KADA tuig, madamo ang gina-reinstate ukon nakapanumbalik sa kongregasyon. Hamili gid sila nga mga karnero. Imadyina ang daku nga “kalipay sa langit” sa kada tion nga may nagabalik kay Jehova. (Luc. 15:7, 10) Kon nakapanumbalik ka, makasigurado ka nga nalipay gid si Jesus, ang mga anghel, kag ilabi na gid si Jehova nga nangin bahin ka liwat sang kongregasyon. Pero, samtang ginapabakod mo liwat ang imo kaangtanan kay Jehova, posible nga may mga panghunahuna nga makapaluya sa imo. Ano ang pila sa sini, kag ano ang makabulig sa imo?

Madamo ang naluyahan gihapon sang buot bisan pa nakapanumbalik na sila sa kongregasyon. Mahimo nga nabatyagan mo man ang ginbatyag ni Hari David. Bisan pa ginpatawad na sia sa iya mga sala, nagsiling sia: “Daw natabunan ako sang akon mga sala.” (Sal. 40:12; 65:3) Gani ginakonsiensia gihapon ukon nahuya ang isa nga nakapanumbalik kay Jehova, kag posible nga mabatyagan niya ini sa sulod sang madamo nga tinuig. Si Isabelle, a nga sobra 20 ka tuig nga na-disfellowship, nagsiling, “Para sa akon, indi gid ako mapatawad ni Jehova.” Kon magluya ang imo buot, magaluya man liwat ang imo kaangtanan kay Jehova. (Hulu. 24:10) Gani panikasugi gid nga indi magluya ang imo buot.

May iban naman nga nagabatyag nga indi nila masarangan ang tanan nga dapat nila himuon para mangin suod sila liwat kay Jehova. Sang nakapanumbalik si Antoine, nagsiling sia, “Daw indi na ’ko kabalo kon paano himuon ang mga hilikuton sa pag-alagad kay Jehova.” Bangod sini nga panghunahuna, wala ginahimo sang iban ang ila bug-os nga masarangan sa pag-alagad.

Binagbinaga ini nga ilustrasyon. Kon naguba ang balay sang isa ka tawo bangod sang bagyo, mahimo ginapamensar niya kon daw ano kadaku ang dapat niya kay-uhon kag kon daw ano niya ini kadugay matapos.  Gani mahimo magluya ang iya buot. Kon naguba ang imo kaangtanan kay Jehova bangod sang serioso nga sala, mahimo nagabatyag ka man nga daku gid nga panikasog ang dapat mo himuon para makay-o ini. Pero may makabulig sa imo.

Ginaagda kita ni Jehova: “Kari kamo, maghambalanay kita kag buligan ko kamo nga tadlungon ang inyo kaangtanan sa akon.” (Isa. 1:18) Nagpanikasog ka na nga ‘matadlong’ ang imo kaangtanan kay Jehova, kag nalipay gid sia sa ginhimo mo. Hunahunaa ini: Bangod nagbalik ka kay Jehova, puede niya gamiton ang imo halimbawa para masabat ang panumbungon ni Satanas.—Hulu. 27:11.

Paagi sa pagbalik kay Jehova, nagapalapit ka sa iya, kag nagapromisa sia nga magapalapit sia sa imo. (Sant. 4:8) Pero bisan pa bahin ka na liwat sang kongregasyon kag ginabaton ka na sang mga kauturan, may dapat ka pa himuon. Dapat mo padayon nga pabakuron ang imo gugma sa imo Amay kag Abyan, nga si Jehova. Paano mo ini himuon?

Panikasugi nga himua ang mga masarangan mo lang anay himuon. Posible nga wala mo pa nalipatan ang mga natun-an mo parte kay Jehova kag sa iya ginpromisa nga Paraiso. Pero kinahanglan mo maghimo liwat sang maayo nga iskedyul sa pag-alagad. Nalakip sa sini ang regular nga pagbantala, pag-attend sa mga miting, kag pagpakig-upod sa mga kauturan. Binagbinaga ang pila sa mga puede mo himuon.

Pirme mangamuyo kay Jehova. Nahangpan sang imo Amay nga posible nabudlayan ka nga mangamuyo sa iya bangod ginakonsiensia ka. (Roma 8:26) Pero ‘magpadayon sa pagpangamuyo’ kag isugid kay Jehova nga gusto mo gid sia mangin Abyan. (Roma 12:12) Si Andrej nagsiling: “Ginakonsiensia gid ako kag grabe gid ang akon kahuya. Pero sa kada tapos ko pangamuyo, nagamag-an ang akon pamatyag kag nagatawhay ang akon hunahuna.” Kon indi ka kabalo kon ano ang imo ipangamuyo, binagbinaga ang mga pangamuyo ni Hari David nga nagapakita sang iya paghinulsol. Mabasa ini sa Salmo 51 kag 65.

Tun-i ang Biblia sing regular. Makabulig ini para magbakod ang imo pagtuo kag gugma kay Jehova. (Sal. 19:7-11) “Bangod indi regular ang akon pagbasa kag pagtuon sang Biblia, nagluya ang akon pagtuo kag napasubo ko si Jehova,” siling ni Felipe. “Indi ko gusto nga masulit ang akon sala, gani ginsigurado ko nga mangin regular ang akon personal nga pagtuon.” Mahimo mo man ini. Kon kinahanglan mo magpili sang mga topiko para sa imo personal nga pagtuon, puede ka magpabulig sa imo hamtong nga abyan.

Pabakura liwat ang imo kaangtanan sa imo mga kauturan. Nabalaka ang pila nga nakapanumbalik sa kongregasyon kay basi akig sa ila ang iban nga kauturan. Si Larissa nagsiling: “Nahuya gid ako. Ginapamensar ko nga nasakitan gid ang mga kauturan sa ginhimo ko. Malawig nga tion nga amo sini ang akon ginapamensar.” Makasalig ka nga gusto ka buligan sang mga gulang kag sang iban pa nga hamtong nga mga kauturan para magbakod liwat ang imo kaangtanan kay Jehova. (Tan-awa ang kahon nga “ Ano ang Puede Himuon sang mga Gulang?”) Nalipay gid sila nga nagbalik ka, kag gusto nila nga mangin malipayon ka.—Hulu. 17:17.

Ano ang puede mo himuon para magsuod ka sa mga kauturan? Mag-attend sa tanan nga miting kag regular nga magbantala upod ang imo mga kauturan. Paano ini makabulig sa imo? Si Felix nagsiling: “Gusto gid sang mga kauturan nga magbalik ako. Nabatyagan ko nga palangga nila ako. Nakabulig gid sila tanan sa akon. Bangod sini, nabatyagan ko nga bahin ako liwat sang kongregasyon, nga ginpatawad na ako ni Jehova, kag masarangan ko nga padayon nga mag-alagad sa iya.”—Tan-awa ang kahon nga “ Ano ang Puede Mo Himuon?”

Samtang ginapabakod mo liwat ang imo kaangtanan kay Jehova, tinguhaan man ni Satanas nga paluyahon ka paagi sa mga problema nga daw mga bagyo. (Luc. 4:13) Gani padayon nga pabakura ang imo kaangtanan kay Jehova.

Parte sa iya mga karnero, amo ini ang ginpromisa ni Jehova: “Pangitaon ko ang nadula, pabalikon ko ang nagtalang, bugkusan ko ang may bali, kag pabaskugon ko ang maluya.” (Ezeq. 34:16) Madamo na ang nabuligan ni Jehova, gani makasalig ka nga gusto ka gid niya buligan samtang ginapabakod mo liwat ang imo kaangtanan sa iya.