Mga Pamangkot Gikan sa mga Bumalasa

Sa 1 Pedro 4:​3, mabasa naton nga ang pila ka Cristiano nagpakigbahin anay sa “ilegal nga mga idolatriya.” Indi bala ang tanan nga idolatriya ilegal, ginapakamalaut kag ginadumilian sang Dios?

Huo, sa pagtamod sang Dios, ang tanan nga idolatriya ilegal. Ang mga luyag nga kahamut-an niya indi dapat magbuhat sang idolatriya.​—⁠1 Corinto 5:​11; Bugna 21:8.

Apang, daw ginapatuhuyan ni apostol Pedro ang idolatriya sa tuhay nga pagtamod. Ang isa ka rason amo nga sa madamong pungsod sang una, kinaandan kag wala ginadumilian sing legal sang mga awtoridad ang idolatriya. Buot silingon, wala ginadumilian sang kasuguan sang pungsod ini nga idolatriya. Ang iban nga idolatriya bahin pa gani sang pagsulundan sang pungsod ukon sang panguluhan. Sa sini nga kahulugan, ang iban nagpakigbahin sa ‘mga idolatriya nga wala sing legal nga pagdumili’ antes nangin mga Cristiano. (New World Translation, 1950 nga edisyon) Halimbawa, matalupangdan nga nagpatindog si Hari Nabocodonosor sang Babilonia sing isa ka idolatroso nga larawan nga bulawan apang wala magsimba sa sini ang mga alagad ni Jehova nga sanday Sadrac, Mesac, kag Abednego.​—⁠Daniel 3:1-12.

Gikan sa lain naman nga pagtamod, madamong idolatroso nga ritwal ang naglakip sang mga buhat nga supak gid sa kasuguan sang kinaugali ukon sa moralidad nga naghalin sa napanubli nga konsiensia. (Roma 2:​14, 15) Nagsulat si apostol Pablo tuhoy sa malaut nga mga buhat nga “batok sa kinaugali” kag “malaw-ay,” kag masami nga bahin ini sang relihioso nga mga ritwal. (Roma 1:​26, 27) Ang mga lalaki kag mga babayi nga nagpakigbahin sa ilegal nga idolatriya wala nagsunod sang pagdumili sang ila kinaugali nga pagbatyag sang husto kag sayop. Nagakaigo gid nga biyaan sadtong nangin mga Cristiano ining malaut nga mga buhat.

Dugang pa sa nasambit na, ginpakamalaut ni Jehova nga Dios ining kinaandan nga mga idolatriya sa tunga sang mga di-Judiyo. Sa amo batok ini sa kasuguan.⁠ *​—⁠Colosas 3:5-7.

[Footnote]