1. Ano ang ginsiling ni Jesus sa apat ka mangingisda, kag ano ang ila ginhimo?

MGA mangingisda ang mga disipulo nga sanday Pedro, Andres, Santiago, kag Juan. Mahimo nga nakibot gid sila sang ginsilingan sila ni Jesus: “Magsunod kamo sa akon, kay himuon ko kamo nga mga mangingisda sang mga tawo.” * Ano ang ila ginhimo? Ang Biblia nagasiling: “Sa gilayon ginbayaan nila ang mga pukot, kag nagsunod sa iya.” (Mat. 4:18-22) Bangod sang ila desisyon, nagbag-o gid ang ila kabuhi. ‘Magapangisda na sila sang buhi nga mga tawo,’ imbes nga isda. (Luc. 5:10) Subong, ginaagda gihapon ni Jesus ang mga tawo nga nagapabalor sang kamatuoran. (Mat. 28:19, 20) Ginbaton mo na bala ang pangagda ni Jesus nga mangin mangingisda sang mga tawo?

2. Ngaa mahimo nagapangalag-ag ang iban nga mangin manugbantala sang maayong balita, kag ano ang makabulig sa ila para himuon ini?

² Mahimo madamo na nga pagbag-o ang ginhimo mo sa imo kabuhi bangod sang imo pagtuon sang Biblia, kag dapat ka na magdesisyon kon bala gusto mo na mangin manugbantala sang maayong balita. Kon daw indi ka pa makadesisyon, indi ka dapat maluyahan sing buot. Mahimo nagapangalag-ag ka kay kabalo ka nga serioso gid ang himuon mo nga desisyon. Ang Biblia nagasiling nga ginbayaan “gilayon” ni Pedro kag sang iya mga kaupod ang ila mga pukot. Pero, indi buot silingon nga wala anay nila ginpamensaran ang ila desisyon. Kay man, sobra na anom ka bulan nga nakilala nila si Jesus kag ginbaton na nila sia bilang Mesias. (Juan 1:35-42) Mahimo nga madamo ka na man sing nabal-an parte kay Jehova kag kay Jesus, kag gusto mo nga mangin suod  pa gid sa ila. Pero dapat mo anay pamensaran sing maayo ang himuon mo nga desisyon. Ano ang nakabulig kanday Pedro, Andres, kag sa iban para makahimo sang desisyon?

3. Ano nga mga kinaiya ang makabulig sa imo para batunon mo ang pangagda ni Jesus?

³ Gusto gid sang mga disipulo ni Jesus ang ila ginahimo, sagad sila sa sini, maisog sila, kag handa sila magsakripisyo. Nakabulig gid sa ila ini nga mga kinaiya para mangin epektibo sila sa pagbantala sang maayong balita. Binagbinagon sa sini nga artikulo kon paano mo mapakita ini nga mga kinaiya para mangin epektibo ka nga disipulo sang Cristo.

4. Ngaa nagpangisda si Pedro?

⁴ Nagpangisda si Pedro para amanan ang iya pamilya, kag gusto gid niya ini nga obra. (Juan 21:3, 9-15) Sang ulihi, nanamian man sia magpangisda sang mga tawo. Ginbuligan sia ni Jehova para mangin epektibo sia sa sini nga hilikuton.—Binu. 2:14, 41.

5. Base sa Lucas 5:8-11, ngaa hinadlukan si Pedro, kag ano ang makabulig sa aton kon amo man sini ang aton ginabatyag?

⁵ Ang pinakaimportante nga rason kon ngaa nagabantala kita amo ang aton gugma kay Jehova. Ini nga gugma makabulig sa aton nga isugid sa iban ang parte sa iya bisan pa nagabatyag kita nga indi kita kabalo kon paano ini himuon. Sang gin-agda ni Jesus si Pedro nga mangin mangingisda sang mga tawo, ginsilingan niya sia: “Indi ka na magkahadlok.” (Basaha ang Lucas 5:8-11.) Indi buot silingon nga nahadlok si Pedro sa posible nga matabo sa iya kon mangin disipulo sia. Sa baylo, daw indi sia makapati sa kadamuon sang isda nga ila nakuha paagi sa milagro ni Jesus, gani nagbatyag sia nga indi niya masarangan ang ginapahimo ni Jesus. Pareho kay Pedro, mahimo nahadlok ka man. Posible nga nagabatyag ka nga indi mo mahimo ang  tanan nga dapat himuon para mangin disipulo ka sang Cristo. Gani pabakura ang imo gugma kay Jehova, kay Jesus, kag sa imo isigkatawo. Mapalig-on ka sini nga batunon ang pangagda ni Jesus nga mangin mangingisda sang mga tawo.—Mat. 22:37, 39; Juan 14:15.

6. Ano ang pila ka rason kon ngaa gusto naton magbantala?

⁶ Binagbinaga ang pila ka rason kon ngaa gusto naton magbantala. Gusto naton sundon ang ginsugo ni Jesus: “Kadtui ninyo ang mga tawo . . . kag tudlui ninyo sila agod mangin disipulo ko.” (Mat. 28:19, 20) Nagabantala man kita bangod ang mga tawo daw pareho sa mga karnero nga ‘ginpanitan kag nag-alaplaag,’ kag dapat gid nila mabal-an ang kamatuoran parte sa Ginharian. (Mat. 9:36) Gusto ni Jehova nga mabal-an sang tanan nga sahi sang tawo ang sibu nga ihibalo parte sa kamatuoran para maluwas sila.—1 Tim. 2:4.

7. Suno sa Roma 10:13-15, ngaa importante ang pagbantala?

⁷ Kon hunahunaon naton nga ang aton pagbantala makabulig sa mga tawo para maluwas sila, magapalig-on ini sa aton nga magbantala. Nagapangisda ang isa ka mangingisda para may ibaligya sia ukon kaunon, pero nagapangisda kita sang mga tawo para maluwas sila.—Basaha ang Roma 10:13-15; 1 Tim. 4:16.

8-9. Ano ang dapat nabal-an sang mga mangingisda, kag ngaa?

⁸ Sang panahon ni Jesus, dapat nabal-an sang Israelinhon nga mangingisda kon ano lang nga isda ang puede niya pangisdaon. (Lev. 11:9-12) Dapat nabal-an man niya kon diin nga parte sang dagat makita ini nga mga isda. Masami nga makita ang mga isda sa parte sang dagat nga gusto nila ang kainiton ukon kabugnawon sang tubig kag madamo sang pagkaon. Dapat nabal-an man sang mangingisda ang husto nga oras sa pagpangisda. Natun-an ini sang isa ka misyonero nga nagaalagad sa isa ka isla sa Pacific Ocean. Sang ginhagad sia sang isa ka tumandok nga utod nga magpangisda, nagsiling sia, “Sige, kitaay lang kita buas sa alas nuebe sa aga.” Ang utod nagsabat: “Indi puede nga magpagusto lang kita kon ano nga oras kita magpangisda. Dapat magpangisda kita sa oras nga madamo sang isda.”

⁹ Amo man sini ang ginhimo sang mga disipulo ni Jesus sang unang siglo nga nangin mangingisda sang mga tawo. Nagbantala sila sa oras kag lugar nga madamo sang tawo. Halimbawa, nagbantala sila sa templo, mga sinagoga, mga balay, kag mga tiendahan. (Binu. 5:42; 17:17; 18:4) Sa aton teritoryo, dapat kabalo kita kon ano nga oras ara ang mga tawo sa ila balay kag kon sa diin nga lugar madamo sang tawo. Dapat naton i-adjust ang aton iskedyul para mabantalaan naton sila.—1 Cor. 9:19-23.

10. Ano nga mga gamit ang gin-aman sang organisasyon ni Jehova para sa aton?

¹⁰ Ang mangingisda dapat may husto nga mga gamit kag dapat kabalo sia kon paano ini gamiton. Dapat may husto man kita nga mga gamit sa pagbantala, kag dapat kabalo man kita kon paano ini gamiton. Gintudluan ni Jesus ang iya mga disipulo kon paano magbantala. Ginsilingan niya sila kon ano ang ila dalhon, kon diin sila mabantala, kag kon ano ang ila isiling. (Mat. 10:5-7; Luc. 10:1-11) Subong, ang organisasyon ni Jehova may gin-aman nga Teaching Toolbox nga may mga gamit nga nakabulig gid sa aton hilikuton. * Kag gintudluan kita kon paano ini gamiton. Nakabulig ini sa aton nga mangin maisog kag epektibo sa aton pagbantala.—2 Tim. 2:15.

11. Ngaa dapat mangin maisog ang mga mangingisda sang mga tawo?

¹¹ Ang mga mangingisda dapat mangin maisog  kay indi nila mapaktan ang tiempo kag gulpi lang nagamadlos ang dagat. Kag sa masami, gab-i sila nagapangisda. Ang mga mangingisda sang mga tawo dapat man mangin maisog. Kon nagabantala kita kag nagapakilala bilang isa ka Saksi ni Jehova, mahimo pamatukan kita sang aton pamilya, pakalainon sang aton mga abyan, kag mahimo indi kita pagpamatian sang iban. Pero indi na kita matingala sa sini. Nagpaandam si Jesus sa iya mga sumulunod nga pamatukan sila.—Mat. 10:16.

12. Suno sa Josue 1:7-9, ano ang makabulig sa aton para mangin maisog?

¹² Paano ka mangin maisog? Una, dapat kumbinsido ka nga bisan pa ara na si Jesus sa langit, padayon niya nga ginatuytuyan ang pagbantala nga hilikuton. (Juan 16:33; Bug. 14:14-16) Dayon, pabakura ang imo pagtuo sa promisa ni Jehova nga atipanon ka niya. (Mat. 6:32-34) Samtang nagabakod ang imo pagtuo, mas nagaisog ka pa gid. Tumalagsahon ang pagtuo ni Pedro kag sang iya mga kaupod kay ginbayaan nila ang ila palangabuhian para magsunod kay Jesus. Ginpakita mo nga tumalagsahon man ang imo pagtuo sang ginpabalo mo sa imo mga abyan kag sa imo pamilya nga nagatuon ka na sang Biblia upod sa mga Saksi ni Jehova kag nagatambong sa ila mga miting. Posible nga madamo ka na sing ginhimo nga mga pagbag-o sa imo kabuhi para matuman mo ang mga kasuguan ni Jehova. Nahimo mo ini bangod sang imo pagtuo kag kaisog. Kon padayon ka nga mangin maisog, makasalig ka nga “kaupod mo si Jehova nga imo Dios bisan diin ka magkadto.”—Basaha ang Josue 1:7-9.

13. Paano ang pagpamalandong kag pangamuyo makabulig sa imo nga mangin maisog?

 ¹³ Ano pa ang puede mo himuon para mangin maisog? Mangamuyo nga hatagan ka sing kaisog. (Binu. 4:29, 31) Sabton ni Jehova ang imo mga pangamuyo kag indi ka gid niya pagpabay-an. Pirme ka niya buligan. Puede mo man pamalandungan kon paano ginbuligan ni Jehova ang iya mga alagad sang una. Pamensara man kon paano ka ginbuligan ni Jehova sa imo mga problema, kag kon paano ka niya ginbuligan para mabag-o mo ang imo kabuhi. Kon nasarangan ni Jehova nga tuytuyan ang iya katawhan para makatabok sila sa Pula nga Dagat, mabuligan ka man niya para mangin disipulo ka sang Cristo. (Ex. 14:13) Iluga ang pagtuo sang isa ka salmista nga nagsiling: “Si Jehova yara sa akon tupad; indi ako mahadlok. Ano ang mahimo sang tawo sa akon?”—Sal. 118:6.

14. Ano ang natun-an mo sa eksperiensia ni Masae kag ni Tomoyo?

¹⁴ Ang isa pa ka paagi para mangin maisog amo ang pagpamalandong kon paano ginbuligan ni Jehova ang mga mahuluy-on nga mangin maisog. Binagbinaga ang eksperiensia sang isa ka sister nga si Masae. Mahuluy-on sia kag nagabatyag sia nga indi niya masarangan magbantala. Para sa iya, ang pag-istorya sa indi niya kilala daw pareho sa pagtaklas sa isa ka mataas nga pader nga indi niya masarangan taklason. Gani nagpanikasog gid sia para pabakuron ang iya gugma sa Dios kag sa iya mga isigkatawo. Ginpamalandungan niya nga importante gid ang pagbantala kay hilingagawon na ang tion, kag nangamuyo sia nga buligan sia nga manamian sia sa pagbantala. Gani nangin maisog sia kag nangin regular payunir. Mabuligan man ni Jehova nga ‘mangin maisog’ ang bag-o nga mga manugbantala. Binagbinaga ang eksperiensia sang isa ka sister nga si Tomoyo sa pinakauna nga tion nga nakaupod sia sa pagpamalaybalay. Ang pinakauna nga tawo nga iya kuntani mabantalaan nagsinggit: “Indi ko gusto mag-istorya sa mga Saksi ni Jehova!” Ginlampos dayon sang tagbalay ang puertahan. Wala nahadlok si Tomoyo kag ginsilingan niya ang iya kaupod, “Nalipay gid ‘ko kay bal-an niya nga isa ako ka Saksi ni Jehova bisan wala pa ako kahambal.” Regular payunir na subong si Tomoyo.

15. Kon nabudlayan kita magbantala, paano naton mailog ang mga mangingisda, kag ngaa importante ini?

¹⁵ Para madamo sing makuha nga isda ang isa ka mangingisda, dapat sia magsakripisyo. Halimbawa, dapat aga pa sia magbugtaw, dapat tapuson gid niya ang iya obra, kag dapat padayon sia nga magpangisda bisan pa maglain ang tiempo. Dapat man kita magsakripisyo para makabatas kita kag matapos naton ang aton hilikuton.—Mat. 10:22.

16. Ano ang makabulig sa aton nga himuon ang mga hilikuton nga nabudlayan kita nga himuon?

¹⁶ Sa masami, gusto naton himuon ang mahapos lang nga obra. Pero kon kaisa, indi mahapos himuon ang importante nga mga hilikuton. Gani dapat naton hanason ang aton kaugalingon nga himuon ang mga hilikuton nga nabudlayan kita nga himuon. Pero kinahanglan naton ang bulig para masarangan naton nga magsakripisyo. Gani ginabuligan kita ni Jehova paagi sa iya balaan nga espiritu.—Gal. 5:22, 23.

17. Suno sa 1 Corinto 9:25-27, ano ang ginhimo ni apostol Pablo para mahanas niya ang iya kaugalingon nga magsakripisyo?

¹⁷ Ginhanas ni apostol Pablo ang iya kaugalingon nga magsakripisyo. Nagsiling sia nga “ginasakit” niya ang iya lawas para mahimo niya ang husto. (Basaha ang 1 Corinto 9:25-27.) Ginpalig-on niya ang iban nga hanason ang ila kaugalingon nga magsakripisyo kag himuon ang tanan “sing nagakaigo kag suno sa kahimusan.” (1 Cor. 14:40) Dapat kita magpanikasog para padayon naton nga masimba si Jehova, kag nalakip  sa sini ang regular nga pagbantala kag pagtudlo sang maayong balita.—Binu. 2:46.

18. Ano ang dapat naton himuon para tamdon kita ni Jehova nga madinalag-on?

¹⁸ Madinalag-on ang isa ka mangingisda kon madamo sia sing nakuha nga isda. Pero kon parte sa pagbantala, ang aton kadalag-an wala nabase sa kadamuon sang aton nabuligan nga mangin Saksi ni Jehova. (Luc. 8:11-15) Para kay Jehova, madinalag-on kita kon padayon kita nga nagabantala kag nagatudlo sa iban. Ngaa? Bangod ginatuman naton sia kag ang iya Anak.—Mar. 13:10; Binu. 5:28, 29.

19-20. Ano ang isa pa ka importante nga rason kon ngaa dapat gid kita magbantala subong?

¹⁹ Sa pila ka pungsod, may mga bulan lang nga puede makapangisda. Kon malapit na matapos ang tion nga puede makapangisda, mas nagapanikasog pa gid ang mga mangingisda. Bilang mga mangingisda sang mga tawo, may isa pa ka importante nga rason kon ngaa dapat gid kita magbantala subong. Ano ini? Dali na lang gid matapos ini nga sistema. Malip-ot na lang gid ang nabilin nga tion sa pagbantala sang maayong balita nga makaluwas sang kabuhi. Gani indi paghunahunaa nga hulaton mo anay nga mangin maayo gid ang kahimtangan sang imo kabuhi antes mo himuon ining importante gid nga hilikuton.—Man. 11:4.

²⁰ Dapat mangin maathag sa imo ang mga rason kon ngaa gusto mo magbantala, dugangi ang imo ihibalo sa Biblia, mangin maisog, kag hanasa ang imo kaugalingon nga magsakripisyo. Dapat mo ini himuon subong. Magbantala upod sa sobra walo ka milyon ka manugbantala sang maayong balita sa bilog nga kalibutan, kag mabatyagan mo ang kalipay sa pag-alagad kay Jehova. (Neh. 8:10) Himua ang imo bug-os nga masarangan nga makabantala asta matapos ini nga hilikuton. Binagbinagon sa masunod nga artikulo ang tatlo ka paagi nga magapalig-on sa aton nga magpadayon sa pagbantala sang maayong balita sang Ginharian.