1. Ngaa nabudlayan kita magtuman kon kaisa?

 MAY mga tion bala nga nabudlayan ka magtuman? Naeksperiensiahan ini ni Hari David, gani nangamuyo sia sa Dios: “Pukawa ang akon handum nga magtuman sa imo.” (Sal. 51:12) Palangga ni David si Jehova, pero may mga tion nga nabudlayan sia magtuman sa Iya. Nabudlayan man kita magtuman kon kaisa. Ngaa? Una, may mga tion nga nabudlayan kita magtuman bangod napanubli naton ining indi maayo nga kinaiya. Ikaduha, ginasulay kita ni Satanas nga magrebelde pareho sa ginhimo niya. (2 Cor. 11:3) Ikatlo, lapnag sa kalibutan “ang espiritu nga nagapanghikot na karon sa mga anak sang pagkadimatinumanon.” (Efe. 2:2) Gani dapat gid kita magpanikasog para mabatuan ang indi maayo nga kinaiya nga napanubli naton, ang Yawa, kag ang impluwensia sini nga kalibutan. Dapat naton himuon ang aton bug-os nga masarangan para matuman naton si Jehova kag ang mga ginhatagan niya sang awtoridad.

2. Ano ang buot silingon sang “handa sa pagtuman”? (Santiago 3:17)

² Basaha ang Santiago 3:17. Gintuytuyan si Santiago sa pagsulat nga ang maalam nga mga tawo “handa sa pagtuman.” Buot silingon, dapat handa kita nga tumanon ang mga ginhatagan ni Jehova sang awtoridad. Pero kon suguon nila kita nga supakon ang mga kasuguan ni Jehova, indi gusto ni Jehova nga tumanon naton sila.​—Binu. 4:18-20.

3. Ngaa importante kay Jehova nga tumanon naton ang mga ginhatagan niya sang awtoridad?

³ Posible nga mas mahapos para sa aton nga tumanon si Jehova sangsa tumanon ang mga tawo. Kay man, perpekto pirme ang mga instruksion ni Jehova. (Sal. 19:7) Sa bahin naman sang mga tawo, indi sila perpekto. Pero ginhatagan sang aton Amay sa langit sang awtoridad ang mga ginikanan, ang mga opisyal sang gobierno, kag ang mga gulang. (Hulu. 6:20; 1 Tes. 5:12; 1 Ped. 2:13, 14) Gani kon ginatuman naton sila, ginatuman naton si Jehova.  Binagbinagon naton kon paano naton matuman ang mga tawo nga ginhatagan ni Jehova sang awtoridad, bisan pa kon kaisa indi kita komporme sa ila mga instruksion ukon nabudlayan kita nga tumanon ini.

4. Ngaa madamo nga pamatan-on ang indi matinumanon sa ila mga ginikanan?

⁴ Mga pamatan-on, madamo sa inyo mga kaedad ang “indi matinumanon sa [ila] mga ginikanan.” (2 Tim. 3:1, 2) Ngaa? Para sa pila ka pamatan-on, hipokrito kuno ang ila mga ginikanan. Wala kuno ginaaplikar sang mga ginikanan ang ginatudlo nila sa ila kabataan. May pila naman ka pamatan-on nga nagasiling nga bangod moderno na ang aton panahon subong, indi na maaplikar ang mga laygay sang ila mga ginikanan ukon estrikto ini katama. Kon isa ikaw ka pamatan-on, amo man bala sini ang imo ginabatyag? Madamo ang nabudlayan nga tumanon ining sugo ni Jehova: “Mangin matinumanon kamo sa inyo mga ginikanan sa paagi nga kalahamut-an sa Ginuo, kay matarong ini.” (Efe. 6:1) Ano ang makabulig sa imo nga tumanon ini?

5. Base sa Lucas 2:46-52, ngaa dalayawon gid ang pagtuman ni Jesus sa iya mga ginikanan?

⁵ Kon parte sa pagtuman, makatuon ka kay Jesus bangod sia ang aton pinakamaayo nga halimbawa. (1 Ped. 2:21-24) Isa sia ka perpekto nga tawo nga may indi perpekto nga mga ginikanan. Pero ginpadunggan ni Jesus ang iya mga ginikanan bisan pa may mga tion nga nakahimo sila sang sala kag wala nila sia nahangpan. (Ex. 20:12) Binagbinaga ang natabo sang 12 anyos si Jesus. (Basaha ang Lucas 2:46-52.) Samtang nagapauli sila pagkatapos sang kapiestahan sa Jerusalem, wala matalupangdan nanday Jose kag Maria nga nabilin si Jesus. Responsibilidad nila nga siguraduhon nga upod nila ang tanan nila nga kabataan. Sang nakita na nanday Jose kag Maria si Jesus, ginbasol ni Maria si Jesus. Puede kuntani nga silingan sila ni Jesus nga indi husto nga basulon nila sia. Pero matinahuron ang pagsabat ni Jesus sa iya mga ginikanan kag simple lang ang ginsiling niya sa ila. Bisan pa ‘wala nahangpan nanday Jose kag Maria ang ginsiling ni Jesus sa ila,’ ‘padayon nga nagpasakop si Jesus sa ila.’

6-7. Ano ang makabulig sa mga pamatan-on para mapalig-on sila nga tumanon ang ila mga ginikanan?

⁶ Mga pamatan-on, kon nakahimo sang sala ang inyo mga ginikanan ukon wala nila kamo nahangpan, nabudlayan bala kamo nga tumanon sila? Ano ang makabulig sa inyo? Una, hunahunaa kon ano ang ginabatyag ni Jehova. Ang Biblia nagasiling nga kon ginatuman ninyo ang inyo mga ginikanan, “kalahamut-an ini sa Ginuo.” (Col. 3:20) Kabalo si Jehova nga may mga tion nga wala kamo nahangpan sang inyo mga ginikanan, kag may mga tion man nga nagahimo sila sang mga patakaran nga mabudlay tumanon. Pero kon tumanon ninyo sila, malipay sa inyo si Jehova.

⁷ Ikaduha, hunahunaa kon ano ang ginabatyag sang inyo mga ginikanan. Kon tumanon ninyo ang inyo mga ginikanan, malipay sila sa inyo kag saligan nila kamo. (Hulu. 23:22-25) Magasuod man kamo sa ila. Ang isa ka brother sa Belgium nga si Alexandre nagsiling, “Sang pirme ko na ginatuman ang akon mga ginikanan, nagsuod kami sa isa kag isa kag nangin mas malipayon kami.” b Ikatlo, kon tumanon mo ang imo mga ginikanan, makabulig ini sa imo sa ulihi. Si Paulo nga taga-Brazil nagsiling, “Bangod ginatuman ko ang akon mga ginikanan, nakabulig ini sa akon nga tumanon si Jehova kag ang iban pa nga may awtoridad.” Suno sa Pulong sang Dios, ari ang isa ka importante nga rason kon ngaa  dapat ninyo tumanon ang inyo mga ginikanan: “Agod mag-uswag ka kag magkabuhi ka sing malawig sa duta.”​—Efe. 6:2, 3.

8. Ano ang ginsiling sang madamo nga pamatan-on kon ngaa ginatuman nila ang ila mga ginikanan?

⁸ Madamo nga pamatan-on ang nagsiling nga maayo gid ang resulta kon nagatuman sila. Binagbinaga si Luiza nga taga-Brazil man. May mga cell phone ang halos tanan niya nga kaedad, gani daw indi niya mahangpan kon ngaa indi sia paghatagan sang cell phone sang iya mga ginikanan. Pero narealisar niya nga ginaproteksionan nila sia. Subong, amo ini ang ginsiling niya, “Kon ginatuman ko ang akon mga ginikanan, wala ko ginahunahuna nga daw ginagapos nila ako, kundi ginahunahuna ko nga daw pareho ini sa isa ka seat belt nga makaluwas sang akon kabuhi.” Binagbinaga man si Elizabeth nga isa ka pamatan-on nga sister nga taga-United States. May mga tion gihapon nga nabudlayan sia nga tumanon ang iya mga ginikanan. Nagsiling sia, “Kon daw indi ko mahangpan ang patakaran sang akon mga ginikanan, ginadumdom ko ang mga tion nga naproteksionan ako sang ila mga patakaran.” Suno naman kay Monica, nga taga-Armenia, maayo gid pirme ang resulta kon ginatuman niya ang iya mga ginikanan kon ikumparar sa mga tion nga wala sia nagtuman.

9. Ano ang ginasiling sang madamo nga tawo parte sa pagtuman sa mga kasuguan?

⁹ Suno sa Biblia, ang mga gobierno amo ang “mas mataas nga mga awtoridad.” (Roma 13:1) Madamo nga tawo ang nagasiling nga kinahanglan naton ang mga gobierno, kag kinahanglan naton tumanon ang ila mga kasuguan. Pero kon indi gani sila komporme sa isa ka kasuguan ukon pamatyag nila indi ini makatarunganon, wala sila nagatuman. Halimbawa, binagbinaga ang parte sa pagbayad sing buhis. Sa isa ka survey sa isa ka pungsod sa Europe, madamo ang nagsiling nga “indi nila pagbayaran ang buhis nga sa banta nila indi makatarunganon.” Bangod sini, mga 65 porsiento lang sang buhis nga dapat ihatag sa gobierno ang ginabayaran sang mga pumuluyo sini nga pungsod.

10. Ngaa dapat naton tumanon bisan ang mga kasuguan nga pamatyag naton mabudlay tumanon?

¹⁰ Suno sa Biblia, ang mga gobierno nga ginagamhan sang tawo nagaresulta sa pag-antos, ginakontrol ini ni Satanas, kag laglagon ini sa ulihi. (Sal. 110:5, 6; Man. 8:9; Luc. 4:5, 6) Ginasugiran man kita sang Biblia nga “ang tawo nga nagapamatok sa awtoridad nagapamatok sa kahimusan sang Dios.” Temporaryo nga ginatugutan ni Jehova ang paggahom sang mga gobierno sang tawo para mangin organisado ang tanan. Gani, “ihatag [naton] sa tanan ang para sa ila,” lakip ang buhis, respeto, kag pagtuman. (Roma 13:1-7) Posible nga may mga kasuguan ang mga gobierno nga pamatyag naton mabudlay tumanon, indi makatarunganon, ukon magastuhan kita kon tumanon naton. Pero bangod ginasugo kita ni Jehova nga tumanon ang mga gobierno, dapat naton sila tumanon magluwas lang kon  suguon nila kita nga supakon ang iya mga kasuguan.​—Binu. 5:29.

11-12. Base sa Lucas 2:1-6, ano ang ginhimo nanday Jose kag Maria para matuman nila ang isa ka kasuguan, kag ano ang resulta? (Tan-awa man ang mga piktyur.)

¹¹ May matun-an kita sa halimbawa nanday Jose kag Maria. Handa sila nga tumanon ang gobierno bisan pa mabudlay ang ginapatuman sa ila. (Basaha ang Lucas 2:1-6.) Sang mga siam na ka bulan ang ginabusong ni Maria, may ginsugo ang gobierno nga mabudlay tumanon sa ila sitwasyon. Si Augusto amo ang nagagahom sadto, kag nagsugo sia nga dapat magparehistro ang tanan nga nagaistar sa Emperyo sang Roma sa lugar nga ila natawhan. Gani dapat magkadto sanday Jose kag Maria sa Betlehem nga mga 150 ka kilometro ang kalayuon. Mabudlay gid ini nga paglakbay, ilabi na para kay Maria, kay magataklad-dulhog sila sa dalan nga ila agyan. Posible nga nabalaka sila kay basi magbata si Maria samtang nagalakbay sila. Nabalaka man sila sa posible matabo sa bata nga amo ang ginpromisa nga Mesias. Puede bala nga indi lang anay nila pagtumanon ang gobierno?

¹² Bisan pa may mga ginakabalak-an sanday Jose kag Maria, gintuman nila ang sugo sang gobierno. Ginpakamaayo sila ni Jehova bangod nagtuman sila. Nakaabot si Maria sa Betlehem nga wala sing malain nga natabo, mapagros ang iya ginbata, kag nakabulig pa sia nga matuman ang tagna sa Biblia.​—Miq. 5:2.

13. Kon matinumanon kita, paano ini makaamlig sa aton mga kauturan?

¹³ Kon tumanon naton ang gobierno, makabenepisyo kita kag ang iban. Paano? Ang isa ka benepisyo amo nga malikawan naton nga masilutan. Kay man, ginasilutan ang mga tawo nga wala nagatuman sa mga kasuguan. (Roma 13:4) Kon tumanon naton ang gobierno, makita nila nga matinumanon ang mga Saksi ni Jehova. Binagbinaga ining eksperiensia sa Nigeria nga natabo madamo nga tinuig na ang nagligad. May nagsulod nga mga soldado sa Kingdom Hall sa tion sang isa ka miting sang kongregasyon. Ginapangita nila ang mga tawo nga nagapanggamo kag nagaprotesta parte sa pagbayad sing buhis. Pero ginpahalin ang mga soldado sang ila opisyal, kag nagsiling sia, “Nagabayad sing buhis ang  mga Saksi ni Jehova.” Sa kada tion nga ginatuman mo ang mga kasuguan sang gobierno, nagabulig ka para indi maguba ang aton maayo nga reputasyon bilang katawhan ni Jehova. Kag magaabot ang tion nga maamligan sini nga reputasyon ang imo mga kauturan.​—Mat. 5:16.

14. Ano ang ginhimo sang isa ka sister para mangin matinumanon sia sa gobierno?

¹⁴ Pero may mga tion gid nga daw nabudlayan kita nga tumanon ang gobierno. Si Joanna, nga isa ka sister sa United States, nagsiling, “Bangod may pila sa amon pamilya nga nangin biktima sang inhustisya sang gobierno, nabudlayan gid ako nga tumanon ang gobierno.” Pero may ginhimo si Joanna para mabag-o niya ang iya panghunahuna. Una, gin-untatan niya ang pagbasa sang mga post sa social media nga nagapakalain sa gobierno. (Hulu. 20:3) Ikaduha, nangamuyo sia kay Jehova nga buligan sia nga magsalig sa Iya imbes nga mangamuyo sang pagbag-o sa gobierno. (Sal. 9:9, 10) Ikatlo, ginbasa niya ang mga artikulo sa aton mga publikasyon parte sa neutralidad. (Juan 17:16) Subong, nagsiling si Joanna nga bangod ginarespeto niya kag ginatuman ang gobierno, nakabatyag sia sang kalinong sa hunahuna kag nangin malipayon sia.

15. Ngaa may mga tion nga nabudlayan kita nga tumanon ang mga instruksion sang organisasyon ni Jehova?

¹⁵ Gusto ni Jehova nga ‘tumanon naton ang mga nagapanguna’ sa kongregasyon. (Heb. 13:17) Perpekto ang aton Lider nga si Jesus, pero indi perpekto ang mga brother nga ginagamit niya nga magpanguna diri sa duta. Gani posible may mga tion nga nabudlayan kita nga tumanon sila, ilabi na kon daw indi naton gusto himuon ang ginapahimo nila sa aton. Naeksperiensiahan ini ni apostol Pedro. Isa ka bes, nag-alang-alang sia nga tumanon ang ginsugo sa iya sang isa ka anghel. Ginsugo sia nga kaunon ang mga sapat nga indi matinlo suno sa Mosaikong Kasuguan. Pero indi lang makaisa kundi tatlo ka beses sia nga nagsiling nga indi niya ini mahimo. (Binu. 10:9-16) Ngaa? Para kay Pedro, daw indi mapatihan ang ginasugo sa iya. Kay man, wala pa gid niya ini mahimo sa bilog niya nga kabuhi. Kon nabudlayan si Pedro nga tumanon ang sugo sang isa ka perpekto nga anghel, indi na kita matingala nga nabudlayan kita kon kaisa nga tumanon ang mga instruksion sang indi perpekto nga mga tawo.

16. Bisan pa daw indi makatarunganon ang instruksion nga nabaton ni apostol Pablo, ano ang ginhimo niya? (Binuhatan 21:23, 24, 26)

¹⁶ “Handa sa pagtuman” si apostol Pablo bisan pa pamatyag niya indi makatarunganon ang ginapahimo sa iya. Binagbinaga ang natabo sang nakabati sang huringhuring ang Judiyo nga mga Cristiano parte kay Pablo. Ginabalewala kuno niya ang Kasuguan ni Moises kag nagabantala kuno sia nga “talikdan kag indi na pagsundon ang Kasuguan ni Moises.” (Binu. 21:21) Para mapakita ni Pablo nga ginatuman niya ang Kasuguan, may ginpahimo sa iya ang Cristiano nga mga gulang nga lalaki sa Jerusalem. Ginsilingan nila sia nga updon niya sa templo ang apat ka lalaki kag tinluan niya ang iya kaugalingon paagi sa seremonya. Pero kabalo si Pablo nga wala na ginapatuman sa mga Cristiano ang Kasuguan. Kag wala man sia sing ginhimo nga malain. Pero gintuman dayon ni Pablo ang ginpahimo sa iya. “Pagkadason nga adlaw gin-upod ni Pablo ang mga lalaki kag gintinluan nila ang ila kaugalingon paagi sa seremonya.” (Basaha ang Binuhatan 21:23, 24, 26.) Bangod nagtuman si Pablo, wala naguba ang paghiusa sang mga kauturan.​—Roma 14:19, 21.

17. Ano ang natun-an mo sa eksperiensia ni Stephanie?

¹⁷ Nabudlayan ang isa ka sister nga si Stephanie nga batunon ang desisyon nga ginhimo sang branch office sa ila pungsod. Nagaalagad sia kag ang iya bana sa isa ka foreign-language group, kag nalipay gid sila sa sini. Pero nagdesisyon  ang branch office nga untaton ini nga grupo, kag gin-asayn sila nga mag-asawa sa isa ka kongregasyon nga nagagamit sang ila lenguahe. “Nasubuan gid ako,” siling ni Stephanie. “Ginapamensar ko nga indi man kinahanglan sang mga kongregasyon nga nagagamit sang amon lenguahe ang dugang nga mga manugbantala.” Pero, ginsuportahan niya ang bag-o nga instruksion. “Sang ulihi, nahangpan ko nga maayo gid ang ginhimo nila nga desisyon,” siling niya. “Sa amon bag-o nga kongregasyon, madamo ang nagaisahanon lang nga Saksi sa ila pamilya. Gani daw nangin mga ginikanan nila kami kag ginapalig-on namon sila. Gina-Bible study ko subong ang isa ka sister nga bag-o lang ma-reactivate. Kag mas madamo ako sang tion subong para sa personal nga pagtuon.” Nagsiling pa sia, “Matinlo ang akon konsiensia kay ginpanikasugan ko nga magtuman.”

18. Ano ang mga benepisyo kon matinumanon kita?

¹⁸ Matun-an naton nga mangin matinumanon. Sa bahin ni Jesus, “nakatuon sia sang pagkamatinumanon sa mga butang nga iya gin-antos,” indi sa mga tion nga maayo ang sitwasyon. (Heb. 5:8) Pareho kay Jesus, makatuon kita nga mangin matinumanon kon ara kita sa mabudlay nga mga sitwasyon. Halimbawa, sang tion sang COVID-19 nga pandemic, ginsilingan kita nga indi kita anay maghiwat sang mga miting sa Kingdom Hall kag indi kita anay magbantala paagi sa pagpamalaybalay. Nabudlayan ka bala nga tumanon ini? Pero bangod nagtuman ka, naamligan mo ang imo kaugalingon, nakabulig ka sa paghiusa sang kongregasyon, kag nalipay sa imo si Jehova. Subong, nangin mas handa pa gid kita nga tumanon ang bisan ano nga instruksion nga mabaton naton sa tion sang dakung kapipit-an. Nagadepende sa aton pagtuman ang aton kaluwasan.​—Job 36:11.

19. Ngaa gusto mo mangin matinumanon?

¹⁹ Natun-an naton nga kon matinumanon kita, madamo kita sang mabaton nga pagpakamaayo. Pero ang panguna nga rason kon ngaa ginatuman naton si Jehova amo nga palangga naton sia kag gusto naton nga malipay sia sa aton. (1 Juan 5:3) Indi gid naton mabayaran si Jehova sa tanan nga ginhimo niya para sa aton. (Sal. 116:12) Pero puede naton tumanon si Jehova kag ang mga ginhatagan niya sang awtoridad. Kon nagatuman kita, ginapakita naton nga maalam kita. Kag kon maalam kita, ginapasadya naton ang tagipusuon ni Jehova.​—Hulu. 27:11.