1-2. Ano ang ginasiling sang Manugwali 11:6 nga maaplikar sa pagbantala sang maayong balita sang Ginharian?

 SA PILA ka pungsod, nalipay ang mga tawo kon mabatian nila ang maayong balita kag gusto pa gid nila nga istoryahan ini. Amo gid ini ang ila kinahanglan. Sa pila naman ka pungsod, indi interesado ang kalabanan nga tawo nga istoryahan ang parte sa Dios ukon ang Biblia. Kamusta sa inyo lugar? Ano ang kalabanan nga reaksion sang mga tawo kon istoryahan ang parte sa maayong balita? Ano man ang ila reaksion, gusto ni Jehova nga magpadayon kita sa pagbantala asta sa tion nga magsiling si Jehova nga natapos na ini nga hilikuton.

² Nakadesisyon na si Jehova kon san-o matapos ang pagbantala. Dayon “magaabot ang katapusan.” (Mat. 24:14, 36) Gani, ano ang himuon naton para padayon kita nga makabantala asta matapos ini nga hilikuton?—Basaha ang Manugwali 11:6.

3. Ano ang binagbinagon naton sa sini nga artikulo?

³ Ginbinagbinag naton sa nagligad nga artikulo ang apat ka paagi nga dapat naton himuon para mangin epektibo kita nga “mangingisda sang mga tawo.” (Mat. 4:19) Binagbinagon sa sini nga artikulo ang tatlo ka paagi nga magapalig-on sa aton nga magpadayon sa pagbantala bisan may mga kabudlayan. Tun-an naton kon ngaa importante nga (1) unahon naton pirme sa aton kabuhi ang pagbantala, (2) mangin mapinasensiahon kita, kag (3) pabakuron naton ang aton pagtuo.

4. Ngaa dapat gid naton tinguhaan nga unahon sa aton kabuhi ang hilikuton nga ginapahimo sa aton ni Jehova?

⁴ Gintagna ni Jesus ang mangin kinaiya sang mga tawo kag kon ano ang matabo sa katapusan nga mga adlaw. Kabalo sia nga puede ini mangin rason nga indi na pag-unahon sang iya mga disipulo ang pagbantala. Gani ginlaygayan niya sila nga ‘padayon nga magbantay.’ (Mat. 24:42) Sang panahon ni Noe, madamo ang nangin rason kon ngaa wala ginpamatian sang mga tawo ang paandam ni Noe. Ini nga mga rason mahimo man makaapekto sa aton pagbantala  subong. (Mat. 24:37-39; 2 Ped. 2:5) Gani, dapat gid naton tinguhaan nga unahon sa aton kabuhi ang hilikuton nga ginapahimo sa aton ni Jehova.

5. Suno sa Binuhatan 1:6-8, asta diin magalab-ot ang pagbantala sang maayong balita?

⁵ Subong, dapat gid naton unahon ang pagbantala sang maayong balita sang Ginharian. Gintagna ni Jesus nga sa tapos sia mapatay, magapadayon gihapon sa pagbantala ang iya mga sumulunod kag mas madamo nga tawo ang ila mabantalaan. (Juan 14:12) Pero sa tapos mapatay si Jesus, nagbalik sa pagpangisda ang pila sa iya mga disipulo. Gani sa tapos mabanhaw si Jesus, ginbuligan niya ang iya mga disipulo nga makakuha sang madamo nga isda paagi sa milagro. Paagi sa sini nga milagro, gintudluan ni Jesus ang iya mga disipulo nga mas importante ang pagbantala kag pagtudlo sa iban para mangin disipulo sangsa bisan ano nga hilikuton. (Juan 21:15-17) Antes nagkadto si Jesus sa langit, ginsilingan niya ang iya mga disipulo nga ang pagbantala nga hilikuton nga iya ginsugdan sa Israel magalab-ot asta sa pinakamalayo nga bahin sang duta. (Basaha ang Binuhatan 1:6-8.) Pagligad sang pila ka tuig, ginpakita ni Jesus kay Juan ang isa ka palanan-awon parte sa matabo “sa adlaw sang Ginuo.” b Dalayawon gid ang nakita ni Juan. Nakita niya nga ginagiyahan sang anghel ang pagbantala sang “wala sing katapusan nga maayong balita” sa “tagsa ka pungsod kag tribo kag hambal kag katawhan.” (Bug. 1:10; 14:6) Maathag nga gusto ni Jehova nga ibantala naton ang maayong balita sa bilog nga kalibutan asta matapos ini nga hilikuton.

6. Ano ang magapalig-on sa aton nga unahon pirme sa aton kabuhi ang pagbantala?

⁶ Kon pamalandungan naton ang tanan nga ginahimo ni Jehova para buligan kita sa pagbantala, magapalig-on ini sa aton nga unahon pirme sa aton kabuhi ini nga hilikuton. Halimbawa, nagaaman sia sang madamo nga espirituwal nga pagkaon. May ara kita mga publikasyon  nga ginaimprinta, kag may ara man nga mabasa sa mga gadyet. May ara man audio kag video nga mga rekording, kag mga programa sa Internet. Dalayawon gid nga sa aton opisyal nga website, may mga impormasyon nga mabasa sa sobra 1,000 ka lenguahe! (Mat. 24:45-47) Nabahinbahin ang mga tawo sa kalibutan bangod lainlain nga pulitiko ang ila ginasuportahan kag lainlain ang ila relihion. Nabahinbahin man sila kay ang iban manggaranon pero ang iban pigado. Pero nahiusa gid ang sobra walo ka milyon ka alagad sang Dios sa bilog nga kalibutan. Halimbawa, sang Biernes, Abril 19, 2019, nahiusa ang mga Saksi sa bilog nga kalibutan paagi sa pagtan-aw sang video nga nagabinagbinag sang teksto sa amo nga adlaw. Pagkagab-i, 20,919,041 ang nagtipon para saulugon ang Memoryal sang kamatayon ni Jesus. Isa gid ka pribilehiyo nga makita ining dalayawon nga hitabo kag mangin bahin sini. Kon pamalandungan naton ini nga pribilehiyo, mapalig-on kita sini nga unahon pirme sa aton kabuhi ang pagbantala sang Ginharian.

7. Paano ang halimbawa ni Jesus magapalig-on sa aton nga unahon ang pagbantala?

⁷ Ang isa pa ka paagi nga magapalig-on sa aton nga unahon ang pagbantala amo ang pagsunod sa halimbawa ni Jesus. Wala gid sing may nakapauntat sa iya sa pagpanaksi sa kamatuoran. (Juan 18:37) Wala sia nagpadala sa pagsulay ni Satanas nga ihatag sa iya “ang tanan nga ginharian sang kalibutan kag ang gahom kag manggad sini,” kag wala man sia nagpadala sa gusto sang iban nga himuon sia nga hari. (Mat. 4:8, 9; Juan 6:15) Wala niya ginhandum nga mangin manggaranon, kag wala man sia nahadlok sa grabe nga pagpamatok. (Luc. 9:58; Juan 8:59) Kon ginatilawan ang aton pagtuo, makapokus kita gihapon sa aton hilikuton kon dumdumon naton ang laygay ni apostol Pablo. Ginpalig-on niya ang mga Cristiano nga sundon ang halimbawa ni Jesus para ‘indi sila pagkapuyon kag indi sila magpangampo’!—Heb. 12:3.

8. Ano ang ginahimo sang mapinasensiahon nga tawo, kag ngaa dapat gid kita mangin mapinasensiahon subong?

⁸ Ang mapinasensiahon nga tawo nagahulat sing kalmado asta magbag-o ang sitwasyon. Dapat kita mangin mapinasensiahon sa lainlain nga sitwasyon. Halimbawa, dapat naton ini himuon kon gusto na gid naton nga madula ang malain nga sitwasyon, ukon may ginapaabot kita nga pagpakamaayo nga madugay na naton nga ginahulat. Gusto gid sadto ni manalagna Habacuc nga madula na ang malain nga nagakatabo sa Juda. (Hab. 1:2) Naglaum naman ang mga disipulo ni Jesus nga “magaabot gilayon” ang Ginharian para luwason sila sa pagpamigos sang Roma. (Luc. 19:11) Kag gusto gid naton nga dulaon na sang Ginharian sang Dios ang malain nga mga tawo kag paistaron sa bag-ong kalibutan ang matarong nga mga tawo. (2 Ped. 3:13) Pero dapat kita mangin mapinasensiahon kag maghulat kon san-o ini himuon ni Jehova. Binagbinagon naton kon paano kita ginabuligan ni Jehova nga mangin mapinasensiahon.

9. Ano nga mga halimbawa ang nagapakita nga mapinasensiahon si Jehova?

⁹ Si Jehova ang pinakamaayo nga halimbawa sang pagkamapinasensiahon. Ginhatagan niya si Noe sang bastante nga tion nga mahimo ang arka kag makabantala. (1 Ped. 3:20; 2 Ped. 2:5) Ginpamatian ni Jehova ang sulitsulit nga pagpamangkot ni Abraham parte sa Iya desisyon nga laglagon ang malaut nga mga tawo sa Sodoma kag Gomorra. (Gen. 18:20-33) Tumalagsahon gid ang pagpasensia ni Jehova sa pungsod sang Israel kay nangin indi matutom sila sa iya sa sulod sang ginatos ka tuig. (Neh. 9:30, 31) Subong, makita naton nga mapinasensiahon si Jehova kay ‘ginahatagan niya ang tanan sang kahigayunan nga maghinulsol.’ (2 Ped. 3:9; Juan 6:44; 1 Tim. 2:3, 4) Pareho kay Jehova, dapat man kita mangin mapinasensiahon sa aton pagbantala kag pagtudlo sa iban. May isa ka ilustrasyon sa  iya Pulong nga gingamit niya para tudluan kita nga mangin mapinasensiahon.

10. Suno sa Santiago 5:7, 8, ano ang ginatudlo sa aton sang halimbawa sang mangunguma?

¹⁰ Basaha ang Santiago 5:7, 8. Ang halimbawa sang mangunguma makatudlo sa aton kon paano mangin mapinasensiahon. May mga tanom nga kadasig lang magtubo. Pero ang kalabanan nga tanom, ilabi na ang nagapamunga, mas madugay makapatubas. Sa Israel, mga anom ka bulan ang ginahulat sang mangunguma antes sia makapatubas. Ang mga mangunguma nagasab-ug sang binhi pagkatapos sang una nga ulan ukon tungatunga sang Oktubre, kag nagaani sila pagkatapos sang ulihi nga ulan ukon tungatunga sang Abril. (Mar. 4:28) Dapat man kita mangin mapinasensiahon pareho sang mangunguma. Pero, mahimo nga indi ini mahapos himuon.

11. Ngaa dapat kita mangin mapinasensiahon sa aton ministeryo?

¹¹ Bangod indi kita perpekto, gusto naton dayon makita ang resulta sang aton mga pagpanikasog. Pero para makapatubas ang aton uma, dapat naton ini pirme atipanon. Dapat naton ihanda ang duta, kag dapat kita magtanom, manghilamon, kag mamunyag. Kon gusto naton mangin disipulo ang aton ginatudluan sang Biblia, dapat man kita magpanikasog. Kinahanglan sang tion para mabuligan naton sila nga madula ang ila malain nga mga kinaiya pareho sang pagpasulabi kag indi pag-ulikid sa iban. Kon mapinasensiahon kita, indi kita maluyahan sang buot kon indi mamati sa aton ang mga tawo. Kag kon may mamati sa aton, dapat kita gihapon mangin mapinasensiahon. Indi naton mapilit ang aton ginatudluan sang Biblia nga magtuo sa ila natun-an. May tion nga bisan ang mga disipulo ni Jesus wala dayon nakaintiende sa iya gintudlo. (Juan 14:9) Dapat naton dumdumon nga mahimo kita magtanom kag magbunyag, pero ang Dios ang nagapatubo sini.—1 Cor. 3:6.

12. Paano kita mangin mapinasensiahon kon ginabantalaan naton ang aton mga paryente nga indi Saksi?

¹² Mahimo mabudlayan kita nga mangin mapinasensiahon kon ginabantalaan naton ang aton  mga paryente nga indi Saksi. Ang prinsipio sa Manugwali 3:1, 7 makabulig sa aton. Nagasiling ini: “May . . . tion sa paghipos kag tion sa paghambal.” Ang aton maayo nga paggawi isa na ka panaksi sa ila, pero dapat mangin handa kita nga panaksihan sila kon may kahigayunan. (1 Ped. 3:1, 2) Dapat kita mangin mapisan sa pagbantala kag pagtudlo sa iban, pero dapat kita mangin mapinasensiahon sa tanan lakip sa aton mga paryente.

13-14. Maghatag sing halimbawa sang mga alagad ni Jehova nga nangin mapinasensiahon nga mahimo naton mailog.

¹³ Kon binagbinagon naton ang halimbawa sang mga matutom sang panahon sang Biblia kag sa aton tion subong, mabuligan kita sini nga mangin mapinasensiahon. Gusto na gid ni Habacuc nga madula ang kalautan, pero mapinasensiahon sia kay nagsiling sia: “Magabantay ako agod mahibaluan kon ano ang iya ipahambal sa akon.” (Hab. 2:1) Nagsiling si apostol Pablo nga gusto gid niya ‘tapuson’ ang iya ministeryo. Pero, mapinasensiahon sia nga ‘nagpanaksi sing maid-id sa maayong balita.’—Binu. 20:24.

¹⁴ Binagbinaga ang halimbawa sang mag-asawa nga naggradwar sa Gilead. Gin-asayn sila sa isa ka pungsod nga ang kalabanan nga tawo indi Cristiano kag pila lang ka bilog ang Saksi. Diutay lang ang gusto magtuon sang Biblia. Pero ang mga klasmeyt nila sa Gilead nga nagaalagad sa iban nga pungsod nagaistorya sa ila parte sa ila mga ginatudluan sang Biblia kag sa ila nabuligan nga mangin Saksi. Bisan pa wala nagapamati ang kalabanan nga tawo sa teritoryo sang mag-asawa, mapinasensiahon gid sila kag nagpadayon sila sa pagbantala. Pagligad sang walo ka tuig nga pagbantala sa ila teritoryo, nalipay gid sila nga nabawtismuhan ang isa sa ila ginatudluan sang Biblia. Ano ang matun-an naton sa halimbawa sining matutom nga mga alagad sang Dios sang una kag subong? Padayon sila nga nangin mapisan sa ila hilikuton kag nangin mapinasensiahon, gani ginpadyaan sila ni Jehova. Kabay pa nga “mangin mga manug-ilog [kita] sang mga nagapanubli sang mga saad paagi sa pagtuo kag paghulat sing mapinasensiahon.”—Heb. 6:10-12.

15. Ano ang isa ka paagi nga ang aton pagtuo makabulig sa aton nga makapadayon sa pagbantala?

¹⁵ May pagtuo kita sa mensahe nga aton ginabantala, gani gusto naton nga isugid ini sa madamo nga tawo. Nagasalig kita sa mga promisa sa Pulong sang Dios. (Sal. 119:42; Isa. 40:8) Nakita naton nga nagakatuman ang mga tagna sa Biblia. Nakita man naton nga nangin maayo gid ang kabuhi sang mga tawo sang gin-aplikar nila ang mga laygay sang Biblia. Bangod sini, nagapati gid kita nga dapat gid mabatian sang tanan ang maayong balita sang Ginharian.

16. Suno sa Salmo 46:1-3, paano ang aton pagtuo kay Jehova kag kay Jesus makabulig sa aton nga magpadayon sa pagbantala?

¹⁶ May pagtuo man kita kay Jehova nga amo ang ginhalinan sang mensahe nga aton ginabantala, kag kay Jesus nga ginhimo niya nga Hari sang Ginharian. (Juan 14:1) Bisan ano man ang matabo sa aton, buligan gid kita pirme ni Jehova kay sia ang aton dalangpan kag kusog. (Basaha ang Salmo 46:1-3.) Makasalig man kita nga bisan pa ara si Jesus sa langit, ginatuytuyan niya ang pagbantala kay ginhatagan sia ni Jehova sang gahom kag awtoridad.—Mat. 28:18-20.

17. Maghatag sing halimbawa kon ngaa dapat kita magpadayon sa pagbantala.

¹⁷ Kon may pagtuo kita, mas nagasalig pa gid kita nga pakamaayuhon ni Jehova ang aton mga panikasog. Kag kon kaisa, ginahimo niya ini sa paagi nga wala naton ginapaabot. (Man. 11:6) Halimbawa, kada adlaw, linibo ka tawo ang makakita sang aton mga literatura nga nakadispley sa aton mga lamesa ukon mga cart. Epektibo bala ini nga paagi sang pagbantala? Huo! Mabasa sa Nobiembre 2014 nga Ministeryo sa Ginharian ang parte sa isa ka pamatan-on nga estudyante  nga nagaeskwela sa unibersidad. Gusto niya magsulat sang isa ka artikulo parte sa mga Saksi ni Jehova. Wala niya nakita ang Kingdom Hall, pero nakita niya sa ila eskwelahan ang lamesa nga may displey sang aton mga literatura, kag nakakita sia sang impormasyon nga magamit niya sa iya artikulo. Sang ulihi, nabawtismuhan sia bilang isa ka Saksi, kag regular payunir na sia subong. Ang mga eksperiensia pareho sini nagapalig-on sa aton nga magpadayon sa pagbantala kay may mga tawo pa nga dapat sugiran sang maayong balita sang Ginharian.

18. Ngaa makasalig kita nga ang pagbantala sang Ginharian matapos gid sa tion nga gindesisyunan ni Jehova?

¹⁸ Makasalig kita nga ang pagbantala sang Ginharian matapos gid sa husto nga tion. Binagbinaga ang natabo sang panahon ni Noe. Ginpakita ni Jehova nga kabalo gid sia kon san-o ang pinakamaayo nga tion nga himuon ang isa ka hilikuton. Mga 120 ka tuig antes sang Baha, nakadesisyon na si Jehova kon san-o niya ini pahanabuon. Pagligad sang madamo nga tinuig, ginsugo ni Jehova si Noe nga maghimo sang arka. Sa sulod sang mga 40 ukon 50 ka tuig antes sang Baha, nangin masako gid si Noe sa paghimo sang hilikuton nga ginsugo sa iya ni Jehova. Bisan pa wala namati ang mga tawo sa iya, padayon nga ginbantala ni Noe ang paandam ni Jehova asta sa tion nga nagsiling si Jehova nga pasudlon na ang mga sapat sa arka. Dayon sa husto gid nga tion, “ginsira ni Jehova ang puertahan.”—Gen. 6:3; 7:1, 2, 16.

19. Ano ang masaksihan naton kon padayon kita nga mangin mapisan sa aton hilikuton?

¹⁹ Malapit na lang gid ang tion nga magasiling si Jehova nga natapos na ang pagbantala sang Ginharian. Dayon laglagon niya ang kalibutan ni Satanas kag paistaron niya sa bag-ong kalibutan ang mga tawo nga matinumanon sa iya. Samtang wala pa ini, ilugon naton si Noe, si Habacuc, kag ang iban pa nga padayon nga nangin mapisan sa ila hilikuton. Kabay pa nga unahon naton pirme sa aton kabuhi ang pagbantala, mangin mapinasensiahon kita, kag pabakuron naton ang aton pagtuo kay Jehova kag sa iya mga promisa.