Kinahanglan Naton ang Organisasyon ni Jehova

NAKABATI ka na bala sa isa nga nagsiling, “Nagapati ako sa Dios apang indi sa organisado nga relihion”? Ang kaanggid nga mga pagtamod masami nga ginapabutyag sang mga indibiduwal nga makugi anay nga mga palasimba apang nalugaw-an bangod wala mahatag sang ila relihion ang ila espirituwal nga mga kinahanglanon. Bisan pa ginpaslaw sang relihioso nga mga organisasyon sa kabilugan, madamo ang nagasiling nga luyag gihapon nila nga magsimba sa Dios. Apang, nagapati sila nga maayo pa nga simbahon sia sa ila kaugalingon nga paagi sangsa himuon ini nga nagapakig-upod sa isa ka relihion ukon sa iban pa nga organisasyon.

Ano ang ginasiling sang Biblia? Luyag bala sang Dios nga makig-upod ang mga Cristiano sa isa ka organisasyon?

Ang Una nga mga Cristiano Nakabenepisyo Bangod Organisado

Sang Pentecostes 33 C.⁠E., ginpasagahay ni Jehova ang iya balaan nga espiritu, indi sa pila lamang ka napain nga mga tumuluo, kundi sa isa ka grupo sang mga lalaki kag babayi nga nagtipon “sa isa ka duog,” nga amo, sa naibabaw nga hulot sa siudad sang Jerusalem. (Binuhatan 2:1) Sadto nga tion, nahuman ang Cristianong kongregasyon nga nangin isa ka internasyonal nga organisasyon. Nangin isa ini ka matuod nga pagpakamaayo para sa una nga mga disipulo. Ngaa? Una, ginhatagan sila sing importante nga tulumanon​—⁠ang pagbantala sing maayong balita sang Ginharian sang Dios sa ulihi “sa bug-os napuy-an nga duta.” (Mateo 24:14) Sa kongregasyon matun-an sang bag-o nga mga nakumbertir gikan sa eksperiensiado nga mga masigkatumuluo kon paano himuon ang pagbantala nga hilikuton.

Wala madugay naglapnag ang mensahe sang Ginharian lampas pa sa mga pader sang Jerusalem. Sang tungatunga sang 62 kag 64 C.⁠E., ginsulat ni apostol Pedro ang iya nahauna nga sulat sa mga Cristiano nga “nag-alaplaag sa Ponto, Galacia, Capadocia, Asia, kag Bitinia,” ang tanan sa modernong-adlaw nga Turkey. (1 Pedro 1:1) May mga tumuluo man sa Palestina, Lebanon, Siria, Cipre, Gresya, Creta, kag Italya. Subong sang ginsulat ni Pablo sa mga taga-Colosas sang 60-61 C.⁠E., ang maayong balita “ginbantala sa tanan nga tinuga sa idalom sang langit.”​—⁠Colosas 1:⁠23.

Ang ikaduha nga benepisyo bangod sang pagpakig-upod sa isa ka organisasyon amo ang pagpalig-on nga mahatag sang mga Cristiano sa isa kag isa. Sa pagpakig-upod sa kongregasyon, makapamati ang mga Cristiano sang makapapagsik nga mga pamulongpulong, makatuon sang Sagrado nga Kasulatan sing tingob, makapaambit sang makapabakod sa pagtuo nga mga eksperiensia, kag makabuylog sa mga masigkatumuluo sa pangamuyo. (1 Corinto, kapitulo 14) Kag ang hamtong nga mga lalaki ‘makatatap sa panong sang Dios.’​—⁠1 Pedro 5:⁠2.

 Subong mga katapo sang kongregasyon, nagkilalahay man ang mga Cristiano sa isa kag isa kag naghigugmaanay sa isa kag isa. Sa baylo nga magbatyag nga nabug-atan bangod sang ila pagpakig-upod sa kongregasyon, ang una nga mga Cristiano napabakod kag napalig-on bangod sini.​—⁠Binuhatan 2:​42; 14:​27; 1 Corinto 14:​26; Colosas 4:​15, 16.

Ang isa pa ka rason nga kinahanglanon ang nahiusa bug-os kalibutan nga kongregasyon, ukon organisasyon, amo nga agod mapauswag ang paghiusa. Natun-an sang mga Cristiano nga “maghambal nga may paghilisugot.” (1 Corinto 1:10) Importante ini. Ang mga katapo sang kongregasyon may lainlain nga tinun-an kag gindak-an nga katilingban. Nagpamulong sila sing nanuhaytuhay nga mga lenguahe, kag lainlain gid ang ila personalidad. (Binuhatan 2:​1-11) Kon kaisa, may lainlain gid nga mga opinyon. Apang, nabuligan ang mga Cristiano nga malubad ini nga mga di-paghangpanay sa sulod sang kongregasyon.​—⁠Binuhatan 15:​1, 2; Filipos 4:​2, 3.

Ang serioso nga mga problema nga indi masarangan sang lokal nga mga gulang gindangop sa hamtong nga nagalakbay nga mga manugtatap, kaangay ni Pablo. Ang importante nga mga butang may kahilabtanan sa doktrina gindangop sa nagadumala nga hubon nga nahamtang sa Jerusalem. Ang nagadumala nga hubon una nga ginhuman sang mga apostoles ni Jesucristo apang sang ulihi naglakip man sa mga gulang sa kongregasyon sa Jerusalem. Ginkilala sang tagsa ka kongregasyon ang hatag-Dios nga awtoridad sang nagadumala nga hubon kag sang mga tiglawas sini sa pag-organisar sang ministeryo, pagtangdo sa mga lalaki sa mga palangakuan sa pag-alagad, kag sa paghimo sing mga desisyon sa mga butang may kahilabtanan sa doktrina. Sang ginhusay sang nagadumala nga hubon ang isa ka hulusayon, ginbaton sang mga kongregasyon ang desisyon kag “nagkalipay tungod sang pagpalig-on.”​—⁠Binuhatan 15:​1, 2, 28, 30, 31.

Huo, naggamit si Jehova sing organisasyon sang unang siglo. Apang kamusta karon?

Kinahanglan Naton ang Organisasyon Karon

Kaangay sang ila unang-siglo nga mga katumbas, ginatuman karon sing hanuot sang mga Saksi ni Jehova ang sugo nga ibantala ang maayong balita sang Ginharian. Ang isa ka paagi nga ginahimo nila ini nga hilikuton amo ang pagpanagtag sing mga Biblia kag mga bulig sa pagtuon sing Biblia, nga nagakinahanglan sing pag-organisar.

Ang Cristianong mga publikasyon dapat mahalungon nga ihanda, siguruhon nga husto, imprintahon, kag dayon ipadala sa mga kongregasyon. Ang indibiduwal naman nga mga Cristiano dapat magboluntaryo sa pagdul-ong sing literatura sa mga luyag magbasa sini. Minilyon ang napalab-utan sing mensahe sang Ginharian sa sining paagi. Ginatinguhaan sang mga manugbantala sing maayong balita nga himuon ang ila pagbantala nga hilikuton sa mahim-ong nga paagi, ginapat-od nga wala sing bahin sang teritoryo ang nahikot sing sobra samtang ang iban naman nga bahin napatumbayaan. Ini tanan nagakinahanglan sing pag-organisar.

Sanglit ang “Dios wala sing pinasulabi,” dapat ibadbad ang mga Biblia kag literatura sa Biblia. (Binuhatan 10:34) Sa karon, matigayon ini nga magasin sa 132 ka hambal, kag ang kaupod sini, ang Magmata!, ginabalhag sa 83 ka hambal. Nagakinahanglan ina sang naorganisar-sing-maayo nga mga grupo sang mga manugbadbad sa bug-os nga kalibutan.

Nagabaton sing pagpalig-on ang mga katapo sang kongregasyon kon nagatambong sila sa Cristianong mga miting kag mga asambleya. Didto nagapamati sila sing makapapagsik nga mga pamulongpulong sa Biblia, nagatuon sing Kasulatan sing tingob, nagasugid sing makapabakod nga mga eksperiensia, kag nagabuylog sa mga masigkatumuluo sa pangamuyo. Kag kaangay sang ila mga kauturan sang unang siglo, nakaagom sila sing makapalig-on nga mga pagduaw gikan sa mahigugmaon nga nagalakbay nga mga manugtatap. Sa amo, ang mga Cristiano karon nagahuman sa “isa ka panong, isa ka manugbantay.”​—⁠Juan 10:⁠16.

Matuod, ang mga Saksi ni Jehova indi himpit, ni ang mga kaangay sa ila sang una. Apang, nahiusa sila nga nagapangabudlay sing tingob. Subong resulta, ginahimo ang pagbantala sing Ginharian nga hilikuton sa bug-os nga duta.​—⁠Binuhatan 15:​36-40; Efeso 4:⁠13.

[Retrato sa pahina 31]

Ang mga Cristiano karon nagahuman sa “isa ka panong, isa ka manugbantay”