1, 2. (a) Suno kanday Elifaz kag Bildad, paano ginatamod sang Dios ang aton pag-alagad sa iya? (b) Ano ang ginsiling ni Jehova parte sa sini?

 “MAPUSLANON bala ang tawo sa Dios? Mapuslanon bala sa iya ang tawo nga may paghangop? Ginapabaloran bala sang Labing Gamhanan ang imo pagkamatarong, ukon may makuha bala sia sa imo kay ginahuptan mo ang imo integridad?” (Job 22:1-3) Napaligban mo na bala ini nga mga pamangkot? Sang ginpamangkot ini ni Elifaz nga Temanhon kay Job, nagapati si Elifaz nga indi ang sabat sa sini. Nangatarungan pa gani ang kaupod niya nga si Bildad nga Shuhanon nga indi gid makabig sang Dios nga matarong ang mga tawo.—Basaha ang Job 25:4.

² Ining indi matuod nga mga manuglugpay nagsiling nga wala sing pulos kay Jehova ang aton matutom nga pag-alagad sa iya kag para kuno sa Dios, daw pareho lang kita sa sapatsapat, ulod, ukon lago. (Job 4:19; 25:6) Basi magsiling kita nga daw mapainubuson sanday Elifaz kag Bildad. (Job 22:29) Kay man, kon ara kita sa ibabaw sang mataas nga bukid ukon sa sulod sang eroplano, kagamay gid ukon indi salapakon ang makita naton sa idalom. Pero amo bala sina ang pagtamod ni Jehova sa aton mga panikasog para sa Ginharian kon ginatulok niya ang aton planeta?  Ginsilingan ni Jehova sanday Elifaz, Bildad, kag Zofar nga wala sila nagahambal sang kamatuoran, pero nalipay sia kay Job nga gintawag niya nga “akon alagad.” (Job 42:7, 8) Gani puede gid ang tawo mangin ‘mapuslanon sa Dios.’

3. Ano ang ginsiling ni Elihu parte sa aton pag-alagad kay Jehova, kag ano ang iya buot silingon?

³ Wala ginsaway ni Jehova si Elihu sang namangkot sia: “Kon matarong ka, ano ang mahatag mo sa iya [sa Dios]; ano ang mabaton niya sa imo?” (Job 35:7) Buot silingon bala ni Elihu nga wala pulos sa Dios ang aton pag-alagad sa iya? Indi. Buot silingon ni Elihu nga wala nagadepende si Jehova sa aton pagsimba. Wala sing kulang kay Jehova. Wala kita sing mahimo para mangin mas manggaranon ukon mas gamhanan pa gid sia. Ang matuod, ano man ang aton maayo nga kinaiya, talento, ukon ikasarang, naghalin ini sa Dios kag ginatalupangod niya kon paano naton ini ginagamit.

4. Paano ginatamod ni Jehova ang pagpakita naton sang kaayo sa iban?

⁴ Kon magpakita kita sang mainunungon nga gugma sa mga nagaalagad kay Jehova, ginatamod niya ini nga ginhimo naton sa iya. “Ang isa nga nagakaluoy sa kubos nagapahulam kay Jehova, kag bayaran Niya ang iya ginahimo,” siling sang Hulubaton 19:17. Nagapahangop bala ini nga ginatalupangod gid ni Jehova kon magpakita kita sang kaayo sa mga kubos? Ginatamod bala sang Manunuga sang uniberso nga may utang sia sa mga tawo nga nagapakita sang kaluoy sa iban kag bayaran niya sila paagi sa pagpakamaayo sa ila? Huo, kag ginpamatud-an ini sang Anak sang Dios.—Basaha ang Lucas 14:13, 14.

5. Ano nga mga pamangkot ang binagbinagon naton?

⁵ Gin-agda ni Jehova si manalagna Isaias nga mangin humalambal Niya, gani nalipay Sia nga gamiton ang matutom nga mga tawo para matuman ang Iya katuyuan. (Isa. 6:8-10) Kinabubut-on ini nga ginbaton ni Isaias. Subong, linibo man ang daw nagasiling sing “Yari ako! Ipadala ako!” sang ginbaton nila ang mabudlay nga mga asaynment sa pag-alagad kay Jehova. Pero mahimo mamangkot ang isa: ‘Importante gid bala ang mahimo ko? Mainayuhon gid si Jehova sa paghatag sa akon sing kahigayunan nga mag-alagad sing kinabubut-on, pero indi bala nga manghikot man sia gihapon para matuman ang iya Pulong bisan indi ko paghimuon ang bug-os ko nga masarangan?’ Binagbinagon naton ang natabo sang panahon nanday Debora kag Barak para masabat ini nga mga pamangkot.

6. Ano ang kinatuhayan sang mga Israelinhon sa mga soldado ni Jabin?

⁶ ‘Ginpigos kag ginpintasan’ ni Hari Jabin sang Canaan ang mga Israelinhon sing 20 ka tuig. Nagapanago sila bangod sa kahadlok. Wala sila sing nagakaigo nga armas para makabato ukon para maamligan ang ila kaugalingon, pero ang ila mga kaaway may 900 ka kangga sa inaway nga ang mga ruweda sini may nagalabaw nga matalom nga mga salsalon.—Huk. 4:1-3, 13; 5:6-8. a

7, 8. (a) Ano ang una nga ginsugo ni Jehova kay Barak? (b) Paano napierde sang Israel ang mga soldado ni Jabin? (Tan-awa ang piktyur sa umpisa sini nga artikulo.)

⁷ Pero ginsugo ni Jehova si Barak paagi kay Debora nga manalagna: “Magkadto ka sa Bukid Tabor upod ang 10,000 ka lalaki  halin sa tribo ni Neptali kag ni Zebulon. Dalhon ko sa imo sa sapa sang Kison si Sisera nga pangulo sang mga soldado ni Jabin kag ang iya mga kangga sa inaway kag ang iya mga soldado, kag itugyan ko sia sa imo.”—Huk. 4:4-7.

⁸ Nagpanawagan sing mga boluntaryo, kag nagtipon sila sa Bukid Tabor. Gintuman gilayon ni Barak ang mga instruksion ni Jehova. (Basaha ang Hukom 4:14-16.) Sang nagapakig-away sila sa Taanac, gulpi nga nag-ulan sing mabaskog gani nangin lunangon ang palibot. Ginlagas ni Barak ang mga soldado ni Sisera asta sa Haroset-hagoyim nga 24 ka kilometro ang kalayuon. Samtang nagapalagyo, ginbiyaan ni Sisera ang iya makahaladlok nga kangga nga wala na sing pulos kag nalagyo sa Zaananim, mahimo malapit sa Kedes. Nagkadto sia sa tolda ni Jael nga asawa ni Heber nga Kenhanon kag ginpasulod sia ni Jael. Natulugan sia bangod sa kakapoy. Dayon, maisugon nga ginpatay ni Jael si Sisera. (Huk. 4:17-21) Napierde ang kaaway sang Israel! b

9. Ano ang ginsiling sang Hukom 5:20, 21 parte sa pagpakig-away kay Sisera?

⁹ Madamo kita sing mahibaluan nga mga detalye kon tun-an naton ang Hukom kapitulo 4 kag 5. Halimbawa, nagsiling ang Hukom 5:20, 21: “Nagpakig-away ang mga bituon halin sa langit; halin sa ila mga banas nagpakig-away sila kay Sisera. Gin-anod sang suba sang Kison ang mga kaaway.” Nagapatuhoy bala ini sa pagbulig sang mga anghel, ukon sa nagtupa nga mga meteor? Wala ini ginpaathag sa kasaysayan. Pero indi bala makatarunganon hunahunaon nga ginpahanabo sang Dios nga mag-ulan sing mabaskog sa sina gid nga lugar kag oras para magguot ang 900 ka kangga sa inaway? Tatlo ka beses nga ginsambit sa Hukom 4:14, 15 nga si Jehova ang nagpadaug sa Israel. Wala sa 10,000 ka Israelinhon nga nagboluntaryo ang makasiling nga sila ang ginhalinan sini nga kadalag-an.

10, 11. Ano ang “Meroz,” kag ngaa ginpakamalaut ini?

¹⁰ Pero katingalahan nga sa ambahanon nanday Debora kag Barak nga nagadayaw kay Jehova bangod sang kadalag-an, nag-amba sila: “‘Pakamalauta ninyo ang Meroz,’ siling sang anghel ni Jehova, ‘pakamalauta ninyo ang mga pumuluyo sini, kay wala sila magkadto sa pagbulig kay Jehova, sa pagbulig kay Jehova upod sa mga gamhanan.’”—Huk. 5:23.

¹¹ Natuman gid ang pagpakamalaut sa Meroz amo nga indi na mapat-od kon ano ang ginapatuhuyan sini. Isa ayhan ini ka siudad nga ang mga nagaistar sa sini wala nagbulig sang may panawagan sa mga boluntaryo? Kon diri nag-agi si Sisera sang nagpalagyo sia, may kahigayunan bala sila nga dakpon sia pero wala nila ini ginhimo? Ngaa wala nila mabatian sang nagpanawagan sing mga boluntaryo si Jehova? Napulo ka libo halin sa ila rehiyon ang nagtipon para makig-away. Imadyina nga nakita sang mga taga-Meroz ang mapintas nga pangulo sang mga soldado nga nagadalagan kag nag-agi sa ila mga dalan para makapalagyo. Kahigayunan nila ini kuntani para masakdag ang katuyuan ni Jehova kag pakamaayuhon sila. Pero sa sining importante nga tion nga may kahigayunan na sila, wala sila sing ginhimo. Tuhay gid ini sa maisugon nga ginhimo ni Jael nga ginsambit sa sunod nga mga bersikulo!—Huk. 5:24-27.

12. Ano nga magkatuhay nga panimuot ang makita naton sa Hukom 5:9, 10, kag ano dapat ang kahulugan sini para sa aton?

¹² Sa Hukom 5:9, 10, makita naton nga magkatuhay ang panimuot sang mga nag-upod  kay Barak kag sang mga wala nag-upod. Gindayaw nanday Debora kag Barak ang “mga kumander sang Israel, nga kinabubut-on nga nag-upod sa katawhan.” Tuhay gid sila sa mga “nagasakay sa kaki nga mga asno,” nga nagabatyag nga tuman sila ka importante amo nga indi sila bagay makig-away, kag sa mga “nagapungko sa maayo nga klase sang mga alpombra,” nga nagakabuhi sing maluho! Indi pareho sa mga “nagalakat sa dalan,” nga mas gusto magpatawhay, ang mga nag-upod kay Barak handa magpakig-away sa batuhon nga bukid sang Tabor kag sa lunangon nga suba sang Kison! Ang tanan nga gusto magpatawhay ginhambalan nga ‘hunahunaon ini!’ Huo, dapat nila hunahunaon ang nadula nila nga kahigayunan nga magbulig sa hilikuton ni Jehova. Dapat man ini himuon sang mga nagaalang-alang sa pag-alagad sing bug-os sa Dios subong.

13. Ngaa tuhay ang panimuot sang mga tribo nanday Ruben, Dan, kag Aser sa panimuot sang mga tribo nanday Zebulon kag Neptali?

¹³ Nasaksihan sang mga kinabubut-on nga nag-upod ang pagpanghikot ni Jehova bilang Soberano. May masugid gid sila kon ‘hambalan nila ang matarong nga mga binuhatan ni Jehova.’ (Huk. 5:11) Pero ginsambit ang mga tribo nanday Ruben, Dan, kag Aser sa Hukom 5:15-17 nga mas nagpasulabi sa ila mga manggad, pareho sang mga karnero, sakayan, kag pantalan, sangsa ginapahimo ni Jehova. Indi pareho sa ila ang mga tribo nanday Zebulon kag Neptali nga “nagtaya sang ila kabuhi bisan pa mapatay sila” para suportahan sanday Debora kag Barak. (Huk. 5:18) May importante kita nga matun-an sa sining magkatuhay nga panimuot.

14. Paano naton masakdag ang pagkasoberano ni Jehova subong?

¹⁴ Subong, indi kita literal nga nagapakig-away, kundi pribilehiyo naton nga magbantala nga may kaisog kag kakugi. Kinahanglan gid ang mga boluntaryo sa organisasyon ni Jehova. Madamo nga kauturan nga lalaki, babayi, kag pamatan-on ang nagaboluntaryo  sa pag-alagad bilang mga payunir ukon Bethelite, sa pagpatindog sang mga Kingdom Hall, kag sa mga asembleya kag kombension. Ang pila ka gulang may mabug-at man nga responsibilidad bilang miembro sang Hospital Liaison Committee kag sang komite nga nagatatap sa kombension. Makasalig ka nga ginapabaloran gid ni Jehova ang imo kinabubut-on nga pag-alagad, kag indi niya ini pagkalimtan.—Heb. 6:10.

15. Ano ang himuon naton para indi madula ang aton kakugi sa pag-alagad kay Jehova?

¹⁵ Pamangkuton naton ang aton kaugalingon: ‘Kontento na bala ako nga ang iban lang ang nagapangabudlay? Mas ginauna ko bala ang materyal nga mga butang sangsa pag-alagad sing kinabubut-on? Pareho kanday Barak, Debora, Jael, kag sa 10,000 ka boluntaryo, may pagtuo bala ako kag kaisog nga gamiton ang tanan ko nga ginapanag-iyahan para tumanon si Jehova? Kon nagaplano ako nga magsaylo sa iban nga siudad ukon pungsod para sa mas daku nga kita, nagapangamuyo bala ako kag ginabinagbinag ang mangin epekto sini sa akon pamilya kag sa kongregasyon?’ c

16. Ano ang mahatag naton kay Jehova nga wala sa iya?

¹⁶ Ginapadunggan kita ni Jehova paagi sa pagtugot niya nga sakdagon naton ang iya pagkasoberano. Halin sang una, gusto sang Yawa nga sia ang dampigan sang mga tawo, indi si Jehova. Pero kon sakdagon mo ang paggahom ni Jehova, makita sing maathag ni Satanas kon kay sin-o ka dampig. Malipay si Jehova kon kinabubut-on ka nga mag-alagad sa iya bangod sang imo pagtuo kag katutom. (Hulu. 23:15, 16) Kon ginasakdag mo sia, masabat niya si Satanas nga nagayaguta sa iya. (Hulu. 27:11) Ang imo katutom kag pagtuman amo ang mahatag mo kay Jehova nga hamili para sa iya kag nagapahalipay gid sa iya.

17. Suno sa Hukom 5:31, ano ang matabo sa palaabuton?

¹⁷ Sa indi madugay, ang tanan nga nagakabuhi sa duta nagadampig na sa pagkasoberano ni Jehova. Ginapaabot gid naton ini nga tion! Buylugan naton sanday Debora kag Barak sa pag-amba: “Kabay pa nga malaglag ang tanan mo nga kaaway, O Jehova, apang kabay pa nga ang mga nagahigugma sa imo mangin pareho sang adlaw nga nagasilak.” (Huk. 5:31) Sabton ni Jehova ini nga pangabay kon laglagon na niya ang malaut nga kalibutan ni Satanas! Kon magsugod na ang inaway sa Armageddon, indi kinahanglan ang boluntaryo nga mga tawo sa paglaglag sa kaaway. Mangin tion ini nga ‘magapahimunong lang kita, kag tan-awon ang pagluwas sa aton ni Jehova.’ (2 Cron. 20:17) Samtang wala pa ini, madamo kita sing kahigayunan nga sakdagon sing maisugon kag makugi ang paggahom ni Jehova.

18. Ano ang epekto sa iban sang imo kinabubut-on nga pag-alagad?

¹⁸ “Bangod ang katawhan kinabubut-on nga nagpakig-away, dayawa ninyo si Jehova!” Amo ini ang umpisa sang ambahanon nanday Debora kag Barak kag gindayaw nila ang Labing Mataas, indi ang mga tinuga. (Huk. 5:1, 2) Gani kabay pa nga ang imo kinabubut-on nga pag-alagad magpalig-on man sa iban nga ‘dayawon si Jehova!’