Report sang mga Manugbantala sang Ginharian

Nakasapo Sia sing Katuyuan sa Kabuhi

KILALA ni Jesus ang iya mga karnero. (Juan 10:14) Kon ang isa ka tawo maayo sing tagipusuon kag nagahigugma sa paghidait kag pagkamatarong, magapalapit sia sa mga sumulunod ni Jesus. Ina nga indibiduwal makasapo sing katuyuan sa kabuhi, subong sang natabo sa isa ka babayi sa Belgium. Amo ini ang iya kasaysayan:

“Sang ang mga Saksi ni Jehova nanuktok sa akon ganhaan, ginapung-awan gid ako kag nagahunahuna sa pagkutol sang akon kabuhi. Naluyagan ko ang ginsiling sang mga Saksi nahanungod sa solusyon sa mga problema sa sining masakiton nga kalibutan apang wala ko maluyagi ang ideya nga ang Dios nadalahig. Walo ka tuig na ako nga nag-untat sa pagkadto sa simbahan, kay naugot ako sa pagkasalimpapaw nga nakita ko didto. Apang, sa mga Saksi, nahantop ko ang kamatuoran sa ginsiling nila kag nahangpan nga, ti, mabudlay gid man mabuhi nga wala ang Dios.

“Sing masubo, pagligad sang pila ka pagduaw, nautod ang akon pagpakig-angot sa mga Saksi. Nagkasubo gid ako. Nanigarilyo ako sing duha ka kaha kada adlaw kag nagsugod sa paggamit sing mga droga. Sa luyag nga masugilanon ko ang akon napatay nga lolo, gintilawtilawan ko ang espiritismo. Daku gid ang akon kahadlok sang isa ka gab-i samtang nagaisahanon ako naeksperiensiahan ko ang mga pagsalakay sang demonyo subong resulta sini! Naglawig ini sing binulan. Kada gab-i nahadlok ako sa ideya nga mag-isahanon.

“Nian, isa ka adlaw nagdayandayan ako, nag-agi sa iban nga alagyan nga tuhay sa akon naandan, kag nakakadto ako sa isa ka ginapatindog nga dakung tinukod. Sa akon kakibot nakita ko didto ang isa ka dakung kadam-an. Sa pagpalapit, nakita ko nga mga Saksi ni Jehova gali sila nga nagapatindog sing Kingdom Hall. Nadumduman ko ang mga pagduaw sang mga Saksi sa akon puluy-an, kag nahunahuna ko kon daw ano ka malipayon kuntani kon ang bug-os nga kalibutan magkabuhi kaangay nila.

“Handum ko gid nga kuntani magabalik ang mga Saksi sa akon puluy-an, gani ginsugilanon ko ang pila sang mga nagapangabudlay sa tilipunan. Nangamuyo ako sa Dios, kag pagligad sang napulo ka adlaw ang lalaki nga nakasugilanon primero sa akon yara sa akon ganhaan. Nanugda sia nga padayunon namon ang pagtuon sa Biblia, kag malipayon ako nga nagpasugot. Sa gilayon gin-agda niya ako nga magtambong sa mga miting sa Kingdom Hall. Ginbaton ko ini. Wala pa gid ako makakita sing subong nga talan-awon! Madugay na ako nangita sing mga tawo nga nagahigugmaanay sa isa kag isa kag malipayon. Kag yari gid man sila!

“Pagkatapos sadto gintambungan ko ang tanan nga mga miting. Pagligad sang tatlo ka semana, gin-untat ko ang malain nga bisyo sang pagpanigarilyo. Ginhaboy ko ang akon mga libro tuhoy sa astrolohiya kag ang akon mga plaka nga may satanikong musika, kag nabatyagan ko nga ang mga demonyo nagapalayo sa akon. Ginkay-o ko ang akon kabuhi suno sa mga talaksan sang Biblia ni Jehova, kag pagligad sang tatlo ka bulan nagsugod ako sa pagbantala sing maayong balita. Pagligad sang anom ka bulan nabawtismuhan ako. Duha ka adlaw pagkatapos sang akon bawtismo, nagsugod ako sa pag-aux­il­iary payunir.

“Nagapasalamat ako kay Jehova tungod sa tanan nga maayong mga butang nga nahimo niya sa akon. Ang akon kabuhi may katuyuan na gid man. Huo, ang ngalan ni Jehova isa ka makusog nga torre diin nakasapo ako sing dalangpan kag pangamlig. (Hulubaton 18:10) Nabatyagan ko gid ang ginbatyag sang salmista sang nagsulat sia sa Salmo 84:10: ‘Ang isa ka adlaw sa sulod sang imo mga luwang labi pa kaayo sa isa ka libo bisan diin! Maayo pa nga ako magmanugbantay sang ganhaan sa balay sang akon Dios sangsa magpuyo sa mga layanglayang sang pagkamalaut.’ ”

Ining mapainubuson nga babayi nakasapo sing katuyuan sa kabuhi. Amo man ang bisan sin-o nga nagapangita kay Jehova nga may maayo nga tagipusuon.