagpangita kag sa pagbulig sa mga tawo nga nagahandum sing kabuhi nga walay katapusan. (Binuhatan 13:48) Ayhan makabulig ka pa sa kongregasyon sa iban naman nga mga paagi, subong sang pagbulig sa mga may edad na kag pagpalig-on sa mga pamatan-on. Makapahalipay gid ini nga mga panikasog!
Ang Imo Kaangtanan sa Iban
13. Ano nga mga pakiana ang mapamangkot naton sa aton kaugalingon tuhoy sa pagsuklob sing bag-o nga personalidad?
13 Sanglit malapit na ang adlaw ni Jehova, dapat ka bala manikasog pa nga “magsuklob sang bag-o nga personalidad nga gintuga suno sa kabubut-on sang Dios sa matuod nga pagkamatarong kag pagkamainunungon”? (Efeso 4:20-24, NW) Samtang ginapalambo mo ang diosnon nga mga kinaiya, mahimo nga makita gid sang iban nga ‘nagalakat ka suno sa espiritu sang Dios’ kag nagapakita sang mga bunga sini. (Galacia 5:16, 22-25, NW) May masambit ka bala nga espesipiko nga mga buhat nga ikaw kag ang imo pamilya nagsuklob sing bag-o nga personalidad? (Colosas 3:9, 10, NW) Halimbawa, kilala ka bala nga mabinuligon sa imo mga masigkatumuluo kag sa iban? (Galacia 6:10) Ang regular nga pagtuon sa Biblia magabulig sa imo sa pagpalambo sing diosnon nga mga kinaiya nga magahanda sa imo para sa adlaw ni Jehova.
14. Ngaa dapat mangabay sa Dios ang isa ka tawo sing balaan nga espiritu samtang ginapalambo niya ang pagpugong sa kaugalingon?
14 Ano kon madali ka mangakig kag narealisar mo nga kinahanglan mo ang dugang pa nga pagpugong sa kaugalingon? Ini nga kinaiya isa sa mga bunga nga sarang mapatubas sa imo sang balaan nga espiritu sang Dios. Gani, mangabay sa Dios sing balaan nga espiritu, nahisanto sa ginsiling ni Jesus: “Padayon sa pagpangayo, kag hatagan kamo; padayon sa pagpangita, kag inyo makita; padayon sa pagpanuktok, kag pagabuksan kamo. . . . Kon kamo bisan malaut makahibalo maghatag sang maayo nga mga dulot sa inyo mga anak, labi pa gid nga ang Amay sa langit magahatag sang balaan nga espiritu sa mga nagapangayo sa iya!”—Lucas 11:9-13, NW.
15. Ano ang dapat mo himuon kon naguba ang imo maayo nga relasyon sa isa ka utod?
15 Ibutang ta nga naguba ang imo maayo nga relasyon sa isa ka utod. Kon amo sini, tinguhai gid nga mapasag-uli ini, agod mapalambo ang paghidait kag paghiusa sang kongregasyon. (Salmo 133:1-3) Iaplikar ang laygay ni Jesus nga nasulat sa Mateo 5:23, 24 ukon sa Mateo 18:15-17. Kon akig ka pa gihapon, husaya gilayon ang problema. Masami nga ang kinahanglan lamang amo ang imo kahanda sa pagpatawad. Nagsulat si Pablo: “Mangin mainayuhon sa isa kag isa, mapinalanggaon nga may kaawa, nga nagapatawad sing kinabubut-on sa isa kag isa subong nga ang Dios nagpatawad man sing kinabubut-on sa inyo paagi kay Cristo.”—Efeso 4:25, 26, 32, NW.
16. Sa ano nga mga paagi dapat magpakita ang mag-asawa sing pagkamahinangpanon?
16 Kinahanglan sang mag-asawa ang pagkamahinangpanon gid kag, kon kaisa, ang pagkamapinatawaron. Kon kinahanglan nga pauswagon mo pa ang pagkamahigugmaon kag pagkamahinangpanon sa imo tiayon, panikasugi ini sa bulig sang Dios kag sang iya Pulong. May dapat ka pa bala himuon agod masunod ang 1 Corinto 7:1-5, sa amo mabuhinan ang problema kag malikawan ang pagluib? Sa pagkamatuod, isa ini ka butang sa kabuhi sang mag-asawa nga dapat sila mangin mahinangpanon gid.
17. Ano nga mga tikang ang dapat himuon kon makahimo ang isa sing mabug-at nga sala?
17 Ano kon nakahimo ka sing mabug-at nga sala? Tadlunga ini gilayon. Mangayo sing bulig sa Cristiano nga mga gulang. Makabulig ang ila pangamuyo kag laygay agod mapasag-uli ang imo espirituwal nga kapagros. (Santiago 5:13-16) Mangayo sing patawad kay Jehova paagi sa pangamuyo. Konsiensiahon ka kon indi mo paghimuon ini. Naeksperiensiahan ini ni David, apang nahaw-asan sia sang magtu-ad sia kay Jehova! Nagsulat si David: “Bulahan sia nga ang iya paglalis ginpatawad, nga ang iya sala gintabonan. Bulahan ang tawo nga wala ginapasangti sang GINOO sang kalautan, nga sa iya espiritu walay limbong.” (Salmo 32:1-5) Ginapatawad ni Jehova ang mga nakasala nga nagapakita sing matuod nga paghinulsol.—Salmo 103:8-14; Hulubaton 28:13.
Magpabilin nga Indi Bahin sang Kalibutan
18. Paano naton dapat tamdon ang kalibutan?
18 Pat-od nga ginapaabot mo ang matahom nga bag-ong kalibutan nga ginasaad sang aton langitnon nga Amay. Kon amo, paano mo ginatamod ang kalibutan sang di-matarong nga katilingban sang tawo nga nahamulag sa Dios? Si Satanas nga “manuggahum sang kalibutan,” wala sing gahom kay Jesucristo. (Juan 12:31; 14:30) Pat-od nga indi mo luyag nga ang Yawa kag ang iya kalibutan magagahom sa imo, gani pamatii ang ginasiling ni apostol Juan: “Dili ninyo paghigugmaon ang kalibutan ukon ang mga butang nga yara sa kalibutan.” Amo ina ang maalamon nga dalanon, kay “ang kalibutan nagataliwan, kag ang kailigbon sini; apang ang nagahimo sang kabubut-on sang Dios nagapadayon sa gihapon.”—1 Juan 2:15-17.
19. Ginapalig-on ang Cristiano nga mga pamatan-on nga magpahamtang sing ano nga mga tulumuron?
19 Ginabuligan mo bala ang imo mga anak sa ‘pagtipig sa ila kaugalingon nga wala sing higko gikan sa kalibutan’? (Santiago 1:27, NW) Luyag buniton ni Satanas ang imo mga anak subong sang pagbunit sang tawo sa isda. Ginadesinyo ang nanuhaytuhay nga mga organisasyon agod mangin bahin sang kalibutan ni Satanas ang mga pamatan-on. Apang, ang mga alagad ni Jehova bahin na sang isa ka organisasyon nga amo lamang ang makalampuwas kon laglagon na ining malaut nga sistema sang mga butang. Gani, dapat palig-unon ang Cristiano nga mga pamatan-on nga ‘pirme maghimo sing madamo sa hilikuton sang Ginuo.’ (1 Corinto 15:58) Dapat buligan sang Cristiano nga mga ginikanan ang ila mga anak sa pagpahamtang sing mga tulumuron nga magahatag sa ila sing makalilipay kag makapaladya nga kabuhi nga nagapadungog sa Dios kag nagabulig sa ila nga mangin handa para sa adlaw ni Jehova.
Kon Ano ang Mapaabot sa Tapos sang Daku nga Adlaw ni Jehova
20. Ngaa dapat naton dumdumon pirme ang kabuhi nga walay katapusan?
20 Mahulat mo ang adlaw ni Jehova nga may kalinong sa tagipusuon kon dumdumon mo pirme ang walay katapusan nga kabuhi. (Judas 20, 21) Ginapaabot mo ang dayon nga kabuhi sa Paraiso, gani nagalaum ka nga magabaskog liwat ang imo lawas subong sang pamatan-on kag wala sing latid ang imo tion sa paglab-ot sa mapuslanon nga mga tulumuron kag sa pagtuon sing dugang pa tuhoy kay Jehova. Ang matuod, wala sing katapusan ang imo pagtuon tuhoy sa Dios bangod “mga higad lamang sang iya mga dalanon” ang nahibaluan karon sang mga tawo. (Job 26:14) Makakulunyag gid ini nga palaabuton!
21, 22. Ano nga pagbayluhanay sing impormasyon ang mahimo matabo sa ulot mo kag sang mga banhawon?
21 Sa Paraiso, mapaalinton sa aton sang mga banhawon ang iban pa nga detalye nga wala naton nahibaluan tuhoy sa nagligad. Ipaathag sa aton didto ni Enoc kon paano sia nakatigayon sing kaisog nga kinahanglanon agod mabantala niya ang mensahe ni Jehova sa di-diosnon nga mga tawo. (Judas 14, 15) Pat-od gid nga maistorya si Noe sang gintukod nila ang arka. Masugid sa aton ni Abraham kag ni Sara kon ano ang ila ginbatyag sang ginbiyaan nila ang masulhay nga kabuhi sa Ur kag nagpuyo sila sa mga tolda. Hunahunaa ang tul-id nga pagsaysay ni Ester kon paano niya gindepensahan ang iya mga kasimanwa kag ginpaslaw ang plano ni Haman batok sa ila. (Ester 7:1-6) Handurawa si Jonas nga nagasugid sang yara sia sa sulod sang daku nga isda sing tatlo ka adlaw ukon si Juan Bautista nga nagalaragway sang iya ginbatyag sang ginbawtismuhan niya si Jesus. (Lucas 3:21, 22; 7:28) Makawiwili gid ini nga mga butang nga hibaluon!
22 Sa sulod sang Isa ka Libo ka Tuig nga Paggahom ni Cristo, mahimo nga mahatagan ka sing kahigayunan nga buligan ang mga banhawon nga makatigayon sing “ihibalo sang Dios.” (Hulubaton 2:1-6) Sa karon, makalilipay gid makita ang mga tawo nga nagatigayon sing ihibalo ni Jehova nga Dios kag ginaaplikar ini! Apang hunahunaa ang imo kalipay sa palaabuton kon pakamaayuhon ni Jehova ang imo mga panikasog nga tudluan ang mga tawo nga nabuhi sang una pa nga mga dag-on kag pasalamatan ka nila sing tinagipusuon!
23. Dapat determinado kita nga himuon ang ano?
23 Subong di-himpit nga mga tawo, indi naton maisip tanan ukon matimbangtimbang ang mga benepisyo nga ginaagom naton karon subong katawhan ni Jehova. (Salmo 40:5) Ginapasalamatan naton ilabi na ang espirituwal nga mga aman sang Dios. (Isaias 48:17, 18) Bisan ano pa ang aton kahimtangan, bug-os tagipusuon nga himuon naton ang aton sagrado nga pag-alagad samtang ginahulat naton ang daku nga adlaw ni Jehova.
Paano Mo Sabton?
• Ano ang “adlaw ni Jehova”?
• Paano ka mangin handa para sa adlaw ni Jehova?
• Bangod malapit na ang daku nga adlaw sang Dios, ano nga mga pagbag-o ang mahimo dapat naton panikasugan?
• Ano ang ginapaabot mo kon matapos na ang adlaw ni Jehova?
[Mga Pamangkot sa Pagtinuon]
[Piktyur sa pahina 12]
Nangin handa si Jesus para sa mga pagtilaw
[Piktyur sa pahina 15]
Daku gid nga pribilehiyo nga tudluan ang mga banhawon sing ihibalo ni Jehova!
