SINING KARON LANG, MADAMO ANG NAGATUON PARTE SA KASAKIT NGA RESULTA SANG KAMATAYON SANG PINALANGGA. Pero sa nabinagbinag na, ang pinakamaayo nga giya masami nga nagahisanto sa madugay na nga laygay sang Biblia. Ginapakita sini nga wala gid nagalubad ang giya sang Biblia. Pero indi lang masaligan nga giya ang makita sa Biblia. May mga impormasyon nga diri lang makita, kag makapaumpaw gid sa mga nagalalaw.

• Pasalig nga ang aton napatay nga pinalangga wala nagaantos

  “Ang mga patay wala gid sing nahibaluan,” siling sang Biblia sa Manugwali 9:5. Ang ila “panghunahuna madula.” (Salmo 146:4) Base sa sini, ginpaanggid sang Biblia ang kamatayon sa mahamuok nga pagtulog.—Juan 11:11.

• Ang pagpati nga mahigugmaon ang Dios makapaumpaw

  Ang Biblia nagsiling sa Salmo 34:15: “Ang mga mata ni Jehova a nagatulok sa mga matarong, kag ang iya mga dulunggan nagapamati sa ila pagpangayo sing bulig.” Ang pagsugid naton sang aton ginabatyag sa Dios paagi sa pangamuyo indi lang makapaumpaw ukon nagahatag sing kalinong sa hunahuna. Nagapasuod ini sa aton relasyon sa aton Manunuga, nga mahimo maggamit sang iya gahom para paumpawan kita.

• Ang paglaum sa isa ka maayo nga palaabuton

  Imadyina ang palaabuton nga ang mga ara sa lulubngan mabuhi liwat diri sa duta! Pirme ini ginasambit sa Biblia. Ginasugid sang Biblia kon ano ang mangin sitwasyon sang duta. Ini nagasiling: “Pahiran [sang Dios] ang tagsa ka luha sa [aton] mga mata, kag wala na sing kamatayon, ukon paglalaw ukon paghibi ukon kasakit pa.”—Bugna 21:3, 4.

Madamo sa nagapati kay Jehova, ang Dios sa Biblia, ang napabakod gid sa pag-atubang sang kasubo bangod sa paglaum nga makita liwat ang ila napatay nga mga pinalangga. Halimbawa, si Ann, nga napatyan sang bana pagkatapos sang 65 ka tuig nga pag-asawahay, nagsiling: “Ginapasalig ako sang Biblia nga ang akon napatay nga pinalangga wala nagaantos kag banhawon sang Dios ang mga ara sa iya handumanan. Ginapamensar ko ini kon masubuan ako, gani, nalampuwasan ko ang pinakamalain nga natabo sa akon!”

Si Tiina, nga ginsambit sa nauna nga mga artikulo, nagsiling: “Halin sang adlaw nga napatay si Timo, nabatyagan ko gid ang bulig sang Dios. Nabatyagan ko gid ang pagbulig ni Jehova sa sining mabudlay nga sitwasyon. Kag ang promisa sa Biblia nga pagkabanhaw, nangin matuod gid sa akon. Nakapabakod ini sa akon nga magpadayon asta nga makit-anay kami liwat ni Timo.”

Amo man sini ang pagpati sang minilyon nga kumbinsido gid nga masaligan ang Biblia. Bisan pa sa pamatyag mo daw indi ini mapatihan ukon damgo lamang, mas maayo gid kon usisaon mo mismo ang mga pamatuod nga masaligan ang mga laygay kag mga promisa sini. Makita mo gid nga ang Biblia amo ang pinakamaayo nga bulig sa mga nagalalaw.

Tan-awa ang mga video parte sa sini sa amon website sa jw.org/hil

 ANO ANG KAHIMTANGAN SANG MGA PATAY?

GUSTO MO BALA SANG MAAYONG BALITA?