1-3. Ano ang wala ginhimo sang manalagna nga halin sa Juda, kag ano ang resulta? (Tan-awa ang piktyur sa umpisa sini nga artikulo.)

SANG nagagahom si Hari Jeroboam, ginpakadto ni Jehova ang isa ka manalagna halin sa Juda para isugid ang mensahe sang paghukom sa sining apostata nga hari sang Israel. Ginsugid sining mapainubuson nga manalagna ang mensahe sang Dios, kag gin-amligan sia ni Jehova sang naakig sa iya si Jeroboam.—1 Hari 13:1-10.

² Sang nagapauli na ang manalagna, nasugata niya ang isa ka tigulang nga taga-Betel. Ang tigulang nagsiling nga manalagna man sia kuno ni Jehova. Nagbinutig sia sa manalagna amo nga wala sini gintuman ang sugo ni Jehova nga ‘indi magkaon ukon mag-inom sa Israel’ kag ‘indi magbalik sa iya gin-agyan.’ Wala mahamuot si Jehova sa sini. Sang ulihi, pagpauli sang manalagna, ginsugata sia sang leon sa dalan kag ginpatay sia sini.—1 Hari 13:11-24.

³ Ngaa nangin makahas ang maugdang anay nga manalagna kag nagpamati sa nagbinutig nga tigulang? Wala ini ginsugid sang Biblia. Pero mahimo nga nalipatan gid niya nga dapat sia ‘maglakat sing maugdang upod sa Dios.’ (Basaha ang  Miqueas 6:8.) Sa Biblia, ang paglakat upod kay Jehova nagakahulugan sing pagsalig sa iya, pagtuman sa iya bilang Soberano, kag pagsunod sa iya panuytoy. Nahibaluan sang maugdang nga tawo nga dapat sia pirme mangamuyo sa iya mahigugmaon kag labing gamhanan nga Amay. Namangkot kuntani ang manalagna kay Jehova para athagon ang Iya sugo, pero indi naton mabasa sa Kasulatan nga ginhimo niya ini. Kon kaisa, dapat man kita maghimo sang mabudlay nga mga desisyon, kag daw indi maathag kon ano ang dapat naton himuon. Kon maugdang kita kag pangayuon naton ang panuytoy ni Jehova, malikawan naton ang serioso nga mga sala.

4. Ano ang tun-an naton sa sini nga artikulo?

⁴ Sa nagligad nga artikulo, natun-an naton kon ngaa importante gihapon para sa mga Cristiano ang kaugdang kag kon ano ini. Pero sa ano nga mga sitwasyon matilawan ang aton kaugdang? Paano naton mapauswag ini nga kinaiya para makapabilin kita nga maugdang bisan nabudlayan kita nga ipakita ini? Para masabat ini nga mga pamangkot, binagbinagon naton ang tatlo ka sitwasyon nga matilawan ang aton kaugdang, kag kon ano ang dapat naton himuon sa kada sitwasyon.—Hulu. 11:2.

5, 6. Paano ginpakita ni Barzilai ang kaugdang?

⁵ Matilawan ang aton kaugdang kon magbag-o ang aton kahimtangan ukon asaynment. Sang gin-agda ni David ang 80 anyos nga si Barzilai nga mag-istar sa palasyo, isa gid ini ka kadungganan para kay Barzilai. Kon batunon niya ini, padayon niya nga mangin kaupod ang hari. Pero nangindi si Barzilai. Ngaa? Bangod tigulang na sia, ginsilingan niya si David nga indi niya gusto magpabug-at sa hari. Gani ginrekomendar niya nga si Kimham na lang ang ibulos sa iya, nga mahimo nga anak niya.—2 Sam. 19:31-37.

⁶ Makatarunganon ang desisyon ni Barzilai bangod maugdang sia. Wala niya ginbaton ang pangagda ni David indi bangod nagabatyag sia nga indi sia kalipikado sa sini nga responsibilidad ukon bangod gusto niya na lang magpatawhay. Nahibaluan niya nga nagbag-o na ang iya kahimtangan kag may mga limitasyon na sia. Gusto niya himuon ang iya lang masarangan. (Basaha ang Galacia 6:4, 5.) Kon importante sa aton ang posisyon, ukon ginatinguhaan naton nga mangin bantog ukon dayawon sang iban, magaresulta ini sa pagpabugal sang aton kaugalingon, paindisanay, kag kapaslawan sa ulihi. (Gal. 5:26) Pero kon maugdang kita, nahiusa kita sa paggamit sang aton mga ikasarang sa paghimaya sa Dios kag sa pagbulig sa iban.—1 Cor. 10:31.

7, 8. Kon maugdang kita, ngaa indi kita magasalig sa aton kaugalingon?

⁷ Ang dugang nga responsibilidad nagahatag sing dugang nga awtoridad, gani matilawan man sa sini ang aton kaugdang. Sang nabatian ni Nehemias nga mabudlay ang kahimtangan sang katawhan sa Jerusalem, nangamuyo gid sia kay Jehova. (Neh. 1:4, 11) Ginpakamaayo sia ni Jehova sang ginhimo sia ni Hari Artajerjes nga mangin gobernador didto. Pero bisan pa mataas ang posisyon ni Nehemias, manggaranon sia kag may awtoridad, wala gid sia magsalig sa iya eksperiensia ukon mga ikasarang. Padayon sia nga naglakat upod sa Dios. Pirme niya ginpangayo ang panuytoy ni Jehova paagi sa pagtuon sa Kasuguan sang Dios. (Neh. 8:1, 8, 9) Wala niya ginpintasan ang iban; sa baylo, nag-alagad sia sa ila kag sia mismo ang naggasto.—Neh. 5:14-19.

 ⁸ Kon maugdang kita pareho kay Nehemias, indi kita magasalig sa aton kaugalingon kon makabaton kita sang bag-o nga asaynment ukon dugang nga responsibilidad. Kon magsalig lang ang isa ka gulang sa iya eksperiensia, mahimo niya tatapon ang mga hilikuton sa kongregasyon nga wala anay nagapangamuyo kay Jehova. Ang iban mahimo magdesisyon anay kag dayon mangamuyo kay Jehova nga pakamaayuhon ang ila desisyon. Pero kaugdang bala ini? Pirme ginadumdom sang maugdang nga tawo ang iya kaangtanan sa Dios kag ang responsibilidad nga ginhatag sa iya sang Dios. Ano man ang aton mga ikasarang, indi kita dapat magsalig sa aton kaugalingon ilabi na kon nagaatubang sa pamilyar nga sitwasyon ukon problema. (Basaha ang Hulubaton 3:5, 6.) Bilang bahin sang panimalay sang Dios, mas ginahunahuna naton ang pagtuman sang aton mga responsibilidad sa aton pamilya ukon sa kongregasyon sangsa pagtigayon sang mataas nga posisyon.—1 Tim. 3:15.

9, 10. Paano kita mabuligan sang kaugdang kon ginapakalain kita?

⁹ Mabudlay punggan ang aton balatyagon kon ginapakalain kita. Pirme ginayaguta kag ginapaakig si Hana sang iya karibal, nga si Penina, gani nagahibi sia. Palangga gid si Hana sang iya bana, pero baw-as sia. Sang nagkadto sia sa tabernakulo kag nagpangamuyo, nasal-an sia sang mataas nga saserdote nga si Eli nga hubog sia. Hunahunaa ina! Pero wala sapayan sini, bangod maugdang si Hana, kalmado sia kag matinahuron nga nagsabat kay Eli. Ginsulat sa Biblia ang iya tinagipusuon nga pangamuyo. Ginpabutyag niya sa sini ang iya pagtuo, pagdayaw, kag apresasyon.—1 Sam. 1:5-7, 12-16; 2:1-10.

¹⁰ Kon maugdang kita, ‘padayon man naton nga madaug ang malaut paagi sa maayo.’ (Roma 12:21) Sa sistema ni Satanas, pirme kita makaeksperiensia sang indi maayo nga pagtratar, gani dapat gid naton panikasugan nga indi maakig sa mga malauton.  (Sal. 37:1) Pero mas nasakitan kita kon utod ang nagapakalain sa aton. Sundon sang maugdang nga tawo si Jesus. “Sang ginainsulto sia,” siling sang Biblia, “wala sia magbalos . . . , kundi ginsalig niya ang iya kaugalingon sa Isa nga nagahukom sing matarong.” (1 Ped. 2:23) Nahibaluan ni Jesus nga ang pagtimalos iya ni Jehova. (Roma 12:19) Ginalaygayan man ang mga Cristiano nga magpaubos kag “indi magbalos sang kahalitan sa kahalitan.”—1 Ped. 3:8, 9.

11, 12. (a) Kon maugdang kita, ano ang himuon naton kon dayawon kita sang iban? (b) Paano naton mapakita nga maugdang kita sa aton pamayo, pamustura, kag paggawi?

¹¹ Matilawan man ang aton kaugdang kon dayawon kita sang iban. Binagbinaga ang reaksion ni Ester sa wala niya ginapaabot nga mga hitabo. Matahom gid sia, kag isa ka tuig nga gin-asikaso ang pagpatahom pa gid sa iya. Adlaw-adlaw nga kaupod niya ang madamo nga dalaga sa bilog nga Emperyo sang Persia nga nagatinguha nga magustuhan sang hari. Pero matinahuron gihapon sia kag maugdang. Wala sia nangin bugalon ukon matinaastaason bisan sang ginpili sia sang hari nga mangin rayna.—Est. 2:9, 12, 15, 17.

¹² Kon maugdang kita, pirme disente kag talahuron ang aton pamayo, pamustura, kag paggawi. Mas nanamian ang mga tawo sa nagapakita sang “malinong kag malulo nga espiritu” sangsa nagapabugal ukon nagapadayawdayaw. (Basaha ang 1 Pedro 3:3, 4; Jer. 9:23, 24) Ang ginabatyag naton nga bugal makita sa ulihi sa aton paggawi. Halimbawa, basi ipabatyag naton sa iban nga pinasahi gid kita bangod sang aton mga pribilehiyo, impormasyon nga nahibaluan, ukon bangod suod kita sa mga utod nga nagapanguna. Ukon basi ginahambal naton nga kita lang ang nakapensar ukon naghimo sang isa ka butang, bisan pa may nagbulig sa aton. Dapat naton sundon ang maayo nga halimbawa ni Jesus. Pirme niya ginakutlo ukon ginapatuhuyan ang Hebreong Kasulatan. Bangod maugdang sia, nahibaluan sang mga nagapamati sa iya nga halin kay Jehova ang iya ginsiling kag indi bangod sang iya kaalam.—Juan 8:28.

13, 14. Paano kita mabuligan sang kaugdang nga makahimo sang maayo nga mga desisyon?

¹³ Matilawan man ang aton kaugdang kon nagahimo kita sing desisyon. Sang ara sa Cesarea si apostol Pablo, ginsilingan sia ni manalagna Agabo nga dakpon sia kon magkadto sia sa Jerusalem. Mahimo nga patyon pa sia. Nahadlok ang mga kauturan, gani ginpangabay nila si Pablo nga indi na magkadto didto. Pero indi nila sia makumbinsi. Indi sobra ang pagsalig niya sa kaugalingon kag wala man sia nahadlok. Nagsalig gid sia kay Jehova kag handa sia nga tumanon ang iya asaynment, ano man ang itugot ni Jehova nga matabo sa iya. Sang mabal-an ini sang mga kauturan, wala na nila ginpunggan si Pablo sa iya desisyon nga magkadto sa Jerusalem.—Binu. 21:10-14.

¹⁴ Kon maugdang kita, makahimo kita sang maayo nga mga desisyon bisan pa indi naton mahibaluan ukon makontrol ang mangin resulta sini. Halimbawa, kon mag-alagad kita sing bug-os tion, ano ang matabo kon magmasakit kita? Ano abi kon magakinahanglan sang bulig ang aton tigulang na nga mga ginikanan? Ano ang himuon naton kon magtigulang na kita? Bisan pa mangamuyo kita ukon mag-research, indi naton masabat ini tanan nga pamangkot. (Man. 8:16, 17) Kon magsalig kita kay Jehova, hibaluon naton kag batunon ang aton mga limitasyon. Pagkatapos mag-research, mamangkot sa iban, kag mangamuyo para giyahan kita, dapat naton sundon ang  panuytoy sang espiritu sang Dios. (Basaha ang Manugwali 11:4-6.) Pakamaayuhon kita ni Jehova, ukon tuytuyan niya kita nga ipasibu ang aton mga plano.—Hulu. 16:3, 9.

15. Paano kita mabuligan sang pagpamalandong parte kay Jehova nga padayon nga magpaubos?

¹⁵ Bangod madamo gid sing kaayuhan kon maugdang kita, paano naton ini labi pa nga mapakita? Binagbinagon naton ang apat ka paagi. Una, labi kita nga mangin maugdang kag mangin matinahuron kay Jehova kon pamalandungan naton ang iya mas superyor nga mga kinaiya kag posisyon. (Isa. 8:13) Dumduma nga nagalakat kita upod sa Labing Gamhanan nga Dios, kag indi upod sa anghel ukon tawo. Magapalig-on ini sa aton nga ‘magpaubos sa idalom sang gamhanan nga kamot sang Dios.’—1 Ped. 5:6.

16. Paano kita mapalig-on sang pagpamalandong sa gugma sang Dios nga mangin maugdang?

¹⁶ Ikaduha, mapakita pa gid naton ang kaugdang kon pamalandungan naton ang gugma ni Jehova. Halimbawa, ginsiling ni apostol Pablo nga “mas ginapadunggan” ni Jehova ang mga bahin sang lawas sang tawo nga kulang sing dungog. (1 Cor. 12:23, 24) Gani nagaulikid man si Jehova sa kada isa sa aton bisan pa may mga limitasyon kita. Wala niya kita ginakomparar sa iban kag ginapalangga niya kita gihapon bisan pa makahimo kita sang sala. Bangod sang gugma ni Jehova, mangin malipayon kita ano man ang aton responsibilidad sa kongregasyon.

17. Paano kita makabenepisyo kon magpokus kita sa maayo nga mga kinaiya sang iban?

¹⁷ Ikatlo, maapresyar pa gid naton ang aton pag-alagad kay Jehova kon ilugon naton ang aton Dios kag magpokus sa maayo nga mga kinaiya sang iban. Sa baylo nga tinguhaan nga kita pirme ang dayawon sang iban ukon ang nagamando sa iban, dapat kita mangin maugdang kag magpangayo sing laygay sa iban kag magpamati sa ila mga panugda. (Hulu. 13:10) Malipay kita kon makabaton sila sing mga pribilehiyo. Kag dayawon naton si Jehova kay ginapakamaayo niya ang “tanan [naton] nga kauturan sa bug-os nga kalibutan.”—1 Ped. 5:9.

18. Paano naton mahanas ang aton konsiensia para mangin maugdang kita?

¹⁸ Ikap-at, mapakita pa gid naton ang kaugdang kon hanason naton ang aton konsiensia suno sa mga prinsipio sang Biblia. Makadesisyon kita sing maayo kon tamdon naton ang mga butang suno sa pagtamod ni Jehova. Paagi sa padayon nga pagtuon, pagpangamuyo, kag pagkabuhi suno sa aton natun-an, mapabakod naton ang aton konsiensia. (1 Tim. 1:5) Kag mas unahon na naton ang kaayuhan sang iban. Kon himuon naton ini, nagpromisa si Jehova nga ‘tapuson niya ang aton paghanas,’ kag buligan niya kita nga mapakita ang kaugdang kag iban pa nga mga kinaiya.—1 Ped. 5:10.

19. Ano ang magabulig sa aton nga padayon nga mangin maugdang?

¹⁹ Bangod sang isa lang ka makahas nga buhat, nadula sang manalagna nga halin sa Juda ang iya kabuhi kag maayo nga kaangtanan sa Dios. Pero posible makapabilin nga maugdang bisan mabudlay ini. Nahimo ini sang mga matutom sang una kag sang mga maugdang sa aton panahon. Samtang padayon kita nga nagalakat upod kay Jehova, labi kita nga mangin maugdang. (Hulu. 8:13) Ano man ang aton kahimtangan subong, isa gid ka matahom kag indi matupungan nga pribilehiyo ang paglakat upod sa Dios. Pabalori ini nga kadungganan, kag panikasugi gid nga padayon nga maglakat sing maugdang upod kay Jehova.