1, 2. (a) Isugid ang ilustrasyon ni Jesus parte sa tag-iya sang ulubasan. (b) Paano ginlaragway sa sini ang mga kinaiya nga kaalwan kag wala tupong nga kaayo?

 AGA pa nga nagkadto ang tag-iya sang ulubasan sa tiendahan para magpangita sang mga tawo nga magaobra sa iya ulubasan. Nagsugot ang nakita niya nga mga tawo sa ihatag niya nga sueldo kag nag-obra sila. Pero kinahanglan niya ang dugang pa nga manug-obra, gani nagbalikbalik sia sa tiendahan sa bilog nga adlaw para mangita, kag ginsilingan niya sila pati ang nakita niya sang hapon na nga suelduhan niya sila sing eksakto. Sang sirom na, gintipon niya ang mga manug-obra kag ginsuelduhan sila tanan sing palareho, nag-obra man sila sing madamo nga oras ukon isa lang ka oras. Natalupangdan ini sang nahauna nga mga manug-obra, gani nagreklamo sila. Nagsabat ang tag-iya sang ulubasan: ‘Indi bala nga nagsugot kamo sa ginsiling ko nga sueldo? Wala bala ako sing kinamatarong sa paghatag sang gusto ko sa tanan ko nga manug-obra? Nahisa bala kamo bangod maalwan ako?’—Mat. 20:1-15, footnote.

² Ginpahanumdom sa aton sini nga parabola ni Jesus ang kinaiya ni Jehova nga pirme ginasambit sa Biblia, ang iya “wala tupong nga kaayo.” ^[1] (Basaha ang 2 Corinto 6:1.) Daw indi bagay hatagan sing bilog nga adlaw nga sueldo ang mga nag-obra sing isa lang ka oras, pero pagpakita ini sang tag-iya sang daku gid nga kaayo sa  ila. Parte sa termino nga “wala tupong nga kaayo,” nga ginbadbad nga “bugay” ukon “grasya” sang madamo nga bersion sang Biblia, nagsulat ang isa ka iskolar: “Nagakahulugan ini sang wala bayad kag indi tani nagakabagay nga regalo nga ginhatag indi bangod sa pagpangabudlay sang isa ukon balos sa iya.”

3, 4. Ngaa kag paano ginpakita ni Jehova ang wala tupong nga kaayo sa tanan nga tawo?

³ Ginsambit sa Kasulatan nga ang “wala tupong nga kaayo sang Dios” isa ka “wala bayad nga dulot” ukon regalo. (Efe. 3:7) Ngaa kag paano ginahatag ni Jehova ining “wala bayad nga dulot”? Kon himpit naton nga mahimo ang tanan nga ginapatuman ni Jehova, nagakabagay kita pakitaan sang iya kaayo. Pero indi naton ini mahimo. Nagsulat ang maalam nga si Hari Solomon: “Wala sing matarong nga tawo sa duta nga nagahimo pirme sing maayo kag indi makasala.” (Man. 7:20) Nagsiling man si apostol Pablo: “Ang tanan nakasala kag wala makalab-ot sa himaya sang Dios,” kag “ang bayad sa sala amo ang kamatayon.” (Roma 3:23; 6:23a) Amo ini ang nagakabagay sa aton.

⁴ Pero ginpakita ni Jehova ang iya gugma sa makasasala nga mga tawo paagi sa iya wala tupong nga kaayo. Ginpadala niya ang iya indi matupungan nga regalo, “ang iya bugtong nga Anak,” sa duta kag napatay para sa aton. (Juan 3:16) Nagsulat si Pablo nga si Jesus “ginkoronahan na karon sing himaya kag dungog bangod nag-antos sia tubtob sa kamatayon, agod paagi sa wala tupong nga kaayo sang Dios matilawan niya ang kamatayon para sa tagsa ka tawo.” (Heb. 2:9) Huo, “ang dulot nga ginahatag sang Dios amo ang kabuhi nga wala sing katapusan paagi kay Cristo Jesus nga aton Ginuo.”—Roma 6:23b.

5, 6. Ano ang resulta kon nagagahom sa aton (a) ang sala? (b) ang wala tupong nga kaayo?

⁵ Ngaa nangin makasasala ang tanan nga tawo kag nagakapatay? Nagpaathag ang Biblia: “Bangod sa paglapas sang isa ka tawo [si Adan] ang kamatayon naggahom subong hari” sa mga kaliwat ni Adan. (Roma 5:12, 14, 17) Pero makapili kita nga indi na maggahom sa aton ang sala. Kon magtuo kita sa halad-gawad sang Cristo, nagagahom sa aton ang wala tupong nga kaayo ni Jehova. Ngaa masiling naton ini? “Sang nakahimo sing madamo nga sala ang mga tawo, labi pa nga ginpakita sang Dios ang iya wala tupong nga kaayo sa ila. Sa ano nga katuyuan? Subong nga ang sala kag kamatayon naggahom subong hari, gani ang wala tupong nga kaayo sang Dios nagagahom man subong hari agod mapakamatarong niya ang mga tawo, kag mabaton nila ang kabuhi nga wala sing katapusan paagi kay Jesucristo.”—Roma 5:20, 21.

⁶ Bisan makasasala pa kita, indi naton dapat tugutan nga maggahom sa aton ang sala. Kon makahimo kita sang sala, mangabay kita kay Jehova nga patawaron niya kita. Nagpaandam si Pablo sa mga Cristiano: “Indi dapat nga mangin agalon ninyo ang sala, bangod wala kamo sa idalom sang kasuguan kundi sa idalom sang wala tupong nga kaayo.” (Roma 6:14) Gani, nagagahom na sa aton ang wala tupong nga kaayo. Ano ang resulta sini? Ginpaathag ni Pablo: “Ang wala tupong nga kaayo sang Dios [nagahanas] sa aton nga sikwayon ang pagkadidiosnon kag kalibutanon nga mga kailigbon kag magkabuhi nga may maligdong nga hunahuna kag pagkamatarong kag diosnon nga debosyon sa tunga sining karon nga sistema sang mga butang.”—Tito 2:11, 12.

7, 8. Ano ang buot silingon nga ang wala tupong nga kaayo ni Jehova “ginpakita sa nanuhaytuhay nga paagi”? (Tan-awa ang mga piktyur sa umpisa sini nga artikulo.)

⁷ Nagsulat si apostol Pedro: “Suno sa dulot nga nabaton sang kada isa sa inyo, gamita ninyo ini sa pag-alagad sa isa kag isa subong  maayong mga tulugyanan sang wala tupong nga kaayo sang Dios nga ginpakita sa nanuhaytuhay nga paagi.” (1 Ped. 4:10) Ano ang buot silingon sini? Bisan ano man nga sahi sang pagtilaw ang aton ginaatubang, mabuligan kita ni Jehova nga mabatas ini. (1 Ped. 1:6) Paagi sa iya wala tupong nga kaayo, ihatag niya kon ano gid ang kinahanglan naton para malampuwasan ang kada pagtilaw.

⁸ Ginapakita gid sa nanuhaytuhay nga paagi ang wala tupong nga kaayo ni Jehova. Nagsulat si apostol Juan: “Bugana ang nabaton naton nga wala tupong nga kaayo halin sa iya, kay puno sia sing wala tupong nga kaayo.” (Juan 1:16) Madamo kita sing nabaton nga pagpakamaayo bangod ginpakita ni Jehova ang iya kaayo sa nanuhaytuhay nga paagi. Ano ang pila sa sini?

9. Paano kita nakabenepisyo sa wala tupong nga kaayo ni Jehova, kag paano naton ini mapasalamatan?

⁹ Ginpatawad kita sa aton mga sala. Bangod sang wala tupong nga kaayo ni Jehova, mapatawad kita sa aton mga sala kon maghinulsol kita kag padayon naton nga pakigbatuan ang aton makasasala nga mga huyog. (Basaha ang 1 Juan 1:8, 9.) Dapat kita magpasalamat sa kaluoy sang Dios kag magdayaw sa iya. Nagsulat si Pablo sa pareho niya nga hinaplas nga mga Cristiano: “Ginluwas [kita ni Jehova] sa awtoridad sang kadudulman kag ginsaylo sa ginharian sang iya hinigugma nga Anak, nga paagi sa iya ginhilway kita paagi sa gawad, ang kapatawaran sang aton mga sala.” (Col. 1:13, 14) Bangod ginpatawad kita sa aton mga sala, mabaton naton ang iban pa nga mga pagpakamaayo.

10. Ano ang natigayon naton bangod sang wala tupong nga kaayo sang Dios?

¹⁰ Natigayon naton ang maayo nga kaangtanan sa Dios. Halin pa sang natawo kita, mga kaaway na kita sang Dios bangod makasasala kita. Nagsiling si Pablo: “Sang kaaway pa kita sang Dios napasag-uli kita sa iya paagi sa kamatayon sang iya Anak.” (Roma 5:10) Bangod sini nga pagpasag-uli, mahimo na kita mangin abyan ni Jehova. Ginpaathag ni Pablo nga nangin posible ini nga pribilehiyo bangod sang wala tupong nga kaayo ni Jehova: “Karon nga ginpakamatarong na kita [ang hinaplas nga mga utod sang Cristo] tungod sang aton pagtuo, huptan naton ang aton paghidait sa Dios paagi sa aton Ginuong Jesucristo, nga paagi man sa pagtuo sa iya makapalapit kita sa Dios agod mabaton naton ang wala tupong nga kaayo, nga ginabaton naton subong.” (Roma 5:1, 2) Pagpakamaayo gid ini!

11. Paano ginbuligan sang mga hinaplas ang “iban nga mga karnero” nga mangin matarong?

¹¹ Puede kita mangin matarong sa atubangan sang Dios. Tanan kita indi matarong. Pero gintagna ni Daniel nga sa tion sang katapusan, “ang mga may paghangop,” ang mga hinaplas nga nagkalabilin, ‘magabulig sa madamo nga mangin matarong.’ (Basaha ang Daniel 12:3.) Paagi sa ila pagbantala kag pagpanudlo, ginbuligan nila ang minilyon nga “iban nga mga karnero” nga mangin matarong sa atubangan ni Jehova. (Juan 10:16) Pero nangin posible lamang ini bangod sang wala tupong nga kaayo ni Jehova. Ginpaathag ni Pablo: “Ginapakamatarong sila sang Dios bangod sang gawad nga ginhatag ni Cristo Jesus agod maluwas sila. Isa ini ka wala sing bayad nga dulot bangod sang iya [sang Dios] wala tupong nga kaayo.”—Roma 3:23, 24.

12. Ano ang kaangtanan sang pangamuyo sa wala tupong nga kaayo sang Dios?

¹² Makapalapit kita sa Dios paagi sa pangamuyo. Bangod sang wala tupong nga kaayo ni Jehova, may pribilehiyo kita nga makapangamuyo sa iya. Ginsiling ni Pablo nga ang trono ni Jehova amo ang “trono sang wala tupong nga kaayo” kag ginpalig-on niya kita nga magpalapit sa sini “nga may kahilwayan sa paghambal.” (Heb. 4:16a) Ginhatag ni Jehova sa aton ini nga pribilehiyo paagi sa iya  Anak, “nga paagi sa iya may kahilwayan kita sa paghambal kag pagpalapit sa Dios nga may pagsalig, kay nagatuo kita sa Cristo.” (Efe. 3:12) Ginpakita gid ni Jehova ang iya wala tupong nga kaayo sang gintugutan niya kita nga makapalapit sa iya paagi sa pangamuyo.

13. Paano naton matigayon ang wala tupong nga kaayo “sa tion nga nagakinahanglan kita sang bulig”?

¹³ Mabaton naton ang bulig sa tion nga kinahanglan naton ini. Ginpalig-on kita ni Pablo nga mangamuyo pirme kay Jehova, “agod matigayon naton ang kaluoy kag ang wala tupong nga kaayo sa tion nga nagakinahanglan kita sang bulig.” (Heb. 4:16b) Kon may problema kita ukon nagaatubang sang pagtilaw sa kabuhi, makapangayo kita sang bulig kay Jehova. Sabton niya ang aton pangamuyo, bisan pa indi sia obligado nga himuon ini, kag ginagamit niya ang aton mga kauturan para buligan kita. “Gani, makasiling kita nga may pagsalig: ‘Si Jehova ang akon manugbulig; indi ako magkahadlok. Ano ang mahimo sang tawo sa akon?’”—Heb. 13:6.

14. Ano ang epekto sang wala tupong nga kaayo ni Jehova sa aton tagipusuon?

¹⁴ Malugpayan ang aton tagipusuon. Isa gid ka pagpakamaayo nga malugpayan ni Jehova ang aton tagipusuon paagi sa iya wala tupong nga kaayo. (Sal. 51:17) Nagsulat si Pablo sa mga Cristiano sa Tesalonica nga ginahingabot sadto: “Ginahigugma kita sang Dios nga aton Amay, kag bangod sang iya kaayo ginhatagan niya kita sang wala sing katapusan nga lugpay kag paglaum. Ginapangamuyo namon nga Sia kag si Ginuong Jesucristo maglugpay sang inyo tagipusuon kag magpabakod sa inyo.” (2 Tes. 2:16, 17, footnote) Nalugpayan gid kita kay nahibaluan naton nga ginapalangga kita ni Jehova kag nagaulikid sia sa aton bangod sang iya indi matupungan nga kaayo!

15. Bangod sang wala tupong nga kaayo sang Dios, ano ang aton paglaum?

¹⁵ May paglaum kita nga mabuhi sing wala katapusan. Bangod makasasala kita, wala kita kuntani sing paglaum. (Basaha ang Salmo 49:7, 8.) Pero ginhatagan kita ni Jehova sang  matahom nga paglaum. Nagpromisa si Jesus sa iya mga sumulunod: “Amo ini ang kabubut-on sang akon Amay, nga ang tanan nga nagakilala sa Anak kag nagatuo sa iya makatigayon sang kabuhi nga wala sing katapusan.” (Juan 6:40) Ang paglaum nga mabuhi sing wala katapusan isa gid ka regalo sang Dios bangod sang iya wala tupong nga kaayo. Gin-apresyar gid ini ni Pablo sang nagsiling sia: “Ang wala tupong nga kaayo sang Dios napadayag, nga nagadala sang kaluwasan sa tanan nga sahi sang mga tawo.”—Tito 2:11.

16. Paano ginbalewala sang mga Cristiano sang una ang wala tupong nga kaayo sang Dios?

¹⁶ Bisan pa nakabaton kita sang madamo nga pagpakamaayo bangod sang wala tupong nga kaayo ni Jehova, indi kita maghunahuna nga ginakunsinti niya ang tanan nga paggawi. Sang una, ginhimo sang pila ka Cristiano “ang wala tupong nga kaayo sang . . . Dios nga balibad sa matampalason nga paggawi.” (Judas 4) Abi sining indi matutom nga mga Cristiano nga puede sila magpakasala kag patawaron lang sila ni Jehova. Mas malain pa sa sini, ginganyat man nila ang ila mga kauturan sa pagpakasala. Subong, ang nagahimo sini “nag-insulto sa espiritu sang wala tupong nga kaayo.”—Heb. 10:29.

17. Ano ang ginlaygay ni Pedro?

¹⁷ Ginpatalang subong ni Satanas ang pila ka Cristiano nga maghunahuna nga puede sila magpakasala kag patawaron lang sila dayon kay maluluy-on ang Dios. Matuod, handa si Jehova sa pagpatawad sa nagahinulsol nga mga makasasala, pero ginapaabot niya nga pakigbatuan gid naton ang aton makasasala nga mga huyog. Gingiyahan niya si Pedro sa pagsulat: “Gani, mga hinigugma, bangod nahibaluan na ninyo ini nga daan, magbantay kamo agod indi kamo mapatalang kaupod nila paagi sa sayop sang mga tawo nga indi matinumanon sa kasuguan kag madula ninyo ang inyo kalig-on. Indi, kundi padayon kamo nga magbaton sang wala tupong nga kaayo kag ihibalo sa aton Ginuo kag Manluluwas nga si Jesucristo.”—2 Ped. 3:17, 18.

18. Bangod sang wala tupong nga kaayo ni Jehova, ano ang mga responsibilidad naton?

¹⁸ Bilang pagpasalamat sa wala tupong nga kaayo ni Jehova, dapat naton gamiton ang nabaton naton nga mga dulot para mapadunggan ang Dios kag mabuligan ang aton mga isigkatawo. Paano? Nagsiling si Pablo: “Gani tungod sa wala tupong nga kaayo sang Dios, nanuhaytuhay nga mga dulot ang ginhatag niya sa aton . . . Kon dulot ini sa pagministeryo, padayon nga himuon naton ini; ukon ang may dulot sa pagpanudlo, padayon nga magpanudlo. Ang may dulot sa paglaygay, padayon nga maglaygay; . . . ang nagapakita sing kaluoy, padayon nga maghimo sini sing malipayon.” (Roma 12:6-8) Bangod sang wala tupong nga kaayo ni Jehova sa aton, responsibilidad naton nga mangin mapisan sa Cristianong ministeryo, tudluan sing Biblia ang iban, palig-unon ang aton mga kauturan, kag patawaron ang mga nakasala sa aton.

19. Ano nga responsibilidad ang binagbinagon sa masunod nga artikulo?

¹⁹ Bilang pagpasalamat sa indi matupungan nga gugma sang Dios, dapat gid kita magpanikasog “nga magpanaksi . . . sing maid-id sa maayong balita tuhoy sa wala tupong nga kaayo sang Dios.” (Binu. 20:24) Binagbinagon ini nga responsibilidad sa masunod nga artikulo.