Ang Husto nga Rason sa Pagpati

ANG Koreano nga libro nga 31 Reasons Why Young People Leave the Church nagsiling nga madamo ang nag-untat sa pagsimba bangod wala sila makasapo sing makaalayaw nga mga sabat sa ila mga pamangkot. Bilang halimbawa, nagapamangkot sila, ‘Ngaa ang mga tawo nga nagapati sa Dios nagaantos?’ kag ‘Ngaa dapat namon batunon ang tanan nga ginatudlo sang mga simbahan samtang ang madamo sa mga panudlo sini makalilibog kag nagasumpakilay?’

Madamo ang naghinakop nga wala sing sabat sa Biblia bangod nalugaw-an sila sa mga sabat sang ila klero. Kon ang isa ka klerigo nagapaathag pasad lamang sa iya personal nga opinyon, ang resulta amo sa masami ang sayop nga paghangop, pagsikway pa gani, sa Dios kag sa Biblia.

Amo ini ang naeksperiensiahan ni Abel, nga ginpadaku subong isa ka Lutherano sa Bagatnan nga Aprika. Sia naghinumdom: “Ang simbahan nagatudlo nga ang tanan nga napatay ‘ginkuha’ sang Dios. Apang indi ko mahangpan kon ngaa ang isa ka Dios sang gugma ‘magakuha’ sang mga ginikanan gikan sa ila mga kabataan. Sa kaumhan sang Aprika diin nagdaku ako, wala namon ginaihaw ang munga tubtob nagtalin na ang mga piso. Kon mahibaluan namon nga nagabusong ang bakiya nga baka, ginapaisol namon ang pag-ihaw sa sini tubtob mabun-ag kag malutas ang tinday. Indi ko mahangpan kon ngaa ang isa ka mahigugmaon nga Dios wala nagapakita sing amo man nga patugsiling sa mga tawo.”

Si Aram, nga taga-Canada, may kaanggid man nga mga pagduhaduha. “Sang 13 anyos ako, napatay ang akon amay,” asoy niya. “Sa serbisyo sa lubong, ang isa ka prominente nga klerigo nagpaathag nga luyag sang Dios nga mapatay ang akon amay agod makapakigsuod pa gid sia sa Dios sa langit. ‘Ginakuha sang Dios ang maayo nga mga tawo,’ siling niya, ‘bangod ginahigugma sang Dios ang  mga matarong.’ Indi ko mahangpan kon ngaa makagod gid ang Dios.”

Sang ulihi, si Abel kag si Aram lunsay nakapakig-angot sa mga Saksi ni Jehova, nagtuon sa Biblia upod sa ila kag, sa katapusan, nasapwan nila ang mga sabat sa ila mga pamangkot. Napalambo nila ang gugma sa Dios kag ang isa ka mabakod nga pagtuo sa iya. Sang ulihi, gindedikar nila ang ila kabuhi kay Jehova kag nangin matutom niya nga mga alagad.

Ang Sibu nga Ihibalo—⁠Importante sa Pagpati sang Isa sa Dios

Ano ang matun-an naton gikan sa sini nga mga eksperiensia? Ginasugiran kita sini nga kon tuhoy sa pagpati sa Dios, importante ang sibu nga ihibalo sa Biblia. Ginhambalan ni apostol Pablo ang mga Cristiano sa dumaan nga siudad sang Filipos: “Amo ini ang padayon ko nga ginapangamuyo, nga kabay nga ang inyo gugma magbugana sing labi kag labi pa gid nga may sibu nga ihibalo kag bug-os nga paghantop.” (Filipos 1:9) Ginaangot diri ni Pablo ang gugma sa Dios kag sa mga masigkatumuluo sa sibu nga ihibalo sang Dios kag sa paghantop kon ano ang iya kabubut-on.

Makatarunganon ini, bangod ang una nga kinahanglanon agod masaligan kag mapiyaran ang isa ka tawo amo ang makilala sia​​—⁠kon mas lubos kag sibu nga makilala mo sia, mas daku ang imo pagsalig. Sing kaanggid, ang sibu nga ihibalo ginakinahanglan agod mapahulag ka sa pagpati sa Dios. “Ang pagtuo amo ang masaligan nga pagpaabot sang mga butang nga ginalauman, ang maathag nga pagpasundayag sang mga katunayan bisan nga di-makita,” siling ni Pablo. (Hebreo 11:1) Ang pagpati sa Dios nga wala sing sibu nga ihibalo sa Biblia kaangay sa isa ka balaybalay nga human sa mga baraha. Ang isa ka mahinay nga huyop hustuhan na nga makapatumba sini.

Ang pagtuon sa Biblia makabulig sa imo nga masapwan ang mga sabat sa mga pamangkot kaangay sa madugay nga ginpaligban nanday Abel kag Aram, Ngaa nagakapatay ang mga tawo? Ginapaathag sang Biblia nga “paagi sa isa ka tawo nagsulod ang sala sa kalibutan kag ang kamatayon paagi sa sala, kag busa ang kamatayon naglapnag sa tanan nga tawo bangod sila tanan nakasala.” (Roma 5:12) Ang tawo nagatigulang kag nagakapatay, indi bangod ginakuha sila sang Dios agod mangin kaupod niya, kundi bangod nakasala si Adan. (Genesis 2:​16, 17; 3:​6, 17-​19) Dugang pa, ginapakita sang Biblia ang matuod nga paglaum nga ginatanyag ni Jehova nga Dios. Paagi sa iya Anak, nga si Jesucristo, nagaaman sia sing paglaum nga pagkabanhaw para sa makasasala nga katawhan.​​—⁠Juan 5:​28, 29; Binuhatan 24:15.

Agod buligan kita nga mahangpan ang kamatuoran tuhoy sa pagkabanhaw, ang rekord sang Biblia nagaunod sing pila ka halimbawa sang mga indibiduwal nga ginbanhaw ni Jesus. (Lucas 7:​11-​17; 8:​40-​56; Juan 11:17-​45) Samtang ginabasa mo ining mga kasaysayan sa Biblia, talupangda ang kalipay kag kasadya nga nabatyagan sang mga abyan kag pamilya sang mga ginbanhaw. Talupangda man nga napahulag sila nga dayawon ang Dios kag magtuo kay Jesus.

Ang sibu nga ihibalo tuhoy sa Dios kag sa iya mga katuyuan mahimo may katulad man nga epekto sa mga tawo karon. Madamo sadto ang naligban, nabug-atan, kag nasandad pa gani sa importante nga mga pamangkot nga wala sila sing makita nga makaalayaw nga mga sabat. Apang samtang ginatun-an nila ang Biblia, nasapwan nila ang mga sabat, kag ina nagbag-o sing bug-os sang ila kabuhi.

Ang Gugma sa Dios​​—⁠Panguna Gid nga Rason sa Pag-alagad sa Iya

Samtang importante ang sibu nga ihibalo sa pagtuo sa Dios, labi pa ang kinahanglanon agod mapahulag ang isa sa pagtuman kag sa pag-alagad sa iya. Sang ginpamangkot si Jesus kon ano ang labing daku nga sugo gikan sa Dios, sia nagsiling: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.” (Marcos 12:30) Kon ang isa ka tawo nagahigugma sa Dios sa paagi nga ginsiling ni Jesus, kinabubut-on gid sia nga magatuman kag magaalagad sa Iya. Amo ka bala sina?

Si Rachel, nga pila ka dekada na nga nag-alagad bilang isa ka misyonera sa Korea, may amo sini nga rason sa iya pagtuo: “Ginahunahuna ko ang kaalwan ni Jehova sa iya mga tinuga, ang iya pagkamapinatawaron sa pagpakig-angot niya sa iya katawhan, kag ang iya handum nga makapanginpulos kita paagi sa pagsugid sa aton kon ano ang luyag niya nga himuon naton. Ini tanan nga butang nagapabaskog sang akon gugma sa Dios. Kag ini nga gugma nagapahulag sa akon nga alagaron sia.”

 Si Martha, isa ka balo nga nagapuyo sa Alemanya, nag-alagad kay Jehova sa sulod na sang 48 ka tuig. Nagsiling sia: “Ngaa ginaalagad ko si Jehova? Bangod ginahigugma ko sia. Kada gab-i nagapakigsugilanon ako kay Jehova sa pangamuyo kag ginasugiran ko sia kon daw ano ka daku ang akon pagpasalamat para sa tanan niya nga mga pagpakamaayo, ilabi na para sa halad nga gawad.”

Huo, ang gugma sa Dios nagapahulag sa aton nga alagaron sia sing tinagipusuon. Apang paano mapalambo sang isa ini nga gugma? Ang makapukaw gid sa aton agod magpalambo sing gugma sa Dios amo ang tudok nga apresasyon sa gugma nga iya ginpakita sa aton. Talupangda ining makalilipay nga pahanumdom gikan sa Biblia: “Sia nga wala nagahigugma wala makakilala sa Dios, bangod ang Dios gugma. Sa sini ang gugma sang Dios ginpahayag sa aton kahimtangan, bangod ginpadala sang Dios ang iya bugtong nga Anak sa kalibutan agod maagom naton ang kabuhi paagi sa iya. Sa sini ang gugma amo, indi nga ginhigugma naton ang Dios, kundi nga ginhigugma niya kita kag ginpadala ang iya Anak subong nagatumbas nga halad para sa aton mga sala.”​​—⁠1 Juan 4:​8-​10.

Nahangpan mo bala kon daw ano ka daku ining gugma? Handurawa lang nga daw malumos ka na sa isa ka masulog nga sapa kag gintaya sang isa ka tawo ang iya kabuhi agod luwason ka. Kalimtan mo lang bala sia, ukon indi bala ikaw mangin mapasalamaton gid sa iya? Indi bala handa ka nga himuon ang tanan nga imo masarangan para sa iya? Ang gugma nga ginpakita sang Dios sa pag-aman sang iya Anak, si Jesucristo, bilang ang halad nga gawad mas daku katama kon ipaanggid. (Juan 3:​16; Roma 8:​38, 39) Kon ang imo tagipusuon natandog sang gugma sang Dios, mapahulag ka sa paghigugma kag sa pag-alagad sa iya sing bug-os tagipusuon.

Mga Pagpakamaayo sa Karon kag sa Palaabuton

Bisan pa ang gugma naton sa Dios dapat nga amo ang panguna gid nga rason sa paghimo sang iya kabubut-on, makalilipay mahibaluan nga ginapadyaan sang Dios ang mga nagaalagad sa iya. Si apostol Pablo nagsiling: “Kon wala sing pagtuo imposible nga mapahamut-an sia sing maayo, kay sia nga nagapalapit sa Dios dapat magpati nga amo sia kag nga sia ang nangin manugpadya  sadtong hanuot nga nagapangita sa iya.”​​—⁠Hebreo 11:6.

Yadtong mga nagahigugma kag nagatuman sa Dios ginapakamaayo gid niya. Madamo ang nakaagom sing mas mapagros nga panglawas subong resulta sang pagsunod sa mga prinsipio sang Biblia. (Hulubaton 23:​20, 21; 2 Corinto 7:1) Yadtong nagaaplikar sa mga prinsipio sang Biblia tuhoy sa pagkabunayag kag kapisan masami nga ginasaligan sang ila mga amo kag busa nagaagom sing mas daku nga kalig-unan sa ulubrahan. (Colosas 3:23) Paagi sa pagsalig kay Jehova, ang mga alagad sang Dios nagaagom sing malinong nga hunahuna bisan sa mabudlay nga mga kahimtangan. (Hulubaton 28:25; Filipos 4:​6, 7) Labaw sa tanan, masinaligon sila nga nagalaum sa pagpakamaayo nga magkabuhi sing walay katapusan sa nagahilapit nga Paraiso sa duta.​​—⁠Salmo 37:​11, 29.

Ano ang ginabatyag tuhoy kay Jehova sadtong mga nagaagom sini nga mga pagpakamaayo gikan sa iya? Si Jacqueline, isa ka Cristiano sa Canada, nagapabutyag sang iya apresasyon sa Dios: “Ginahatagan niya kita pirme sining makatilingala nga mga dulot, kag ginaaman niya ang pat-od nga paglaum nga dayon nga kabuhi.” Si Abel, nga ginsambit kaina, nagalaragway sang iya balatyagon sa sining paagi: “Ang paglaum nga magkabuhi sing dayon sa isa ka paraiso nga duta bag-o para sa akon, kag ginakakunyagan ko ini. Apang, bisan pa wala sing Paraiso, nalipay gihapon ako nga ipakita ang akon gugma sa Dios paagi sa pag-alagad sa iya.”

Mahimo Ka Man Makatigayon sing Matuod nga Pagtuo

“Si Jehova sang mga kasuldadusan nagahukom nga may pagkamatarong; ginausisa niya ang mga batobato kag ang tagipusuon,” siling sang Biblia. (Jeremias 11:20) Huo, ginausisa ni Jehova kon ano ang tinago sa nasulod gid nga bahin sang aton pagkatawo. Dapat nga usisaon sang kada isa ang iya kaugalingon nga motibo sa pagpati sa Dios. Ang sayop nga mga pagpati kag mga konsepto tuhoy sa Dios mahimo nga nagdul-ong sa sayop nga mga buhat sang nagligad. Apang ang sibu nga ihibalo sa Biblia makadul-ong sa isa ka husto nga kaangtanan sa Manunuga, si Jehova nga Dios.​​—⁠1 Timoteo 2:​3, 4.

Paagi sa ila kahimusan nga walay bayad nga pagtuon sa Biblia sa puluy-an, ang mga Saksi ni Jehova nagabulig sa mga tawo nga matigayon ang sibu nga ihibalo tuhoy sa Dios. (Mateo 28:20) Madamo sa nagbaton sini nga bulig ang naghigugma sa Dios kag nagpalambo sing matuod nga pagtuo sa iya. Paagi sa pagtuon sa Biblia, naangkon nila “ang praktikal nga kaalam kag ang ikasarang sa paghunahuna,” nga nagabulig sa ila nga ‘maglakat nga may kalig-unan’ sa sining makatalagam nga mga adlaw. (Hulubaton 3:​21-​23) Labi ka importante, karon may paglaum sila “nga sigurado kag malig-on” sa palaabuton. (Hebreo 6:19) Mahimo ka man makatigayon sing matuod nga pagtuo kag makaagom sining mga pagpakamaayo.

[Kahon sa pahina 6]

Makalilibog nga mga Pamangkot nga Nagakinahanglan sing mga Sabat

“Samtang ginahanas ako sa ospital bilang isa ka estudyante sa pagkadoktor, nakita ko ang maayo nga mga tawo nga nagaugayong sa kasakit bangod sa mga balatian kag mga kalamidad. Kon may Dios, ngaa nagakatabo ining mga butang? Ang relihion bala isa lang ka paagi agod makatigayon sing malinong nga hunahuna?”​​—⁠Isa anay ka Presbiteryano sa Korea.

“Nagpalibog ako pirme kon bala ang akon amay, nga isa ka alkoholiko, nagkadto sa impierno ukon sa langit. Nahadlok ako sa mga patay kag sa ideya tuhoy sa kalayuhon nga impierno. Indi ko mahangpan kon ngaa paantuson sing dayon sang isa ka mahigugmaon nga Dios ang isa ka tawo sa impierno.”​​—⁠Isa anay ka Katoliko sa Brazil.

“Ano ang palaabuton sang duta kag sang katawhan? Paano mabuhi sing dayon ang katawhan? Paano matigayon sang katawhan ang matuod nga paghidait?”​​—⁠Isa anay ka Katoliko sa Alemanya.

“Para sa akon walay pulos ang panudlo nga reinkarnasyon. Ang mga sapat wala nagasimba, gani kon sa pila ka rason mabun-ag ka liwat nga isa ka sapat agod bayaran ang imo mga sala, paano mo tadlungon ang mga butang kag mag-uswag gikan sa sina nga kahimtangan?”​​—⁠Isa anay ka Hindu sa Bagatnan nga Aprika.

“Nagdaku ako sa isa ka pamilya nga nagapati sa Confucianismo, kag pirme ako nagapakigbahin sa mga seremonya para sa kapahuwayan sang amon mga katigulangan. Samtang nagapakigbahin ako sa paghanda sa halaran nga lamesa kag nagayaub, nagpalibog ako kon bala ang napatay nga mga katigulangan nagkari agod kaunon ang pagkaon kag agod tan-awon ang amon pagyaub sa ila.”​​—⁠Isa anay ka Confucianista sa Korea.

Nasapwan sining tanan nga indibiduwal ang mga sabat sa ila mga pamangkot sang nagtuon sila sa Biblia upod sa mga Saksi ni Jehova.