MAY kilala ka bala nga mga utod nga nagsaylo sa iban nga pungsod diin kinahanglan ang dugang pa nga mga manugbantala sang Ginharian? Nakapamangkot ka na bala: ‘Ano ang nagpalig-on sa ila nga mag-alagad sa iban nga pungsod? Paano sila naghanda? Mahimo ko man bala ini?’ Para masabat ini nga mga pamangkot, mas maayo nga sila ang aton pamangkuton.

Ngaa napensaran ninyo nga mag-alagad sa iban nga pungsod diin mas daku ang kinahanglanon? Si Amy, nga mga 35 anyos kag taga-Estados Unidos, nagsiling: “Madugay ko na nga ginahandum nga mag-alagad sa iban nga pungsod, pero daw indi ko gid ini mahimo.” Ano ang nagpalig-on sa iya? “Sang 2004, ginhagad ako sang mag-asawa nga nagaalagad sa Belize nga magbisita sa ila kag magpayunir didto sing isa ka bulan. Nagpayunir ako didto kag nanamian gid ako sa sini! Pagligad sang isa ka tuig, nagsaylo ako sa Ghana para magpayunir didto.”

Si Stephanie, nga manug-30 anyos kag taga-Estados Unidos man, nag-usisa anay sang iya kahimtangan kag nagpamensar: ‘Wala ako sing balatian kag obligasyon sa pamilya. Mas madamo pa ang mahimo ko para kay Jehova.’ Napalig-on sia sini nga magsaylo sa Ghana kag dugangan ang iya tion sa pag-alagad. Handum gid nanday Filip kag Ida, mag-asawa nga payunir nga sobra 50 anyos kag taga-Denmark, nga magsaylo sa teritoryo nga mas daku ang kinahanglanon. Gintinguhaan nila nga malab-ot ini nga handum. “Sang may kahigayunan na kami nga makasaylo,” siling ni Filip, “daw ginsilingan kami ni Jehova: ‘Lakat na kamo!’” Sang 2008, nagsaylo sila sa Ghana kag nag-alagad didto sing sobra tatlo ka tuig.

Nagaalagad sa Estados Unidos ang payunir nga mag-asawa nga sanday Hans kag Brook nga  treintahon na. Sang 2005, nagbulig sila sa mga biktima sang Bagyo Katrina. Sang ulihi, nagsulat sila nga luyag nila magbulig sa pagpanukod sing mga pasilidad sa iban nga pungsod, pero wala sila nakabaton sing sabat. “Dayon,” siling ni Hans, “nabatian namon sa pamulongpulong sa kombension nga ginbag-o ni Hari David ang iya tulumuron sang wala sia gintugutan nga magpatindog sang templo. Nagbulig ini sa amon nga mahangpan nga puede gali bag-uhon ang aton teokratiko nga mga tulumuron.” (1 Cron. 17:1-4, 11, 12; 22:5-11) Nagsiling man si Brook, “Gusto ni Jehova nga tilawan man namon ang iban nga pribilehiyo sa pag-alagad.”

Sang mabatian nanday Hans kag Brook ang makalilipay nga mga eksperiensia sang ila mga abyan nga nag-alagad sa iban nga pungsod, napalig-on sila nga himuon man ini. Sang 2012, nagkadto sila sa Ghana kag nagbulig sa isa ka sign-language nga kongregasyon sing apat ka bulan. Kinahanglan sila magbalik sa Estados Unidos, pero bangod sang naeksperiensiahan nila sa pag-alagad sa Ghana, napalig-on pa gid sila nga unahon sa ila kabuhi ang intereses sang Ginharian. Nakabulig sila sa pagpatindog sang sanga talatapan sa Micronesia.

Paano kamo naghanda para makaalagad diin mas daku ang kinahanglanon? “Ginbasa ko ang mga artikulo sa Ang Lalantawan parte sa pag-alagad diin mas daku ang kinahanglanon,” siling ni Stephanie. a “Ginsugiran ko man ang mga gulang sang kongregasyon kag ang manugtatap sang sirkito kag ang iya asawa parte sa akon handum nga mag-alagad sa iban nga pungsod. Pirme ko gid ini ginapangamuyo kay Jehova.” Ginpasimple pa gid ni Stephanie ang iya kabuhi, amo nga nakatipon sia sang kuarta para magamit niya samtang nagaalagad sia sa iban nga pungsod.

 Nagsiling si Hans: “Nangamuyo kami kay Jehova nga giyahan kami kay gusto namon magkadto kon diin niya kami pakadtuon. Ginsambit man namon sa amon pangamuyo ang petsa nga plano namon magsaylo.” Nagsulat sila sa apat ka sanga talatapan. Sang nagsabat sa ila ang sanga talatapan sa Ghana, nagbiyahe sila didto, sa tuyo nga magbisita sing duha lang ka bulan. “Nalipay gid kami mag-alagad upod sa kongregasyon,” siling ni Hans, “amo nga nagtener pa kami didto.”

Sanday George kag Adria, mag-asawa nga manug-40 anyos nga taga-Canada, nagapati nga ginapakamaayo ni Jehova ang maayo nga mga desisyon, indi lang ang maayo nga mga handum. Gani gintinguhaan gid nila nga malab-ot ang ila tulumuron. Gintawgan nila ang isa ka sister nga nagaalagad sa Ghana diin mas daku ang kinahanglanon kag madamo sila sing ginpamangkot sa iya. Nagsulat man sila sa sanga talatapan sa Canada kag sa Ghana. Nagsiling si Adria, “Kag ginpasimple pa gid namon ang amon kabuhi.” Bangod sini nga mga desisyon, nakasaylo sila sa Ghana sang 2004.

Ano ang mga kabudlayan ninyo sang nagsaylo kamo, kag paano ninyo ini gin-atubang? Sang primero, ginhidlaw si Amy sa iya pamilya. “Namag-uhan gid ako.” Ano ang nakabulig sa iya? “Sang gintawgan ako sang akon pamilya kag ginsilingan nga ginaapresyar gid nila ang akon pag-alagad, nagpahanumdom ini sa akon kon ngaa nagdesisyon ako nga magsaylo. Sang ulihi, nag-istoryahanay kami sang akon pamilya paagi sa video. Bangod makita namon ang kada isa, daw upod ko lang sila gihapon.” Nagsiling si Amy nga  nangin amiga niya ang isa ka sister sa amo nga lugar nga nagbulig nga maintiendihan niya ang mga kinabatasan didto. “Sia ang akon ginapalapitan kag ginapamangkot kon indi ko maintiendihan ang reaksion sang iban. Gintudluan niya ako kon ano ang dapat himuon kag ano ang likawan, kag nakabulig gid ini para makaalagad ako sing malipayon.”

Nagsiling sanday George kag Adria nga sang nagsaylo sila sa Ghana, daw nagbalik sila sa tiempo sang una. “Nagapanglaba kami sa labador sa baylo nga sa washing machine. Mas madugay magpreparar sang pagkaon kon ikomparar sa naandan namon,” siling ni Adria. “Pero pagligad sang tion, nakatuon man kami sa sining daw mabudlay nga mga kahimtangan.” Nagsiling si Brook: “Malipayon kami wala sapayan sang mga kabudlayan nga ginaatubang namon nga mga payunir. Ginapakabahandi gid namon ang tanan namon nga makapalig-on nga mga eksperiensia.”

Ngaa mapanugda ninyo sa iban ini nga sahi sang pag-alagad sa Ginharian? “Makalilipay magbantala sa teritoryo diin gusto gid sang mga tawo mahibaluan ang kamatuoran kag magtuon sa Biblia kada adlaw,” siling ni Stephanie. “Wala gid ako nagahinulsol sa desisyon ko nga mag-alagad sa lugar diin mas daku ang kinahanglanon!” Sang 2014, napamana ni Stephanie si Aaron, kag nagaalagad sila sa sanga talatapan sa Ghana subong.

“Maayo gid ini nga eksperiensia,” siling ni Christine, nga payunir nga taga-Germany kag treintahon ang edad. Nag-alagad si Christine sa Bolivia antes sia nagsaylo sa Ghana. Nagsiling pa sia: “Bangod malayo ako sa akon pamilya, kay Jehova ako pirme nagapangayo sing bulig. Nangin suod pa gid ako sa iya. Nakita ko man ang tumalagsahon nga paghiusa sang katawhan ni Jehova. Gani, nangin malipayon pa gid ako.” Napamana ni Christine si Gideon, kag padayon sila nga nagaalagad sa Ghana.

Ginsugid nanday Filip kag Ida ang ginhimo nila para mabuligan nga mag-uswag ang ila mga ginatudluan sing Biblia. “Sang primero, sobra sa 15 ang ginahiwat namon nga pagtuon sa Biblia, pero ginhimo namon nga 10 na lang para matudluan namon sila sing maayo.” Nakabulig bala ini sa mga estudyante? Nagsiling si Filip: “Gintudluan ko sa Biblia ang pamatan-on nga si Michael. Nagatuon sia kada adlaw kag nagahanda sing maayo amo nga natapos namon ang Ginatudlo sang Biblia nga libro sa isa lang ka bulan. Dason, nangin indi bawtismado sia nga manugbantala. Sa una nga adlaw nga nagbantala sia, nagsiling sia sa akon, ‘Puede mo ako buligan sa akon mga ginatudluan sing Biblia?’ Nakibot ako. Ginpaathag ni Michael nga nakasugod sia sang tatlo ka pagtuon kag gusto niya magpabulig sa sini.” Kinahanglan gid ang dugang pa nga mga manunudlo kay ang mga estudyante sa Biblia mga manunudlo na!

Natalupangdan man ni Amy ini nga kinahanglanon sang nagsiling sia: “Pag-abot namon sa Ghana, nagbantala kami sa gamay nga baryo kag ginpangita namon ang mga apa. Indi lang isa ka apa ang amon nakita kundi walo gid sa sini lang nga baryo!” Sang ulihi, napamana ni Amy si Eric, kag mga espesyal payunir sila subong. Nag-alagad sila sa isa ka sign-language nga kongregasyon, kay sa sini nga pungsod may mga 300 ka apa nga manugbantala kag madamo sing interesado. Naeksperiensiahan naman nanday George kag Adria nga mangin misyonero sang nag-alagad sila sa Ghana. Gani malipayon gid sila sang gin-agda sila sa ika-126 nga klase sang Gilead School! Mga misyonero sila subong sa Mozambique.

Makapalig-on nga makita ang madamo halin sa iban nga pungsod nga nagabulig sa mga kauturan sa hilikuton nga pag-ani. (Juan 4:35) Sa isa ka tuig, mga 120 ang ginabawtismuhan kada semana sa Ghana. Pareho sa 17 ka utod nga nagsaylo sa Ghana sa pag-alagad diin mas daku ang kinahanglanon, linibo man ka manugbantala sa bilog nga kalibutan ang napalig-on sang ila gugma kay Jehova nga ‘maghalad sang ila kaugalingon sing kinabubut-on.’ Nagaalagad sila sa mga lugar diin kinahanglan ang dugang pa nga mga manugbantala sang Ginharian. Napasadya gid nila ang tagipusuon ni Jehova!—Sal. 110:3; Hulu. 27:11.