1. Paano ginapakita sang katawhan sang Dios nga nagahigugmaanay sila?

ANG mga alagad ni Jehova sa bilog nga kalibutan bahin sang isa ka pamilya nga nagahigugmaanay. (1 Juan 4:16, 21) Ini nga gugma makita indi lang sa paghimo sing daku nga sakripisyo sa ila mga kauturan, kundi sa magagmay nga mga butang pareho sa makapalig-on nga hambal kag mainayuhon nga buhat. Kon ipakita naton ang kaayo kag konsiderasyon sa iban, ‘ginailog naton ang Dios, subong mga anak nga hinigugma.’—Efe. 5:1.

2. Paano gin-ilog ni Jesus ang gugma sang iya Amay?

² Himpit nga gin-ilog ni Jesus ang iya Amay. Nagsiling si Jesus: “Kari sa akon, kamo tanan nga ginabudlayan kag ginabug-atan, kag papahuwayon ko kamo . . . , kay ako malulo kag mapainubuson sing tagipusuon.” (Mat. 11:28, 29) Kon ginailog naton ang halimbawa sang Cristo sa ‘pagpatugsiling sa mga kubos,’ kahamut-an kita sang aton Amay sa langit kag malipay gid kita. (Sal. 41:1) Binagbinagon naton kon paano naton ipakita ang konsiderasyon sa pamilya, sa kongregasyon, kag sa ministeryo.

3. Paano ipakita sang mga bana nga may paghangop sila kag may konsiderasyon? (Tan-awa ang piktyur sa umpisa sini nga artikulo.)

³ Ang mga bana ang dapat manguna sa pagpakita sing konsiderasyon sa pamilya. (Efe. 5:25; 6:4) Halimbawa, ginapalig-on sila nga makig-upod sa ila asawa “suno sa ihibalo,” nga mahimo man i-translate nga “magpakita sing konsiderasyon sa ila; magpakita sing paghangop sa ila.” (1 Ped. 3:7; footnote) Ang paghangop kag ang konsiderasyon pirme magkaupod. Halimbawa, ang mahinangpanon nga bana nakahibalo nga ang iya asawa kaupod niya nga bagay sa iya. Magkatuhay sila sa madamo nga butang, pero indi buot silingon nga kubos ang iya asawa sa iya. (Gen. 2:18) Gani nagapakita sia sing konsiderasyon sa balatyagon sang iya asawa kag ginapadunggan niya sia kag ginatahod. Ang isa ka asawa sa Canada nagsiling parte sa iya bana: “Wala gid niya ginabalewala ang akon nabatyagan ukon nagasiling, ‘Wala ka sing rason nga magbatyag sina.’ Ginapamatian man niya ako sing maayo. Kon ginabuligan niya ako nga mahangpan ang isa ka butang, ginahimo niya ini sing mainayuhon.”

4. Paano ipakita sang bana nga may konsiderasyon sia sa iya asawa kon nagapakig-angot sia sa iban nga babayi?

⁴ Ginabinagbinag man sang may konsiderasyon nga bana ang balatyagon sang iya asawa kon nagapakig-angot sia sa iban nga babayi. Wala sia nagapakiat sa ila ukon nagapakita sing indi nagakaigo nga atension. Wala man niya ini ginahimo sa social media ukon sa Internet. (Job 31:1) Huo, mainunungon sia sa iya asawa, indi lang bangod palangga niya ang iya asawa, kundi palangga man niya ang Dios kag ginadumtan niya ang malaut.—Basaha ang Salmo 19:14; 97:10.

5. Paano ipakita sang asawa nga may konsiderasyon sia sa iya bana?

⁵ Kon ginailog sang bana ang iya ulo, nga si Jesucristo, mangin mahapos sa iya asawa nga ipakita ang “tudok nga pagtahod” sa iya. (Efe. 5:22-25, 33) Kag kon ginatahod sang asawa ang iya bana, mapahulag sia nga pakitaan sing konsiderasyon ang iya bana kon masako sia sa hilikuton sa kongregasyon ukon may ginaatubang nga mga problema. Ang isa ka bana sa Britanya nagsiling: “Kon kaisa, mahantop sang akon asawa kon may ginapamensar ako. Bisan pa puede ko ini isugid sa iya, nagahulat sia sing husto nga tion, kag ginasunod niya ang prinsipio sa Hulubaton 20:5 para ‘matungkad’ ang akon panghunahuna.”

6. Paano naton mapalig-on ang mga kabataan nga ipakita ang konsiderasyon sa iban, kag ano ang benepisyo sini sa mga kabataan?

⁶ Kon ang mga ginikanan nagapakita sing konsiderasyon sa isa kag isa, mangin maayo sila nga halimbawa sa ila kabataan. Sila ang may panguna nga responsibilidad sa pagtudlo sa ila kabataan nga ipakita ang konsiderasyon sa iban. Halimbawa, matudluan nila ang ila kabataan nga indi magdalagan kon ara sa Kingdom Hall. Kon may pagtilipon, mahimo nila hambalon ang ila kabataan nga paunahon sa pagkuha sing pagkaon ang mga tigulang. Siempre, ang tanan sa kongregasyon makabulig sa mga ginikanan. Halimbawa, kon ang bata nakahimo sing maayo, pareho sa pagbukas sang puertahan para sa aton, dapat naton sia komendahan. Ang paghimo sini may maayo nga epekto sa bata, kay magatudok sa iya tagipusuon nga “mas malipayon ang nagahatag sangsa nagabaton.”—Binu. 20:35.

7. Paano ginpakita ni Jesus ang konsiderasyon sa tawo nga bungol, kag ano ang matun-an naton sa halimbawa ni Jesus?

⁷ Isa ka bes sang ara sia sa rehiyon sang Decapolis, “gindala [sang mga tawo] kay Jesus ang isa ka tawo nga bungol kag may diperensia sa paghambal.” (Mar. 7:31-35) Imbes nga ayuhon sa atubangan sang madamo, “gindala niya sia sa unhan” kag gin-ayo sia. Ngaa? Bangod ang tawo bungol, mahimo indi sia  komportable kon madamo ang tawo. Nahibaluan ini ni Jesus, gani gin-ayo niya ang tawo nga silahanon lang. Subong, indi kita makahimo sing mga milagro. Pero mapakita naton nga ginahunahuna naton ang mga kinahanglanon kag balatyagon sang aton mga masigkasumilimba, kag dapat kita magpakita sing konsiderasyon sa ila. Si apostol Pablo nagsulat: “Hunahunaon naton ang isa kag isa agod pahulagon sa gugma kag sa maayong mga buhat.” (Heb. 10:24) Nahangpan ni Jesus ang ginabatyag sang tawo nga bungol kag ginpakitaan sia sing kaayo. Maayo gid sia nga halimbawa para sa aton!

8, 9. Paano naton ipakita ang konsiderasyon sa mga tigulang kag may kasablagan? (Maghatag sing mga halimbawa.)

⁸ Ipakita ang konsiderasyon sa mga tigulang kag may kasablagan. Makilala ang Cristianong kongregasyon, indi sa pagkaepektibo sa paghimo sang hilikuton, kundi paagi sa gugma. (Juan 13:34, 35) Ini nga gugma nagapahulag sa aton nga magsakripisyo para buligan ang mga tigulang kag may kasablagan nga makatambong sa Cristiano nga mga miting kag makabantala. Ginahimo naton ini bisan limitado lang ang ila masarangan. (Mat. 13:23) Naapresyar gid sang naka-wheelchair nga si Michael ang bulig sang iya pamilya kag sang mga kauturan sa iya grupo sa pag-alagad sa latagon. Nagsiling sia: “Bangod sang ila bulig, makatambong ako sa kalabanan nga mga miting kag regular nga makapakigbahin sa ministeryo. Nanamian gid ako magpanaksi sa publiko.”

⁹ Sa madamo nga puluy-an Bethel, may mga kauturan nga tigulang na kag may kasablagan. Ang mainulikdon nga mga manugtatap nagapakita sang konsiderasyon sa sining matutom nga mga alagad paagi sa paghimo sing kahimusan nga makapanaksi sila paagi sa sulat kag sa telepono. “Ginaapresyar gid namon nga makahimo kami sing sulat,” siling ni Bill nga 86 anyos kag nagasulat sa mga tawo sa lugar nga talagsa lang mabantalaan. Si Nancy, nga halos 90 anyos na, nagsiling: “Wala ko ginatamod ang paghimo sang sulat nga daw pagpanulod lang sang papel sa sobre. Pagpanaksi ini. Dapat mahibaluan sang mga tawo ang kamatuoran!” Si Ethel, nga natawo sang 1921, nagsiling: “Nagapalanakit pirme ang akon lawas. May mga tion nga nabudlayan ako bisan sa pag-ilis lang.” Bisan pa sini, nalipay sia magpanaksi paagi sa telepono kag may mga naistorya pa gani sia liwat. Si Barbara, nga 85 anyos, nagpaathag: “Bangod mapigaw na ang akon panglawas, nabudlayan ako mangin regular sa ministeryo. Pero paagi sa telepono, makapanaksi ako sa iban. Salamat, Jehova!” Wala pa isa ka tuig, ang pila ka pinalangga nga mga tigulang sa isa ka puluy-an Bethel nakahinguyang sing 1,228 ka oras sa ministeryo, nakahimo sing 6,265 ka sulat, nakatawag sing sobra 2,000 ka beses, kag nakapahamtang sing 6,315 ka publikasyon! Nalipay gid sa sini si Jehova!—Hulu. 27:11.

10. Paano kita makabulig para makabenepisyo sing bug-os ang mga kauturan sa Cristiano nga mga miting?

¹⁰ Ipakita ang konsiderasyon sa Cristiano nga mga miting. Luyag naton nga ang mga kauturan makabenepisyo sing bug-os sa mga miting. Makabenepisyo gid sila kon may konsiderasyon kita. Paano naton mahimo ini? Ang isa ka paagi amo ang pag-abot sing temprano para indi kita makatublag sa iban. Kon kaisa, may mga hitabo nga wala naton ginapaabot amo nga maulihi kita sa miting. Pero kon pirme kita ulihi, dapat naton binagbinagon kon paano kita makapakita sing konsiderasyon sa aton mga kauturan. Dumdumon man naton nga si Jehova kag ang iya Anak ang nag-agda sa aton. (Mat. 18:20) Dapat gid naton sila tahuron!

11. Ngaa dapat sundon sang mga may bahin sa miting ang sugo sa 1 Corinto 14:40?

¹¹ Mapakita man naton ang konsiderasyon sa aton mga kauturan kon ginatuman naton ini nga sugo: “Himua ninyo ang tanan sing nagakaigo kag suno sa kahimusan.” (1 Cor. 14:40) Ang mga utod nga may mga bahin sa miting nagatuman sa sini kon wala sila nagaobertaym.  Kon ginahimo nila ini, ginapakita nila ang konsiderasyon indi lang sa masunod nga may bahin kundi sa kongregasyon man. Ang iban nga mga utod mahimo magabiyahe pa sing malawig pauli. Ang iban mahimo kinahanglan pa magsakay sa depasahero nga mga salakyan ukon malayo pa ang lalakton para makapauli. Kag ang iban mahimo may indi Saksi nga tiayon nga nagahulat sa ila balay kag nagapaabot nga magpauli sila dayon.

12. Ngaa ang mga gulang takus sang “labaw sa kinaandan nga kaayo lakip ang gugma”? (Tan-awa ang kahon nga “ Ipakita ang Konsiderasyon sa mga Nagapanguna.”)

¹² Ang mga gulang nagapangabudlay sa kongregasyon kag makugi sila sa ministeryo, gani takus gid nga pakitaan naton sila sing pinasahi nga konsiderasyon. (Basaha ang 1 Tesalonica 5:12, 13.) Sigurado gid nga nagapasalamat ka sa ginahimo sang mga gulang para sa imo. Ipakita ini paagi sa pagkooperar kag pagbulig sa ila. Ang matuod, “ginabantayan nila [kita] subong nga sila ang manabat.”—Heb. 13:7, 17.

13. Ano ang aton matun-an sa pagpakig-angot ni Jesus sa mga tawo?

¹³ Sa isa ka tagna parte kay Jesus, si Isaias nagsiling: “Indi niya pagbalion ang tabun-ak nga nadugmok, kag indi niya pagpalungon ang pabilo nga nagapiraw.” (Isa. 42:3) May empatiya si Jesus sa mga tawo bangod sang gugma niya sa ila. Nahangpan niya ang ginabatyag sang mga tawo nga daw tabun-ak nga nadugmok ukon daw pabilo nga nagapiraw. Gani, ginpakita niya ang konsiderasyon, kaayo, kag pagkamapinasensiahon. Bisan ang mga bata nanamian makig-upod sa iya. (Mar. 10:14) Indi pareho kay Jesus ang ikasarang naton sa paghangop kag pagtudlo sa mga tawo. Pero, mapakita naton ang konsiderasyon sa mga tawo sa aton teritoryo sa paagi sang aton pag-istorya sa ila, sa tion sang aton pagbisita, kag sa kalawigon sang aton pagbisita.

14. Ngaa dapat gid naton hunahunaon sing maayo kon paano kita nagaistorya sa mga tawo?

 ¹⁴ Paano naton istoryahon ang mga tawo? Minilyon sa mga tawo subong ang ‘ginpanitan kag nag-alaplaag’ bangod sang korap kag wala sing kaluoy nga mga negosyante, pulitiko, kag lider sang relihion. (Mat. 9:36) Gani, madamo nga tawo ang wala sing pagsalig sa iban kag nadulaan sing paglaum. Amo nga importante gid nga ipakita naton ang kaayo kag konsiderasyon paagi sa pagpili sang tinaga nga aton gamiton kag bisan sa tono sang aton tingog! Madamo ang interesado sa aton mensahe indi lang bangod may nahibaluan kita sa Biblia ukon maayo kita mangatarungan, kundi bangod nagaulikid gid kita sa ila kag may konsiderasyon kita.

15. Paano naton ipakita ang konsiderasyon sa mga ginapanaksihan naton?

¹⁵ Madamo sing paagi nga mapakita naton ang konsiderasyon sa mga tawo nga ginapanaksihan naton. Kon nagapamangkot kita, dapat kita mangin mainayuhon kag matinahuron. Ang isa ka payunir nga nagaalagad sa lugar nga madamo ang mahuluy-on nagagamit sing mga pamangkot nga indi mahuy-an ang mga tawo kon indi nila ini masabat. Ginalikawan niya ang mga pamangkot nga mabudlay sabton. Halimbawa, wala sia nagapamangkot, ‘Kabalo ka bala sang ngalan sang Dios?’ ukon ‘Kabalo ka bala kon ano ang Ginharian sang Dios?’ Sa baylo, nagasiling sia, “Natun-an ko sa Biblia nga may ngalan ang Dios. Puede ko bala ipakita sa imo sa Biblia ang iya ngalan?” Sarisari ang mga kultura kag katawhan, gani ini nga paagi indi epektibo sa iban nga lugar. Pero, dapat gid naton ipakita pirme ang konsiderasyon kag pagtahod. Nalakip sa sini ang pagtinguha naton nga makilala ang mga tawo sa aton teritoryo.

16, 17. Paano ang konsiderasyon makabulig sa aton sa pagdesisyon (a) kon san-o naton bisitahan ang mga tawo? (b) kon ano kalawig ang aton pagbisita sa ila?

¹⁶ San-o naton dapat bisitahan ang mga tawo? Kon nagapamalaybalay kita, wala kita ginapaabot sang mga tawo. Gani importante gid nga bisitahan naton sila sa tion nga mahimo naton sila maistorya. (Mat. 7:12) Halimbawa, adlaw na bala nagabugtaw ang mga tawo sa inyo teritoryo kon Sabado kag Domingo? Kon huo, puede ka anay makapanaksi sa dalan, sa publiko nga mga lugar, ukon duawon liwat ang mga tawo nga nahibaluan mo nga puede na maistorya.

¹⁷ Ano kalawig ang aton pagbisita? Kasako gid sang mga tawo, gani nagakaigo gid nga malip-ot lang ang aton pagbisita, ilabi na kon una ini nga paghambalanay. Mas maayo ini sangsa magtener kita sing malawig. (1 Cor. 9:20-23) Kon makita nila nga nahangpan naton ang ila kahimtangan nga masako sila, mahimo batunon nila kita kon magbalik kita. Gani dapat gid naton ipakita sa aton ministeryo ang mga kinaiya nga ginapatubas sang espiritu sang Dios. Kon ipakita naton ini, mangin “masigkamanugpangabudlay [kita] sang Dios.” Mahimo pa gani kita gamiton ni Jehova para buligan ang iban nga matun-an ang kamatuoran.—1 Cor. 3:6, 7, 9.

18. Ano ang mabaton naton nga mga pagpakamaayo kon ipakita naton ang konsiderasyon sa iban?

¹⁸ Gani manikasog gid kita nga ipakita ang konsiderasyon sa pamilya, sa kongregasyon, kag sa ministeryo. Kon himuon naton ini, pakamaayuhon gid kita subong kag sa palaabuton. Ang Salmo 41:1, 2 nagasiling: “Malipayon ang nagapatugsiling sa mga kubos; luwason sia ni Jehova sa adlaw sang kalalat-an. . . . Kabigon sia nga malipayon sa duta.”