1, 2. Ngaa dapat naton binagbinagon kon paano malugpayan ang mga namatyan? (Tan-awa ang piktyur sa umpisa sini nga artikulo.)

 “SANG mapatay ang amon bata nga lalaki, halos isa ka tuig gid nga nagbatyag kami sing grabe nga kasakit,” siling ni Susi. Nagsiling ang isa pa ka utod nga sang hinali nga napatay ang iya asawa, nakabatyag sia sang “indi malaragway nga kasakit sa lawas.” Makapasubo gid nga madamo ang nagabatyag sini nga kasakit. Madamo sa Cristianong kongregasyon subong ang wala nagapensar nga mapatay ang ila pinalangga antes sang Armageddon. Mahimo nga napatay man ang imo pinalangga ukon may kilala ka nga namatyan. Basi nakapamangkot ka, ‘Paano mabuligan ang mga nagapangasubo bangod napatay ang ila pinalangga?’

² Basi may nagsiling sa imo nga madula lang ang kasubo sa pagligad sang tion. Pero matuod gid bala ini? Nagsiling ang isa ka balo, “Para sa akon, madula lang ang kasubo sang isa depende sa kon ano ang iya ginahimo samtang nagaligad ang tion.” Huo, pareho sa pilas, ang ginabatyag nga kasakit mahimo maghaganhagan pagligad sang tion kon bulngon ini. Ano gid ang makabulig  sa mga namatyan para maghaganhagan ang ila ginabatyag nga kasakit?

3, 4. Ngaa sigurado kita nga nahangpan ni Jehova ang ginabatyag sang napatyan sang pinalangga?

³ Ang panguna nga nagalugpay sa aton amo si Jehova, ang aton maluluy-on nga Amay sa langit. (Basaha ang 2 Corinto 1:3, 4.) Si Jehova ang panguna nga halimbawa sa pagpakita sing empatiya, kag ginpasalig niya ang iya katawhan: “Ako mismo ang nagalugpay sa imo.”—Isa. 51:12; Sal. 119:50, 52, 76.

⁴ Ang aton Amay nga may mapinalanggaon nga kaluoy nakaeksperiensia man nga mapatyan sang pinalangga, pareho nanday Abraham, Isaac, Jacob, Moises, kag Hari David. (Num. 12:6-8; Mat. 22:31, 32; Binu. 13:22) Ginapasalig kita sang Pulong sang Dios nga ginakalangkagan kag ginahandum ni Jehova nga banhawon sila. (Job 14:14, 15) Sa sina nga tion, malipayon na sila kag may maayo nga panglawas. Dumduma man nga nag-antos kag napatay ang pinalangga gid nga Anak sang Dios, “ang iya kalipay.” (Hulu. 8:22, 30) Indi gid naton malaragway ang kasakit nga ginbatyag ni Jehova sadto.—Juan 5:20; 10:17.

5, 6. Paano kita ginalugpayan ni Jehova?

⁵ Makasalig gid kita nga buligan kita ni Jehova. Gani isugid gid naton sa iya sa pangamuyo ang ginabatyag naton nga kasubo. Makapahalipay gid mahibaluan nga nahangpan ni Jehova ang ginabatyag naton kag ginalugpayan niya kita! Paano niya ini ginahimo?

⁶ Ginabuligan kita sang Dios paagi sa ‘pagpabakod sang balaan nga espiritu.’ (Binu. 9:31) Malugpayan gid kita sang aktibo nga puersa sang Dios. Nagpromisa si Jesus nga ang aton Amay sa langit ‘magahatag gid sang balaan nga espiritu sa mga nagapangayo sa iya.’ (Luc. 11:13) Si Susi nga ginsambit kaina nagsiling: “Pila ka beses nga nagluhod kami kag nagpangabay kay Jehova nga lugpayan niya kami. Nabatyagan gid namon nga ginbantayan sang paghidait sang Dios ang amon tagipusuon kag hunahuna.”—Basaha ang Filipos 4:6, 7.

7, 8. Ngaa makasalig kita nga malugpayan kita ni Jesus?

⁷ Ang pagpalangga kag empatiya ni Jehova himpit nga ginpakita sang iya maluluy-on nga Anak nga si Jesus sang ari sia sa duta paagi sa iya ginhambal kag ginhimo. (Juan 5:19) Ginpadala sang Dios si Jesus para lugpayan ang “mga nagakalisod” kag ang “tanan nga nagalalaw.” (Isa. 61:1, 2; Luc. 4:17-21) Gani kilala sia nga maluluy-on gid kay nahangpan niya ang ginabatyag sang mga tawo nga nagaantos kag gusto gid niya sila buligan.—Heb. 2:17.

⁸ Naeksperiensiahan man ni Jesus nga mapatyan sang mga miembro sang pamilya kag mga abyan. Posible nga pamatan-on pa si Jesus sang napatay si Jose nga nag-adoptar sa iya. a Handurawa ang ginbatyag nga kasubo sang mapinalanggaon nga si Jesus, nga mahimo isa ka tin-edyer ukon mga 20 anyos sadto. Mahimo nga nasubuan man sia kay nagakalisod ang iya iloy kag mga utod.

9. Paano ginpakita ni Jesus nga may empatiya sia sang mapatay si Lazaro?

⁹ Sa tion sang ministeryo ni Jesus,  ginpakita niya nga nahangpan niya ang mga tawo kag may empatiya sia sa ila. Halimbawa, sang mapatay ang pinalangga niya nga abyan nga si Lazaro, nabatyagan man niya ang grabe nga kasubo nanday Maria kag Marta, bisan pa nahibaluan niya nga banhawon niya si Lazaro. Natandog gid ang iya balatyagon amo nga naghibi sia.—Juan 11:33-36.

10. Ngaa makasalig kita nga nahangpan ni Jesus ang aton ginabatyag?

¹⁰ Paano makabulig sa aton ang paglugpay ni Jesus sadto? Ginapasalig kita sang Kasulatan nga “si Jesucristo amo gihapon halin sadto, subong, kag tubtob san-o.” (Heb. 13:8) Ang “Pangulo nga Ahente sang kabuhi” nakabatyag mismo sang kasubo, gani “mahangpan niya ang kahimtangan sang mga ginatilawan kag buligan niya sila.” (Binu. 3:15; Heb. 2:10, 18) Gani makasalig kita nga matandog gihapon ang balatyagon sang Cristo kon nagaantos kita. Mahangpan niya ang ginabatyag naton nga kasubo kag lugpayan niya kita “sa tion nga nagakinahanglan kita sang bulig.”—Basaha ang Hebreo 4:15, 16.

11. Ano nga mga teksto ang nakapabakod gid sa imo?

¹¹ Ang rekord parte sa kasubo ni Jesus sang mapatay si Lazaro isa lamang sa madamo nga teksto sa Pulong sang Dios nga makalugpay kag makapabakod. Matuod ini “kay ang tanan nga butang nga ginsulat sadto ginsulat sa pagtudlo sa aton. Nagahatag ini sa aton sing paglaum bangod ining Kasulatan nagabulig sa aton sa pagbatas kag nagapabakod sa aton.” (Roma 15:4) Kon nagapangasubo ka bangod napatay ang imo pinalangga, mapabakod ka man sang masunod nga mga teksto:

•   “Malapit si Jehova sa mga nagaantos; ginaluwas niya ang mga nalisdan.”—Sal. 34:18, 19.

•   “Sang nagdamo ang akon kabalaka, ginlugpayan kag ginpaumpawan mo [Jehova] ako.”—Sal. 94:19.

•   “Ginahigugma kita sang Dios nga aton Amay, kag bangod sang iya kaayo ginhatagan niya kita sang wala sing katapusan nga lugpay kag paglaum. Ginapangamuyo namon nga Sia kag si Ginuong Jesucristo maglugpay sang inyo tagipusuon kag magpalig-on sa inyo.”—2 Tes. 2:16, 17. b

12. Paano naton malugpayan ang iban?

¹² Makalugpay man ang Cristianong kongregasyon sa mga nagapangasubo bangod napatay ang ila pinalangga. (Basaha ang 1 Tesalonica 5:11.) Paano mo mapabakod kag malugpayan ang may “nadugmok nga espiritu”? (Hulu. 17:22) Dumduma nga may “tion sa paghipos kag tion sa paghambal.” (Man. 3:7) Nagsiling ang balo nga si Dalene: “Dapat ihambal sang mga namatyan ang ila ginahunahuna kag ginabatyag. Gani ang pinakamaayo nga mahimo mo para sa ila amo ang pamatian sila, kag pabay-an lang sila nga ihambal ini.” Nagsiling man si Junia, nga may utod nga naghikog: “Bisan pa indi mo mahangpan sing bug-os ang ila kalisod, importante gid sa ila nga gusto mo mahangpan ang ila ginabatyag.”

13. Ano ang dapat naton dumdumon parte sa pagbatyag sing kasubo?

¹³ Dumdumon man naton nga indi palareho ang aton reaksion sa kasubo. May tion nga kita lang ang nakaintiende sang aton kasakit, kag basi indi pa gani naton mapaathag  kon ano gid ang aton ginabatyag. Ang Pulong sang Dios nagsiling: “Ang tagipusuon nakahibalo sang kapait nga ginabatyag sini, kag wala sing iban nga makahangop sang kalipay sini.” (Hulu. 14:10) Bisan pa isugid sang isa ang iya ginabatyag, kon kaisa mahimo nga indi sia mahangpan dayon sang iban.

14. Ano ang isiling naton sa mga namatyan para malugpayan sila?

¹⁴ Gani indi man mahapos kon ano ang isiling sa isa nga nagapangasubo nga napatyan sang pinalangga. Pero ginasiling sang Biblia nga “ang pulong sang maalamon makapaayo.” (Hulu. 12:18) Para lugpayan ang iban, madamo ang naggamit sang brosyur nga Kon ang Isa nga Ginahigugma Mo Mapatay. c Pero sa masami, ang pinakamaayo nga mabulig mo amo ang “maghibi upod sa mga tawo nga nagahibi.” (Roma 12:15) “Ginahibi ko na lang ang akon ginabatyag,” siling ni Gaby sang napatay ang iya bana. “Gani daw maumpawan ako kon updan ako sang akon mga abyan maghibi. Mabatyagan ko nga wala ako nagaisahanon sa akon kasubo.”

15. Paano naton malugpayan ang iban kon nabudlayan kita kon ano ang ihambal sa ila sing personal? (Tan-awa man ang kahon nga “ Makapaumpaw nga mga Tinaga.”)

¹⁵ Kon nabudlayan ka kon ano ang ihambal sing personal, basi mas mahapos sa imo ang magpadala sing card, e-mail, sulat, ukon mag-text. Puede mo isulat ang isa ka teksto nga makapabakod, ang parte sa kinaiya sang napatay, ukon ang parte sa isa ka makalilipay nga handumanan. “Ang mga ginasulat nga pagpalig-on kag mga imbitasyon sang mga utod nagapabakod gid sa akon,” siling ni Junia. “Mabatyagan ko gid nga ginapalangga ako kag ginaulikdan.”

16. Ano pa ang isa ka paagi nga malugpayan mo ang iban?

 ¹⁶ Makabulig man kon ipangamuyo mo ang utod nga namatyan ukon kon mangamuyo ka upod sa iya. Daw mabudlay ini himuon bangod emosyonal ang tanan, pero makalugpay gid ang imo tinagipusuon nga pangamuyo, bisan pa nagahibi ka kag nagakurog ang imo tingog. “Kon duawon ako sang mga utod nga babayi,” siling ni Dalene, “ginapangabay ko sila nga mangamuyo. Masami nga nabudlayan sila sa pag-umpisa, pero kon mahambal na nila ang pila ka dinalan, nagabaskog na ang ila tingog sa ila tinagipusuon nga pagpangamuyo. Napalig-on gid ako bangod sang ila mabakod nga pagtuo, gugma, kag pag-ulikid.”

17-19. Ngaa dapat padayon kita nga maglugpay sa iban?

¹⁷ Indi palareho ang mga tawo kon parte sa kalawigon sang ila pagpangalisod. Kon mapatyan ang isa, madamo nga abyan kag paryente ang magakadto sa paglugpay sa iya, pero mapauli man sila sa ulihi. Gani sa pagligad sang mga binulan, mangin handa gihapon sa pagbulig sa namatyan. “Ang matuod nga abyan nagahigugma sa tanan nga tion, kag isa ka utod nga masaligan sa tion sang kalisdanan.” (Hulu. 17:17) Dapat padayon nga lugpayan sang mga Cristiano ang ila namatyan nga utod nga nagapangasubo.—Basaha ang 1 Tesalonica 3:7.

¹⁸ Dumduma nga may mga butang nga hinali lang magpasubo sa mga namatyan, pareho sang petsa sang anibersaryo, isa ka kanta, piktyur, hitabo, ukon kon may mapanimahuan sila, mabatian nga huni, ukon bisan ang tiempo. Masakit gid sa isa ka balo kon nagaisahanon na lang sia sa ginahimo nila nga mag-asawa sang una, halimbawa sa pagtambong sa asembleya ukon sa Memoryal. “Ginpaabot ko na nga masubo gid ang anibersaryo sang amon kasal,” siling sang isa ka utod nga lalaki, “kag nasubuan gid ako. Pero para indi ako mag-isahanon, may ginplano ang pila ka utod nga gamay nga tinipontipon upod sa akon suod nga mga abyan.”

¹⁹ Pero dumduma man nga indi lang sa pinasahi nga mga okasyon dapat pabakuron ang mga namatyan. “May maayo gid nga resulta ang pagbulig sang iban kag pagpakig-upod nila sa akon bisan pa indi tion sang anibersaryo,” siling ni Junia. “Nabuligan gid ako kag napabakod sa tion nga wala ko ini ginapaabot.” Matuod, indi naton madula ang tanan nga kasubo sang mga napatyan sang pinalangga, pero malugpayan naton sila kag mapabakod paagi sa pagbulig sa ila. (1 Juan 3:18) Nagsiling si Gaby: “Nagapasalamat gid ako kay Jehova bangod ginbuligan ako sang mapinalanggaon nga mga gulang sa akon mabudlay nga kahimtangan. Paagi sa ila, nabatyagan ko ang pagpalangga ni Jehova nga daw ginahakos niya ako.”

20. Ngaa malugpayan gid kita sang mga promisa ni Jehova?

²⁰ Makapahalipay gid mahibaluan nga ginalugpayan kita ni Jehova nga Dios, kag dulaon gid niya ang kasubo kon “ang tanan nga yara sa handumanan nga mga lulubngan makabati sang [tingog sang Cristo] kag magagua.” (Juan 5:28, 29) Nagpromisa ang Dios nga “dulaon niya sing dayon ang kamatayon, kag pahiran sang Soberanong Ginuong Jehova ang luha sa tanan nga nawong.” (Isa. 25:8) Sa sina nga tion, ang tanan nga nagaistar sa duta indi na “maghibi upod sa mga tawo nga nagahibi,” kundi ‘magakasadya na sila upod sa mga tawo nga nagakasadya.’—Roma 12:15.