1, 2. Paano ginatamod sang madamo ang ila trabaho?

MASAMI nga makilala ang mga tawo paagi sa ila trabaho. Para sa madamo, ang trabaho ukon posisyon amo ang basihan nga importante sila. Sa iban nga kultura, para makilala ang isa ka tawo, ginapamangkot sia, “Ano ang trabaho mo?”

² Kon kaisa, ginalaragway sang Biblia ang mga tawo paagi sa ila trabaho. Ginsambit sa sini “si Mateo nga manugsukot sing buhis”; si “Simon, nga isa ka manugpanit”; kag “si Lucas nga hinigugma nga manugbulong.” (Mat. 10:3; Binu. 10:6; Col. 4:14) Makilala man ang iban nga tawo paagi sa ila mga asaynment ukon pribilehiyo sa pag-alagad. Mabasa naton ang parte kanday Hari David, manalagna Elias, kag apostol Pablo. Ginpabaloran sini nga mga lalaki ang mga asaynment nga ginhatag sa ila sang Dios. Kon may mga pribilehiyo man kita sa pag-alagad, dapat man naton ini pabaloran.

3. Ngaa dapat hanason sang tigulang nga mga utod ang mga bataon? (Tan-awa ang piktyur sa umpisa sini nga artikulo.)

³ Madamo sa aton ang nanamian sa aton responsibilidad sa kongregasyon kag luyag naton himuon ini sing padayon. Pero makapasubo nga halin sang tion ni Adan, ang mga tawo nagatigulang kag  ginabuslan sang iban. (Man. 1:4) Nangin hangkat ini para sa matuod nga mga Cristiano. Ang hilikuton sang katawhan ni Jehova nagauswag kag nagadamo. Kag samtang ginahimo naton ang bag-o nga mga proyekto, nagabag-o man ang mga pamaagi sa paghimo sini kag masami ini nagalakip sang paggamit sang teknolohiya. Ang iban nga tigulang mahimo nabudlayan nga magdungan sa sini nga mga pagbag-o. (Luc 5:39) Bisan pa makadungan sila, mahimo nga mas makusog kag mapagsik ang mga bataon sangsa ila. (Hulu. 20:29) Gani, mahigugmaon kag mapuslanon gid kon hanason sang tigulang nga mga utod ang mga bataon nga magbaton sang dugang nga responsibilidad.—Basaha ang Salmo 71:18.

4. Ngaa mabudlay para sa iban nga itugyan ang responsibilidad? (Tan-awa ang kahon nga “ Kon Ngaa ang Iban Wala Nagatugyan sang Responsibilidad.”)

⁴ Mahimo nga indi mahapos sa mga may katungdanan nga itugyan sa bataon nga mga utod ang responsibilidad. Ang iban nahadlok nga madula ang katungdanan nga ila ginapabaloran. Gusto naman sang iban nga sila gid ang mangamot, kay kumbinsido sila nga indi ini masarangan sang mga bataon. Ang iban mahimo magbalibad nga wala sila sing tion sa paghanas sa iban. Sa pihak nga bahin, indi dapat matak-an ang mga bataon kon wala pa sila ginhatagan sing dugang nga responsibilidad.

5. Ano nga mga pamangkot ang binagbinagon sa sini nga artikulo?

⁵ Binagbinagon naton ang pagtugyan sang responsibilidad sa duha ka anggulo. Una, paano mabuligan sang tigulang nga mga utod ang mga bataon nga magbaton sang dugang nga responsibilidad, kag ngaa importante ini? (2 Tim. 2:2) Ikaduha, ngaa importante nga ipakita sang mga bataon ang husto nga panimuot samtang ginabuligan nila ang mga utod nga mas eksperiensiado sa ila kag samtang nagatuon sa ila? Binagbinagon naton kon paano ginhanda ni Hari David ang iya anak para sa isa ka importante nga responsibilidad.

6. Ano ang gusto himuon ni Hari David, kag ano ang pagtamod ni Jehova sa sini?

⁶ Pagkatapos sang tinuig nga pagpanago ni David, nangin hari sia kag nag-istar sa isa ka  matahom nga balay. Bangod nasubuan sia nga wala sing “balay,” ukon templo, nga nadedikar para kay Jehova, gusto niya nga magpatindog sini. Gani nagsiling sia kay Natan nga manalagna: “Nagaistar ako sa balay nga human sa kahoy nga sedro samtang ang kaban sang katipan ni Jehova yara sa tolda.” Nagsiling si Natan: “Himua kon ano ang luyag mo himuon, kay kaupod mo ang matuod nga Dios.” Pero, indi amo sini ang luyag ni Jehova. Gani ginsugo niya si Natan nga isiling kay David: “Indi ikaw ang magapatindog sing balay nga puy-an ko.” Bisan pa mahigugmaon nga ginpasalig ni Jehova nga pakamaayuhon si David, ginsugo Niya nga ang anak ni David nga si Solomon ang magapatindog sang templo. Ano ang reaksion ni David?—1 Cron. 17:1-4, 8, 11, 12; 29:1.

7. Ano ang reaksion ni David sa ginsugo ni Jehova?

⁷ Wala gindingot ni David ang iya suporta kag wala man sia nabalaka nga indi sia ang magabaton sang kadayawan sa pagpatindog sang templo. Ang matuod, gintawag ini nga templo ni Solomon, indi templo ni David. Bisan pa wala ni David natuman ang handum sang iya tagipusuon, bug-os niya nga ginsuportahan ang pagpatindog sang templo. Gin-organisar niya ang mga grupo sang trabahador kag nagtipon sia sing mga salsalon, saway, pilak, bulawan, kag mga kahoy nga sedro. Ginpalig-on man niya si Solomon: “Anak ko, kabay pa nga mangin kaupod mo si Jehova, kag kabay pa nga mangin madinalag-on ka sa pagpatindog sing balay ni Jehova nga imo Dios, suno sa ginsiling niya tuhoy sa imo.”—1 Cron. 22:11, 14-16.

8. Ngaa mahimo nga nakahunahuna si David nga indi kalipikado si Solomon, pero ano ang iya ginhimo?

⁸ Basaha ang 1 Cronica 22:5. Mahimo nga nakahunahuna si David nga indi kalipikado si Solomon sa pagdumala sa pagpatindog sang templo. Kay man, “dapat mangin matahom gid” ini kag sadto nga tion si Solomon “bata pa kag wala pa sing eksperiensia.” Pero, nakahibalo si David nga buligan ni Jehova si Solomon sa pagdumala sa hilikuton nga ginhatag sa iya. Gani ginhimo ni David ang iya masarangan para ihanda ang madamo gid nga materyales.

9. Ngaa dapat malipay ang tigulang nga mga utod sa pagtugyan sang mga responsibilidad? Iilustrar.

⁹ Indi dapat maluyahan ang tigulang nga mga utod kon kinahanglan na nila itugyan ang pila sang ila mga responsibilidad sa mga bataon. Kon hanason ang mga bataon nga magbaton sang mga responsibilidad, makabulig sila sa hilikuton nga ginapahimo ni Jehova. Daku gid ang kalipay sang mga may katungdanan kon ang mga bataon nga ila ginhanas nangin kalipikado sa sini. Sa pag-ilustrar, hunahunaa ang isa ka amay nga nagatudlo sa iya anak kon paano magdrayb sing salakyan. Sang bata pa sia, nagatan-aw lang sia sa iya amay. Pagdaku niya, ginapaathag na sang iya amay kon paano magdrayb. Dayon sang nakakuha na sia sang lisensia, sia na ang nagadrayb sing salakyan samtang ginahatagan sia sang iya amay sing dugang nga instruksion. Kon kaisa,  nagabulosbulos sila sa pagdrayb asta nga ang anak na ang magdrayb para sa iya tigulang na nga amay. Nalipay gid ang maalam nga amay nga ang iya anak ang nagbulos sa iya sa pagdrayb pero wala naglain ang iya buot nga indi na sia ang nagadrayb. Nalipay man ang tigulang nga mga utod nga ginhanas nila ang mga bataon para magbaton sang teokratiko nga mga responsibilidad.

10. Ano ang pagtamod ni Moises sa kadungganan kag awtoridad?

¹⁰ Dapat likawan sang tigulang nga mga utod ang kaimon. Talupangda kon ano ang reaksion ni Moises sang nagpanghikot nga daw mga manalagna ang pila ka Israelinhon. (Basaha ang Numeros 11:24-29.) Luyag ni Josue, nga alagad ni Moises, nga punggan sila. Naghunahuna sia nga basi indi na mapadunggan si Moises kag mabuhinan ang iya awtoridad. Pero nagsiling si Moises: “Nagapangimon ka bala para sa akon? Indi ka magpangimon, kay luyag ko kuntani nga ang tanan nga katawhan ni Jehova mga manalagna agod ibutang ni Jehova sa ila ang iya espiritu!” Nahantop ni Moises nga kabubut-on ini ni Jehova. Indi gusto ni Moises nga sia ang padunggan, gani ginpabutyag niya ang iya handum nga ang tanan nga alagad ni Jehova makabaton sang espirituwal nga mga dulot. Pareho kay Moises, nalipay man bala kita kon ang iban makabaton sang mga pribilehiyo nga pamatyag naton para tani sa aton?

11. Ano ang ginsiling sang isa ka utod parte sa pagtugyan niya sang iya responsibilidad?

¹¹ Madamo nga kauturan ang aktibo nga nangabudlay sing dinekada kag nagbulig sa iban nga magbaton sang dugang nga responsibilidad. Halimbawa, si Peter bug-os tion nga nag-alagad sing sobra 74 ka tuig, kag 35 ka tuig sini sa isa ka sanga talatapan sa Europa. Sia anay ang overseer sang Service Department. Subong, ang bataon nga si Paul, nga nakaupod ni Peter sa malawig nga tion, amo na ang nagatatap sa sini nga responsibilidad. Sang ginpamangkot si Peter sang iya ginbatyag sang nagbag-o ang iya asaynment, nagsabat sia, “Nalipay gid ako nga may mga utod nga ginhanas para sa dugang nga responsibilidad kag maayo gid ang ila ginahimo.”

12. Ano ang matun-an naton sa rekord sang Biblia parte kay Rehoboam?

¹² Sang napatay si Solomon, ang iya anak nga si Rehoboam ang nangin hari. Sang kinahanglan ni Rehoboam ang laygay kon paano atipanon ang iya responsibilidad, ginpamangkot niya anay ang tigulang nga mga lalaki. Pero wala niya ginpamatian ang ila laygay! Ginpasulabi niya ang laygay sang mga pamatan-on nga lalaki nga iya katubotubo nga mga alagad man niya. Malain gid ang resulta. (2 Cron. 10:6-11, 19) Ano ang matun-an naton sa sini? Maalamon nga mangayo sing laygay sa tigulang kag eksperiensiado nga mga utod kag hunahunaon ini sing maayo. Ang mga bataon indi dapat magbatyag nga daw obligado sila nga sundon ang mga pamaagi sang una, pero dapat man nila pamatian ang laygay sang mga tigulang.

13. Paano dapat magpanghikot ang mga bataon upod sa mga tigulang?

¹³ Ang pila ka bataon nga utod mahimo amo na ang may responsibilidad sa pagtatap sa hilikuton nga ginahimo anay sang tigulang nga mga utod. Pero makapanginpulos sila gihapon sa kaalam kag eksperiensia sang mga tigulang kon nagadesisyon. Si Paul, nga ginsambit kaina nga nagbulos kay Peter bilang overseer sang isa ka departamento sa Bethel, nagsiling, “Pirme ko ginapamangkot si Peter sang iya mapanugda, kag ginapalig-on ko ang iban sa amon departamento nga himuon man ini.”

14. Ano ang matun-an naton sa pagbuligay nanday Timoteo kag apostol Pablo?

¹⁴ Madamo nga tinuig nga nagpangabudlay upod kay apostol Pablo ang bataon nga si Timoteo.  (Basaha ang Filipos 2:20-22.) Nagsulat si Pablo sa mga taga-Corinto: “Ginapadala ko sa inyo si Timoteo, kay sia ang akon hinigugma kag matutom nga anak sa Ginuo. Ipahanumdom niya sa inyo ang akon mga pamaagi may kaangtanan kay Cristo Jesus, subong sang pagpanudlo ko sa tagsa ka kongregasyon bisan diin.” (1 Cor. 4:17) Matalupangdan naton diri ang pagbuligay nanday Pablo kag Timoteo. Naghatag gid sing tion si Pablo para tudluan si Timoteo sang iya “mga pamaagi may kaangtanan kay Cristo.” Ginsunod ini ni Timoteo kag ginpalangga sia ni Pablo, gani may pagsalig si Pablo nga atipanon ni Timoteo ang mga kauturan sa Corinto. Maayo gid ini nga halimbawa sa mga gulang subong sa ila paghanas sa mga utod nga lalaki nga magatatap sa kongregasyon!

15. Paano makabulig sa aton ang laygay ni Pablo sa mga Cristiano sa Roma kon naapektuhan kita sang pagbag-o?

¹⁵ Nagakabuhi kita sa makalilipay nga tion. Nagauswag ang dutan-on nga bahin sang organisasyon ni Jehova, kag nagaresulta ini sa mga pagbag-o. Kon personal kita nga naapektuhan sini, magpaubos kita kag magpokus kay Jehova kag indi sa aton kaugalingon. Magaresulta ini sa paghiusa. Ginsulatan ni Pablo ang mga Cristiano sa Roma: “Ginasilingan ko ang tagsatagsa sa inyo nga indi kamo magpakataas sa inyo kaugalingon, kundi ipakita ninyo nga may maligdong kamo nga panghunahuna suno sa pagtuo nga ginhatag sang Dios sa tagsatagsa sa inyo. Kay subong nga ang lawas may madamo nga bahin, apang indi pareho ang ginahimo sini nga mga bahin, kita man isa ka lawas nga nahiusa sa Cristo bisan pa madamo kita.”—Roma 12:3-5.

16. Ano ang mabulig sang tigulang kag bataon nga mga utod kag sang ila asawa para mangin mahidaiton kag nahiusa ang organisasyon ni Jehova?

¹⁶ Gani, ano man ang aton kahimtangan, padayon kita nga magpangabudlay para sa intereses sang dalayawon nga Ginharian ni Jehova. Mahanas sang tigulang nga mga utod ang mga bataon. Mabaton sang bataon nga mga utod ang responsibilidad sing mapainubuson, kag padayon nila nga tahuron ang mga tigulang. Kag mailog sang mga asawa si Priscila, ang asawa ni Aquila, nga nag-upod kag matutom nga nagsuporta sa iya bana sang nagbag-o ang ila kahimtangan.—Binu. 18:2.

17. Ano ang ginapatihan ni Jesus nga mahimo sang iya mga disipulo, kag ginhanas niya sila para sa ano nga hilikuton?

¹⁷ Si Jesus ang pinakamaayo nga halimbawa kon parte sa paghanas sa iban para sa dugang nga responsibilidad. Nahibaluan niya nga kon matapos na ang iya ministeryo sa duta, iban ang magapadayon sa iya hilikuton. Bisan pa indi himpit ang iya mga disipulo, may pagsalig sia sa ila kag ginsilingan niya sila nga magahimo sila sang mga buhat nga labaw pa sa iya nahimo. (Juan 14:12) Ginhanas niya sila sing maayo, gani nabantala nila ang maayong balita kag naglapnag ini sa tanan nga lugar nga ila nahibaluan.—Col. 1:23.

18. Ano ang himuon naton sa palaabuton, kag ano ang mahimo naton subong?

¹⁸ Pagkatapos mapatay si Jesus bilang halad, ginbanhaw sia kag ginhatagan sing dugang nga hilikuton sa langit nga may awtoridad “nga labaw gid sa tanan nga panguluhan, awtoridad, gahom, [kag] pagkaginuo.” (Efe. 1:19-21) Kon mapatay kita nga matutom antes sang Armageddon, banhawon kita sa matarong nga bag-ong kalibutan, kag madamo didto sing makalilipay nga hilikuton para sa aton. Pero subong pa lang, mahimo naton tanan ang importante gid nga hilikuton—ang pagbantala sang maayong balita kag pagtudlo sa iban para mangin disipulo. Kabay pa nga tanan kita, bata man ukon tigulang, “madamo pirme sing ginahimo sa hilikuton sang Ginuo.”—1 Cor. 15:58.