Ang Pulong ni Jehova Buhi

Talalupangdon nga mga Punto sa Tulun-an nga Ikaduhang Samuel

ANG pagkilala bala sa pagkasoberano ni Jehova nagakinahanglan sang aton himpit nga pagkamatinumanon? Ang tawo bala nga may integridad pirme nagahimo sing matarong sa mga mata sang Dios? Ano nga sahi sang indibiduwal ang nakita sang matuod nga Dios nga “kalahamut-an sa iya tagipusuon”? (1 Samuel 13:14) Ginasabat sang tulun-an sang Biblia nga Ikaduhang Samuel ini nga mga pamangkot.

Ang Ikaduhang Samuel ginsulat nanday Gad kag Natan, ang duha ka manalagna nga suod kay Hari David sang dumaan nga Israel.⁠ * Natapos ini nga isulat sang mga 1040 B.⁠C.⁠E., sang magahingapos na ang 40 ka tuig nga paghari ni David, kag ang tulun-an tuhoy gid kay David kag sa iya kaangtanan kay Jehova. Ining makakulunyag nga sugilanon nagasaysay kon paano ang isa ka pungsod nga pirme may inaway nangin isa ka mahamungaya kag nahiusa nga ginharian sa paggahom sang isa ka isganan nga hari. Ining makawiwili nga drama puno sing tawhanon nga mga emosyon nga ginpabutyag sing tudok.

SI DAVID “NAGDAKU PA KAG NAGDAKU PA”

(2 Samuel 1:1–10:19)

Ang reaksion ni David sa balita tuhoy sa pagkapatay nanday Saul kag Jonatan nagapakita sang iya balatyagon sa ila kag kay Jehova. Si David gintangdo nga hari sang tribo ni Juda sa Hebron. Ang anak ni Saul nga si Is-boset ginhimo nga hari sa nabilin nga bahin sang Israel. Si David “nagdaku pa kag nagdaku pa,” kag pagligad sang mga pito ka tuig kag tunga, ginhimo sia nga hari sa bug-os nga Israel.​—⁠2 Samuel 5:10.

Naagaw ni David ang Jerusalem sa mga Jebusnon kag ginhimo niya ini nga kapital sang iya ginharian. Ang iya una nga panikasog nga sayluhon ang kaban sang katipan sa Jerusalem nagresulta sa kalamidad. Apang, ang ikaduha nga panikasog nagmadinalag-on, kag si David nagsaot sa kalipay. Nakigkatipan si Jehova kay David para sa isa ka ginharian. Nalutos ni David ang iya mga kaaway bangod ang Dios padayon nga nagaupod sa iya.

Sabat sa mga Pamangkot sa Kasulatan:

2:18—Ngaa si Joab kag ang iya duha ka utod nga lalaki gintawag nga tatlo ka anak ni Zeruias, nga ila iloy? Sa Hebreo nga Kasulatan, ang mga kaliwat masami ginaisip paagi sa amay. Ang bana ni Zeruias mahimo nga napatay sing temprano, ukon ayhan ginkabig sia nga indi nagakaigo nga ilakip sa Balaan nga Kasulatan. Posible nga si Zeruias ang ginlista bangod utod sia ukon utod sa amay ni David. (1 Cronica 2:​15, 16) Ginsambit lamang ang amay sang tatlo ka mag-utod may kaangtanan sa iya lulubngan sa Betlehem.​—⁠2 Samuel 2:32.

 3:29—Ano ang kahulugan sang “tawo nga nagauyat sang nagatiyog nga kalinyasan”? Ang mga babayi kinaandan na nga nagahabol sang panapton. Gani, ini nga ekspresyon mahimo nagapatuhoy sa mga lalaki nga indi nagakabagay sa mga hilikuton subong sang pagpakig-away kag sa amo obligado sa paghimo sang hilikuton nga ginahimo sa masami sang isa ka babayi.

5:1, 2—Daw ano pa kadugay si David ginhimo nga hari sa bug-os nga Israel sa tapos nga ginpatay si Is-boset? Daw makatarunganon ihinakop nga ginsugdan ni Is-boset ang iya duha-ka-tuig nga paghari wala madugay nga napatay si Saul, sa tion man nga naghari si David sa Hebron. Si David naggahom sa Juda gikan sa Hebron sing pito ka tuig kag tunga. Wala madugay nga ginhimo sia nga hari sa bug-os nga Israel, ginsaylo niya ang iya kapital sa Jerusalem. Gani, si David nangin hari sa bug-os nga Israel pagligad sang mga lima ka tuig nga napatay si Is-boset.​—⁠2 Samuel 2:​3, 4, 8-11; 5:​4, 5.

8:2—Pila ka Moabinhon ang ginpatay sang nakig-away ang Israel batok sa ila? Ang kadamuon mahimo mahibaluan paagi sa pagtakus sa baylo sang pag-isip. Daw ginpakubay ni David ang mga Moabinhon sa duta. Masunod, gintakus niya ang kubay suno sa kalabaon sang isa ka linya, ukon lubid. Maathag nga duha ka linya nga takus, ukon dos-tersia sang mga Moabinhon, ang ginpatay, kag isa ka linya nga takus, ukon un-tersia sa ila, ang wala ginpatay.

Leksion Para sa Aton:

2:1; 5:19, 23. Namangkot si David kay Jehova antes sia magpuyo sa Hebron kag antes sia makig-away sa iya mga kaaway. Pangayuon man naton ang pag-ubay ni Jehova antes maghimo sing mga desisyon nga makaapektar sa aton espirituwalidad.

3:​26-​30. Ang pagtimalos may makapasubo nga mga resulta.​—⁠Roma 12:17-19.

3:​31-​34; 4:​9-​12. Ang indi pagbalos kag pagtanom sing aligutgot ni David takus ilugon.

5:⁠12. Indi gid naton dapat pagkalimtan nga ginatudluan kita ni Jehova sang iya mga dalanon kag ginapaposible niya nga makatigayon kita sing maayo nga kaangtanan sa iya.

6:​1-7. Bisan pa maayo ang tinutuyo ni David, ang pagtinguha niya nga sayluhon ang Kaban sa karo supak sa sugo sang Dios kag napaslawan ini. (Exodo 25:​13, 14; Numeros 4:​15, 19; 7:7-9) Ang pag-uyat ni Uza sa Kaban nagapakita man nga indi mabag-o sang maayong mga tinutuyo ang mga ginapatuman sang Dios.

6:​8, 9. Sa mabudlay nga kahimtangan, si David nagsingkal anay, nian hinadlukan​—⁠ayhan ginbasol pa gani si Jehova sa trahedya. Maghalong kita nga wala naton ginabasol si Jehova sa mga problema nga resulta sang indi naton pagtuman sa iya mga sugo.

7:​18, 22, 23, 26. Ang pagpaubos, eksklusibo nga debosyon kay Jehova, kag ang interes ni David sa pagbayaw sa ngalan sang Dios mga kinaiya nga dapat naton ilugon.

8:2. Ang tagna nga ginhatag mga 400 ka tuig antes natuman. (Numeros 24:17) Ang pulong ni Jehova pirme nagakatuman.

9:​1, 6, 7. Gintuman ni David ang iya saad. Dapat man kita manikasog nga tumanon ang aton ginsaad.

SI JEHOVA NAGPAHANABO SING KALAMIDAD SA IYA HINAPLAS

(2 Samuel 11:1–20:26)

“Yari ako nagapahanabo sing kalamidad sa imo gikan sa imo kaugalingon nga panimalay,” siling ni Jehova kay David, “kag kuhaon ko ang imo mga asawa gikan sa imo mga mata kag ihatag sila sa imo isigkatawo, kag sia magahulid sa imo mga asawa sa panulok sini nga adlaw.” (2 Samuel 12:11) Ngaa ginhatag ini nga pahibalo? Bangod sang pagpakasala ni David upod kay Batseba. Bisan pa ang mahinulsulon nga si David ginpatawad, wala sia makalikaw sa mga resulta sang iya pagpakasala.

Una ang bata nga ginbun-ag ni Batseba napatay. Nian ang ulay nga anak ni David nga si Tamar ginlugos sang iya utod sa amay nga si Amnon. Bilang pagtimalos, si Amnon ginpatay sang utod ni Tamar nga si Absalom. Si Absalom naghimbon batok sa iya kaugalingon nga amay kag ginproklamar ang iya kaugalingon nga hari sa Hebron. Si David napilitan nga magpalagyo sa  Jerusalem. Si Absalom naghulid sa napulo ka asawa sang iya amay nga nabilin sa pag-atipan sa balay. Naghari lamang liwat si David sang napatay si Absalom. Natapos ang pagribok sang Benjaminhon nga si Sheba sang napatay sia.

Sabat sa mga Pamangkot sa Kasulatan:

14:7—Ano ang ginasimbulo sang “akon nagasiga nga baga”? Ang siga sang mahinay sing baga nga uling ginagamit sa pagpatuhoy sa buhi nga anak.

19:29—Ngaa naakig si David sa paathag ni Mefiboset? Sang mabatian si Mefiboset, ayhan narealisar ni David nga nakasala sia sang nagpati sia sa ginsiling ni Ziba. (2 Samuel 16:1-4; 19:24-28) Mahimo nga nagpaakig ini kay David, kag indi niya luyag nga makabati sing dugang pa tuhoy sa sini.

Leksion Para sa Aton:

11:2-15. Ining tampad nga sugilanon tuhoy sa mga kakulangan ni David nagapamatuod sa kamatuoran nga ang Biblia inspirado nga Pulong sang Dios.

11:16-27. Kon makahimo kita sing mabug-at nga sala, indi naton ini dapat pagtaguon subong sang ginhimo ni David. Sa baylo, dapat naton itu-ad ang aton sala kay Jehova kag magpabulig sa mga gulang sa kongregasyon.​—⁠Hulubaton 28:13; Santiago 5:13-16.

12:1-14. Si Natan nagpahamtang sing isa ka maayo nga halimbawa para sa gintangdo nga mga gulang sa kongregasyon. Dapat nila buligan ang mga nakasala sa pagtadlong sang ila dalanon. Dapat himuon sing lantip sang mga gulang ini nga responsibilidad.

12:15-​23. Bangod gintamod sing husto ni David ang natabo sa iya, nagakaigo ang iya nangin reaksion sa kasisit-an.

15:12; 16:​15, 21, 23. Sang daw magalingkod na sa trono si Absalom, ang maalam nga manuglaygay nga si Ahitofel nagluib bangod sang iya bugal kag ambisyon. Ang kaalam nga wala sing pagpaubos kag pag-unong isa ka siod.

19:​24, 30. Gin-apresyar gid ni Mefiboset ang mahigugmaon nga kaayo ni David. Kinabubut-on nga nagpasakop sia sa desisyon sang hari tuhoy kay Ziba. Ang apresasyon kay Jehova kag sa iya organisasyon dapat magpahulag sa aton nga magpasakop.

20:​21, 22. Bangod sang kaalam sang isa ka tawo, malikawan sang madamo ang kapahamakan.​—⁠Manugwali 9:​14, 15.

MAHULOG KITA “SA KAMOT NI JEHOVA”

(2 Samuel 21:1⁠–​​24:25)

May gutom sa tatlo ka tuig bangod nakasala sa dugo si Saul sang ginpatay niya ang mga Gabaonhon. (Josue 9:15) Bilang pagtimalos sa sini, ginpangabay sang mga Gabaonhon ang pagpatay sa pito ka anak nga lalaki ni Saul. Ginhatag sila ni David sa mga Gabaonhon, kag natapos ang  pamangag sang nag-ulan. Apat ka higante nga Filistinhon ang “nahulog sa kamot ni David kag sa kamot sang iya mga alagad.”​—⁠2 Samuel 21:22.

Si David nakasala sing mabug-at sang ginsugo niya ang ilegal nga pag-isip. Naghinulsol sia kag nagpakamaayo nga mahulog sa “kamot ni Jehova.” (2 Samuel 24:14) Subong resulta, 70,000 ang napatay sa kamatay. Ginsunod ni David ang mga sugo ni Jehova, kag ang salot nauntat.

Sabat sa mga Pamangkot sa Kasulatan:

21:8​​—⁠Ngaa masiling nga ang anak ni Saul nga si Mical may lima ka anak nga lalaki, samtang ginasiling sang 2 Samuel 6:23 nga napatay sia nga walay anak? Ang ginabaton gid nga paathag amo nga mga anak sila sang utod ni Mical nga si Merab, nga napangasawa ni Adriel. Mahimo nga napatay sing temprano si Merab, kag ginpadaku sang walay anak nga si Mical ang mga bata.

21:​9, 10​​—⁠Daw ano kalawig ginbantayan ni Rizpa ang iya duha ka anak nga lalaki kag lima ka apo nga lalaki ni Saul nga ginpatay sang mga Gabaonhon? Ining pito ginbitay “sa nahauna nga mga adlaw sang tig-alani”​—⁠Marso ukon Abril. Ang ila mga bangkay ginpabay-an nga wala malubong sa isa ka bukid. Ginbantayan ni Rizpa ang pito ka bangkay adlaw kag gab-i tubtob ginpakita ni Jehova nga nag-ugdaw na ang iya kaakig paagi sa pagpauntat sang pamangag. Nagaulan lamang sing mabunok kon matapos na ang tig-alani sa Oktubre. Gani, nagbantay si Rizpa sing lima ukon anom ka bulan. Pagkatapos sini, ginpalubong ni David ang mga tul-an sang mga lalaki.

24:1​​—⁠Ngaa ang pag-isip sa mga tawo isa ka mabug-at nga sala para kay David? Ang pag-isip mismo wala ginadumili sa Kasuguan. (Numeros 1:1-3; 26:1-4) Wala ginasugid sang Biblia kon ano ang motibo ni David kon ngaa gin-isip niya ang katawhan. Apang, ginapakita sang 1 Cronica 21:1 nga ginsugyot sia ni Satanas nga himuon ini. Nahibaluan gid ni Joab, ang iya pangulo sang militar, nga ang desisyon ni David nga isipon ang katawhan indi husto, kag ginlaygayan niya si David nga indi ini paghimuon.

Leksion Para sa Aton:

22:​2-​51. Tuman katahom nga ginalaragway sang ambahanon ni David si Jehova subong ang matuod nga Dios, nga takus sang aton bug-os nga pagsalig!

23:15-​17. Ginatahod sing tudok ni David ang kasuguan sang Dios sa kabuhi kag dugo amo kon ngaa sa sining okasyon, wala niya paghimua ang daw kaanggid sa paglapas sa sina nga kasuguan. Dapat naton palambuon ini nga panimuot sa tanan nga sugo sang Dios.

24:10. Ang konsiensia ni David nagpahulag sa iya nga maghinulsol. Sensitibo gid bala ang aton konsiensia agod maghulag sa sini nga paagi?

24:14. Nakahibalo gid si David nga si Jehova mas maluluy-on sangsa mga tawo. May amo man bala kita sini nga pagpati?

24:17. Nahanusbo si David nga ang iya sala nagresulta sa pag-antos sang bug-os nga pungsod. Ang isa ka mahinulsulon nga nakasala dapat magkasubo tungod sa kahuluy-an nga ginhimo niya sa kongregasyon.

Mahimo Kita Mangin ‘Kalahamut-an sa Tagipusuon Sang Dios’

Ang ikaduha nga hari sang Israel ‘isa ka lalaki nga kalahamut-an sa tagipusuon ni Jehova.’ (1 Samuel 13:14) Wala gid ginduhaduhaan ni David ang matarong nga mga talaksan ni Jehova, kag wala niya gintinguhaan ang dalanon nga hilway sa Dios. Kada makasala si David, gin-ako niya ang iya sala, ginbaton ang disiplina, kag gintadlong ang iya dalanon. Si David isa ka tawo nga may integridad. Indi bala maalamon nga mangin kaangay man kita sa iya, ilabi na kon makasala kita?

Ang sugilanon ni David maathag nga nagailustrar nga kon ginakilala naton ang pagkasoberano ni Jehova, dapat naton batunon ang Iya talaksan sa kon ano ang maayo kag malain kag tinguhaan nga sundon ini subong mga manughupot sang integridad. Masarangan naton ini. Nagapasalamat gid kita sa natun-an naton gikan sa tulun-an nga Ikaduhang Samuel. Sa pagkamatuod, ang inspirado nga mensahe sa mga pahina sini buhi kag gamhanan.​—⁠Hebreo 4:12.

[Nota]

[Retrato sa pahina 16]

Ang pagdumdom kon sin-o ang nagpasad sa iya sing malig-on subong hari nakabulig kay David nga magpabilin nga mapainubuson

[Retrato sa pahina 18]

“Yari ako nagapahanabo sing kalamidad sa imo gikan sa imo kaugalingon nga panimalay”

Si Batseba

Si Tamar

Si Amnon