1. Ngaa makatuon kita sa mga tigulang?

 KINAHANGLAN naton tanan ang laygay para makahimo kita sang maayo nga mga desisyon. Makahatag gid sa aton sang laygay ang mga gulang kag ang hamtong nga mga kauturan. Kon mga tigulang na ang nagahatag sa aton sang laygay, indi naton paghunahunaon nga indi na maaplikar sa aton tion ang ila mga laygay. Gusto ni Jehova nga magtuon kita sa mga tigulang. Mas madamo sila sang nabal-an kag eksperiensia parte sa kabuhi sangsa aton.​—Job 12:12.

2. Ano ang binagbinagon naton sa sini nga artikulo?

² Sang panahon sang Biblia, gingamit ni Jehova ang matutom nga mga tigulang para palig-unon kag giyahan ang iya katawhan. Halimbawa, binagbinaga si Moises, si David, kag si apostol Juan. Nagkabuhi sila sa lainlain nga tion, kag indi pareho ang ila mga sitwasyon. Sang lapit na lang sila mapatay, naghatag sila sang maayo nga mga laygay sa mga lamharon. May ginlaygay ang kada isa sa ila parte sa importansia sang pagtuman sa Dios. Kag ginpasulat ni Jehova sa Biblia ang ila mga laygay kay may matun-an kita sa sini. Pamatan-on man kita ukon tigulang, makabenepisyo gid kita sa pagbinagbinag sa ila mga laygay. (Roma 15:4; 2 Tim. 3:16) Sa sini nga artikulo, binagbinagon naton ang pamilinbilin sining tatlo ka tigulang kag kon ano ang matun-an naton sa sini.

“MAGAPABILIN KAMO SING MALAWIG”

3. Ano ang mga pribilehiyo ni Moises sa iya pag-alagad kay Jehova?

³ Matutom gid si Moises kay Jehova. Nag-alagad sia bilang isa ka manalagna, hukom, pangulo, kag manunulat. Madamo gid sing natun-an si Moises sa mga naeksperiensiahan niya sa iya kabuhi. Ginpangunahan niya ang pungsod sang Israel pagua sa Egipto, kag nakita niya ang madamo nga milagro ni Jehova. Gingamit sia ni Jehova para isulat ang una nga lima ka libro sang Biblia, ang Salmo  90, kag posible ang Salmo 91. Kag posible gid nga sia man ang nagsulat sang libro sang Job.

4. Sin-o ang ginpalig-on ni Moises, kag ngaa?

⁴ Antes napatay si Moises sa edad nga 120, gintipon niya ang tanan nga Israelinhon para ipahanumdom sa ila ang mga butang nga nakita nila nga ginhimo ni Jehova para sa ila. Madamo nga tinuig na ang nagligad, nakita sang pila ka Israelinhon ang mga milagro nga ginhimo ni Jehova kag kon paano Niya ginsilutan ang mga Egiptohanon. (Ex. 7:​3, 4) Nakita nila nga gintunga ni Jehova ang Pula nga Dagat, kag naglakat sila sa sini. Nakita man nila nga ginlaglag ni Jehova ang Paraon kag ang tanan niya nga soldado. (Ex. 14:​29-31) Sang ara sila sa kamingawan, gin-amligan sila kag gin-atipan ni Jehova. (Deut. 8:​3, 4) Gani sang lapit na lang magsulod sa Ginsaad nga Duta ang mga Israelinhon, gusto gid ni Moises nga palig-unon sila antes sia mapatay. a

5. Base sa pamilinbilin ni Moises nga mabasa sa Deuteronomio 30:​19, 20, ano ang masaligan sang mga Israelinhon nga matabo?

⁵ Ano ang ginsiling ni Moises? (Basaha ang Deuteronomio 30:​19, 20.) Ginpahanumdom niya sa mga Israelinhon nga may dalayawon sila nga paglaum. Pakamaayuhon sila ni Jehova, kag may paglaum sila nga mag-istar sing malawig sa duta nga ginpromisa niya sa ila. Katahom gid sang sini nga duta kag madamo ini sang patubas. Ginlaragway sa ila ni Moises ini nga duta. Nagsiling sia: “Duta [ini] nga may dalagku kag matahom nga mga siudad nga indi kamo ang nagtukod, mga balay nga puno sing tanan nga sahi sang maayo nga butang nga wala ninyo ginpangabudlayan, mga bubon nga indi kamo ang nagkutkot, kag mga ulubasan kag mga kahoy nga olibo nga indi kamo ang nagtanom.”​—Deut. 6:​10, 11.

6. Ngaa gintugutan sang Dios nga sakupon sang iban nga mga pungsod ang Israel?

⁶ Ginpaandaman man ni Moises ang mga Israelinhon. Para padayon sila nga makaistar sa ila matahom nga duta, dapat nila tumanon ang mga sugo ni Jehova. Nagsiling si Moises nga dapat nila ‘pilion ang kabuhi’ paagi sa pagpamati kay Jehova kag “pag-unong sa iya.” Pero, wala gintuman sang mga Israelinhon si Jehova. Gani, gintugutan sang Dios nga sakupon sila kag bihagon sang mga Asirianhon. Sang ulihi, ginsakop man sila kag ginbihag sang mga Babilonianhon.​—2 Hari 17:​6-8, 13, 14; 2 Cron. 36:​15-17, 20.

7. Ano ang matun-an naton sa ginsiling ni Moises? (Tan-awa man ang piktyur.)

⁷ Ano ang matun-an naton sa ginsiling ni Moises? Kon tumanon naton si Jehova, may paglaum kita nga mabuhi sing wala sing katapusan. Pareho sa mga Israelinhon sadto nga lapit na lang gid magsulod sa Ginsaad nga Duta, lapit na lang gid kita magsulod sa ginpromisa sang Dios nga bag-ong kalibutan. Sa indi na lang gid madugay, mangin paraiso na liwat ang duta. (Isa. 35:1; Luc. 23:43) Wala na didto ang Yawa kag ang iya mga demonyo. (Bug. 20:​2, 3) Wala na ang butig nga mga relihion nga nagatudlo sang mga kabutigan parte kay Jehova. (Bug. 17:16) Wala na ang gobierno sang mga tawo nga nagapigos sa ila mga sakop. (Bug. 19:​19, 20) Sa Paraiso, indi pagtugutan ni Jehova ang mga rebelde. (Sal. 37:​10, 11) Ang tanan nga tawo mangin matinumanon sa matarong nga mga kasuguan ni Jehova, gani magakabuhi sila nga may paghiusa kag paghidait. May gugma kag pagsalig sila sa kada isa. (Isa. 11:9) Dalayawon gid ini nga paglaum. Kag kon tumanon naton si Jehova, padayon kita nga magakabuhi sa paraiso nga duta indi lang sing ginatos ka tuig kundi sing wala sing katapusan.​—Sal. 37:29; Juan 3:16.

8. Paano nakabulig sa isa ka madugay na nga misyonero ang promisa sang Dios nga kabuhi nga wala sing katapusan? (Judas 20, 21)

⁸ Kon pirme naton pamalandungan ang promisa sang Dios nga kabuhi nga wala sing katapusan, makabulig ini sa aton nga tumanon sia bisan ano  pa nga problema ang aton maeksperiensiahan. (Basaha ang Judas 20, 21.) Makabulig man sa aton ini nga promisa kon may ginapakigbatuan kita nga mga kaluyahon. Binagbinaga ang isa ka brother nga madugay na nga misyonero sa Africa. Nagsiling sia nga may kaluyahon sia sa unod nga pirme niya ginapakigbatuan. Nagsiling sia: “Narealisar ko nga indi ko mabaton ang kabuhi nga wala sing katapusan kon indi ko pagtumanon si Jehova. Gani, ginpanikasugan ko pa gid nga pakigbatuan ang akon kaluyahon kag mangamuyo pirme sing hanuot kay Jehova. Sa bulig ni Jehova, nadaug ko ang akon kaluyahon.”

‘MAGAMADINALAG-ON KA’

9. Ano nga mga problema ang naeksperiensiahan ni David?

⁹ Isa si David sa mga nangin hari sang katawhan ni Jehova. Isa man sia ka musikero, mamalaybay, soldado, kag manalagna. Pero, nakaeksperiensia man sia sang madamo nga problema. Sa sulod sang madamo nga tinuig, dapat sia malagyo kag manago bangod gusto sia patyon ni Hari Saul. Sang nangin hari si David, nalagyo sia liwat bangod gusto sia patyon sang iya anak nga si Absalom nga gusto mangin hari. Bisan pa may mga problema si David kag bisan pa nakahimo sia sang serioso nga mga sala, padayon sia nga nag-alagad sing matutom kay Jehova sa bilog niya nga kabuhi. Nagsiling si Jehova nga si David “isa ka tawo nga kalahamut-an sa [Iya] tagipusuon.” Gani, makabulig gid sa aton ang mga laygay ni David.​—Binu. 13:22; 1 Hari 15:5.

10. Ngaa ginhatagan ni David sang laygay ang iya anak nga si Solomon nga magabulos sa iya bilang hari?

¹⁰ Binagbinaga ang laygay nga ginhatag ni David sa iya anak nga si Solomon nga magabulos sa iya bilang hari. Ang pamatan-on nga si Solomon ang ginpili ni Jehova nga magpatindog sang templo para mangin sentro sang matuod nga pagsimba. (1 Cron. 22:5) Daku gid ini nga proyekto kag kinahanglan niya ang bulig ni Jehova para mapangunahan niya ang ila pungsod. Ano ang ginlaygay sa iya ni David? Binagbinagon naton ini.

11. Suno sa 1 Hari 2:​2, 3, ano ang ginpasalig ni David kay Solomon, kag paano ini natuman? (Tan-awa man ang piktyur.)

¹¹ Ano ang ginsiling ni David? (Basaha ang 1 Hari 2:​2, 3.) Ginsilingan ni David ang iya anak nga kon tumanon niya si Jehova, magamadinalag-on sia. Kag nangin madinalag-on gid si Solomon sa sulod sang madamo nga tinuig. (1 Cron. 29:​23-25) Napatindog niya ang dalayawon nga templo, nakasulat sia sang pila ka libro sang Biblia, kag makita sa iban pa nga bahin sang Biblia ang pila sa iya mga ginsiling. Nangin bantog sia bangod sa iya kaalam kag manggad. (1 Hari 4:34) Pero suno sa ginsiling ni David, mangin madinalag-on si Solomon basta tumanon lang niya pirme si Jehova nga Dios. Masubo gid kay sang ulihi, nagsimba si Solomon sa iban nga mga dios. Bangod sini, wala na ginpakamaayo ni Jehova si Solomon. Wala na niya ginhatagan si Solomon sing kaalam nga gamhan ang katawhan sa maayo kag makatarunganon nga paagi.​—1 Hari 11:​9, 10; 12:4.

12. Ano ang matun-an naton sa ginsiling ni David?

 ¹² Ano ang matun-an naton sa ginsiling ni David? Kon tumanon naton si Jehova, mangin madinalag-on kita. (Sal. 1:​1-3) Wala nagpromisa si Jehova nga himuon niya kita nga manggaranon kag bantog pareho kay Solomon. Pero kon tumanon naton ang aton Dios, hatagan niya kita sing kaalam nga makabulig sa aton nga makahimo sang maayo nga mga desisyon. (Hulu. 2:​6, 7; Sant. 1:5) Mabuligan kita sang iya mga prinsipio kon may himuon kita nga desisyon parte sa trabaho, edukasyon, kalingawan, kag kuarta. Kon iaplikar naton ang iya mga laygay, maamligan naton ang aton kaangtanan sa iya kag mabaton naton ang kabuhi nga wala sing katapusan. (Hulu. 2:​10, 11) Makakita man kita sang maayo nga mga abyan. Kag mangin malipayon ang aton pamilya.

13. Ano ang nakabulig kay Carmen para mangin madinalag-on sia?

¹³ Binagbinaga si Carmen nga taga-Mozambique. Para sa iya, ang pag-eskwela sa unibersidad amo ang makabulig sa iya nga mangin madinalag-on. Gani, nagpa-enroll sia sa isa ka unibersidad para mag-eskwela sing architecture. “Nanamian gid ako sa akon kurso,” siling niya. “Pero ginaubos sini ang akon tion kag kusog. Ara ako sa eskwelahan halin sa alas siete y medya sang aga asta sa alas seis sang gab-i. Nabudlayan ako nga maka-attend sa mga miting, kag nagluya ang akon kaangtanan kay Jehova. Kag narealisar ko nga nagaalagad ako sa duha ka agalon.” (Mat. 6:24) Ginpangamuyo ni Carmen ang iya sitwasyon kag nag-research sia sa aton mga publikasyon. Nagsiling sia: “Ginlaygayan ako sang mga gulang kag sang akon iloy, kag kanami gid sang ila mga laygay. Gani, nagdesisyon ako nga mag-untat sa pag-eskwela para alagaron si Jehova sing bug-os tion. Para sa akon, amo ini ang pinakamaayo nga desisyon nga ginhimo ko, kag wala ko gid ini ginhinulsulan.”

14. Ano ang matun-an naton sa pamilinbilin ni Moises kag ni David?

¹⁴ Palangga ni Moises kag ni David si Jehova kag kabalo sila nga importante gid nga tumanon sia. Sa ila mga pamilinbilin, ginpalig-on nila ang iban nga ilugon ang ila halimbawa paagi sa pagpabilin nga matutom kay Jehova nga ila Dios. Ginpaandaman man nila ang iban nga kon biyaan nila si Jehova, indi na sila pagpakamaayuhon ni Jehova kag indi nila mabaton ang ginpromisa niya sa ila. Makabulig gid sa aton subong ang ila mga laygay. Pagligad sang ginatos ka tuig, ginpaathag  man sang isa pa ka alagad ni Jehova kon ngaa importante gid nga magpabilin kita nga matutom kay Jehova.

“WALA NA SANG MAKAPAHALIPAY SA AKON SANGSA SINI”

15. Ano ang mga naeksperiensiahan ni apostol Juan sa iya kabuhi?

¹⁵ Suod gid kay Jesucristo ang iya apostol nga si Juan. (Mat. 10:2; Juan 19:26) Gin-updan ni Juan si Jesus sa iya pagministeryo, nakita niya ang mga milagro ni Jesus, kag nag-unong sia kay Jesus bisan sa mabudlay nga mga sitwasyon. Ara sia sang ginpatay si Jesus, kag nagpakita sa iya si Jesus sang ginbanhaw si Jesus. Nagkabuhi sia sing malawig, gani nasaksihan man niya ang pag-uswag sang Cristianong kongregasyon sang unang siglo. Nakita niya nga “ginbantala sa tanan nga tinuga sa idalom sang langit” ang parte sa maayong balita.​—Col. 1:23.

16. Sin-o ang nakabenepisyo sa mga sulat ni Juan?

¹⁶ Sang tigulang na gid si Juan, ginhatagan sia sang pribilehiyo nga isulat “ang bugna nga ginhatag sang Dios kay Jesucristo.” (Bug. 1:1) Ginsulat man niya ang Ebanghelyo nga ginatawag man nga Juan. Kag ginsulat niya ang tatlo ka sulat nga ginatawag subong nga una, ikaduha, kag ikatlong Juan. Ginsulat niya ang iya ikatlo nga sulat para sa matutom nga Cristiano nga si Gayo nga ginakabig niya nga pinalangga nga anak. (3 Juan 1) Sadto nga tion, posible gid nga madamo nga kauturan ang ginakabig ni Juan nga pinalangga nga mga anak. Halin sang una asta subong, napalig-on gid ang tanan nga disipulo ni Jesus sa mga sulat sang matutom nga tigulang nga si Juan.

17. Suno sa 3 Juan 4, ano ang makahatag sang daku nga kalipay?

¹⁷ Ano ang ginsulat ni Juan? (Basaha ang 3 Juan 4.) Ginsulat ni Juan nga nalipay gid sia nga makita nga ginatuman sang iya mga kauturan ang Dios. Sang tion nga ginsulat ni Juan ang iya ikatlo nga sulat, may pila nga nagtudlo sang mga kabutigan kag ginguba nila ang paghiusa sang kongregasyon. Pero, may iban nga padayon nga ‘naglakat sa kamatuoran.’ Gintuman nila si Jehova kag ‘padayon sila nga naglakat suno sa iya mga sugo.’ (2 Juan 4, 6) Nalipay gid si Juan kag si Jehova sa sining matutom nga mga Cristiano.​—Hulu. 27:11.

18. Ano ang matun-an naton sa ginsulat ni Juan?

¹⁸ Ano ang matun-an naton sa ginsulat ni Juan? Kon matutom kita kay Jehova, nagaresulta ini sa kalipay. (1 Juan 5:3) Halimbawa, nalipay kita bangod kabalo kita nga nalipay sa aton si Jehova. Nalipay sia kon ginasikway naton ang mga pagsulay kag ginatuman naton ang iya mga sugo. (Hulu. 23:15) Kag nalipay man ang mga anghel sa langit. (Luc. 15:10) Nalipay man kita kon makita naton  nga nagapabilin nga matutom ang aton mga kauturan bisan pa ginahingabot sila ukon ginasulay nga maghimo sing malain. (2 Tes. 1:4) Kag kon laglagon na ang kalibutan ni Satanas, mangin malipayon gid kita kay nagpabilin kita nga matutom kay Jehova.

19. Ano ang ginsiling sang isa ka sister nga si Rachel parte sa pagtudlo sang kamatuoran sa iban? (Tan-awa man ang piktyur.)

¹⁹ Nalipay gid kita kon ginatudluan naton ang iban parte kay Jehova. Binagbinaga ang isa ka sister nga si Rachel nga taga-Dominican Republic. Nagsiling sia nga isa gid ka daku nga pribilehiyo ang pagtudlo sa iban parte sa aton dalayawon nga Dios, kag madamo na sia sang nabuligan nga mag-alagad kay Jehova. Nagsiling sia: “Kon makita ko nga palangga na sang akon mga Bible study si Jehova, kon nagasalig na sila sing bug-os sa iya, kag kon nagahimo sila sang mga pagbag-o para malipay sia, indi ko ma-describe ang akon kalipay. Matabunan sini nga kalipay ang bisan ano nga sakripisyo nga ginhimo ko para tudluan sila.”

PAMATII ANG PAMILINBILIN SANG MATUTOM NGA MGA LALAKI

20. Ano ang pagkaanggid naton kay Moises, kay David, kag kay Juan?

²⁰ Madugay na nga nagkabuhi si Moises, si David, kag si Juan. Kag lain ang ila sitwasyon sadto kon ikumparar sa aton sitwasyon subong. Pero madamo kita sing pagkaanggid sa ila. Nag-alagad sila sa matuod nga Dios, kag amo man ini ang ginahimo naton subong. Pareho sa ila, nagapangamuyo kita kay Jehova, nagasalig kita sa iya, kag nagapangayo kita sa iya sang laygay. Kag pareho sa sining matutom nga mga lalaki sang una, nagasalig kita nga ginapakamaayo gid ni Jehova ang mga nagatuman sa iya.

21. Paano kita pakamaayuhon ni Jehova kon sundon naton ang mga ginlaygay ni Moises, ni David, kag ni Juan?

²¹ Gani, pamatian naton ang pamilinbilin sining tigulang nga mga lalaki paagi sa pagtuman sa mga sugo ni Jehova. Kon himuon naton ini, mangin madinalag-on kita sa tanan naton nga ginahimo. ‘Magapabilin kita sing malawig,’ ukon magakabuhi kita sing wala sing katapusan. (Deut. 30:20) Kag mangin malipayon kita bangod kabalo kita nga nalipay sa aton ang aton mahigugmaon nga Amay sa langit. Ginatuman gid niya ang tanan niya nga promisa, kag padyaan niya kita sing sobra pa sa aton ginapaabot.​—Efe. 3:20.