Pagkuha sing Ihibalo Tuhoy sa Dios—Paano?

Ang iban mahimo nga mangduhaduha kon bala luyag gid sang dios nga ipahayag ang iya kaugalingon sa mga tawo. Kon luyag niya, paano niya ini ginahimo?

ANG Protestante nga Repormador nga si John Calvin sang ika-16 nga siglo husto sa iya paghinakop nga indi gid makilala sang mga tawo ang Dios luwas kon ipahayag niya ang iya kaugalingon sa katawhan. Apang, mahimo nga ginapalibugan sang iban kon bala interesado gid ang Dios sa pagpahayag sang iya kaugalingon sa mga tawo. Kag kon luyag niya, paano niya ini ginahimo?

Si Jehova, ang “Dakung Manunuga,” may rason sa tanan niya nga ginahimo. Kag subong “Labing Gamhanan nga Dios,” masarangan gid niya tumanon ang iya mga katuyuan. (Manugwali 12:1; Exodo 6:3) Makapat-od kita nga handa gid sia sa pagpahayag sang iya mga katuyuan sa katawhan, kay ang iya manalagna nga si Amos gin-inspirar sa pagsulat: “Ang Soberanong Ginuo nga si Jehova indi maghimo sing isa ka butang kon indi niya anay mapahayag ang iya kompidensial nga butang sa iya mga alagad nga mga manalagna.” Apang, talupangda nga ginpahayag sang Dios ang iya mga katuyuan sa iya lamang mga alagad, sa mga nagahigugma gid sa iya. Indi bala makatarunganon ini? Kay sin-o mo bala ginasugid ang imo sekreto? Kay bisan sin-o lang bala ukon sa imo pinakasuod nga mga abyan?—Amos 3:7; Isaias 40:13, 25, 26.

Ang mapainubuson nga mga tawo nagakahayanghag gid sa kaalam kag ihibalo sang Dios, kag nagakaigo gid ini. Apang, kapin pa sa kahayanghag ang kinahanglan kon luyag naton nga makapanginpulos sa kaalam kag ihibalo sang Dios. Ginapadaku sang Biblia nga agod matun-an ang mga panghunahuna sang Dios, kinahanglan naton ang mapainubuson nga tagipusuon: ‘Pakabahandia ang akon mga sugo sa imo. Talupangda sang imo igdulungog ang kaalam. Ihuyog ang imo tagipusuon sa paghantop. Magtuaw ka para sa paghangop kag magbayaw sang imo tingog para sa paghantop. Padayon nga pangitaa ini subong sang pilak.’—Hulubaton 2:1-4.

Sa pagkamatuod, ang isa ka mapainubuson nga tawo nga nagapanikasog sing subong sini makakilala gid sa Dios. Ining dinalan sa tulun-an sang Hulubaton nagapadayon: “Si Jehova nagahatag sing kaalam; gikan sa iya baba nagagua ang ihibalo kag paghantop.” Huo, ang mga sinsero nga nagapangita sing kamatuoran mahimo ‘makahangop sang pagkamatarong kag paghukom kag pagkatadlong, ang bug-os nga dalanon sang kon ano ang maayo.’—Hulubaton 2:6-9.

Pagpangita sa Kamatuoran

Ang The Encyclopedia of Religion nagsiling: “Sa kabuhi sang tawo dapat makilala kon ano ang matuod kag di-matuod, makusog kag maluya, tunay kag limbong, putli kag nadagtaan, maathag kag makalilibog, subong man kon ano ang ginakabig nga sobra gid ukon indi.” Agod mahimo ini, madugay na nga ginpangita sang mga tawo ang kamatuoran. Sa ila pagliso sang ila igtalupangod kay Jehova, nga gintawag sang salmista nga “Dios sang kamatuoran,” nag-uswag ang ila ihibalo sa kamatuoran.—Salmo 31:5.

Ang ngalan nga Jehova literal nga nagakahulugan sa orihinal nga Hebreo sing “Ginapahanabo Niya nga Mangin Amo.” (Genesis 2:4, New World Translation Reference Bible, footnote) Busa, ang kahulugan mismo sang ngalan sang Dios  nagapatalupangod sang iya Pagkamanunuga kag sang iya katuyuan. Sa katunayan, ang pagkilala kag paggamit sang ngalan ni Jehova isa ka tanda sang matuod nga relihion. Ginkilala gid ni Jesus ini nga katunayan. Nagapatuhoy sa iya mga sumulunod, nagsiling sia sa iya pangamuyo sa Dios: “Ginpakilala ko ang imo ngalan sa ila kag ipakilala ko ini, agod ang gugma nga imo ginhigugma sa akon mangin yara sa ila kag ako mahiusa sa ila.”—Juan 17:26.

Ang isa ka Hebreo anay nga si Jose nga nagasalig sa iya pagpakig-abyan sa Dios, sang ginsugo nga patpaton ang kahulugan sang mga damgo, may kompiansa nga nagsiling: “Indi bala iya sang Dios ang mga pagpatpat?”—Genesis 40:8; 41:15, 16.

Mga pila ka siglo sang ulihi, si Hari Nabocodonosor sang Babilonia may damgo nga indi masarangan nga patpaton sang iya mga mangin-alamon. Ang manalagna nga si Daniel nagsiling sa hari: “May isa ka Dios sa mga langit nga Manugpahayag sang mga tinago, kag ginapahibalo niya kay Hari Nabocodonosor kon ano ang mahanabo sa ulihi nga bahin sang mga adlaw.”—Daniel 2:28.

Ginapakita sang halimbawa nanday Jose kag Daniel nga ang kaalam kag ihibalo sang Dios matigayon lamang sang mga nagaalagad kay Jehova nga Dios. Siempre pa, agod matigayon naton ang kahamuot sang Dios ayhan kinahanglan naton isikway ang aton mga pagtamod sang una. Amo sini ang ginhimo sang mga Judiyo nga nangin Cristiano sang unang siglo. Bangod ginpadaku sila nga nagatahod kag nagasunod sa napatok na nga mga kasuguan sang Judiyo nga sistema sang mga butang, kinahanglan nila ang nagakaigo nga tion agod batunon si Jesus subong Mesias. Nagkari sia sa pagtuman sang Mosaikong Kasuguan, nga amo ang “landong sang maayong mga butang nga magaabot.” (Hebreo 10:1; Mateo 5:17; Lucas 24:44, 45) Ginbuslan ini sang “kasuguan ni Cristo,” nga mas superyor sangsa Mosaikong Kasuguan.—Galacia 6:2; Roma 13:10; Santiago 2:8.

Tanan kita nabun-ag sa kalibutan nga nahamulag sa Dios. Bangod sang napanubli nga sala gikan sa una nga mag-asawa, nabun-ag kita nga may kaawayon sa Dios, nga wala sing sibu nga ihibalo tuhoy sa iya mga katuyuan. Nakapanubli man kita sing malimbungon nga tagipusuon. (Jeremias 17:9; Efeso 2:12; 4:18; Colosas 1:21) Agod mangin abyan ang Dios, dapat naton ipahisuno ang aton panghunahuna sa mga dalanon sang Dios. Indi ini mahapos himuon.

Mahimo nga mabudlay isikway ang butig nga relihioso nga mga ideya ukon mga kinabatasan, ilabi na kon gintudlo ini sa aton sugod pa sa pagkabata. Apang maalamon bala nga padayunon ang sayop nga dalanon? Indi gid! Pat-od nga mas maalamon nga bag-uhon sang isa ang iya panghunahuna kag busa kahamut-an sang Dios.

 Pagkilala sang Alagyan nga Ginagamit sang Dios sa Pagtudlo

Sa diin kita makasapo sing bulig agod mahangpan ang Pulong sang kamatuoran kag nian magkabuhi suno sa sini? Sa Israel sang una, gintangdo sang Dios ang masaligan kag mainunungon nga mga tawo sa pagpanguna sa pungsod. Ang Ulo sang Cristianong kongregasyon karon, nga si Cristo, nagagiya man sa mga sinsero nga nagapangita sang kamatuoran. Ginahimo niya ini paagi sa iya masaligan kag mainunungon nga mga sumulunod, nga amo ang ginagamit sa pagtuytoy kag pag-amlig sa mga hanuot nga nagapangita sing kamatuoran. (Mateo 24:45-47; Colosas 1:18) Apang paano makilala sang isa ang alagyan nga ginagamit sang Dios sa pagtudlo?

Ang matuod nga mga sumulunod ni Jesucristo nagatinguha nga ipakita ang mga kinaiya nga ginpadayag ni Jesus subong tawo. Sa sining kalibutan nga nagalala ang kasingki, ang ila talalupangdon nga pagpakita sining espirituwal nga mga kinaiya amo ang rason kon ngaa mahapos makilala ini nga mga sumulunod. (Tan-awa ang kahon sa pahina 6.) Ini bala nga mga kinaiya makita sa imo relihion ukon sa relihion sang imo mga kaingod? Takus gid nga usisaon ini nga butang paagi sa bulig sang Biblia.

Ginaagda ka namon, nga amon bumalasa, nga himuon ini paagi sa isa ka kurso sang pagtuon sa Biblia. Sang nagligad nga tuig, sa promedyo, kapin sa 6,000,000 ka indibiduwal ukon pamilya sa 235 ka kadutaan ang nakapanginpulos sa sini nga kahimusan sang pagtuon sa Biblia sa mga Saksi ni Jehova. Ang pagtigayon sang kaalam kag ihibalo sang Dios isa ka mapinadayunon, makaalayaw, kag makapaladya nga hilikuton. Ngaa indi magtuon sing Biblia agod makatigayon sing kaalam kag ihibalo sang Dios? Isa ini ka hilikuton nga indi mo gid paghinulsulan. Huo, makilala gid naton ang Dios!

[Kahon sa pahina 6]

ANG MGA NAGAPANGHIKOT NAHISANTO SA DIOS . . .

nagapabilin nga neutral sa mga binangig sa politika.—Isaias 2:4.

nagapatubas sing maayong bunga paagi sa paghimo sang kabubut-on sang Dios.—Mateo 7:13-23.

nagapakita sing matuod nga gugma sa isa kag isa.—Juan 13:35; 1 Juan 4:20.

nagapamulong sing nahiusa bisan diin man sila.—Miqueas 2:12.

wala nagailog sang malain nga panimuot kag paggawi sang kalibutan sa palibot nila.—Juan 17:16.

nagapanaksi sang kamatuoran kag nagahimo sing mga disipulo.—Mateo 24:14; 28:19, 20.

regular nga nagatipon agod magpalig-unanay.—Hebreo 10:25.

nagadayaw sa Dios subong internasyonal nga hubon.—Bugna 7:9, 10.

[Mga retrato sa pahina 7]

Ang ihibalo sang Dios matigayon gikan sa indibiduwal, sa pamilya, kag sa kongregasyon