1. Sa ano nga sitwasyon mahimo mabudlay gid ang mag-alagad kay Jehova?

 SA BANTA mo, sa ano nga sitwasyon mahimo mabudlay gid ang mag-alagad kay Jehova? Kon madamo ka sing problema, ukon sa tion nga wala ka masyado problema? Kon may problema kita, nagadangop kita dayon kay Jehova. Pero ano ang ginahimo naton kon wala kita masyado problema? Nagakalipatan bala naton kon kaisa kon daw ano kaimportante ang pag-alagad sa Dios? Ginpaandaman ni Jehova ang mga Israelinhon nga posible gid ini matabo.—Deut. 6:10-12.

2. Ngaa maayo gid nga halimbawa si Hari Asa?

² Maayo gid nga halimbawa si Hari Asa. Nangin maalamon sia kay nagsalig sia sing bug-os kay Jehova. Mabudlay man ukon matawhay ang sitwasyon, padayon sia nga nag-alagad kay Jehova. Sugod sang bata pa sia, “ang tagipusuon ni Asa bug-os ang debosyon kay Jehova.” (1 Hari 15:14, footnote) Ginpakita ni Asa ang iya debosyon paagi sa pagdula sang pagsimba sa mga diosdios sa Juda. Ang Biblia nagasiling nga “ginguba niya ang mga halaran para sa iban nga mga dios kag ang sagrado nga mataas nga mga duog. Gindugmok niya ang sagrado nga mga haligi, kag gin-utod niya ang sagrado nga mga poste.” (2 Cron. 14:3, 5) Ginpahalin pa gani niya sa pagkarayna ang iya lola nga si Maaca. Ngaa? Bangod gin-impluwensiahan sang iya lola ang mga tawo nga magsimba sa mga diosdios.—1 Hari 15:11-13.

3. Ano ang binagbinagon naton sa sini nga artikulo?

³ Magluwas sa pagdula sang pagsimba sa mga diosdios, ginbuligan man ni Asa ang katawhan sang Juda nga magsimba liwat kay Jehova. Ginpakamaayo ni Jehova si Asa kag ang katawhan sang Juda. Sa tion sang paggahom ni Asa, napulo ka tuig nga  ‘may kalinong sa ila duta.’ (2 Cron. 14:1, 4, 6) Binagbinagon sa sini nga artikulo kon ano ang ginhimo ni Asa samtang matawhay ang sitwasyon. Binagbinagon man naton ang halimbawa sang mga Cristiano sang unang siglo nga nangin maalamon pareho ni Asa samtang matawhay ang sitwasyon. Dayon binagbinagon naton ini nga pamangkot: Kon ginatugutan sang gobierno sang inyo pungsod ang pagsimba kay Jehova, paano mo mapakita nga maalamon ka samtang matawhay ang sitwasyon?

4. Suno sa 2 Cronica 14:2, 6, 7, ano ang ginhimo ni Asa samtang matawhay ang sitwasyon?

⁴ Basaha ang 2 Cronica 14:2, 6, 7. Ginsilingan ni Asa ang katawhan nga si Jehova ang ‘naghatag sa ila sing kalinong sa ila mga kaaway sa palibot.’ Wala ginhunahuna ni Asa nga puede na sia makapulupatawhay kay wala sing inaway. Sa baylo, ginpabakod niya ang mga siudad, kag nagpahimo sia sang mga pader, mga torre, kag mga gawang. Ginsilingan niya ang katawhan sang Juda: “Kita gihapon ang nagapanag-iya sang duta.” Ano ang buot silingon ni Asa? Buot niya silingon nga makapagusto sila sa pagkadto sa bisan diin nga lugar sa ila pungsod, kag mapabakod nila ang ila siudad kay wala sing kaaway nga magapugong sa ila. Ginpalig-on niya ang katawhan nga mangin maalamon samtang matawhay ang sitwasyon.

5. Ngaa ginpabakod ni Asa ang iya puersa militar?

⁵ Ginpabakod man ni Asa ang iya puersa militar samtang matawhay ang sitwasyon. (2 Cron. 14:8) Buot bala silingon nga wala sia nagasalig kay Jehova? Indi. Sa baylo, nahangpan ni Asa nga obligasyon niya bilang hari nga buligan ang katawhan nga mangin handa sa mga kabudlayan sa ulihi. Kabalo si Asa nga magaabot ang tion nga mangin mabudlay ang ila sitwasyon, kag natabo gid ini.

6. Ano ang ginhimo sang mga Cristiano sang unang siglo samtang matawhay ang sitwasyon?

⁶ Madamo nga beses nga ginhingabot ang mga Cristiano sang unang siglo, pero may mga tion man nga wala sila ginpamatukan sa ila pag-alagad. Ano ang ginhimo sang mga disipulo samtang matawhay ang sitwasyon? Mapisan nga ginbantala sining matutom nga mga disipulo ang maayong balita. Ang rekord sa Binuhatan nagasiling nga “gintuman nila si Jehova.” Padayon nila nga ginbantala ang maayong balita, gani “nagdamo ang mga disipulo.” Maathag nga ginpakamaayo gid ni Jehova ang ila mapisan nga pagbantala samtang matawhay ang sitwasyon.—Binu. 9:26-31.

7-8. Ano ang ginhimo ni Pablo kag sang iban pa sang may kahigayunan sila? Ipaathag.

⁷ Gingamit sang mga Cristiano sang unang siglo ang tanan nga kahigayunan nga mabantala ang maayong balita. Halimbawa, sang nakita ni apostol Pablo nga madamo nga tawo ang puede niya bantalaan sa Efeso, nagtener sia didto para tudluan ang mga tawo kag buligan sila nga mangin disipulo.—1 Cor. 16:8, 9.

⁸ Sang 49 C.E., may kahigayunan naman si Pablo kag ang iban pa nga mga Cristiano nga mabantalaan ang madamo nga tawo. Sadto nga tion, gindesisyunan sang mga apostoles kag mga gulang sa Jerusalem ang parte sa pagpatuli. (Binu. 15:23-29) Pagkatapos mapabalo sa mga kongregasyon ang desisyon, nagpanikasog gid ang mga disipulo nga ibantala ang “maayong balita tuhoy sa pulong ni Jehova.” (Binu. 15:30-35) Ano ang resulta? Ang Biblia nagasiling nga “padayon nga naglig-on sa pagtuo ang mga kongregasyon kag nagdugang ang ila kadamuon adlaw-adlaw.”—Binu. 16:4, 5.

9. Ano ang sitwasyon sa madamo nga pungsod subong, kag ano ang puede naton ipamangkot sa aton kaugalingon?

⁹ Sa madamo nga pungsod subong, hilway kita nga makabantala. Amo bala sini ang sitwasyon sa inyo pungsod? Kon huo, pamangkuta ang imo kaugalingon, ‘Ano ang ginahimo ko samtang matawhay ang sitwasyon?’ Sa sining katapusan nga mga adlaw, masako ang katawhan ni Jehova sa paghimo sang pinakamasangkad nga pagbantala kag pagtudlo sa mga tawo sa bilog nga kalibutan. (Mar. 13:10) Madamo kita sang puede himuon para masuportahan ini nga hilikuton.

10. Suno sa 2 Timoteo 4:2, ano ang dapat naton himuon?

¹⁰ Paano mo mapakita nga maalamon ka samtang matawhay ang sitwasyon? (Basaha ang 2 Timoteo 4:2.) Binagbinaga kon bala masarangan mo ukon sang isa ka miembro sang inyo pamilya nga makapayunir. Indi na kita dapat magtinguha pa nga mangin manggaranon kay indi kita mabuligan sang aton mga pagkabutang nga makalampuwas sa dakung kapipit-an.—Hulu. 11:4; Mat. 6:31-33; 1 Juan 2:15-17.

11. Ano ang ginhimo sang iban para mas madamo nga tawo ang ila mabantalaan sang maayong balita?

¹¹ Madamo nga manugbantala ang nagtuon sang lain nga lenguahe para gamiton sa pagbantala kag pagtudlo sa iban. Gin-amanan sila sang organisasyon sang Dios sang mga publikasyon nga base sa Biblia sa madamo nga lenguahe. Halimbawa, sang 2010, ang aton mga publikasyon mabasa sa mga 500 ka lenguahe. Subong, mabasa na ini sa sobra 1,000 ka lenguahe!

12. Ano ang epekto sa mga tawo kon mabatian nila ang mensahe sang Ginharian sa ila namat-an nga lenguahe? Maghatag sing halimbawa.

¹² Ano ang epekto sa mga tawo kon mabatian nila ang kamatuoran sa Pulong sang Dios sa ila  namat-an nga lenguahe? Binagbinaga kon paano nakabenepisyo ang isa ka sister sa isa ka rehiyonal nga kombension sa Memphis, Tennessee, U.S.A. Ang lenguahe nga gingamit sa sini nga kombension amo ang Kinyarwanda. Lenguahe ini sang mga taga-Rwanda, Congo (Kinshasa), kag Uganda. Pagkatapos sang kombension, ang sister nagsiling: “Subong ko pa lang nahangpan sing maayo ang programa sa kombension sugod sang nagsaylo ako sa United States 17 ka tuig na ang nagligad.” Maathag nga nalipay ang sister sang nabatian niya ang programa sa iya namat-an nga lenguahe. May mga tawo bala sa teritoryo sang inyo kongregasyon nga lain ang lenguahe? Mas gusto bala nila nga istoryahon sila sa ila namat-an nga lenguahe? Puede mo bala tun-an ang ila lenguahe para mabantalaan mo sila? Malipay ka gid kon himuon mo ini.

13. Ano ang ginhimo sang aton mga kauturan sa Russia samtang matawhay ang ila sitwasyon?

¹³ Sa pila ka pungsod, ginadumilian sang gobierno ang aton mga kauturan nga magbantala. Halimbawa, binagbinaga ang aton mga kauturan sa Russia. Ginhingabot sila sa madamo nga tinuig. Pero sang Marso 1991, legal sila nga ginkilala sang gobierno sang Russia. Mga 16,000 lang sadto ang mga Saksi sa sini nga pungsod. Pero pagligad sang 20 ka tuig, sobra na sila 160,000! Maathag nga sang hilway na nga makabantala ang mga kauturan, nangin maalamon gid sila. Pero wala nagdugay ang matawhay nga sitwasyon. Bisan pa nagbag-o ang sitwasyon sa ila pungsod, mapisan sila gihapon sa ila pagsimba kay Jehova. Padayon nila nga ginhimo ang ila bug-os nga masarangan nga maalagad sia.

14-15. Paano gingamit ni Jehova ang iya gahom para buligan si Asa?

¹⁴ Sang panahon ni Asa, nagbag-o ang matawhay nga sitwasyon sang Juda. Ginsalakay sila  sang sobra isa ka milyon nga soldado sang Etiopia nga ginpangunahan ni Zera. Nagapati sia nga mapierde niya kag sang iya mga soldado ang Juda. Pero nagsalig si Hari Asa sa iya Dios nga si Jehova, indi sa kadamuon sang iya mga soldado. Nangamuyo si Asa: “Buligi kami, O Jehova nga amon Dios, kay nagasalig kami sa imo, kag sa imo ngalan salakayon namon ini nga kadam-an.”—2 Cron. 14:11.

¹⁵ Halos doble ang kadamuon sang mga soldado sang Etiopia sangsa kadamuon sang mga soldado ni Asa. Pero kabalo si Asa nga may gahom si Jehova kag masarangan Niya nga luwason ang Iya katawhan. Kag ginbuligan gid ni Jehova ang iya katawhan. Napierde ang mga soldado sang Etiopia.—2 Cron. 14:8-13.

16. Ngaa makasigurado kita nga indi magadugay ang aton matawhay nga sitwasyon?

¹⁶ Wala kita kabalo kon ano ang matabo sa kada isa sa aton sa palaabuton. Pero kabalo kita nga indi magadugay ang matawhay nga sitwasyon sang katawhan sang Dios subong. Dumduma nga gintagna ni Jesus nga sa katapusan nga mga adlaw, ‘dumtan sang tanan nga pungsod’ ang iya mga disipulo. (Mat. 24:9) Kag nagsiling si apostol Pablo nga “ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.” (2 Tim. 3:12) ‘Daku gid ang kaakig’ ni Satanas, gani indi kita magpensar nga indi kita maapektuhan sang iya kaakig.—Bug. 12:12.

17. Paano posible nga matilawan ang aton pagtuo?

¹⁷ Sa indi madugay, tanan kita makaeksperiensia sang pagtilaw sa aton pagtuo. Dali na lang gid mag-abot “ang dakung kapipit-an nga wala pa gid matabo halin sa ginsuguran sang kalibutan tubtob karon.” (Mat. 24:21) Sa sina nga tion, posible nga hingabuton kita sang aton pamilya kag dumilian ang aton hilikuton. (Mat. 10:35, 36) Magasalig bala kita kay Jehova nga buligan niya kita kag amligan, pareho sa ginhimo ni Asa?

18. Suno sa Hebreo 10:38, 39, ano ang makabulig sa aton nga mangin handa sa mabudlay nga sitwasyon?

¹⁸ Ginabuligan kita subong ni Jehova para mangin mabakod ang aton pagtuo bisan ano pa ang matabo sa palaabuton. Ginagamit niya “ang matutom kag mainandamon nga ulipon” para amanan kita sang “pagkaon sa nagakaigo nga tion” nga makabulig sa aton nga mangin  malig-on. (Mat. 24:45) Pero dapat magpanikasog ang kada isa sa aton para pabakuron ang aton pagtuo kay Jehova.—Basaha ang Hebreo 10:38, 39.

19-20. Ano ang dapat naton ipamangkot sa aton kaugalingon, kag ngaa dapat naton ini ipamangkot suno sa 1 Cronica 28:9?

¹⁹ Pareho kay Hari Asa, dapat naton ‘pangitaon si Jehova.’ (2 Cron. 14:4; 15:1, 2) Ginsugdan naton ang pagpangita kay Jehova sang nagtuon kita parte sa iya kag nagpabawtismo. Ginahimo naton ang aton bug-os nga masarangan para mapabakod ang aton gugma kay Jehova. Mahimo naton pamangkuton ang aton kaugalingon, ‘Regular bala ako nga nagatambong sa mga miting sang kongregasyon?’ Kon nagatambong kita sa sini nga mga miting nga ginaaman sang organisasyon ni Jehova, mapabakod kita nga padayon nga mag-alagad sa iya kag makapalig-unay kita sa aton mga kauturan. (Mat. 11:28) Mahimo man naton pamangkuton ang aton kaugalingon, ‘Regular ko bala nga ginatun-an ang Biblia?’ Kon upod mo ang imo pamilya, may ara bala kamo pangpamilya nga pagsimba kada semana? Kon nagaisahanon ka lang, may iskedyul ka bala sang pagtuon kada semana? Kag ginahimo mo bala ang imo bug-os nga masarangan para magbantala kag magtudlo sa iban?

²⁰ Ngaa dapat naton ini ipamangkot? Ang Biblia nagasiling nga ginausisa ni Jehova ang aton panghunahuna kag tagipusuon, gani dapat man naton ini himuon. (Basaha ang 1 Cronica 28:9.) Kon nakita naton nga may dapat kita bag-uhon sa mga gusto naton himuon, sa aton paggawi, ukon sa aton panghunahuna, dapat kita mangamuyo kay Jehova nga buligan kita nga himuon ini nga mga pagbag-o. Dapat na naton handaan subong ang mga pagtilaw nga magaabot. Himua ang imo bug-os nga masarangan nga mangin maalamon samtang matawhay ang sitwasyon!