Nagapakigsugilanon Ka Bala sa Imo mga Hinigugma?

“ANG aton ikasarang sa pagkomunikar sa aton mga hinigugma nagapigaw na gid,” report sang semanal nga pamantalaan nga Polityka sa Poland. Sa Estados Unidos, ginabulubanta nga anom na lamang ka minuto kada adlaw ang ginahinguyang sang mga magtiayon para sa makapalig-on nga pagsugilanunay. Ang pila ka eksperto nagahunahuna nga ang katunga sang tanan nga pagbulagay kag diborsio resulta sining pagnubo.

Kamusta naman ang pagsugilanunay sa ulot sang mga ginikanan kag mga kabataan? Sa masami, “indi ini nangin pagsugilanunay, kundi isa ka interogasyon: Kamusta ang pag-eskwela mo? Kamusta ang imo mga abyan?” suno sa report sa ibabaw. “Bangod sining kahimtangan, paano matun-an sang aton mga kabataan ang pagpalambo sing emosyonal nga mga kaangtanan?” pamangkot sini.

Sanglit ang maayong komunikasyon indi matigayon kon wala sing panikasog, paano naton mapauswag ang aton ikasarang sa pagpakigsugilanon? Ginhatagan kita sang Cristianong disipulo nga si Santiago sining importante nga laygay: “Ang tagsa ka tawo dapat magmadagmit sa pagpamati, magmahinay sa paghambal, magmakuli sa pagpangakig.” (Santiago 1:19) Huo, agod matigayon ang makapalig-on nga paghambalanay, dapat kita mamati sing atentibo kag indi magsapar ukon maghinakop sing temprano. Likawi ang pagmulay bangod makahalit ini sa pagsugilanunay. Dugang pa, naggamit si Jesus sing mataktikanhon nga mga pamangkot, indi agod mag-interogar, kundi agod hibaluon kon ano ang yara sa tagipusuon sang iya tagpalamati kag agod pabakuron ang iya kaangtanan sa ila.​​—⁠Hulubaton 20:⁠5; Mateo 16:13-​17; 17:24-​27.

Ang maayong mga prinsipio nga masapwan sa Biblia nagatudlo sa imo nga maghimo sing una nga tikang sa pagpakigsugilanon kag pagkomunikar sa imo mga hinigugma. Mahimo ini magresulta sa isa ka mainit nga kaangtanan nga magadugay sa sulod sang madamong tinuig​—⁠sa bug-os mo pa gani nga kabuhi.