Posible Bala ang Bug-os Kalibutan nga Paghiusa?

MALAPIT na bala naton matigayon ang bug-os kalibutan nga paghidait ukon ang bug-os kalibutan nga kalaglagan? Bisan diin man sini, daw pareho nga may mabakod nga mga rason ini nga mga pagpati.

Sa isa ka bahin, ang pila ka lider sa kalibutan may pagsalig nga nagasiling nga ang bug-os kalibutan nga paghidait mahimo matigayon—ayhan bangod kon indi, tuman ka makahaladlok ang mahimo matabo sa kalibutan. Sa pihak nga bahin, madamo ang ginakulbaan sa mga pamangkot subong sang: Ano nga pungsod ang may mga hinganiban nga makasarang sa paglaglag sa madamo nga tawo? Mangahas ayhan sila nga gamiton ini? Ano ang matabo kon gamiton nila ini?

Ginapakita sang kasaysayan nga halin pa sadto, ang pagsumpunganay kag pag-ihig-ihig amo gid ang kabangdanan kon ngaa indi matigayon ang paghiusa. Kag sa baylo nga magbulig sa paglubad sini, masami nga ginadabukan pa ini sang relihion. “Ang bisan ano nga butang nga nagapabahinbahin sa katawhan nagatuga sing pagbangigay, kag ang relihion amo ang isa sa pinakamakusog nga manugpabahinbahin,” sulat sang dyurnalista nga si James A. Haught. “Bisan pa nga ang kalabanan nagapati nga ang relihion nagabulig sa mga tawo nga mangin ‘maayo,’ maathag gid nga ini man ang nagatiklod sa pila nga maghimo sing malaut.” Amo man sini ang pagpati sang awtor nga si Steven Weinberg. “Ang relihion lamang ang makapahimo sa maayo nga mga tawo sing malain,” sulat niya.

Magahiusa pa ayhan ang aton kalibutan? Huo! Apang indi ang tawo ukon ang himo-tawo nga mga relihion ang makapahiusa sa kalibutan, subong sang makita naton sa masunod nga artikulo.

[Blurb sa pahina 3]

Ang kalibutan bala kaangay sang isa ka granada nga mahimo maglupok bisan ano oras?