1. Ano ang dalayawon nga ginahimo sang mga alagad ni Jehova halin pa sang una?

 PALANGGA mo bala si Jehova? Sigurado gid nga palangga mo sia. Kag indi lang ikaw ang nagapalangga sa iya. Kay man, madamo ang nagapalangga sa iya halin pa sang una. (Sal. 104:​33, 34) Naghimo pa gani sang mga sakripisyo ang madamo sa ila para maalagad nila si Jehova. Ang halimbawa sa sini amo ang mga Nazareo sa Israel sang una. Sin-o ang mga Nazareo, kag ano ang matun-an naton sa ila halimbawa?

2. (a) Sin-o ang mga Nazareo? (Numeros 6:​1, 2) (b) Ngaa nagdesisyon ang iban nga mga Israelinhon nga mangin Nazareo?

² Ang tinaga nga “Nazareo” naghalin sa Hebreo nga tinaga nga nagakahulugan sing “Isa nga Pinili,” “Isa nga Ginpain,” ukon “Isa nga Gindedikar.” Ang mga Nazareo amo ang mga Israelinhon nga naghimo sang pila ka sakripisyo para maalagad nila si Jehova sa pinasahi nga paagi. Suno sa Mosaikong Kasuguan, puede makahimo sing pinasahi nga panaad ang isa ka lalaki ukon isa ka babayi nga magkabuhi bilang Nazareo sa sulod sang ginpat-od nga tion. a (Basaha ang Numeros 6:​1, 2.) Nalakip sa sini nga panaad, ukon sagrado nga promisa, ang pagtuman sa pila ka pagsulundan nga indi kinahanglan tumanon sang iban nga mga Israelinhon. Ti, ngaa nagdesisyon ang iban nga mga Israelinhon nga mangin Nazareo? Posible gid nga napalig-on sila nga himuon ini bangod palangga gid nila si Jehova kag nagapasalamat gid sila sa madamo niya nga pagpakamaayo.​—Deut. 6:5; 16:17.

3. Ano ang pagkaanggid sang katawhan sang Dios subong sa mga Nazareo?

³ Sang ginbuslan sang “kasuguan sang Cristo” ang Mosaikong Kasuguan, indi na puede mangin Nazareo ang katawhan sang  Dios. (Gal. 6:2; Roma 10:4) Pero, pareho sa mga Nazareo, padayon nga ginapakita sang katawhan ni Jehova subong nga gusto gid nila nga alagaron sia sa bug-os nila nga tagipusuon, kalag, hunahuna, kag kusog. (Mar. 12:30) Nagpanaad kita nga himuon naton ini sang gindedikar naton ang aton kaugalingon kay Jehova. Para matuman naton ang aton panaad, dapat naton himuon ang kabubut-on ni Jehova kag dapat handa kita magsakripisyo. Gani binagbinagon naton kon paano gintuman sang mga Nazareo ang ila panaad. Madamo kita sing matun-an sa ila nga makabulig sa aton para matuman naton ang aton panaad. b (Mat. 16:24) Ari ang pila sa sini.

MANGIN HANDA SA PAGSAKRIPISYO

4. Suno sa Numeros 6:​3, 4, ano nga sakripisyo ang dapat himuon sang mga Nazareo?

⁴ Basaha ang Numeros 6:​3, 4. Dapat likawan sang mga Nazareo ang tanan nga makahulubog nga ilimnon kag ang mga produkto halin sa puno sang ubas, pareho sang bunga sini kag pasas. Pero ang iban nga mga Israelinhon nagainom sang makahulubog nga ilimnon kag nagakaon sang ubas kag pasas. Kay man, indi man sala ang pag-inom kag pagkaon sini. Suno sa Biblia, regalo sang Dios ang “alak nga makapasadya sa tagipusuon sang tawo.” (Sal. 104:​14, 15) Pero bisan pa makapasadya sa mga tawo ini nga ilimnon kag pagkaon, nagsakripisyo ang mga Nazareo paagi sa paglikaw sa sini. c

5. Ano nga mga sakripisyo ang ginhimo nanday Madián kag Marcela, kag ngaa ginhimo nila ini?

⁵ Pareho sa mga Nazareo, nagasakripisyo man kita para mas madamo kita sing mahimo para kay Jehova. Binagbinaga ang halimbawa sang isa ka mag-asawa nga sanday Madián kag Marcela. d Daku ang sueldo ni Madián sa iya obra, gani nagaistar sila sa manami nga apartment kag komportable ang ila pangabuhi. Pero, gusto nila dugangan ang ila ginahimo para kay Jehova. Gani naghimo sila sang pila ka pagbag-o. “Ginbuhinan namon ang amon mga galastuhan,” siling nila. “Nagsaylo kami sa mas gamay nga apartment kag ginbaligya namon ang amon awto.” Indi kinahanglan nga himuon nanday Madián kag Marcela ini nga mga sakripisyo, pero nagdesisyon sila nga himuon ini bangod gusto nila dugangan ang ila ginahimo sa ila pag-alagad kay Jehova. Subong, kontento sila sa ila kabuhi kag nalipay gid sila sa ila mga desisyon.

6. Ngaa nagahimo sang mga sakripisyo ang katawhan ni Jehova subong? (Tan-awa man ang piktyur.)

 ⁶ Subong, nalipay ang katawhan ni Jehova nga maghimo sang mga sakripisyo para mas madamo sila sing tion sa ila pag-alagad sa iya. (1 Cor. 9:​3-6) Wala kita ginasugo ni Jehova nga himuon ini nga mga sakripisyo, kag indi man malain ang mga butang nga ginasakripisyo naton. Halimbawa, gusto sang iban nga makaobra man sila kuntani sa ila nanamian nga obra, may kaugalingon man sila kuntani nga balay, kag may ara man sila kuntani sing pet. Pero ginsakripisyo nila ini. Madamo ang nagdesisyon nga indi anay magpangasawa ukon magpamana, ukon indi anay magbata pagkatapos nila magpakasal. May iban nga nag-alagad sa lugar nga nagakinahanglan sang dugang nga manugbantala bisan pa nga mapalayo sila sa ila mga pinalangga. Madamo sa aton ang naghimo sini nga mga sakripisyo bangod gusto naton ihatag kay Jehova ang aton pinakamaayo. Daku man ukon gamay ang aton ginhimo nga mga sakripisyo para maalagad si Jehova, makasalig kita nga ginapabaloran gid niya ini.​—Heb. 6:10.

INDI MAHADLOK NGA MANGIN LAIN SA IBAN

7. Ngaa posible mabudlay para sa isa ka Nazareo nga tumanon ang iya panaad? (Numeros 6:5) (Tan-awa man ang piktyur.)

⁷ Basaha ang Numeros 6:5. Nagpanaad ang mga Nazareo nga indi nila pag-utdan ang ila buhok para ipakita nga bug-os gid ang ila pagpasakop kay Jehova. Kon madugay na nga Nazareo ang isa ka Israelinhon, posible nga malaba na ang iya buhok kag matalupangdan ini dayon sang iban. Kon ginarespeto sia sang iban kag ginapalig-on nila sia nga tumanon ang iya panaad, mas mahapos para sa iya nga mangin lain sa iban. Pero makapasubo nga may mga tion sa kasaysayan sang Israel nga wala ginarespeto ukon ginapalig-on ang mga Nazareo. Sang tion ni manalagna Amos, ‘ginahatagan sang apostata nga mga Israelinhon ang mga Nazareo sing alak nga mainom.’ Posible ginahimo nila ini para indi matuman sang mga Nazareo ang ila panaad nga maglikaw sa alak. (Amos 2:12) Gani may mga tion nga kinahanglan gid mangin maisog ang mga Nazareo para matuman nila ang ila panaad kag mangin lain sila sa iban.

8. Paano ka napalig-on sang eksperiensia sang isa ka pamatan-on nga si Benjamin?

⁸ Sa bulig ni Jehova, masarangan man naton nga mangin maisog kag mangin lain sa iban bisan pa mahuluy-on kita. Binagbinaga ang halimbawa sang dies anyos nga Saksi sa Norway nga si Benjamin. Bangod sang inaway sa Ukraine, naghiwat sing programa ang ila eskwelahan para ipakita ang ila pagsuporta sa mga taga-Ukraine. Ginsilingan ang mga kabataan nga kantahon nila ang isa ka kanta, kag dapat ang kolor sang suksukon nila nga bayo pareho sa kolor sang bandera sang Ukraine. Para indi makaentra si Benjamin sa sini nga programa nga nagasuporta sa isa ka pungsod,  nagtindog sia sa lugar nga medyo malayo sa ginahiwatan sini. Pero nakita si Benjamin sang isa ka maestra kag gintawag niya sia: “Dali na diri. Ikaw na lang ang amon ginahulat!” Maisog nga ginpalapitan ni Benjamin ang maestra kag nagsiling sia: “Neutral ako Ma’am, kag wala ako nagaentra sa mga programa parte sa pulitika. Madamo gani Ma’am nga Saksi ni Jehova ang napriso kay indi sila mag-entra sa inaway.” Naintiendihan sia sang maestra kag ginsilingan sia nga puede lang nga indi sia mag-entra sa programa. Pero, ginpamangkot sia sang iya mga classmate kon ngaa wala sia nag-entra sa ila. Grabe ang kulba ni Benjamin kag daw mahibi sia. Pero, nangin maisog sia kag ginsulit niya sa iya mga classmate ang ginsiling niya sa maestra. Pagkatapos sini, ginsilingan ni Benjamin ang iya mga ginikanan nga nabatyagan niya nga ginbuligan sia ni Jehova nga mapaathag ang iya mga ginapatihan.

9. Ano ang himuon naton para mapasadya naton ang tagipusuon ni Jehova?

⁹ Bangod ginatuman naton si Jehova, makita sang iban nga lain kita sa ila. Sa ulubrahan man ukon sa eskwelahan, dapat mangin maisog kita nga magpakilala nga Saksi kita ni Jehova. Kag samtang nagalain pa gid ang pamatasan kag ginahimo sang mga tawo sa sini nga kalibutan, posible mabudlayan kita nga tumanon ang mga prinsipio sa Biblia kag ibantala ang maayong balita. (2 Tim. 1:8; 3:13) Pero, dumdumon naton pirme nga dapat mangin maisog kita kag dapat mangin lain kita sa mga tawo nga wala nagaalagad kay Jehova. Kon himuon naton ini, ‘ginapasadya naton ang iya tagipusuon.’—Hulu. 27:11; Mal. 3:18.

UNAHA SI JEHOVA SA IMO KABUHI

10. Ngaa posible mabudlay para sa mga Nazareo nga tumanon ang ginasiling sang Numeros 6:​6, 7?

¹⁰ Basaha ang Numeros 6:​6, 7. Indi dapat magpalapit ang mga Nazareo sa patay nga tawo. Posible mahunahuna mo nga gamay man lang ini nga sakripisyo. Pero sang panahon sang Biblia, posible mabudlay para sa isa ka Nazareo nga tumanon ini nga sugo kon mapatay ang suod niya nga paryente. Sadto, kustombre sang mga tawo nga kadtuan ang isa nga napatay. (Juan 19:​39, 40; Binu. 9:​36-40) Pero indi ini puede himuon sang isa ka Nazareo. Bisan pa grabe ang kasubo sang isa ka Nazareo, mabakod ang iya pagtuo kay ginatuman gid niya ang iya panaad. Sigurado gid nga ginpabakod ni Jehova ining matutom niya nga mga alagad para mabatas nila ang mabudlay nga mga sitwasyon.

11. Kon kinahanglan naton magdesisyon parte sa mga butang nga nagadalahig sa aton pamilya, ano ang dapat naton unahon? (Tan-awa man ang piktyur.)

¹¹ Bilang mga alagad ni Jehova, wala naton ginapakadiutay ang aton dedikasyon kay Jehova.  Gani kon kinahanglan naton magdesisyon parte sa mga butang nga nagadalahig sa aton pamilya, ginabinagbinag naton kon ano ang epekto sini sa aton panaad kay Jehova. Ginapanikasugan gid naton nga himuon ang aton mga responsibilidad sa aton pamilya, pero indi gid naton dapat pag-unahon ang gusto sang mga miembro sang aton pamilya. Sa baylo, unahon gid naton pirme ang gusto ni Jehova nga himuon naton. (Mat. 10:​35-37; 1 Tim. 5:8) Kon kaisa, kinahanglan naton maghimo sang desisyon nga makapahalipay kay Jehova bisan pa nga indi ini gusto sang aton mga paryente.

12. Ano ang ginhimo ni Alexandru samtang ginabatas niya ang mabudlay nga sitwasyon sa iya pamilya, kag ano ang wala niya ginhimo?

¹² Binagbinaga ang eksperiensia ni Alexandru kag sang iya asawa nga si Dorina. Pagligad sang isa ka tuig sugod sang nag-Bible study sila nga mag-asawa, nag-untat si Dorina, kag gusto niya nga mag-untat man si Alexandru. Pero, kalmado nga nagsiling si Alexandru nga magapadayon sia sa pag-Bible study. Naakig si Dorina kag gusto gid niya nga mag-untat si Alexandru. Nagsiling si Alexandru nga gintinguhaan niya nga intiendihon ang reaksion ni Dorina, pero indi ini mahapos. May mga tion nga kon ginapakalain sia ni Dorina kag ginasilingan sang masakit nga mga tinaga, daw gusto niya nga mag-untat na lang sa pag-Bible study. Pero, padayon nga gin-una ni Alexandru sa iya kabuhi si Jehova. Padayon man niya nga ginapakitaan sang gugma kag respeto ang iya asawa. Bangod sang maayo nga halimbawa ni Alexandru, napalig-on si Dorina nga mag-Bible study liwat. Sang ulihi, nabawtismuhan si Dorina.​—Tan-awa sa jw.org/hil ang video nga Alexandru kag Dorina Vacar: Ang Gugma Mapinasensiahon kag Mainayuhon nga makita sa serye nga “Ginabag-o sang Kamatuoran ang Kabuhi.”

13. Paano naton mapakita nga palangga naton si Jehova kag ang aton pamilya?

¹³ Ginhimo ni Jehova ang pamilya, kag gusto niya nga mangin malipayon ang aton pamilya. (Efe. 3:​14, 15) Kon gusto naton mabatyagan ang matuod nga kalipay, dapat naton himuon ang gusto ni Jehova nga himuon naton. Samtang ginaatipan mo ang imo pamilya kag ginapakitaan sila sang gugma kag respeto, makasalig ka nga ginapabaloran ni Jehova ang imo mga sakripisyo para masimba sia.​—Roma 12:10.

PALIG-UNON NATON ANG ISA KAG ISA NGA ILUGON ANG MGA NAZAREO

14. Sin-o gid ang mga dapat naton palig-unon?

¹⁴ Dapat handa magsakripisyo ang tanan nga nagaalagad kay Jehova bangod sang ila gugma sa iya. Pero kon kaisa, indi ini mahapos himuon. Paano naton mabuligan ang isa kag isa nga magsakripisyo para kay Jehova? Paagi sa paghambal sing makapalig-on sa isa kag isa. (Job 16:5) May ara bala sa inyo kongregasyon nga nagpasimple sang iya kabuhi para mas madamo sia sing mahimo  sa iya pag-alagad kay Jehova? May kilala ka bala nga pamatan-on nga wala nahadlok nga mangin lain sa iban sa ila eskwelahan bisan pa nga mabudlay ini himuon? May kilala ka bala nga Bible study ukon utod nga posible nabudlayan nga magpabilin nga matutom bangod ginapamatukan sia sang iya pamilya? Panikasugan gid naton nga palig-unon ining aton pinalangga nga mga kauturan, kag isiling naton sa ila nga nagadayaw gid kita sa ila kaisog kag mga sakripisyo.​—Filem. 4, 5, 7.

15. Ano ang ginhimo sang iban para buligan ang mga nagaalagad sing bug-os tion?

¹⁵ Kon kaisa, posible may kahigayunan kita nga mabuligan ang aton mga kauturan nga nagaalagad sing bug-os tion. (Hulu. 19:17; Heb. 13:16) Gusto gid ini himuon sang isa ka matutom nga tigulang nga sister nga nagaistar sa Sri Lanka. Sang nadugangan ang pension nga ginabaton niya, gusto niya buligan ang duha ka pamatan-on nga sister nga mga payunir. Gusto niya sila buligan para makapadayon sila sa ila pag-alagad bisan pa nagapamigado sila. Gani nagdesisyon sia nga hatagan sila sing espesipiko nga kantidad kada bulan para sa ila balayran sa telepono. Dalayawon gid ang ginhimo sini nga sister.

16. Ano ang natun-an naton sa mga Nazareo sang una?

¹⁶ Madamo gid kita sing natun-an sa maayo nga halimbawa sang mga Nazareo sang una. Pero, may matun-an pa gid kita sa ila parte sa aton Amay sa langit nga si Jehova. Kabalo si Jehova nga gusto gid naton nga malipay sia sa aton, kag kabalo sia nga handa kita magsakripisyo para matuman naton ang aton panaad sang nagdedikar kita sa iya. Kag ginapadunggan niya kita paagi sa paghatag sa aton sing kahigayunan nga ipakita sa iya nga palangga naton sia. (Hulu. 23:​15, 16; Mar. 10:​28-30; 1 Juan 4:19) Natun-an naton sa mga Nazareo nga nakita ni Jehova ang aton mga sakripisyo para maalagad sia, kag ginapabaloran niya ini. Gani kabay pa nga padayon naton nga alagaron si Jehova kag kinabubut-on naton nga ihatag sa iya ang aton pinakamaayo.