Ang mga Kasapatan Nagahimaya kay Jehova

ANG pagkahalangdon ni Jehova makita sa mga kasapatan. Ginaatipan gid sing maayo sang Dios ang mga kasapatan, subong sang pag-atipan man niya sa katawhan. (Salmo 145:16) Amo nga sayop gid nga mulayon ang Manunuga sang mga kasapatan kag katawhan! Bisan pa matarong nga tawo si Job, ‘ginpakamatarong niya ang iya kaugalingon sa baylo nga ang Dios.’ Gani may mga leksion nga dapat matun-an si Job!​—⁠Job 32:⁠2; 33:8-12; 34:5.

Nahangpan ni Job sa mga halimbawa nga makita sa mga kasapatan, nga ang mga tawo wala sing rason nga duhaduhaan ang mga pamaagi sang Dios. Mangin maathag gid ini kon binagbinagon naton ang mga pinamulong ni Jehova sa iya alagad nga si Job!

Indi Nila Kinahanglan ang Bulig sang Tawo

Indi masabat ni Job ang mga pamangkot sang Dios tuhoy sa mga kasapatan. (Job 38:39-41) Maathag nga nagaaman si Jehova sing kalan-on para sa leon kag uwak nga wala sing bulig sang tawo. Bisan pa ang mga uwak ang nagapangita sing kalan-on, ang ila pagkaon naghalin mismo sa Dios.​—⁠Lucas 12:24.

Wala sing isabat si Job sang ginpamangkot sia sang Dios tuhoy sa talunon nga mga kasapatan. (Job 39:1-8) Wala sing tawo ang sarang makaamlig sa mga kanding nga talunon kag sa bayi nga mga usa.  Kay man, mabudlay gani bisan ang pagpalapit lang sa mga kanding nga talunon! (Salmo 104:18) Bangod ini sa hatag-Dios nga kinaugali nga ang bayi nga usa, nagapanago sa kagulangan kon manugbata. Ginaatipan niya sing maayo ang iya tinday, apang kon ‘magbakod’ na sila, ‘nagalakat sila kag wala na nagabalik.’ Nian, sila na ang bahala sa ila kaugalingon.

Ang zebra hilway nga nagadayandayan, kag ang desyerto nga kapatagan puluy-an sang talunon nga asno. Indi magamit ni Job ang talunon nga asno agod magdala sing mga lulan. Kay nagapangita sia sang “tagsa ka berde nga tanom,” nga nagalagulad sa mga pukatod para halban. Indi pag-ibaylo sining sapat ang iya kahilwayan sa kawayangan para sa mas madali matigayon nga kalan-on sa mga banwa. “Ang mga singgit sang mangangayam indi sini mabatian,” kay nagakuyampad gilayon ang talunon nga asno kon may tawo nga magpalapit sa duog sini.

Masunod nga ginhinambitan sang Dios ang talunon nga baka. (Job 39:9-12) Tuhoy sini, ang taga-Inglaterra nga arkeologo nga si Austen Layard nagsulat: “Ang talunon nga baka, nga masami ginapakita sa mga tinigib, ginakabig nga makahaladlok nga sapat kag ang pagdakop sini isa ka kadungganan kaangay sang leon. Ang hari masami nga makita nga nagapakig-away sa sini, kag ang mga mangangaway nagalagas sa sini paagi sa pagsakay sa kabayo ukon pagdalagan.” (Nineveh and Its Remains, 1849, Volume 2, pahina 326) Apang, wala sing maalam nga tawo ang magatinguha nga kontrolon ining di-makontrol nga talunon nga baka.​—⁠Salmo 22:21.

Ang mga Kapispisan Nagahimaya kay Jehova

Masunod nga ginpamangkot sang Dios si Job tuhoy sa mga kapispisan. (Job 39:13-18) Ang tulabong nagalupad sing mataas paagi sa mabaskog nga mga pakpak sini. (Jeremias 8:7) Ang avestruz naman bisan pa makakapakapa, indi ini makalupad. Indi kaangay sang tulabong, ang avestruz wala nagapugad sa ibabaw sang kahoy. (Salmo 104:17) Nagakutkot sia sing buho sa balas kag didto nagapangitlog. Apang, wala niya ginapatumbayaan ang mga itlog. Ginatabunan niya ini sing balas agod mahuptan ang hustuhan nga temperatura kag ginaatipan nila ini sang sulog nga avestruz.

Ang avestruz daw ‘nagakalipat sa kaalam’ kon mamutikan niya nga may katalagman sa mga manunukob kag daw nagadalagan palayo. Apang, ang An Encyclopedia of Bible Animals nagsiling: “Isa ini ka estratehiya agod tiplangon ang mga manunukob: magapakita ang [mga avestruz] kag magakapakapa sang ila mga pakpak agod kuhaon ang igtalupangod sang bisan ano nga sapat ukon tawo nga nagapangayam, agod ipahilayo sila sa mga itlog.”

Ngaa ‘ginakadlawan sang avestruz ang kabayo kag ang nagasakay sa sini’? Siling sang The World Book Encyclopedia: “Ang avestruz indi makalupad, apang kilala ini nga madasig magdalagan. Ang malaba nga mga tiil sini makatikang sing 15-pie (4.6-metros) sa kadasigon nga tubtob 40 milyas (64 kilometros) por ora.”

 Ang Dios Nagahatag sing Kusog sa Kabayo

Masunod nga ginpamangkot sang Dios si Job tuhoy sa kabayo. (Job 39:19-25) Sang dumaan nga mga tion, ang mga mangangaway nagapakig-away nga nagasakay sa kabayo, kag ang mga kabayo nagaguyod sing mga kalesa nga may isa ka kutsiro kag ayhan duha ka soldado. Tungod kay indi na makahulat sa inaway, nagahirihiri kag nagapangahig ang kabayo sa duta. Wala ini nahadlok kag wala nagaatras sa espada. Sa tunog sang budyong, ang kabayo nga ginagamit sa inaway nagagios nga daw nagasiling, “Aha!” Nagahuyab ini, nga ‘ginahalunhon ang duta.’ Apang, ginatuman niya ang nagasakay sa iya.

Sa kaanggid nga paglaragway, ang arkeologo nga si Layard nagsulat: “Bisan pa madali ini antaon kaangay sang isa ka kordero, kag renda lamang ang kinahanglan agod magsunod sia, kon mabatian sang bayi nga kabayo sang Arabia ang singgit sa inaway sang tribo, kag makita ang nagaharahara nga bangkaw sang nagasakay sa iya, nagabaga ang iya mga mata, nagabalingaso ang iya mapula nga ilong, nagaarko ang iya liog, nagaalsa ang iya ikog kag nagatingkarag ang iya bungaybungay.”​—⁠Discoveries Among the Ruins of Nineveh and Babylon, 1853, pahina 330.

Talupangda ang Dapay kag ang Agila

Ginliso ni Jehova ang iya igtalupangod sa pila pa ka mga kapispisan. (Job 39:26-30) Ang mga dapay ‘nagatimbuok kag nagahumlad sang iya mga pakpak sa kahanginan.’ Sa pagsambit sa peregrine falcon subong ang pinakamadasig maglupad nga pispis, ang The Guinness Book of Records nagsiling nga “makalab-ot [ini] sa pinakadasig sini nga paglupad kon magsurip ini gikan gid sa hitaas samtang nagalupadlupad ini sa iya teritoryo, ukon kon nagadakop sang iya kalan-on sa kahawaan.” Kon nagalupad paidalom, ini nga pispis nagalupad sa kadasigon nga 349 kilometros por ora sa anggulo nga 45-degrees!

Ang mga agila makalupad sa kadasigon nga sobra sa 130 kilometros por ora. Ginpaanggid ni Job ang madasig nga paglipas sang kabuhi sa kadasigon sang agila sa pagpangita sing dalagiton. (Job 9:​25, 26) Ginhatagan kita sang Dios sing kusog nga makabatas, subong nga daw yara kita sa walay kakapoy nga mga pakpak sang nagatimbuok nga agila. (Isaias 40:31) Kon nagalupad, ginapanginpuslan sang agila ang huyop sang mainit nga hangin nga ginatawag thermal. Nagalibot ini sa mainit nga hangin, nga nagapataas pa gid sa iya. Kon nalab-ot na sang agila ang nagakaigo nga kataason, nagasaylo ini sa masunod nga thermal kag nagapalutanglutang didto sing inoras nga may diutay lang nga pagpanikasog.

Ang agila “nagahimo sang iya mga pugad sa mataas” sa indi malab-ot nga kataason, agod malikaw sa katalagman ang iya boto. Gintuga ni Jehova ang mga agila nga may duna nga kaalam agod mahimo ini. Kag bangod sa hatag-Dios nga panan-aw, “ang mga mata [sang agila] nagalantaw sa malayo.” Masentro sang agila ang iya igtalupangod sa iya dalagiton ukon sa isa ka bangkay samtang nagasurip ini bangod sang iya ikasarang nga mabag-o sing insigida ang pagpokus sang iya mga mata. Ang agila mahimo magkaon sing bangkay sang mga sapat, amo nga “kon diin ang pinatay, didto sia.” Ini nga pispis nagapanagit sing magagmay nga mga sapat kag ginadala ini sa iya boto.

Ginsabdong ni Jehova si Job

Antes magpamangkot sing dugang pa tuhoy sa mga kasapatan, ginsabdong sang Dios si Job. Ano ang reaksion ni Job? Nagpaubos sia kag handa nga nagbaton sing dugang pa nga laygay.​—⁠Job 40:1-14.

Sa sining punto sang inspirado nga rekord sang mga eksperiensia ni Job,  natun-an naton ang isa ka importante gid nga leksion. Ini amo: Wala gid kita sing rason nga pangitaan sing sayop ang Labing Gamhanan. Dapat kita magpamulong kag maggawi sa paagi nga nagapahamuot sa aton langitnon nga Amay. Dugang pa, ang aton panguna nga kabalak-an amo dapat ang pagpakabalaan sa balaan nga ngalan ni Jehova kag ang pagbindikar sa iya pagkasoberano.

Ang Behemoth Nagahimaya sa Dios

Liwat nga ginliso sang Dios ang iya igtalupangod sa kasapatan, ginpamangkot niya si Job tuhoy sa Behemoth, nga sa masami ginakilala nga amo ang hippopotamus. (Job 40:15-24) Ang isa ka hamtong nga hippopotamus mga apat tubtob lima ka metro ang kalabaon kag mahimo nagabug-at sing mga 3,600 kilos. Ang ‘kusog sang Behemoth yara sa iya balikawang’​—⁠ang mga maskulo sa buli nga bahin sini. Ang madamol nga panit sang iya tiyan bentaha gid kay ginasagnoy sining lip-ot-tiil nga Behemoth ang iya lawas sa mga kabatuhan sa suba. Pat-od nga wala gid sing padaug ang tawo sa Behemoth, bangod sang mabukod nga lawas sini, daku nga baba, kag makusog nga apipingig.

Ang Behemoth nagatakas sa suba agod magpaayaw sing “hilamon.” Abaw, bisan ang mga kahilamnan sang bug-os nga bukid daw kulang pa sa iya! Kada adlaw, makahalab sia sing mga 90 tubtob 180 kilos nga hilamon. Kon busog na ang Behemoth, nagaluko ini sa idalom sang kahoy nga lotus ukon sa handong sang poplar. Kon magbaha ang suba nga ginaistaran sang hippopotamus, mapabutwa niya ang iya ulo sa tubig kag makalangoy sugata sa sulog. Bangod sang daku kaayo nga baba sang Behemoth kag sang makahaladlok nga mga bangkil sini, mahimo nga wala gid sing kaisog si Job nga kaw-iton ang ilong sini.

Ang Leviathan Nagahimaya sa Dios

Masunod nga nabatian ni Job ang tuhoy sa Leviathan. (Job 41:1-34) Ang Hebreo nga tinaga nagapatuhoy sa “isa ka sapat nga nagakurinot ang panit”​—⁠mahimo nga amo ang buaya. Puede bala mapahampangan ni Job ang Leviathan sa mga kabataan? Indi gid! Masami napamatud-an nga makatalagam gid nga masumalang ini nga tinuga. Sa pagkamatuod, kon tinguhaan sang isa nga daugon ang Leviathan, mahimo nga terible gid ang pagpakig-away amo nga indi na sia magliwat pa!

Samtang ginapabutwa sang Leviathan ang iya ulo sa tubig kon nagasilak ang adlaw, ang iya mga mata nagasiga “kaangay sang mga badlak sang kaagahon.” Ang matig-a nga himbis sang Leviathan maikit gid kag nagadasok ini sa iya panit amo nga mabudlay makalapos ang bala, ano ayhan kon espada kag bangkaw lang. Ang matalom nga mga himbis sa tiyan sang buaya daw “ligis sang linas” sa lunang. Kon maakig, nagalumbayag ini amo nga ang tubig nagabukal kaangay sang inughaplas. Kag bangod sang kadakuon, taming, kag hinganiban sini⁠—makahaladlok nga baba kag makusog nga ikog​—⁠ang Leviathan wala sing ginakahadlukan.

Ginbawi ni Job ang Iya Ginhambal

Ginbaton ni Job nga ‘naghambal sia apang wala makahangop sang mga butang nga tuman ka makatilingala para sa iya.’ (Job 42:1-3) Ginbaton niya ang pagsabdong sang Dios, ginbawi ang iya ginhambal kag naghinulsol. Ginsabdong man ang iya mga kaupdanan, apang ginpakamaayo gid sia sing bugana.​—⁠Job 42:4-17.

Maalamon gid nga dumdumon ang eksperiensia ni Job! Indi naton masabat ang tanan nga mga pamangkot nga ginpamangkot sang Dios sa iya. Apang, sarang kag dapat kita magpakita sing apresasyon sa madamo kag nanuhaytuhay nga makatilingala nga mga tinuga nga nagahimaya kay Jehova.

[Retrato sa pahina 13]

Talunon nga kanding

[Retrato sa pahina 13]

Uwak

[Retrato sa pahina 13]

Bayi nga leon

[Retrato sa pahina 14]

Zebra

[Retrato sa pahina 14]

Nagapalayo ang avestruz sa iya mga itlog, apang wala niya ini ginapabay-an

[Retrato sa pahina 14]

Mga itlog sang avestruz

[Retrato sa pahina 15]

Peregrine falcon

[Credit Line]

Falcon: © Joe McDonald/Visuals Unlimited

[Retrato sa pahina 15]

Bayi nga kabayo sang Arabia

[Retrato sa pahina 15]

Golden eagle

[Retrato sa pahina 16]

Ang Behemoth ginakilala sang kalabanan nga amo ang hippopotamus

[Retrato sa pahina 16]

Ang Leviathan mahimo nga amo ang makusog nga buaya