Pag-uswag sa Tunga sang Lainlain nga mga Tumandok sa Uganda

ANG Uganda, nga natung-an sang nasidlangan kag nakatundan nga butkon sang Great Rift Valley sang Sidlangan nga Aprika kag nagalabang sa ekwetor, ginbugayan sing tumalagsahon nga katahom. May lainlain ini nga kinaugali nga mga talan-awon, madabong nga mga pananom, kag makawiwili nga mga kasapatan. Nahamtang sa mataas apang patag nga bahin sang Aprika, haganhagan ang klima diri kag matahom tulukon ang nagakuray nga mga pukatod nga ginatos ka kilometros ang kalabaon.

Pila lamang ka pungsod ang subong sang Uganda nga sa sulod sang indi tanto kalapad nga duog, nagayelo sa isa ka bahin kag sa pihak naman tuman kainit. Sakop sini ang halin sa nagayelo nga putukputukan sang Mountains of the Moon, ang Ruwenzori Mountains, sa katundan tubtob ang lamgod nga kaumhan sa sidlangan. Makakita ka sa kapatagan sini sing mga elepante, mga karabaw, kag mga leon. Ang kabukiran kag madabong nga mga kagulangan sini ginapuy-an sang mga gorilya, mga amu, kag sang kapin sa 1,000 ka espesyi sang mga pispis. Ang daku nga bahin sang kontinente sang Aprika apektado sang tigpalamangag kag tiggulutom, apang ginbugayan ang Uganda sing mga suba kag mga linaw subong sang Victoria, ang ikaduha sa pinakadaku nga tab-ang nga linaw sa kalibutan. Ang gibwangan sang Lake Victoria sa aminhan nagagibwang sa Nile River. Amo gali kon ngaa ginpatuhuyan ni Winston Churchill ini nga pungsod subong “ang perlas sang Aprika”!

“Ang Perlas” Nagainggat Karon

Apang, ang daku gid nga pangganyat sang Uganda amo ang katawhan sini—mainabyanon sila, maabiabihon, kag nanuhaytuhay. Ining “Cristiano” nga pungsod sarang malaragway subong isa ka talabuan sang nanuhaytuhay nga mga tribo kag mga kultura. Bisan karon, ining nanuhaytuhay nga mga tawo makilala paagi sa ila mga tradisyon kag bayo.

Sining karon lang, nagdamo sa Uganda ang nagabaton sa maayong balita sang Biblia tuhoy sa tion nga ang dayon nga paghidait magaluntad sa bug-os nga duta. (Salmo 37:11; Bugna 21:4) Mabudlay dalhon ini nga mensahe sa tanan, sa isa ka pungsod nga daw subong kadaku sa Gran Britanya.

 Gikan sa gamay nga panugod sang mabawtismuhan sa Lake Victoria sang 1955 ang una nga lokal nga residente subong isa ka dedikado nga Saksi ni Jehova, “ang diutay” nangin isa ka libo sang ulihi sang 1992. Sugod sadto, nagpadayon ang pag-uswag. Nagahisanto ini sa makapasalig nga mga pulong sang Dios: “Ako, si Jehova, magapadali sini sa iya kaugalingon nga tion.”—Isaias 60:22.

Paglandas sa Balagbag nga mga Lenguahe

Ingles ang opisyal nga lenguahe kag lapnag nga ginagamit ini, ilabi na sa eskwelahan, apang indi ini ang tumandok nga lenguahe sang kalabanan nga mga taga-Uganda. Gani, sa pagtinguha nga mabantala sa mga tawo ang maayong balita, ginabinagbinag man sang mga Saksi ni Jehova ang iban pa nga mga lenguahe nga lapnag nga ginagamit. Kinahanglan ini bangod masobra sa 80 porsiento sang 25 milyones ka tawo ang nagapuyo sa mga uma nayon ukon gamay nga mga banwa, diin ini nga mga tawo masami nga nagagamit sang ila tumandok nga lenguahe sa ila pagkomunikar sa adlaw-adlaw. Ang paglab-ot sa sini nga mga tawo nga may tuhay nga lenguahe kag mahatag ang ila espirituwal nga mga kinahanglanon nagakinahanglan sing daku nga panikasog.

Walay sapayan sini, nagtinguha ang mga Saksi ni Jehova nga mahatag ining mga kinahanglanon paagi sa pagpanaksi sa mga tawo sa ila mismo lenguahe kag paagi sa paghanda sing mga literatura sa Biblia sa nanuhaytuhay nga mga lenguahe. Sa sanga talatapan sa kapital, ang Kampala, ang grupo sang mga manugbadbad nagabadbad sa apat ka lenguahe: ang Acholi, Lhukonzo, Luganda, kag Runyankore. Dugang pa, madamo ang nagatambong sa mga asambleya nga ginahiwat sa nanuhaytuhay nga mga lenguahe sa bug-os nga pungsod, kapin sa doble nga kadamuon sang mga Saksi ni Jehova. Maathag nga ginapakita sini nga ang mga panikasog nga mabantalaan ang mga tawo nga may nanuhaytuhay nga mga lenguahe nagabulig sa madasig nga pag-uswag sa espirituwal. Apang indi lang ina.

Mga Payunir Nagapanguna sa Hilikuton

Malipayon nga ginasuportahan sang mga kongregasyon ang mga tatlo ka bulan nga kampanya kada tuig, nga sa tion sini ginabantalaan ang naligwin nga mga teritoryo. (Binuhatan 16:9) Nagadugang nga kadamuon sang makugi nga lamharon nga mga payunir, ukon bug-os tion nga mga ebanghelisador, ang nagapanguna sa sining hilikuton. Nagakadto sila sa nabaw-ing nga mga duog nga ang iban sini wala pa gid mabantalai sing maayong balita.

 Duha ka Saksi ang gin-asayn subong mga espesyal payunir sa sulod sang tatlo ka bulan sa Bushenyi, isa ka gamay nga banwa sa nakatundan nga Uganda. Nagbuylog sila sa isahanon lamang nga Saksi ni Jehova sa sina nga duog sa pagbantala kag sa pag-organisar sang Cristianong mga miting. Sa sulod lamang sang isa ka bulan, ang duha ka payunir nagadumala sing regular nga paghinun-anon sa Biblia upod sa 40 ka indibiduwal, ang 17 sini nagsugod na sa pagtambong sa mga miting sang mga Saksi ni Jehova. Nag-asoy ang mga payunir: “Pagligad sang pila ka adlaw, nagkadto sa amon balay ang pila nga nabilinan namon sing brosyur nga Ano ang Ginapatuman Sang Dios sa Aton? * nga ang pila ka pahina sini ginsulatan nila sing mga sabat sa mga pamangkot nga masapwan sa brosyur. Luyag nila mahibaluan kon husto ang ila mga sabat.” Sa karon, may kongregasyon na nga may kaugalingon nga Kingdom Hall sa sina nga banwa.

Duha ka payunir ang nagkadto sa isa ka teritoryo sa nakatundan nga Uganda nga wala pa mabantalai sing maayong balita. Nagsulat sila: “Uhaw gid ang mga tawo sa kamatuoran sang Biblia. Sa sulod sang tatlo ka bulan nga pagtener namon diri, nakasugod kami kag nakadumala sing 86 ka pagtuon sa Biblia.” Wala magdugay, isa ka grupo sang mga Saksi ang pormal nga gintukod sa sina nga duog.

Iban Pa nga Makugi nga mga Manugpangabudlay sa Latagon

Lakip sa makugi nga mga payunir amo ang pila nga nag-alagad sing pila ka tuig na. Antes mangin isa sa mga Saksi ni Jehova, nagatokar anay si Patrick sing klarinet sa banda sang air force sang pangulo sang Uganda nga si Idi Amin. Pagligad sang anom ka bulan nga nabawtismuhan si Patrick sang 1983, nangin bug-os tion nga ministro sia. Sia, karon, isa ka nagalakbay nga manugtatap nga nagaduaw kag nagapalig-on sa mga kongregasyon.

Ginbawtismuhan si Margaret sang 1962. Walay sapayan nga manug-otsenta anyos na sia kag indi makahulaghulag sing normal bangod sang iya problema sa balikawang, mga 70 ka oras ang ginahinguyang niya kada bulan sa pagpaambit sa iya mga isigkatawo sang iya napasad sa Biblia nga paglaum. Ginapasundayag niya ang mga literatura sa isa ka bangko sa gua sang iya balay kag nagapakighambal kay bisan sin-o nga nagalabay nga maluyag mamati sa maayong balita tuhoy sa isa ka malinong nga bag-ong kalibutan.

Si Simon, isa ka mangunguma sa nasidlangan nga Uganda, 16 ka tuig na nga nagapangita sing kamatuoran, sang masalapuan niya sang 1995 ang pila ka literatura nga ginabalhag sang mga Saksi ni Jehova. Ang iya nabasahan nagpahulag sa iya nga maghibalo sing dugang pa tuhoy sa Ginharian sang Dios kag sa matahom nga katuyuan ni Jehova para sa duta. Wala sing Saksi sa Kamuli nga iya ginapuy-an,  gani naglakbay si Simon sing mga 140 kilometros pa Kampala agod pangitaon sila. May kongregasyon na karon sa iya minuro.

“Mapabilin Kami Diri”

Sa iban nga mga bahin sa Aprika, ginapaabot sang madamo nga ang isa ka relihioso nga grupo may nagakaigo nga duog para sa pagsimba. Daw isa ini ka daku gid nga problema para sa pila ka kongregasyon sang mga Saksi ni Jehova, bangod wala sila sing inuggasto para sa pagtukod sing presentable nga Kingdom Hall. Indi malaragway sa pulong ang pasalamat sang mga utod sang, ginsugdan sa bug-os nga kalibutan sang talipuspusan sang 1999 ang isa ka pinadasig nga programa para sa pagtukod sing mga Kingdom Hall. Sa sulod sang nagsunod nga lima ka tuig, 40 ka bag-o nga Kingdom Hall ang nahuman sa Uganda. Sa karon, ang halos tanan nga kongregasyon didto may gamay lang apang presentable nga Kingdom Hall. Ang mensahe nga ginapaalinton sa lokal nga mga komunidad sini nga pagtukod sing mga Kingdom Hall amo, “Mapabilin kami diri.” Nakabulig ini sa pag-uswag.

Ang isa ka gamay nga kongregasyon sa naaminhan nga Uganda nagahiwat anay sang ila mga miting sa idalom sang handong sang madabong nga puno sang paho. Sang makabakal na sing duta, madasig lang nga nahikutar ang mga butang. Upod sa lokal nga mga Saksi, ginsugdan sang mga utod sa konstruksion ang pagtukod sing Kingdom Hall. Nagdayaw ang isa ka prominente nga politiko anay sa sina nga duog sa ila ginahimo. Gintanyag niya nga gamiton anay ang iya garahe para sa ila mga miting tubtob mahuman ang Kingdom Hall. Ginbaton man niya ang pagtuon sa Biblia upod sa isa sa mga boluntaryo sa konstruksion. Sia karon isa ka makugi kag bawtismado nga manugbantala, nga malipayon nga nagasimba kay Jehova sa sinang matahom nga bag-o nga Kingdom Hall!

Sa isa ka proyekto nga pagtukod sing Kingdom Hall sa bagatnan-sidlangan nga bahin sang Uganda, natandog gid ang isa ka lokal nga mason sa pagkamainabyanon, gugma, kag pagbuligay nga napanilagan niya sa tunga sang mga kauturan amo nga nagboluntaryo sia nga magbulig sa hilikuton. Sang malapit na mahuman ang proyekto, nagtrabaho pa gani sia sa bug-os nga gab-i agod mahanda sang mga kauturan ang Kingdom Hall para sa dedikasyon pagkaaga. Nagkomento sia: “Kamo lamang ang matuod gid nga nagahigugmaanay, indi lamang sa hambal.”

Walay Sapayan sang Kagamo, Posible ang Pag-uswag

Bangod sang bag-o nga mga teritoryo nga ginakobrehan sa Uganda, padayon nga nagadamo ang mga Saksi didto kag madamo nga mga interesado ang nagapakig-upod sa mga kongregasyon. Apang, ang isa ka hilingagawon nga alatipanon amo ang madamo nga refugee nga nagpanong sa Uganda. Naapektuhan man ang katawhan ni Jehova sang inaway sibil sa kaiping nga mga pungsod. Ang mga Saksi sa mga refugee camp nagapakita sing talalupangdon nga pagsalig kay Jehova. Ang isa ka anay mataas nga opisyal gikan sa kaiping nga pungsod, nga nakaambit anay sa paghingabot sa mga Saksi sang may pagdumili sa sina nga pungsod, naghinumdom nga komportable sadto ang iya pagkabuhi. Sa tapos matun-an ang Biblia sa isa sa mga refugee camp kag mangin Saksi, nagkomento sia: “Ang materyal nga kahamungayaan kag mataas nga posisyon sa sining kalibutan wala sing matuod nga balor. Bisan pa imol na ako karon kag nagabalatian, mas maayo gid ang akon pagkabuhi karon. Kilala ko si Jehova, kag ginaapresyar ko ang pribilehiyo nga makapangamuyo sa iya. Bisan malig-on ang akon paglaum sa palaabuton, nahangpan ko kon ngaa may mga problema kita karon nga ginabatas. Gani may kalinong ako sa akon kaugalingon nga wala ko gid maeksperiensiahan anay.”

Ginasiling nila nga kon magtubsok ka kuno sing lipak sa matambok nga duta sang Uganda sa gab-i, manggamot na ini pagkaaga. Ginapakita sang espirituwal nga pag-uswag sa Uganda nga matambok man ang espirituwal nga duta diri. Nagapasalamat kita kay Jehova nga Dios nga ginhatagan niya sing tion ang dugang pa sa nanuhaytuhay nga mga tawo sa Uganda nga makatuon tuhoy sa iya Ginharian. Ginpaanggid ni Jesus ang pagkahamili sini sa “isa ka perlas nga may daku nga balor.” Nahangpan ina sang dugang kag dugang pa nga mga tawo sa Uganda.—Mateo 13:45, 46.

[Nota]

[Mga Mapa sa pahina 8]

(Para sa aktual nga pormat, tan-awa ang publikasyon)

SUDAN

UGANDA

Nile River

Kamuli

Tororo

Kampala

Bushenyi

Lake Victoria

KENYA

TANZANIA

RWANDA

[Retrato sa pahina 9]

Tatlo sa madamo nga makugi nga payunir nga mga ministro

[Retrato sa pahina 10]

Si Patrick

[Retrato sa pahina 10]

Si Margaret

[Retrato sa pahina 10]

Si Simon

[Retrato sa pahina 10]

Distrito nga kombension sa Tororo

[Credit Line sang retrato sa pahina 8]

Background: © Uganda Tourist Board