Mangin Maluluy-on​—Paano?

“Magbuhat kita sang maayo ayon sa tanan nga tawo, kag labi na gid sa mga tagapanimalay sang pagtoo.”—GALACIA 6:10.

1, 2. Ano ang ginatudlo sa aton sang ilustrasyon bahin sa mabinuligon nga Samaritano tuhoy sa kaluoy?

SAMTANG nagapakigsugilanon kay Jesus ang isa ka tawo nga batid sa Kasuguan, namangkot sia: “Sin-o bala ang akon isigkatawo?” Bilang sabat, ginsaysay ni Jesus ang masunod nga ilustrasyon: “May isa ka tawo nga nagapakadto sa Jerico gikan sa Jerusalem, kag ginbanggaan sia sang mga buyong, nga naghublas kag nagbakul sa iya, kag nagtaliwan, nga nagabiya sa iya nga daw patay. Karon natabu nga may sacerdote nga nagadolhog sa sadtong dalan; kag sang nakita niya sia nagligad sia sa pihak. Sa among bagay ang Levita man, sang nag-abut sia sa sadtong duug kag nakakita sa iya, nagligad sa pihak. Apang ang isa ka Samaritano, sang nagpanlakatan, nag-abut diin sia; kag sang nakita niya sia, nalooy sia, kag nagpalapit sa iya kag ginsamburan ang iya mga pilas, nga ginaboboan sing lana kag alak; kag ginpasakay niya sia sa iya kaugalingon nga hayup kag gindala sia sa dalayonan, kag gin-atipan sia. Kag sang madason nga adlaw nagkuha sia sing duha ka denario kag ginahatag sila sa tagbalay, nga nagasiling, ‘Atipana sia; kag bisan ano nga magamit mo nga dugang, ako sa akon pagbalik magabayad sa imo.’ Sin-o bala sining tatlo, sa hunahuna mo, ang nangin-isigkatawo sa ginbanggaan sang mga buyong?” Nagsabat sia, “Ang nagpakita sing kalooy sa iya.”—Lucas 10:25, 29-37a.

² Maathag gid nga ginpakita sang Samaritano kon ano ang matuod nga kaluoy sang ginbuligan niya ang nahalitan nga tawo! Bangod sa kaluoy, ukon kaawa, napahulag sia sa paghimo sing isa ka butang nga naghatag sing kaumpawan sa nahalitan nga tawo. Isa pa, indi kilala sang Samaritano ini nga tawo. Ang pagkatuhay sa rasa, relihion, ukon kultura, indi upang sa pagpakita sing kaluoy. Pagkatapos mahatag ang ilustrasyon tuhoy sa mabinuligon nga Samaritano, ginlaygayan ni Jesus ang iya kahambal: “Lakat kag himoa ang subong.” (Lucas 10:37b) Mahimo naton sundon ini nga laygay kag magtinguha nga mangin maluluy-on sa iban. Apang paano? Sa ano nga mga paagi makapakita kita sing kaluoy sa aton adlaw-adlaw nga pagkabuhi?

“Kon ang Utod nga Lalaki . . . Hubo”

3, 4. Ngaa dapat kita labi na nga magpakita sing kaluoy sa sulod sang Cristiano nga kongregasyon?

³ “Sa may kahigayonan kita,” siling ni apostol Pablo, “magbuhat kita sang maayo ayon sa tanan nga tawo, kag labi na gid sa mga tagapanimalay sang pagtoo.” (Galacia 6:10) Kon amo, binagbinagon anay naton kon sa ano pa nga mga paagi makapakita kita sing kaluoy sa aton mga masigkatumuluo.

⁴ Sang ginlaygayan ni disipulo Santiago ang matuod nga mga Cristiano nga mangin maluluy-on sila sa isa kag isa, nagsulat sia: “Ang paghukom walay kalooy sa wala magpakita sing kalooy.”  (Santiago 2:13) Ang konteksto sining inspirado nga mga pulong nagasugid sa aton sang pila ka paagi nga makapakita kita sing kaluoy. Halimbawa, ang Santiago 1:27 nagasiling: “Ang putli nga pagtoloohan kag walay dagta sa atubang sang Dios kag Amay amo ini: ang pagduaw sa mga ilo kag balo nga mga babayi sa ila kapipit-an, kag sa pagtipig sang iya kaugalingon nga walay dagta sa sining kalibutan.” Ang Santiago 2:15, 16 nagasiling: “Kon ang utud nga lalaki ukon babayi hubo kag nakulangan sing kalan-on adlawadlaw, kag ang isa sa inyo nagasiling sa ila, ‘Lakat kamo sa paghidait, magpainitinit kag magkalabusug,’ nga wala ninyo sila paghatagi sang mga butang nga kinahanglan sa lawas, ano bala ang kapuslanan sini?”

5, 6. Sa ano nga mga paagi makahimo kita sing maluluy-on nga mga buhat sa aton lokal nga kongregasyon?

⁵ Ang pag-ulikid sa iban kag ang pagbulig sa mga nagakinahanglan sing bulig isa ka tanda sang matuod nga relihion. Bangod sang aton relihion, kon magpakita gani kita sing pag-ulikid sa iban, wala lamang kita nagasiling nga mag-ayo kuntani ang ila kahimtangan. Sa baylo, ang aton mainulikdon nga kaawa magapahulag sa aton nga buligan ang mga nagakinahanglan gid sing bulig. (1 Juan 3:17, 18) Huo, lakip sa madamo nga maluluy-on nga mga buhat nga dapat naton himuon amo ang pagluto sing pagkaon para sa nagamasakit nga utod, pagbuligbulig sa isa ka tigulang na nga utod sa iya mga buluhaton sa sulod sang balay, pagsugat ukon pagdul-ong kon kinahanglanon para makatambong sa Cristiano nga mga miting ang nagakinahanglan sini nga bulig, kag indi mangin kuom sa pagbulig sa mga takus buligan.—Deuteronomio 15:7-10.

⁶ Bisan pa importante man nga maghatag sing materyal nga bulig sa mga katapo sang nagadaku nga Cristiano nga kongregasyon, mas importante ang paghatag sa ila sing espirituwal nga bulig. Ginalaygayan kita nga “palig-onon ang mga mahuyang sing tagiposoon, sakdagon ang mga maluya.” (1 Tesalonica 5:14) “Ang tigulang nga mga babayi” ginapalig-on nga mangin “mga manunudlo sang maayo.” (Tito 2:3, NW) Tuhoy sa Cristiano nga mga manugtatap, ang Biblia nagasiling: “Ang isa ka tawo manginsubong sang palalipdan sa hangin, palanagoan sa unus.”—Isaias 32:2.

7. Ano ang matun-an naton tuhoy sa pagpakita sing kaluoy gikan sa mga disipulo sa Antioquia sang Siria?

⁷ Dugang sa pag-atipan sa balo nga mga babayi, sa mga ilo, kag sa mga nagakinahanglan sing bulig kag pagpalig-on, may mga higayon man nga nag-organisar ang mga kongregasyon sang nahauna nga siglo sing bulig para sa mga tumuluo sa iban nga mga duog. Halimbawa, sang gintagna ni manalagna Agabo nga “magaabut ang daku nga tiggulutum sa bug-os nga kalibutan,” ang mga disipulo sa Antioquia sang Siria ‘nagtapat suno sa ikasarang sang tagsa ka tawo, sa pagpadala sing bulig sa mga kauturan nga nagapuyo sa Judea.’ Ginpadala ini sa mga gulang didto “paagi sa kamut ni Bernabe kag ni Saulo.” (Binuhatan 11:28-30) Kamusta naman karon? Ang “matutom kag mainandamon nga ulipon” nag-organisar sing mga komite agod mag-atipan sa aton mga kauturan nga mahimo maapektuhan sang mga kalamidad subong sang mga bagyo, mga linog, ukon mga tsunami. (Mateo 24:45, NW) Ang boluntaryo nga paggamit sang aton tion, panikasog, kag manggad para sa sini nga kahimusan isa ka maayo nga paagi sa pagpakita sing kaluoy.

“Kon Nagapasulabi Kamo Sing mga Tawo”

8. Paano ang pagpasulabi nagaupang sa pagpakita sing kaluoy?

⁸ Subong paandam batok sa isa ka kinaiya nga  nagaupang sa isa ka tawo sa pagpakita sing kaluoy kag sing “harianon nga kasuguan” sang gugma, nagsulat si Santiago: “Kon nagapasulabi kamo sing mga tawo, nagapakasala kamo, kag ginatagudilian sang kasogoan subong nga mga malinapason.” (Santiago 2:8, 9) Kon magpakita kita sing indi nagakabagay nga pabor sa mga manggaranon ukon sa prominente nga mga tawo, indi kita mangin mahinuklugon sa “pagsinggit sang imol.” (Hulubaton 21:13) Indi kita mangin maluluy-on kon magpakita kita sing paboritismo. Mangin maluluy-on kita kon alalangay ang aton pagpakig-angot sa tanan.

9. Ngaa indi malain nga magpakita kita sing pinasahi nga atension sa mga takus sa sini?

⁹ Buot bala silingon nga kon alalangay ang aton pagpakig-angot sa tanan, indi gid puede nga magpakita kita sing pinasahi nga atension kay bisan sin-o man? Indi naman. Tuhoy sa iya masigkamanugpangabudlay nga si Epafrodito, nagsulat si apostol Pablo sa mga Cristiano sa Filipos: “Padunggan ninyo ang mga subong sa iya.” Ngaa? “Kay tungud sa buluhaton ni Cristo, diotay lang sia mapatay, nga nagapasimpalad sang iya kabuhi sa paghimuno sang inyo pag-alagad sa akon.” (Filipos 2:25, 29, 30) Nagakaigo lamang nga dapat kilalahon ang matutom nga pag-alagad ni Epafrodito. Dugang pa, ang 1 Timoteo 5:17 nagasiling: “Ang mga gulang nga lalaki nga nagadumala sa maayo nga paagi kabigon nga takus sa doble nga kadungganan, ilabi na ang mga nagapangabudlay sing lakas sa paghambal kag pagpanudlo tuhoy sa pulong.” Dapat man kilalahon ang maayo nga espirituwal nga mga kinaiya. Indi pagpakita sing pagpasulabi kon himuon ini.

“Ang Kaalam nga Gikan sa Hitaas . . . Puno sang Kaluoy”

10. Ngaa dapat naton kontrolon ang aton dila?

¹⁰ Tuhoy sa dila, nagsiling si Santiago: “Isa ka malauton nga hulagan, puno sang makamamatay nga hilo. Paagi sini ginapakamaayo ta ang Ginoo kag Amay, kag paagi sini ginapakamalaut ta ang mga tawo, nga ginhimo sa kaangay sang Dios. Gikan sa among baba nagagowa ang pagpakamaayo kag ang pagpakamalaut.” Sa sini nga konteksto, nagdugang pa si Santiago: “Kon kamo may mapait nga kahisa kag maiyaiyahon nga handum sa inyo tagiposoon, dili magpabugal kag dili magbutig batok sa kamatooran. Ining kaalam, wala magikan sa hitaas, kondi dutan-on, lawasnon, yawan-on. Kay kon diin ang kahisa kag maiyaiyahon nga handum, didto ang kagamo kag tagsa ka malaut nga buhat. Apang ang kaalam nga gikan sa hitaas sa nahauna putli, ugaling madaiton, malolo, masinulugton, puno sang kalooy, kag maayong mga bunga, walay pagpangduhaduha ukon pagkasalimpapaw.”—Santiago 3:8-10a, 14-17.

11. Paano kita mangin maluluy-on kon nagahambal kita?

¹¹ Busa, ang aton pagpakighambal sa iban isa ka basehan kon bala may kaalam kita nga “puno sang kalooy.” Ano kon bangod sa kahisa ukon pagpakigbais, magpahambog kita, magbinutig, ukon magpalapta sing makahalalit nga kutsokutso? Nagasiling ang Salmo 94:4: “Ang tanan nga manughikot sang kalautan, nagapabugal sila.” Kag daw ano kadali lang nga maguba sang makahalalit nga paghinambalanay ang maayo nga reputasyon sang isa ka inosente nga tawo! (Salmo 64:2-4) Dugang pa, hunahunaa ang halit nga mahimo sang “saksi nga dimatuud [nga] nagamitlang sing kabutigan.” (Hulubaton 14:5; 1 Hari 21:7-13) Sa tapos mabinagbinag ang tuhoy sa malain nga paggamit sa dila, nagsiling si Santiago: “Mga kauturan ko, ini indi dapat magmangin-amo.” (Santiago 3:10b) Agod makapakita kita sing matuod nga kaluoy, dapat naton gamiton ang aton dila sa matinlo, mahidaiton, kag maalamon nga paagi. Nagsiling si Jesus: “Ako nagasiling sa inyo, nga ang tagsa ka polong nga wala sing pulus nga ipamolong sang mga tawo, magahatag sila sing husay sini sa adlaw sang paghukom.” (Mateo 12:36) Gani, importante gid nga dapat kita mangin maluluy-on kon nagahambal kita!

“Patawaron Ninyo ang mga Tawo sang ila mga Paglapas”

12, 13. (a) Ano ang matun-an naton tuhoy sa kaluoy gikan sa ilustrasyon bahin sa isa ka ulipon nga nakautang sa iya agalon sing daku nga kantidad sang kuarta? (b) Ano ang buot silingon sang pagpatawad sa aton utod sing “tubtub sa kapitoan ka pito”?

¹² Ginapakita sang ilustrasyon ni Jesus tuhoy sa  ulipon nga nakautang sa iya agalon, nga isa ka hari, sing 60,000,000 ka denaryo ang isa pa ka paagi sang pagkamaluluy-on. Bangod indi na gid sia makabayad, nakitluoy ang ulipon. “Bangud sang kalooy,” wala na lang ginpabayad sang agalon ang iya ulipon. Apang naggua ang ulipon kag nakita niya ang iya masigkaulipon nga nakautang sa iya sing isa ka gatos ka denaryo lamang kag wala kaluoy nga ginpabilanggo niya sia. Sang mabalitaan sang agalon ang natabo, ginpatawag niya ang ulipon nga ginpatawad niya kag ginsilingan: “Ikaw nga malaut nga sologoon! Ginpatawad ko ikaw sadto tanan nga utang kay nagpakilooy ka sa akon; kag indi man bala ikaw kuntani magkalooy sa imo masigkasologoon, subong nga ako nagkalooy sa imo?” Gani gintugyan sia sang agalon sa mga manugbilanggo. Ginhinakpan ni Jesus ang ilustrasyon, sa pagsiling: “Amo man ang himoon sa tagsa sa inyo sang akon Amay nga langitnon, kon indi kamo magpatawad sing tinagiposoon sang inyo utud.”—Mateo 18:23-35.

¹³ Maathag gid nga ginapakita sang bag-o lang nasambit nga ilustrasyon nga ang kaluoy nagalakip sing kahanda sa pagpatawad! Ginapatawad ni Jehova ang aton daku nga utang nga amo ang aton sala. Indi bala nga dapat man naton ‘patawaron ang mga tawo sang ila mga paglapas’? (Mateo 6:14, 15) Antes ginsaysay ni Jesus ang ilustrasyon tuhoy sa wala kaluoy nga ulipon, namangkot si Pedro: “Ginoo, makapila bala ang akon utud makasala sa akon, kag mapatawad ko sia? Tubtub bala sa makapito?” Si Jesus nagsabat sa iya, “Wala ako nagasiling sa imo tubtub sa makapito, kondi tubtub sa kapitoan ka pito.” (Mateo 18:21, 22) Huo, ang isa ka maluluy-on nga tawo handa magpatawad sing “tubtub sa kapitoan ka pito,” buot silingon, wala sing limite.

14. Suno sa Mateo 7:1-4, paano kita mangin maluluy-on sa kada adlaw?

¹⁴ Subong isa pa ka paagi sa pagpakita sing kaluoy, nagsiling si Jesus sa Sermon sa Bukid: “Dili kamo maghukom, agud indi kamo paghukman. Kay sa paghukom nga inyo ginahukom hukman kamo . . . Ngaa bala ginamulalong mo ang puling nga yara sa mata sang imo utud, apang wala mo pagsapaka ang balayanon nga yara sa imo kaugalingon nga mata? Ukon paano bala ang pagsiling mo sa imo utud, ‘Ipakuha sa akon ang puling sa imo mata,’ nga may balayanon sa imo kaugalingon nga mata?” (Mateo 7:1-4) Busa, mangin maluluy-on kita sa kada adlaw kon pasensiahan naton ang mga kaluyahon sang iban nga wala sila ginahukman ukon ginamulay.

“Magbuhat Kita Sang Maayo Ayon sa Tanan nga Tawo”

15. Ngaa indi lamang sa mga masigkatumuluo dapat ipakita ang kaluoy?

¹⁵ Bisan pa ginapadaku sang tulun-an sang Santiago sa Biblia nga dapat kita magpakita sing kaluoy sa mga masigkatumuluo, indi buot silingon nga ang mga utod lamang sa sulod sang Cristiano nga kongregasyon ang dapat naton pakitaan sing kaluoy. “Ang GINOO maayo sa tanan,” siling sang Salmo 145:9, “kag ang iya mahinoklogon nga mga kalooy sa ibabaw sang iya tanan nga binuhatan.” Ginalaygayan kita nga ‘magmanug-ilog sang Dios’ kag “magbuhat kita sang maayo ayon sa tanan nga tawo.” (Efeso 5:1; Galacia 6:10) Bisan pa wala naton ginahigugma ang “kalibutan ukon ang mga butang nga yara sa kalibutan,” nagabulig man kita sa mga tawo sa kalibutan nga nagakinahanglan sing bulig.—1 Juan 2:15.

16. Ano nga mga butang ang dapat binagbinagon kon magpakita kita sing kaluoy sa iban?

¹⁶ Subong mga Cristiano, wala kita nagapangalag-ag sa paghatag sing bisan ano nga bulig nga masarangan naton, sa mga biktima sang “wala ginapaabot nga hitabo” ukon yara sa ital-ital nga mga kahimtangan. (Manugwali 9:11, NW)  Siempre, depende sa kahimtangan kon ano ang sarang naton mahimo. (Hulubaton 3:27) Kon maghatag kita sing materyal nga bulig sa iban, dapat kita maghalong nga wala naton sila ginatudluan nga magtinamad. (Hulubaton 20:1, 4; 2 Tesalonica 3:10-12) Busa, ang matuod nga kaluoy kombinasyon sang mahigugmaon nga kaawa ukon simpatiya kag sang maalamon nga pagbinagbinag.

17. Ano ang labing maayo nga paagi nga makapakita kita sing kaluoy sa mga tawo nga indi katapo sang Cristiano nga kongregasyon?

¹⁷ Ang labing maayo nga paagi agod makapakita kita sing kaluoy sa mga tawo nga indi katapo sang Cristiano nga kongregasyon amo ang pagsugid sa ila sing kamatuoran gikan sa Biblia. Ngaa? Bangod kalabanan nga tawo karon nagapangalapkap sa espirituwal nga kadulom. Bangod wala sila makahibalo kon paano nila atubangon ang ila mga problema kag wala man sila sing matuod nga paglaum sa palaabuton, ang kalabanan nga tawo ‘ginalapyo kag nag-aplaag, subong sang mga carnero nga walay manugpahalab.’ (Mateo 9:36) Ang mensahe sang Pulong sang Dios mahimo mangin ‘suga sa ila mga tiil,’ nga magabulig sa ila kon paano atubangon ang mga problema. Mahimo man ini mangin ‘kapawa sa ila banas’ kay ginatagna sang Biblia kon ano ang katuyuan sang Dios sa palaabuton, nga magahatag sa ila sing masanag nga paglaum. (Salmo 119:105) Isa gid ka daku nga pribilehiyo nga isugid ining dalayawon nga mensahe sang kamatuoran sa mga nagakinahanglan sini! Bangod malapit na ang “dakung kangitngitan,” [“dakung kapipit-an,” NW] karon na ang tion nga mangin makugi kita sa pagbantala sing Ginharian kag sa paghimo sing mga disipulo. (Mateo 24:3-8, 21, 22, 36-41; 28:19, 20) Wala na sing iban pa nga maluluy-on nga buhat ang mas importante pa sa sini.

Ihatag ang mga “Butang sa Sulod”

18, 19. Ngaa dapat kita magtinguha nga magpakita sing dugang pa nga kaluoy sa iban?

¹⁸ “Ihatag subong mga dulot tungod sa kaluoy ang mga butang sa sulod,” siling ni Jesus. (Lucas 11:41) Agod ang isa ka maayo nga buhat mangin isa ka matuod nga kaluoy, dapat ini mangin isa ka dulot nga gikan sa sulod—gikan sa isa ka mahigugmaon kag handa nga tagipusuon. (2 Corinto 9:7) Sa isa ka kalibutan diin kinaandan na ang kapintas, kakagod, kag walay pag-ulikid sa mga pag-antos kag mga problema sang iban, makapaumpaw gid ini nga kaluoy!

¹⁹ Gani, tinguhaan naton nga magpakita sing dugang pa nga kaluoy sa iban. Kon himuon naton ini, nagapanikasog gid kita nga mailog ang Dios. Makabulig ini agod mangin mapuslanon kag makaalayaw ang aton pagkabuhi.—Mateo 5:7.

Ano ang Natun-an Mo?

• Ngaa importante gid nga mangin maluluy-on kita sa mga masigkatumuluo?

• Paano kita makapakita sing kaluoy sa sulod sang Cristiano nga kongregasyon?

• Paano kita makahimo sing maayo sa mga tawo nga indi katapo sang kongregasyon?

[Mga Pamangkot sa Pagtinuon]

[Piktyur sa pahina 26]

Maluluy-on nga nagbulig ang Samaritano

[Mga piktyur sa pahina 27]

Maluluy-on nga mga buhat sang mga Cristiano

[Piktyur sa pahina 30]

Ang maayo gid nga paagi sa pagpakita sing kaluoy sa iban nga mga tawo amo ang pagsugid sa ila sang kamatuoran gikan sa Biblia