“Ano Bala ang Kamatooran?”

AMO ini ang matinamayon nga ginpamangkot sang Romano nga Gobernador nga si Poncio Pilato kay Jesus. Indi sia interesado nga mahibaluan ang sabat, gani naghipos na lang si Jesus. Mahimo, para kay Pilato ang kamatuoran mabudlay hangpon.—Juan 18:38.

Madamo sa karon ang nagatamay sa kamatuoran, lakip na ang relihiosong mga lider, mga manunudlo, kag mga politiko. Para sa ila wala sing isa lamang ka talaksan ilabi na sa moral kag espirituwal nga mga butang, kundi relatibo ini kag nagabulubag-o. Buot silingon, ang mga tawo mismo ang mamat-od kon ano ang husto kag sayop. (Isaias 5:20, 21) Bangod sini, mahimo man sikwayon sang mga tawo ang mga talaksan sa moral nga ginasunod anay sang nagligad nga mga kaliwatan kay para sa ila indi na ini praktikal karon.

Talalupangdon gid ang ginsiling ni Jesus, amo nga namangkot si Pilato. Nagsiling si Jesus: “Tungud sini natawo ako, kag tungud sini nagkari ako sa kalibutan, agud nga magsaksi ako sa kamatooran.” (Juan 18:37) Para kay Jesus, ang kamatuoran maathag kag indi mabudlay hangpon. Ginsaaran niya ang iya mga disipulo: “Kamo makakilala sang kamatooran, kag ang kamatooran magahilway sa inyo.”—Juan 8:32.

Diin naton masapwan ina nga kamatuoran? Sa isa ka higayon, nangamuyo si Jesus sa Dios: “Ang imo polong kamatooran.” (Juan 17:17) Ang Biblia inspirado sang Dios, kag nagasugid ini sang kamatuoran nga nagahatag sa aton sing masaligan nga panuytoy kag pat-od nga paglaum sa palaabuton—ang kabuhi nga walay katapusan.—2 Timoteo 3:15-17.

Wala ginhimuslan ni Pilato ang kahigayunan nga mahibaluan ini nga kamatuoran. Ikaw naman? Luyag mo bala pangabayon ang mga Saksi ni Jehova nga ipaambit sa imo ang “kamatuoran” nga gintudlo ni Jesus? Malipay gid sila nga ipaambit sa imo ina nga kamatuoran.