Ang mga Hindu nagapati nga ang pag-antos resulta sang mga ginhimo sang isa ka tawo sa sini nga kabuhi ukon sa iya nagligad nga kabuhi. Pero puede malab-ot sang isa ka tawo ang ginatawag nga moksha, ukon ang kahilwayan sa sulitsulit nga pagkabun-ag liwat, paagi sa pagpanikasog nga matigayon ang panghunahuna nga nakapokus lamang sa espirituwal nga mga butang.

Ang mga Muslim nagapati nga ang pag-antos isa ka silot kag pagtilaw sa pagtuo. Ang mga trahedya isa ka pahanumdom nga “magpasalamat sa tanan nga pagpakamaayo sang Dios sa aton kag dapat naton buligan ang mga nagakinahanglan,” siling ni Dr. Sayyid Syeed, presidente sang Islamic Society of North America.

Ini nga mga tradisyon nagatudlo nga ang pag-antos resulta sang mga buhat sang isa ka tawo. Ang pila ka mga Judiyo nagasiling nga may pagkabanhaw para mahatagan sing hustisya ang isa nga nag-antos nga wala sing sala. Ang isa pa ka sahi sang Judaismo, nga ginatawag Kabbalah (misteryo), nagatudlo sang reinkarnasyon nga nagahatag sa isa ka tawo sang sulitsulit nga kahigayunan para mabayaran ang iya mga sala.

Ang mga Buddhist nagapati nga ang isa ka tawo sulitsulit nga mabun-ag liwat kag padayon nga magaantos asta nga wala niya ginabag-o ang malain niya nga mga ginahimo, balatyagon, kag kailigbon. Pero paagi sa pagtigayon sing kaalam, paghimo sing maayo, kag pagdisiplina sa hunahuna, mahimo malab-ot sang isa ang ginatawag nga nirvana, ukon ang kahimtangan nga wala na sing pag-antos.

Ang mga Confucianist nagapati nga ang kalabanan nga pag-antos resulta sang “kapaslawan kag sala sang tawo,” siling sang A Dictionary of Comparative Religion. Ini nga doktrina nagatudlo nga bisan pa mabuhinan ang pag-antos paagi sa maayo nga pagkabuhi, madamo sa sini ang kahimuan sang “espiritu nga mga tinuga nga mas gamhanan kag indi madaug sang mga tawo. Gani, dapat na lang batunon sang mga tawo kon ano ang gusto himuon sa ila sining mga espiritu.”

Ang pila ka tribo nagapati nga ang pag- antos resulta sang espiritismo. Suno sa sini nga mga pagpati, ang mga espiritista makadala sang suerte ukon trahedya, pero puede mapauntat ang gahom sini paagi sa pila ka ritwal. Gani, kon nagaantos ang isa bangod sang balatian, may mga ritwal kag bulong ang mga siruhano ukon babaylan nga ginapatihan nga makapaayo sa halit sang hiwit.

Ang mga Cristiano nagapati nga may pag-antos bangod nagpakasala ang una nga mga tawo, suno sa mabasa sa libro sang Biblia nga Genesis. Pero madamo nga mga sekta sang Cristianismo ang nagdugang sang ila kaugalingon nga ideya sa sina nga panudlo. Halimbawa, may mga Katoliko nga nagasiling nga ang ila pag-antos puede ‘ihalad sa Dios’ para magpangabay nga pakamaayuhon niya ang simbahan ukon para sa kaluwasan sang iban.