Ginasunod sang mga Cristiano ang mga prinsipio sa Biblia kon nagadesisyon sila kon paano nila maproteksionan kag madepensahan ang ila kaugalingon. Wala sini ginatugot ang paggamit sing armas, pareho sang pusil, riple, ukon iban pa, bilang proteksion sa malain nga tawo. Binagbinaga ang masunod:

Para kay Jehova, sagrado ang kabuhi sang tawo. Nahibaluan ni salmista David nga si Jehova “ang tuburan sang kabuhi.” (Sal. 36:9) Gani, kon nagdesisyon ang isa ka Cristiano nga depensahan ang iya kaugalingon ukon ang iya propiedad, himuon gid niya ang iya masarangan nga indi makapatay sang tawo para indi sia makasala sa dugo.—Deut. 22:8; Sal. 51:14.

Matuod, puede makasala sa dugo ang isa bisan indi pusil ang iya gamiton. Pero mas madali sia makapatay sing tawo kon may pusil sia, aksidente man ini ukon hungod. a Isa pa, mahimo nga tensionado na ang isa nga may tuyo manghalit, gani kon makita niya nga may pusil ang iya biktima, posible gid nga maglala ang sitwasyon kag may mapatay.

Sang nagsiling si Jesus sa iya mga sumulunod nga magdala sila sing mga espada sang gab-i antes sia mapatay, indi ini para sa ila proteksion. (Luc. 22:36, 38) Sa baylo, ginsilingan sila ni  Jesus nga magdala sang espada para tudluan sila nga indi sila dapat magbalos bisan pa halitan sila sang armado nga mga tawo. (Luc. 22:52) Sang ginlabo ni Pedro ang ulipon sang mataas nga saserdote, ginsugo ni Jesus si Pedro: “Itagob ang imo espada.” Dayon ginhambal ni Jesus ang isa ka prinsipio nga nagagiya sa iya mga sumulunod asta subong: “Ang tanan nga nagagamit sang espada mapatay sa espada.”—Mat. 26:51, 52.

Suno sa Miqueas 4:3, ang katawhan sang Dios ‘nagasalsal sang ila mga espada nga mangin mga punta sang arado kag sang ila mga bangkaw nga mangin mga garab nga inughagbas.’ Amo ini nga kinaiya ang nagapakilala sa matuod nga mga Cristiano. Ginatuman nila ang ginsugo sang Dios paagi kay apostol Pablo: “Indi magbalos sing malaut sa malaut kay bisan sin-o. . . . Himua ang masarangan ninyo sa pagpakighidait sa tanan nga tawo.” (Roma 12:17, 18) Gintuman ini ni Pablo bisan pa naeksperiensiahan niya ang madamo nga kabudlayan, lakip ang ‘katalagman sa mga kawatan.’ Wala gid niya ginlapas ang mga prinsipio sa Kasulatan para lang maproteksionan ang iya kaugalingon. (2 Cor. 11:26) Sa baylo, nagsalig sia sa Dios kag sa kaalam halin sa Pulong sang Dios nga “mas maayo pa sangsa mga hinganiban sa inaway.”—Man. 9:18.

Mas ginapabaloran sang mga Cristiano ang kabuhi sangsa materyal nga mga butang. “Bisan pa ang tawo madamo sing pagkabutang, indi ini makahatag sa iya sang kabuhi.” (Luc. 12:15) Gani, kon indi naton mapunggan ang kawatan nga may armas paagi sa malulo nga panghambal, sundon naton ang ginsiling ni Jesus: “Indi pagbalusi ang malauton.” Mahimo magkahulugan ini nga ihatag naton sa iya ang bisan ano nga gusto niya. (Mat. 5:39, 40; Luc. 6:29) b Siempre, mas maayo gihapon kon malikawan naton nga mabiktima sang bayolente nga mga kriminal. Posible ini kon likawan naton “ang pagpadayawdayaw sang palangabuhian” naton kag kon kilala kita nga mahidaiton nga mga Saksi ni Jehova sang aton mga kaingod.—1 Juan 2:16; Hulu. 18:10.

Ginarespeto sang mga Cristiano ang konsiensia sang iban. (Roma 14:21) Mahimo nga makibot ukon masandad pa gani ang iban nga kauturan kon mahibaluan nila nga may pusil ang isa ka utod para gamiton bilang proteksion sa malain nga tawo. Pero bangod sa gugma, mas unahon naton ang kaayuhan sang iban sangsa aton kaugalingon, kag indi naton pag-ipilit ang aton kinamatarong.—1 Cor. 10:32, 33; 13:4, 5.

Ginatinguhaan sang mga Cristiano nga magpakita sang maayo nga halimbawa. (2 Cor. 4:2; 1 Ped. 5:2, 3) Kon ang isa ka Cristiano may pusil para gamiton bilang proteksion sa malain nga tawo, laygayan sia sang mga gulang halin sa Kasulatan. Kon magdesisyon sia nga magpanag-iya gihapon sing pusil, indi sia maayo nga halimbawa. Gani indi sia mahatagan sang mga responsibilidad ukon pinasahi nga mga pribilehiyo sa kongregasyon. Amo man ang isa ka Cristiano nga nagadala sang armas bangod sang iya trabaho. Mas maayo kon magpangita sia sang iban nga trabaho. c

Dapat ang Cristiano mismo ang magdesisyon kon paano niya proteksionan ang iya kaugalingon, ang iya pamilya, ukon ang iya pagkabutang, kag kon ano ang batunon niya nga trabaho. Pero dapat sia magdesisyon base sa mga prinsipio sa Biblia. Makita sa sini nga mga prinsipio ang kaalam sang Dios kag ginhatag niya ini bangod palangga niya kita. Gani ang hamtong sa espirituwal nga mga Cristiano indi magapanag-iya sing armas bilang proteksion sa malain nga tawo. Nahibaluan nila nga ang matuod kag permanente nga proteksion matigayon sang mga nagasalig sa Dios paagi sa pagkabuhi suno sa mga prinsipio sa Biblia.—Sal. 97:10; Hulu. 1:33; 2:6, 7.