TULUN-AN NGA ARTIKULO 39
Kon ang Aton Pinalangga Nagbiya kay Jehova
“Pirme [nila ginasakit] ang iya balatyagon.”—SAL. 78:40.
AMBAHANON 102 “Buligan ang mga Maluya”
ANG BINAGBINAGON SA SINI NGA ARTIKULO a
1. Ano ang ginabatyag sang pamilya sang na-disfellowship?
MAY pinalangga ka bala nga na-disfellowship sa kongregasyon? Grabe gid ini kasakit! Ang isa ka sister nga si Hilda nagsiling: “Sang napatay ang akon bana, abi ko amo na ’to ang pinakamasakit nga maeksperiensiahan ko sa akon kabuhi. b Kay man, 41 ka tuig kami nga nag-updanay bilang mag-asawa. Pero sang na-disfellowship ang akon anak, kag ginbiyaan niya ang iya asawa kag ang ila kabataan, mas masakit pa gid gali ini.”
Nahangpan ni Jehova nga grabe gid ang imo kasubo sang na-disfellowship ang imo pinalangga (Tan-awa ang parapo 2-3) d
2-3. Suno sa Salmo 78:40, 41, ano ang ginabatyag ni Jehova kon may alagad sia nga nagbiya sa iya?
2 Hunahunaa ang kasakit nga ginbatyag ni Jehova sang ginsikway sia sang pila ka anghel nga miembro sang iya pamilya. (Jud. 6) Kag imadyina ang iya kasubo sang sulitsulit nga nagrebelde sa iya ang mga Israelinhon nga iya pinalangga nga katawhan. (Basaha ang Salmo 78:40, 41.) Sigurado gid nga nasakitan man ang aton mahigugmaon nga Amay sa langit kon may pinalangga ka nga nagbiya sa iya. Nahangpan niya nga nasubuan ka. Naluoy sia sa imo, gani palig-unon ka niya kag buligan.
3 Sa sini nga artikulo, binagbinagon naton kon ano ang puede naton himuon para mabaton naton ang bulig ni Jehova kon may pinalangga kita nga nag-untat sa pag-alagad sa iya. Binagbinagon man naton kon paano naton mabuligan ang mga kauturan nga may paryente nga na-disfellowship. Pero binagbinagon anay naton ang pila ka panghunahuna nga dapat naton likawan.
INDI PAGBASULA ANG IMO KAUGALINGON
4. Ano ang ginabatyag sang madamo nga ginikanan kon nagbiya kay Jehova ang ila anak?
4 Kon ang mga ginikanan may pinalangga nga anak nga nagbiya kay Jehova, masami nga ginahunahuna nila kon ano ang mga wala nila nahimo nga nakabulig kuntani sa ila anak nga indi magbiya kay Jehova. Sang na-disfellowship ang anak sang brother nga si Luke, nagsiling sia: “Ginbasol ko ang akon kaugalingon. Nagakadamguhan ko pa gani ini, kag kalain gid sang mga damgo ko. Kon kaisa, nagahibi ako kag daw ginakumos ang akon dughan.” Ang isa ka sister nga si Elizabeth may anak man nga na-disfellowship. Pirme niya ginapamensar: “May mga kakulangan gid guro ako bilang isa ka iloy. Pamatyag ko wala ko gid napatudok sing maayo ang kamatuoran sa akon anak.”
5. Sin-o ang may sala kon may alagad si Jehova nga nagbiya sa iya?
5 Dapat naton tandaan nga ginhatagan ni Jehova ang kada isa sa aton sang kahilwayan sa pagdesisyon. Buot silingon, depende sa aton kon bala tumanon naton sia ukon indi. May pila ka kabataan nga nagdesisyon nga alagaron si Jehova sing matutom bisan pa indi maayo nga halimbawa ang ila mga ginikanan. May pila naman ka kabataan nga nagbiya sang ulihi kay Jehova bisan pa ginhimo sang ila mga ginikanan ang bug-os nila nga masarangan nga tudluan sila sang mga prinsipio sa Biblia. Gani ang kada isa sa aton ang dapat magdesisyon kon bala alagaron naton si Jehova. (Jos. 24:15) Mga ginikanan, masubo gid kon ginbiyaan sang inyo anak si Jehova. Pero indi ninyo dapat pagbasulon ang inyo kaugalingon.
6. Ano ang posible nga mabatyagan sang isa ka bata kon nagbiya sa Dios ang iya ginikanan?
6 Kon kaisa, may ginikanan nga nagauntat sa pag-alagad kay Jehova kag ginabiyaan niya ang iya pamilya. (Sal. 27:10) Para sa mga kabataan nga ginatan-aw ang ila ginikanan bilang isa ka maayo nga halimbawa, grabe gid ini kasakit. Sang na-disfellowship ang amay ni Esther, nagsiling sia: “Abi ko amat-amat lang sia nga nagakaanod palayo sa kamatuoran, pero indi na gid gali niya gusto mag-alagad kay Jehova. Gani pirme ako nagahibi. Palangga ko ang akon amay, gani sang na-disfellowship sia, pirme ko ginapamensar kon kamusta ang iya sitwasyon. May mga tion pa gani nga ginaatake ako sang nerbios.”
7. Kon na-disfellowship ang ginikanan sang isa ka pamatan-on, ano ang ginabatyag ni Jehova?
7 Mga pamatan-on, kon na-disfellowship ang isa sa inyo mga ginikanan, nasubuan gid kami para sa inyo. Makasigurado kamo nga kabalo si Jehova nga nasakitan gid kamo. Palangga niya kamo kag ginapabaloran gid niya ang inyo katutom sa iya. Amo man sini ang ginabatyag namon nga mga kauturan ninyo. Tandai man ninyo nga indi ninyo dapat pagbasulon ang inyo kaugalingon kon ano man ang gindesisyon sang inyo ginikanan. Pareho sang nasambit kaina, ginhatagan ni Jehova ang kada isa sang kahilwayan sa pagdesisyon. Kag kon ang isa nagdedikar na kag bawtismado na, sia ang dapat ‘magdala sang iya kaugalingon nga lulan sang responsibilidad.’—Gal. 6:5, footnote.
8. Ano ang puede himuon sang pamilya sang na-disfellowship samtang ginahulat nila nga magbalik kay Jehova ang ila pinalangga? (Tan-awa man ang kahon nga “ Magbalik kay Jehova.”)
8 Kon may pinalangga ka nga nagbiya kay Jehova, posible nga nagalaum ka gid nga magabalik sia sa Iya. Ano ang puede mo himuon samtang ginahulat mo ina nga tion? Himua ang imo bug-os nga masarangan para magpabilin nga mabakod ang imo pagtuo. Kon himuon mo ini, mangin maayo ka nga halimbawa sa iban pa nga miembro sang inyo pamilya, kag posible nga may maayo man ini nga epekto sa isa nga na-disfellowship. Mabuligan ka man sini nga masarangan ang kasubo kag kasakit nga nabatyagan mo. Gani ano ang puede mo himuon para magpabilin nga mabakod ang imo pagtuo?
ANG PUEDE MO HIMUON PARA MAGPABILIN NGA MABAKOD ANG IMO PAGTUO
9. Paano mo mapabakod ang imo pagtuo kay Jehova? (Tan-awa man ang kahon nga “ Makapaumpaw nga mga Teksto kon ang Imo Pinalangga Nagbiya kay Jehova.”)
9 Himua ang imo bug-os nga masarangan para magpabilin nga mabakod ang imo pagtuo. Importante gid nga padayon mo nga pabakuron ang imo kaugalingon kag ang iban pa nga miembro sang inyo pamilya. Paano mo ini himuon? Mapabakod mo ang imo pagtuo kay Jehova kon pirme mo basahon ang Pulong sang Dios, pamalandungan ini, kag mag-attend sa mga miting. Nag-untat sa pag-alagad kay Jehova ang amay kag ang magulang nga babayi ni Joanna. Nagsiling sia: “Nagatawhay ang akon pamatyag kon ginabasa ko ang parte kanday Abigail, Ester, Job, Jose, Jesus, kag iban pa nga ginasambit sa Biblia. Napalig-on ako sang ila halimbawa kag nakabulig ini sa akon nga magpokus sa maayo, gani nagahaganhagan ang kasakit nga nabatyagan ko. Napalig-on man ako sang aton orihinal nga mga kanta.”
10. Paano kita ginabuligan sang Salmo 32:6-8 para maghaganhagan ang aton kasubo?
10 Isugid kay Jehova ang tanan mo nga ginakabalak-an. Kon nasubuan ka, padayon nga magpangamuyo sa iya. Pangabaya ang aton mahigugmaon nga Dios nga buligan ka para mangin pareho sa iya ang imo pagtan-aw sa imo sitwasyon kag ‘hatagan ka sing paghangop kag tudluan ka sang dalanon nga dapat mo laktan.’ (Basaha ang Salmo 32:6-8.) Matuod, posible nga mabudlayan ka sa pagsugid kay Jehova sang imo nabatyagan. Pero nahangpan gid ni Jehova kon daw ano kasakit ang imo ginabatyag. Palangga ka gid niya kag ginapalig-on ka niya nga isugid sa iya ang imo nabatyagan.—Ex. 34:6; Sal. 62:7, 8.
11. Suno sa Hebreo 12:11, ngaa dapat kita magsalig sa mahigugmaon nga pagdisiplina ni Jehova? (Tan-awa man ang kahon nga “ Ang Pag-disfellowship Isa ka Pamatuod nga Palangga Kita ni Jehova.”)
11 Magpasakop sa desisyon sang mga gulang. Ang pag-disfellowship isa ka paagi ni Jehova sa pagdisiplina sa iya katawhan. Ginahimo niya ini bangod palangga niya sila. Para ini sa kaayuhan sang tanan, pati na sa isa nga na-disfellowship kay amo ini ang pinakamaayo nga paagi para mabuligan sia. (Basaha ang Hebreo 12:11.) Posible nga may pila ka utod nga magsiling nga indi husto ang desisyon sang mga gulang nga i-disfellowship ang nakasala. Pero sa masami, wala ginasugid sini nga mga utod ang ila nabal-an nga indi maayo parte sa nakasala. Ang matuod, wala kita kabalo sang tanan nga detalye. Gani dapat kita magsalig nga ginsunod gid sing maayo sang mga gulang nga miembro sang hudisyal nga komite ang mga prinsipio sa Biblia, kay kabalo sila nga nagahukom sila “para kay Jehova.”—2 Cron. 19:6.
12. Ano ang maayo nga resulta nga naeksperiensiahan sang iban bangod ginsunod nila ang sugo nga indi makig-upod sa na-disfellowship?
12 Kon magpasakop ka sa desisyon sang mga gulang sa pag-disfellowship sa imo pinalangga, posible nga mabuligan mo gid sia nga magbalik kay Jehova. “Nagalalain gid kami kay indi namon puede istoryahon ang amon anak,” siling ni Elizabeth, nga ginsambit kaina. “Pero sang nakabalik na sia kay Jehova, nagsiling sia nga husto lang nga gin-disfellowship sia. Sang ulihi, nagpasalamat sia kay nakabulig ini sa iya nga manuto. Bangod sini, napabaloran ko gid ang pagdisiplina ni Jehova,” siling pa ni Elizabeth. Nagsiling man ang iya bana nga si Mark: “Sang ulihi, ginsilingan ako sang amon anak nga ang isa ka rason kon ngaa nagdesisyon sia nga magbalik kay Jehova amo ang amon indi pagpakig-upod sa iya. Nalipay gid ako nga ginbuligan kami ni Jehova nga mangin matinumanon sa iya.”
13. Ano ang makabulig sa imo para maghaganhagan ang kasakit nga imo nabatyagan?
13 Makig-istorya sa imo mga abyan nga makaintiende sang imo nabatyagan. Makig-upod sa hamtong nga mga kauturan nga makabulig sa imo nga indi madulaan sang paglaum. (Hulu. 12:25; 17:17) Si Joanna, nga ginsambit kaina, nagsiling: “Pamatyag ko daw nagaisahanon ako. Pero nakabulig gid sa akon ang pagpakig-istorya sa akon mga abyan nga ginasaligan ko.” Pero ano ang puede mo himuon kon may nahambal sa imo ang iban nga kauturan nga nagpasakit pa gid sa imo balatyagon?
14. Ngaa dapat naton ‘padayon nga batason ang isa kag isa kag magpinatawaray sing kinabubut-on’?
14 Mangin mapinasensiahon sa imo mga kauturan. Kay man, may mga tion nga indi husto ang ila mahambal. (Sant. 3:2) Tanan kita indi perpekto, gani posible nga nabudlayan ang iban kon ano ang ila ihambal. Posible man nga may mahambal sila nga makasakit sa aton, pero indi nila ini hungod. Dumduma ang ginlaygay ni apostol Pablo: “Padayon nga batasa ninyo ang isa kag isa kag magpinatawaray kamo sing kinabubut-on bisan pa ang isa may rason nga magreklamo sa isa.” (Col. 3:13) Sang na-disfellowship ang anak sang isa ka sister, nagsiling sia: “May mga kauturan nga gusto kuntani magpalig-on sa akon. Pero imbes nga maghaganhagan ang akon kasakit, nadugangan pa gid ini. Ginbuligan ako ni Jehova nga patawaron sila.” Ano ang puede himuon sang mga kauturan para mabuligan ang pamilya sang na-disfellowship?
MAKABULIG ANG MGA KAUTURAN
15. Ano ang puede naton himuon para mabuligan ang pamilya sang na-disfellowship?
15 Pakitai sing kaayo ang pamilya sang na-disfellowship kag ipabatyag sa ila nga palangga mo sila. Sang na-disfellowship ang manghod nga lalaki sang isa ka sister nga si Miriam, daw indi sia mag-attend sa mga miting. “Nabalaka ako sa ihambal sang iban. Pero madamo nga kauturan ang nasubuan man sa natabo sa akon manghod nga na-disfellowship, kag indi sila akig sa iya. Nagapasalamat gid ako kay gin-unungan nila ako.” Nagsiling man ang isa pa ka sister: “Sang na-disfellowship ang amon anak, ginkadtuan kami sang mga kauturan para palig-unon kami. Ang iban sa ila nagsiling nga indi sila kabalo kon ano ang ila ihambal. Ang iban naghibi kag ang iban naman naghatag sa akon sang sulat. Daku gid ang nabulig nila sa akon.”
16. Ano ang puede himuon sang mga kauturan para padayon nga mabuligan ang pamilya sang na-disfellowship?
16 Padayon nga buligi ang pamilya sang na-disfellowship. Kinahanglan gid nila subong ang imo pagpalangga kag pagpalig-on. (Heb. 10:24, 25) Kon kaisa, nagasiling ang pamilya sang na-disfellowship nga wala na sila ginaistorya sang pila ka kauturan, kag pamatyag nila daw gin-disfellowship man sila. Indi naton gusto nga amo sini ang ila mabatyagan. Dapat naton palig-unon ilabi na ang mga pamatan-on nga may mga ginikanan nga nag-untat sa pag-alagad kay Jehova. Dapat man naton isiling sa sini nga mga pamatan-on nga ginapabaloran naton ang ila katutom. Sang na-disfellowship ang bana ni Maria kag ginbiyaan ang ila pamilya, nagsiling sia: “Nagkadto sa amon balay ang pila sa akon mga abyan. Nagluto sila sing pagkaon kag ginbuligan nila ako sa pag-study sa akon mga bata. Nasakitan man sila sa natabo sa amon kag naghibi sila. Sang may nagpalapta sang indi matuod nga mga istorya parte sa akon, ginpangapinan nila ako. Napalig-on gid nila ako.”—Roma 12:13, 15.
Mapakita sang mga kauturan nga palangga nila ang pamilya sang na-disfellowship paagi sa pagbulig sa ila (Tan-awa ang parapo 17) e
17. Ano ang puede himuon sang mga gulang para paumpawan ang mga nasubuan?
17 Mga gulang, himua ninyo ang inyo bug-os nga masarangan nga mapalig-on ang pamilya sang na-disfellowship. May responsibilidad kamo nga paumpawan ang mga kauturan nga may pinalangga nga nagbiya kay Jehova. (1 Tes. 5:14) Para mapalig-on sila, istoryaha sila antes kag pagkatapos sang mga miting. Kadtui sila sa ila balay kag magpangamuyo nga kaupod sila. Updi sila sa pagbantala, ukon hagara sila sa inyo pangpamilya nga pagsimba. Kinahanglan gid sang mga alagad ni Jehova nga nasubuan ang pagpalangga, atension, kag pag-intiende sa ila nabatyagan. Dapat ini ipakita kag ipabatyag sang mga gulang sa ila.—1 Tes. 2:7, 8.
INDI MADULAAN SANG PAGLAUM KAG PADAYON NGA MAGSALIG KAY JEHOVA
18. Suno sa 2 Pedro 3:9, ano ang gusto sang Dios nga himuon sang mga nagbiya sa iya?
18 “Indi [luyag ni Jehova] nga ang bisan sin-o malaglag kundi luyag niya nga ang tanan mahatagan sang kahigayunan nga maghinulsol.” (Basaha ang 2 Pedro 3:9.) Bisan pa makahimo sang serioso nga sala ang isa ka tawo, ginapabaloran gihapon sang Dios ang iya kabuhi. Tandai nga daku gid ang ginbayad ni Jehova para sa kabuhi sang kada isa sa aton bisan pa makasasala kita. Amo ini ang halad gawad sang iya pinalangga nga Anak. Naluoy si Jehova sa mga nagbiya sa iya, gani gusto niya sila buligan nga magbalik sa iya. Nagalaum sia nga magdesisyon sila nga magbalik sa iya. Maathag ini nga ginapakita sang ilustrasyon ni Jesus parte sa anak nga nagbiya sa ila pamilya. (Luc. 15:11-32) Madamo sa mga nagbiya kay Jehova ang nagbalik sang ulihi sa ila mahigugmaon nga Amay sa langit. Kag nalipay gid ang ila mga kauturan nga batunon sila. Nalipay gid si Elizabeth, nga ginsambit kaina, sang nakapanumbalik ang iya anak. Nagsiling sia, “Nagapasalamat gid ako sa mga nagpalig-on sa amon nga indi kami dapat madulaan sang paglaum.”
19. Ngaa padayon kita nga makasalig kay Jehova?
19 Makasalig gid kita pirme kay Jehova. Para gid pirme sa aton kaayuhan ang iya mga ginapatuman. Isa sia ka maalwan kag maluluy-on nga Amay nga nagapalangga gid sa tanan nga nagasimba kag nagapalangga sa iya. Kon makaeksperiensia ka sang kasubo kag kasakit, makasigurado ka nga indi ka pagpabay-an ni Jehova. (Heb. 13:5, 6) Si Mark, nga ginsambit kaina, nagsiling: “Wala gid kami ginpabay-an ni Jehova. Ginbuligan gid niya kami sang nakaeksperiensia kami sang mga kabudlayan.” Padayon ka nga hatagan ni Jehova sang “gahom nga labaw sa kinaandan.” (2 Cor. 4:7) Gani bisan pa nagbiya kay Jehova ang imo pinalangga, masarangan mo nga magpabilin nga matutom kag indi madulaan sang paglaum.
AMBAHANON 44 Pangamuyo sang Napung-awan
a Masubo gid kon ginbiyaan sang aton pinalangga si Jehova. Binagbinagon sa sini nga artikulo kon ano ang ginabatyag sang aton Dios kon matabo ini. Hibaluon naton kon ano ang puede himuon sang pamilya sang na-disfellowship para maghaganhagan ang kasakit nga ila ginabatyag, kag para magpabilin nga mabakod ang ila pagtuo. Binagbinagon man sa sini nga artikulo kon ano ang puede himuon sang tanan nga kauturan sa kongregasyon para mapaumpawan kag mabuligan ang pamilya sang na-disfellowship.
b Gin-islan ang pila ka ngalan sa sini nga artikulo.
