1-2. (a) Ngaa madamo subong ang nabudlayan nga magsalig sa mga may awtoridad? (b) Ano ang binagbinagon naton sa sini nga artikulo?

 SUBONG, madamo ang nabudlayan nga magsalig sa mga may awtoridad. Natalupangdan nila nga ginapaboran sang mga gobierno kag sang mga kasuguan ang mga manggaranon kag mga may impluwensia, pero ginabalewala sini ang mga imol. Husto gid ang ginasiling sang Biblia: “Ginagamhan sang tawo ang iya isigkatawo sa iya kahalitan.” (Man. 8:9) Indi man maayo ang ginahimo sang pila ka lider sang mga relihion, gani may mga tawo nga wala na nagasalig sa Dios. Kon may gina-Bible study kita, dapat naton sia buligan nga magsalig kay Jehova, sa mga gulang, kag sa mga nagapanguna sa Iya organisasyon.

² Indi lang ang mga Bible study ang dapat magpabakod sang ila pagsalig kay Jehova kag sa iya organisasyon. Bisan pa tinuig na kita nga nagaalagad kay Jehova, indi gid dapat madula ang aton pagsalig nga ang paagi ni Jehova amo ang pinakamaayo. Kon kaisa, may mga sitwasyon nga posible magtilaw sang aton pagsalig kay Jehova. Sa sini nga artikulo, binagbinagon naton ang tatlo ka sitwasyon nga posible magtilaw sang aton pagtuo: (1) kon nagabasa kita sang pila ka kasaysayan sa Biblia, (2) kon makabaton kita sang mga instruksion halin sa organisasyon ni Jehova, kag (3) kon makaeksperiensia kita sang mga kabudlayan sa ulihi.

3. Paano posible matilawan ang aton pagsalig kay Jehova kon nagabasa kita sang pila ka kasaysayan sa Biblia?

 ³ Samtang ginabasa naton ang Pulong sang Dios, posible nga may mga pamangkot kita parte sa ginhimo ni Jehova sa pila ka tawo kag parte sa pila niya ka desisyon. Halimbawa, sa libro sang  Numeros, mabasa naton nga nagsiling si Jehova nga dapat patyon ang isa ka Israelinhon nga nagpangahoy sa Adlaw nga Inugpahuway. Mabasa naman naton sa Ikaduhang Samuel nga pagligad sang madamo nga tinuig, ginpatawad ni Jehova si Hari David sang nagpakighilahi sia kag may ginpapatay nga tawo. (Num. 15:32, 35; 2 Sam. 12:9, 13) Posible nga mamangkot kita, ‘Ngaa ginpatawad ni Jehova si David sang nagpakighilahi sia kag may ginpapatay nga tawo, pero ngaa ginsilutan niya sang kamatayon ang tawo nga nakahimo sang daw indi man serioso nga sala?’ Para masabat ini nga pamangkot, binagbinagon naton ang tatlo ka butang nga dapat naton tandaan kon nagabasa kita sang Biblia.

4. Paano mapabakod sang Genesis 18:20, 21 kag Deuteronomio 10:17 ang aton pagsalig sa mga desisyon ni Jehova?

⁴ Indi sa tanan nga tion kompleto ang detalye sang isa ka kasaysayan sa Biblia. Halimbawa, kabalo kita nga sinsero gid nga naghinulsol si David sa iya mga nahimo. (Sal. 51:2-4) Pero ano naman ang panimuot sang tawo nga naglapas sang kasuguan parte sa Adlaw nga Inugpahuway? Naghinulsol bala sia sa iya nahimo? May nalapas na bala sia sadto nga mga kasuguan ni Jehova? Ginpaandaman na bala sia sang una pero ginbalewala niya ini ukon wala niya ginpati? Wala sing ginasiling ang Biblia parte sa sini. Pero, makasigurado kita nga “wala gid sing pagkadimatarong” kay Jehova. (Deut. 32:4) Indi sia pareho sa mga tawo kon nagadesisyon sia. Sa masami, nagadesisyon ang mga tawo base sa uluistorya lang, base sa ila negatibo nga pagtan-aw sa iban, ukon base sa iban pa nga rason. Bangod sini, makahimo sila sang indi husto nga mga desisyon. Pero lain si Jehova, ginabase niya ang iya mga desisyon sa kon ano gid ang matuod nga natabo. (Basaha ang Genesis 18:20, 21; Deuteronomio 10:17.) Samtang nagadamo ang aton nabal-an parte kay Jehova kag sa iya mga kasuguan, mas magasalig pa gid kita sa iya mga desisyon. Bisan pa indi masabat subong ang aton mga pamangkot parte sa isa ka kasaysayan sa Biblia, bastante na ang aton nabal-an parte sa aton Dios para makumbinsi kita nga ‘matarong ang tanan niya nga ginahimo.’​—Sal. 145:17.

5. Bangod indi kita perpekto, ano kon kaisa ang pagtan-aw naton sa isa ka sitwasyon? (Tan-awa man ang kahon nga “ Bangod Indi Kita Perpekto, May mga Tion nga Daw Indi Naton Maintiendihan ang Desisyon ni Jehova.”)

⁵ Bangod indi kita perpekto, may mga tion nga indi husto ang aton pagtan-aw sa isa ka sitwasyon. Gintuga kita sang Dios suno sa iya larawan,  gani gusto gid naton makita nga ginatratar sing husto ang mga tawo. (Gen. 1:26) Pero bangod indi kita perpekto, posible nga sala ang pagtan-aw naton sa isa ka sitwasyon bisan pa abi naton nabal-an naton ang tanan nga detalye. Halimbawa, naakig gid si Jonas sang nagdesisyon si Jehova nga kaluuyan ang mga taga-Ninive. (Jon. 3:10–4:1) Pero ano ang resulta bangod naluoy si Jehova sa ila? Naluwas ang sobra 120,000 ka taga-Ninive nga sinsero nga naghinulsol. Gani husto gid ang desisyon ni Jehova, pero dapat tadlungon ang panghunahuna ni Jonas.

6. Ngaa indi obligado si Jehova nga ipaathag sa aton ang iya mga desisyon?

⁶ Indi obligado si Jehova nga ipaathag sa mga tawo ang iya mga desisyon. Gintugutan ni Jehova ang iya mga alagad sang una nga isugid sa iya ang ila ginabatyag parte sa mga desisyon nga iya ginhimo ukon pagahimuon pa lang. (Gen. 18:25; Jon. 4:2, 3) Kag kon kaisa, ginapaathag niya ang iya desisyon. (Jon. 4:10, 11) Pero, indi obligado si Jehova nga ipaathag sa aton ang iya mga desisyon. Bangod sia ang aton Manunuga, indi niya kinahanglan maglisensia sa aton antes sia magdesisyon, kag indi niya kinahanglan mamangkot sa aton kon bala husto ukon indi ang iya ginhimo.​—Isa. 40:13, 14; 55:9.

7. Ano ang posible nga nabudlayan naton nga himuon, kag ngaa?

⁷ Nagapati gid kita nga pirme ginahimo ni Jehova kon ano ang husto. Pero, posible nga nabudlayan kita nga magsalig sa mga tawo nga gintangdo niya nga magpanguna. Kon may ginapatuman ang mga utod nga may awtoridad sa organisasyon ni Jehova, posible nga magduhaduha kita kon bala amo gid ini ang panuytoy ni Jehova ukon basi sila lang ang naghimo sini. Posible nga amo man sini ang ginhunahuna sang pila ka tawo nga nagkabuhi sang panahon sang Biblia. Binagbinaga ang mga halimbawa sa  parapo 3. Sang ginsilutan sing kamatayon ang tawo nga naglapas sang kasuguan parte sa Adlaw nga Inugpahuway, posible nga may paryente sia nga naghunahuna kon bala namangkot gid man si Moises kay Jehova parte sa sini. Kag sang nakasala si David sang pagpakighilahi sa asawa ni Urias nga Hethanon, posible nga may abyan si Urias nga naghunahuna nga gingamit ni David ang iya posisyon bilang hari para indi sia pagsilutan sing kamatayon. Ang matuod, nagasalig si Jehova sa mga gintangdo niya nga magpanguna sa iya organisasyon kag sa kongregasyon. Gani kon wala kita nagasalig sa sini nga mga utod, indi naton masiling nga nagasalig kita kay Jehova.

8. Ano ang ginahimo sa mga kongregasyon subong nga pareho sa mabasa sa Binuhatan 16:4, 5?

⁸ Subong, ginapangunahan ni Jehova ang iya katawhan paagi sa “matutom kag mainandamon nga ulipon.” (Mat. 24:45) Pareho sa nagadumala nga hubon sang unang siglo, ini nga ulipon amo ang nagatatap sang katawhan sang Dios sa bilog nga kalibutan kag sila ang nagahatag sang mga instruksion sa mga gulang sa kongregasyon. (Basaha ang Binuhatan 16:4, 5.) Ginasigurado sang mga gulang nga matuman sang mga kongregasyon ini nga mga instruksion. Mapakita naton nga nagasalig kita sa paagi ni Jehova kon ginatuman naton ang mga instruksion halin sa iya organisasyon kag sa mga gulang.

9. Sa ano nga mga sitwasyon posible nga nabudlayan kita nga suportahan ang desisyon sang mga gulang, kag ngaa?

⁹ Kon kaisa, posible nga nabudlayan kita nga suportahan ang desisyon sang mga gulang. Halimbawa, sining nagligad nga mga tinuig, may mga pagbag-o nga ginhimo sa madamo nga kongregasyon kag mga sirkito. May mga sitwasyon nga ginpangabay sang mga gulang ang pila ka kauturan nga magsaylo sa iban nga kongregasyon nga diutay ang manugbantala. Ginahimo ini para magamit gid sing maayo ang aton mga Kingdom Hall base sa kapasidad sini. Kon  isa kita sa ginpangabay, posible nga nabudlayan kita nga bayaan ang aton mga abyan kag pamilya. Ginatuytuyan bala sang Dios ang mga gulang kon diin iasayn ang mga utod? Wala. Bangod sini, posible nga nabudlayan kita nga sundon ang ila mga instruksion. Pero ginasaligan ni Jehova ang mga gulang sa paghimo sini nga mga desisyon, gani dapat man naton sila saligan. b

10. Base sa Hebreo 13:17, ngaa dapat naton suportahan ang mga gulang?

¹⁰ Ngaa dapat naton suportahan ang mga desisyon sang mga gulang bisan pa indi kita komporme sa sini? Kay kon himuon naton ini, nagabulig kita para indi maguba ang paghiusa sang katawhan sang Dios. (Efe. 4:2, 3) Nagauswag ang kongregasyon kon ang tanan mapainubuson nga nagapasakop sa mga desisyon sang hubon sang mga gulang. (Basaha ang Hebreo 13:17.) Kag ang mas importante, ginapakita naton kay Jehova nga nagasalig kita sa iya kon suportahan naton ang mga gintangdo niya nga mag-atipan sa aton.​—Binu. 20:28.

11. Paano naton mapabakod ang aton pagsalig sa mga instruksion nga ginahatag sang mga gulang?

¹¹ Paano naton mapabakod ang aton pagsalig sa mga instruksion nga ginahatag sang mga gulang? Dumdumon naton nga nagapangamuyo sila nga buligan sila sang balaan nga espiritu kon may himuon sila nga mga desisyon nga makaapekto sa kongregasyon. Ginabinagbinag man nila sing maayo ang mga prinsipio sa Biblia nga makabulig sa ila, kag ginausisa nila ang mga instruksion sang organisasyon ni Jehova. Gusto gid nila nga malipay si Jehova kag maatipan sing maayo ang iya katawhan. Kabalo ining matutom nga mga lalaki nga importante sa Dios kon paano nila ginatuman ang ila mga responsibilidad kay manabat sila sa iya. (1 Ped. 5:2, 3) Hunahunaa ini: Nabahinbahin ang mga tawo sa kalibutan bangod sa rasa, relihion, kag pulitika, pero nahiusa ang katawhan ni Jehova sa pagsimba sa isa lang ka matuod nga Dios. Posible lang ini bangod ginapakamaayo ni Jehova ang iya organisasyon.

12. Kon nakahimo sang serioso nga sala ang isa ka utod, ano ang mga dapat binagbinagon sang mga gulang para mabal-an kon bala matuod gid ang iya paghinulsol?

¹² Ginhatagan ni Jehova ang mga gulang sang mabug-at nga responsibilidad nga siguraduhon nga matinlo ang kongregasyon. Kon nakahimo sang serioso nga sala ang isa ka utod, ginasugo ni Jehova ang mga gulang nga hibaluon kon bala dapat pa sia magpabilin sa kongregasyon. Gani dapat nila hibaluon kon bala matuod gid ang iya paghinulsol. Posible magsiling sia nga nagahinulsol gid sia, pero ginadumtan gid bala niya ang iya nahimo kag nangil-ad sia sa sini? Ginapanikasugan gid bala niya nga indi masulit ang iya sala? Kon ang iya malain nga mga kaupdanan amo ang isa ka rason kon ngaa nakahimo sia sang sala, handa bala sia nga untaton ang pagpakig-upod sa ila? Nagapangamuyo ang mga gulang kay Jehova, ginausisa nila kon ano gid ang natabo, ginabinagbinag nila ang mga prinsipio sa Biblia, kag ginahibalo nila kon ano ang ginabatyag sang utod sa iya nahimo nga sala. Dayon nagadesisyon ang mga gulang kon bala dapat magpabilin sa kongregasyon ang utod nga nakasala ukon dapat sia i-disfellowship.​—1 Cor. 5:11-13.

13. Ano ang posible nga hunahunaon naton kon na-disfellowship ang aton suod nga abyan ukon paryente?

¹³ Paano matilawan ang aton pagsalig sa mga gulang? Kon indi naton suod nga abyan ukon paryente ang na-disfellowship, posible nga mabaton naton dayon ang desisyon sang mga gulang. Pero ano abi kon suod naton nga abyan ang gin-disfellowship? Basi hunahunaon naton nga wala gin-usisa sang mga gulang kon ano gid ang natabo, ukon basi magduhaduha kita kon bala ang ila desisyon amo gid ang gusto ni  Jehova. Ano ang makabulig sa aton nga batunon ang ila desisyon?

14. Ano ang makabulig sa aton kon nagdesisyon ang mga gulang nga dapat i-disfellowship ang aton abyan ukon paryente?

¹⁴ Dapat naton dumdumon nga kahimusan ni Jehova ang pag-disfellowship. Para ini sa kaayuhan sang kongregasyon, kag posible man nga makabenepisyo sa sini ang nakasala. Kon indi pagsikwayon sa kongregasyon ang nagahimo sang sala nga wala nagahinulsol, maimpluwensiahan niya ang iban nga maghimo man sing malain. (Gal. 5:9) Posible nga indi man niya marealisar kon daw ano kaserioso ang iya sala, kag indi sia magpanikasog nga bag-uhon ang iya panghunahuna kag mga ginahimo para mangin maayo liwat ang iya kaangtanan kay Jehova. (Man. 8:11) Kon kinahanglan magdesisyon ang mga gulang kon bala i-disfellowship ukon indi ang nakasala, makasalig kita nga ginaserioso gid nila ini nga responsibilidad. Pareho sa mga hukom sa Israel sang una, nahangpan nila nga “nagahukom [sila] indi para sa mga tawo kundi para kay Jehova.”​—2 Cron. 19:6, 7.

15. Ngaa dapat gid naton saligan ang mga instruksion ni Jehova subong?

¹⁵ Malapit na gid ang katapusan sining malain nga kalibutan, gani dapat pa gid kita magsalig sa paagi ni Jehova. Ngaa? Sa tion sang dakung kapipit-an, posible nga makabaton kita sang mga instruksion nga daw mabudlay intiendihon ukon tumanon. Siempre, indi kita pag-istoryahon ni Jehova sing personal. Posible gid nga gamiton niya nga maghatag sang mga instruksion ang mga gintangdo niya nga magpanguna. Sa sina nga tion, indi naton pagduhaduhaan ang mga instruksion kag indi kita dapat maghunahuna, ‘Halin gid bala ini kay Jehova, ukon basi ginhimo lang ini sang mga utod nga nagapanguna?’ Magasalig ka bala kay Jehova kag sa iya organisasyon kon mag-abot na ining importante nga tion? Para mabal-an mo ang sabat, binagbinaga kon paano mo ginatamod ang mga instruksion sang organisasyon sang Dios subong. Kon nagasalig ka sa mga instruksion nga ginabaton naton subong kag ginatuman mo ini dayon, posible gid nga amo man sini ang himuon mo sa tion sang dakung kapipit-an.—Luc. 16:10.

16. Paano matilawan ang aton pagsalig sa mga paghukom nga pagahimuon ni Jehova sa palaabuton?

¹⁶ Dapat man naton hunahunaon sing maayo kon ano ang aton mangin reaksion sa mga paghukom nga himuon ni Jehova sa katapusan sining malain nga kalibutan. Subong, nagalaum gid kita nga kuntani madamo pa nga tawo ang mag-alagad man kay Jehova, lakip na ang aton mga paryente nga indi Saksi, antes mag-abot ang katapusan. Pero sa Armageddon, gamiton ni Jehova si Jesus sa paghukom sa kada tawo. (Mat. 25:31-33; 2 Tes. 1:7-9) Indi kita ang magadesisyon  kon sin-o ang dapat kaluuyan ni Jehova. (Mat. 25:34, 41, 46) Magasalig bala kita sa mga desisyon ni Jehova, ukon magauntat kita sa pag-alagad sa iya kay indi kita komporme sa iya mga desisyon? Gani dapat gid naton pabakuron ang aton pagsalig kay Jehova subong para saligan naton sia sing bug-os sa palaabuton.

17. Ano ang maayo nga mga resulta kon himuon na ni Jehova ang iya mga paghukom sa katapusan sining malain nga kalibutan?

¹⁷ Imadyina kon ano ang aton mabatyagan sa bag-ong kalibutan sang Dios kon makita na naton ang resulta sang mga paghukom ni Jehova. Wala na sang butig nga relihion, kag wala na sang makagod nga mga negosyo kag korap nga mga gobierno nga nagapabudlay kag nagapaantos sa mga tawo. Wala na sang magamasakit, magatigulang, kag wala na sang mapatay sa aton mga pinalangga. Gapuson si Satanas kag ang mga demonyo sa sulod sang isa ka libo ka tuig. Ang tanan nga malain nga resulta sang ila pagrebelde madula na. (Bug. 20:2, 3) Sa sina nga tion, magapasalamat gid kita bangod nagsalig kita sa paagi ni Jehova.

18. Base sa Numeros 11:4-6 kag 21:5, ano ang matun-an naton sa ginhimo sang mga Israelinhon?

¹⁸ Sa bag-ong kalibutan sang Dios, may mga kabudlayan bala nga magatilaw sang aton pagsalig sa paagi ni Jehova? Binagbinaga ang natabo sa mga Israelinhon. Wala madugay pagkatapos sila ginhilway sa Egipto, nagreklamo ang pila sa ila. Nahidlaw sila sa preska nga mga pagkaon sa Egipto, kag gintamay nila ang manna nga ginhatag sa ila ni Jehova. (Basaha ang Numeros 11:4-6; 21:5.) Posible ayhan nga magreklamo man kita pagkatapos sang dakung kapipit-an? Wala kita kabalo kon daw ano kadaku nga obra ang himuon naton para matinluan ang duta kag para amat-amat ini nga himuon nga paraiso. Posible gid nga madamo kita sang dapat himuon sa umpisa kag mabudlay ini. Magareklamo bala kita sa ihatag sa aton ni Jehova sa sina nga tion? Ari ang masigurado naton: Kon pirme naton ginapasalamatan ang mga ginahatag sa aton ni Jehova subong, himuon man naton ini sa palaabuton.

19. Ano nga importante nga mga punto ang imo natun-an sa sini nga artikulo?

¹⁹ Husto gid pirme ang paagi ni Jehova. Dapat nga kumbinsido gid kita sa sini. Dapat man naton saligan ang mga ginasaligan ni Jehova nga magpatuman sang iya mga instruksion. Dapat naton tandaan ang ginsiling ni Jehova paagi sa iya manalagna nga si Isaias: “Mangin mabakod kamo kon magpakalinong kamo kag magsalig sa akon.”—Isa. 30:15.