1. Ngaa masiling naton nga pinasahi gid ang aton tion subong?

 PINASAHI gid ang aton tion subong. Kada adlaw, makita naton nga nagakatuman ang mga tagna sa Biblia. Halimbawa, makita naton nga nagakompetensiahanay ang “hari sang aminhan” kag ang “hari sang bagatnan” kay gusto sang kada isa sa ila nga gamhan ang kalibutan. (Dan. 11:​40, footnote) Makita naton nga ginabantala ang maayong balita parte sa Ginharian sang Dios sa bilog nga kalibutan, kag minilyon ka tawo ang nagdesisyon nga mag-alagad kay Jehova. (Isa. 60:22; Mat. 24:14) Kag nagabaton kita sing bugana nga espirituwal nga pagkaon “sa nagakaigo nga tion.”​—Mat. 24:​45-47.

2. Ano ang masigurado naton, pero ano ang dapat naton batunon?

² Padayon kita nga ginabuligan ni Jehova para mahangpan naton sing maayo ang importante nga mga hitabo nga malapit na lang matabo. (Hulu. 4:18; Dan. 2:28) Makasigurado kita nga kon mag-umpisa na ang dakung kapipit-an, mabal-an naton ang tanan nga kinahanglan naton mabal-an para makapabilin kita nga matutom kag nahiusa sa sinang mabudlay gid nga tion. Pero, dapat naton batunon nga may pila ka butang parte sa palaabuton nga wala naton nabal-an. Sa sini nga artikulo, una naton nga binagbinagon kon ngaa ginbag-o naton ang aton paghangop parte sa pila ka hitabo sa palaabuton. Dayon repasuhon naton ang pila ka butang nga aton nabal-an parte sa palaabuton kag kon paano magahukom ang aton Amay sa langit.

KON ANO ANG WALA NATON NABAL-AN

3. Ano ang ginsiling naton nga matabo sa mga indi alagad ni Jehova kon mag-umpisa na ang dakung kapipit-an, kag ngaa nasiling naton ini?

³ Sang una, nagsiling kita nga kon mag-umpisa na ang dakung kapipit-an, wala na sing tsansa ang mga indi alagad ni Jehova nga magdampig sa iya kag malaglag sila sa Armageddon. Nasiling naton  ini bangod nahunahuna naton sadto nga may katumbas sa palaabuton ang tanan nga natabo sang panahon sang Baha. Halimbawa, nahunahuna naton nga bangod ginsira ni Jehova ang puertahan sang arka antes mag-abot ang Baha, wala naman sing tsansa ang mga indi alagad ni Jehova nga mag-alagad sa iya kon mag-umpisa na ang dakung kapipit-an.​—Mat. 24:​37-39.

4. Ngaa wala na naton ginasiling subong nga may katumbas sa palaabuton ang tanan nga natabo sang panahon sang Baha?

⁴ Husto bala nga magsiling kita nga may katumbas sa palaabuton ang tanan nga natabo sang panahon sang Baha? Indi. Ngaa? Bangod wala sing ginasiling ang Biblia parte sa sini. a Matuod gid man nga ginkumparar ni Jesus sa “adlaw ni Noe” ang tion sang iya presensia, pero wala sia nagsiling nga may katumbas sa palaabuton ang tanan nga natabo sang panahon sang Baha. Halimbawa, wala sia nagsiling nga may katumbas sa palaabuton ang pagsira sang puertahan sang arka. Pero, indi buot silingon sini nga wala na kita sing matun-an sa kasaysayan ni Noe kag sang Baha.

5. (a) Ano ang ginhimo ni Noe antes sang Baha? (Hebreo 11:7; 1 Pedro 3:20) (b) Parte sa aton pagbantala, ano ang pagkaanggid sang aton sitwasyon subong sa panahon ni Noe?

⁵ Sang nabaton ni Noe ang paandam ni Jehova, ginpakita niya ang iya pagtuo paagi sa paghimo sang arka. (Basaha ang Hebreo 11:7; 1 Pedro 3:20.) Sing kaanggid, dapat ipakita sang mga tawo nga nakabati sang maayong balita parte sa Ginharian sang Dios ang ila pagtuo  paagi sa pag-aplikar sang ila natun-an. (Binu. 3:​17-20) Gintawag ni Pedro si Noe nga “isa ka manugbantala sang pagkamatarong.” (2 Ped. 2:5) Base sa ginbinagbinag sa nagligad nga artikulo, nagpanikasog gid si Noe nga bantalaan ang mga tawo. Pero, wala sing ginasiling ang Biblia kon bala nabantalaan gid niya ang tanan nga tawo antes sang Baha. Subong, nagapanikasog gid kita para mabantalaan naton ang mga tawo sa bilog nga kalibutan. Pero, indi posible nga mabantalaan naton ang tanan nga tawo antes mag-abot ang katapusan. Ngaa indi ini posible?

6-7. Ngaa makasiling kita nga indi naton mabantalaan sang maayong balita ang tanan nga tawo sa bilog nga kalibutan antes mag-abot ang katapusan?

⁶ Binagbinaga ang ginsiling ni Jesus parte sa kasangkaron sang aton pagbantala. Nagtagna sia nga ang maayong balita ibantala “sa bug-os nga duta subong panaksi sa tanan nga pungsod.” (Mat. 24:14) Nagakatuman na ini nga tagna, kag mas madamo na gid nga mga tawo ang malab-ot sang aton pagbantala subong. Matigayon na sa sobra 1,000 ka lenguahe ang mensahe parte sa Ginharian. Kag paagi sa aton jw.org nga website, makatuon parte sa maayong balita ang kalabanan nga tawo sa bilog nga kalibutan.

⁷ Pero ginsilingan man ni Jesus ang iya mga disipulo nga indi nila “malibot ang mga siudad,” ukon indi nila mabantalaan ang tanan nga tawo, antes sia mag-abot. (Mat. 10:23; 25:​31-33) Gani indi naton mabantalaan ang tanan nga tawo antes mag-abot si Jesus para hukman ang katawhan. Halimbawa, minilyon ka tawo ang nagaistar sa mga lugar nga ginadumilian ang aton pagbantala. Madamo man nga mga bata ang ginabun-ag kada minuto. Ginahimo gid naton ang aton bug-os nga masarangan para mabantalaan naton ang mga tawo “sa tagsa ka pungsod kag tribo kag hambal.” (Bug. 14:6) Pero indi naton mabantalaan ang tanan nga tawo sa bilog nga kalibutan antes mag-abot ang katapusan.

8. Ano ang posible ipamangkot naton parte sa kon paano hukman ni Jehova ang mga tawo sa palaabuton? (Tan-awa man ang mga piktyur.)

⁸ Gani, posible mamangkot kita: Ano ang matabo sa mga tawo nga indi naton mabantalaan antes mag-umpisa ang dakung kapipit-an? Paano sila hukman ni Jehova kag sang iya Anak nga gintangdo niya nga maghukom sa mga tawo? (Juan 5:​19, 22, 27; Binu. 17:31) Ang teksto nga ginbasihan sini nga artikulo nagasiling nga “indi [luyag ni Jehova] nga ang bisan sin-o malaglag.” Sa baylo, luyag niya nga “ang tanan mahatagan sang kahigayunan nga maghinulsol.” (2 Ped. 3:9; 1 Tim. 2:4) Kabalo kita nga amo ini ang luyag ni Jehova, pero wala pa niya kita ginasugiran kon paano niya hukman ang mga tawo nga indi naton mabantalaan. Siempre, indi sia obligado nga isugid sa aton ang parte sa iya mga ginhimo ukon pagahimuon pa.

9. Ano ang ginasugid sa aton ni Jehova paagi sa Biblia?

⁹ Ginasugid sa aton ni Jehova paagi sa iya Pulong ang pila sa mga butang nga pagahimuon niya. Halimbawa, ginasugiran kita sang Biblia nga banhawon ni Jehova ang “mga indi matarong,” ukon ang mga tawo nga wala mahatagan sing tsansa nga makatuon parte sa maayong balita kag maghimo sang mga pagbag-o. (Binu. 24:15; Luc. 23:​42, 43) Bangod sini, posible may mahunahuna naman kita nga mga pamangkot.

10. Ano ang iban pa naton nga mga pamangkot?

¹⁰ Wala na bala sing paglaum nga mabanhaw ang tanan nga mapatay sa tion sang dakung kapipit-an ukon mangin permanente bala ang ila kalaglagan? Kabalo kita nga laglagon ni Jehova kag sang iya kasuldadusan sa Armageddon ang mga nagapamatok sa iya, kag maathag nga ginasiling sang Biblia nga indi na sila pagbanhawon. (2 Tes. 1:​6-10) Pero kamusta naman ang mga tawo nga mapatay sa tion sang dakung kapipit-an  bangod sa iban nga rason? Halimbawa, posible mapatay sila bangod sa balatian, katigulangon, ukon aksidente. Kag posible man nga patyon sila sang iban. (Man. 9:11; Zac. 14:13) May pila bala sa ila nga malakip sa “mga indi matarong” nga banhawon sa bag-ong kalibutan? Wala kita kabalo sang sabat sa sini.

KON ANO ANG ATON NABAL-AN

11. Ano ang basihan sa paghukom sa mga tawo?

¹¹ May nabal-an kita nga pila ka butang parte sa mga matabo sa palaabuton. Halimbawa, kabalo kita nga hukman ang mga tawo base sa kon paano nila gintratar ang mga utod sang Cristo. (Mat. 25:40) Kon ginsuportahan nila ang mga hinaplas kag ang Cristo, hukman sila bilang mga karnero. Kabalo man kita nga kon mag-umpisa na ang dakung kapipit-an, may mabilin pa nga mga hinaplas diri sa duta. Pero dal-on sila sa langit antes mag-umpisa ang Armageddon. Gani samtang ari pa sa duta ining mga utod sang Cristo, posible nga may tsansa pa ang sinsero nga mga tawo nga suportahan sila kag ang ila hilikuton. (Mat. 25:​31, 32; Bug. 12:17) Ngaa importante ini nga mga impormasyon?

12-13. Ano ang posible mangin reaksion sang iban kon laglagon na ang “Babilonia nga Daku”? (Tan-awa man ang mga piktyur.)

¹² Madugay na nga ginasiling sang mga Saksi ni Jehova nga laglagon ang “Babilonia nga Daku.” Gani kon mag-umpisa na ang dakung kapipit-an kag makita sang mga tawo ang paglaglag sa “Babilonia nga Daku,” posible nga madumduman sang pila sa ila ang ginsiling sang mga Saksi parte sa sini. Posible ayhan nga may pila nga magatuo kay Jehova bangod sa mga hitabo nga ila masaksihan?—Bug. 17:5; Ezeq. 33:33.

¹³ Kon magtuo sila kay Jehova, mangin pareho ini sa natabo sa Egipto sang panahon ni Moises. Dumduma nga “madamo nga dumuluong” ang nag-upod sa mga Israelinhon sang naggua sila sa Egipto. Posible nga nagtuo kay Jehova ang pila sa ila sang nakita nila nga natuman ang ginsiling ni Moises parte sa Napulo ka Kalalat-an. (Ex. 12:38) Kon pareho man sa sini ang matabo pagkatapos malaglag ang Babilonia nga Daku, dapat bala maglain ang aton buot kay may mga tawo nga magaupod sa aton antes mag-Armageddon? Indi. Sa baylo, gusto naton  ilugon ang aton Amay sa langit nga “isa ka Dios nga maluluy-on kag mainawaon, indi dali maakig kag bugana sa mainunungon nga gugma kag kamatuoran.” b—Ex. 34:6.

14-15. Kon parte sa paglaum sang isa ka tawo nga mabuhi sing wala sing katapusan, nagadepende bala ini sa kon san-o sia napatay ukon sa diin sia nagaistar? Ipaathag. (Salmo 33:​4, 5)

¹⁴ Kon kaisa, may mga utod nga nagasiling, “Maayo man gani nga subong napatay ang akon paryente nga indi Saksi samtang wala pa nag-umpisa ang dakung kapipit-an kay may paglaum pa sia nga mabanhaw.” Sigurado nga maayo man ang ila motibo kon ngaa nasiling nila ini. Pero kon parte sa paglaum sang isa ka tawo nga mabuhi sing wala sing katapusan, wala ini nagadepende sa kon san-o sia napatay. Perpekto nga Hukom si Jehova, gani pirme matarong kag husto ang iya mga desisyon. (Basaha ang Salmo 33:​4, 5.) Makasigurado kita nga himuon sang “Hukom sang bug-os nga duta” kon ano ang husto.​—Gen. 18:25.

¹⁵ Kon parte sa paglaum sang isa ka tawo nga mabuhi sing wala sing katapusan, makasiling man kita nga wala ini nagadepende sa kon diin sia nagaistar. Halimbawa, minilyon ka tawo ang nagaistar sa mga pungsod diin wala gid sila nahatagan sing tsansa nga makatuon parte sa mensahe sang Ginharian. Indi gid paghukman ni Jehova ining minilyon ka tawo bilang “mga kanding.” (Mat. 25:46) Kon naluoy kita sa sini nga mga tawo, sigurado nga mas naluoy sa ila ang matarong nga Hukom sang bug-os nga duta. Wala kita kabalo kon paano maniobrahon ni Jehova ang  mga matabo sa tion sang dakung kapipit-an. Posible nga may iban sa sini nga mga tawo nga mahatagan sing tsansa nga makatuon parte kay Jehova. Posible magatuo sila kay Jehova, kag magadampig sila sa iya kon pakabalaanon na niya ang iya kaugalingon sa atubangan sang tanan nga pungsod.​—Ezeq. 38:16.

16. Ano ang nabal-an naton parte kay Jehova? (Tan-awa man ang piktyur.)

¹⁶ Paagi sa aton pagtuon sang Biblia, nabal-an naton nga hamili gid kay Jehova ang kabuhi sang mga tawo. Ginhatag pa gani niya ang kabuhi sang iya Anak para may paglaum kita tanan nga mabuhi sing wala sing katapusan. (Juan 3:16) Nabatyagan gid naton tanan ang pagpalangga ni Jehova. (Isa. 49:15) Kabalo sia sang ngalan sang kada isa sa aton. Ang matuod, kilala gid niya sing maayo ang kada isa sa aton. Gani bisan pa mapatay kita, mabanhaw niya kita bangod kabalo sia sang tanan nga detalye parte sa aton pagkatawo pati na ang tanan nga ara sa aton memorya. (Mat. 10:​29-31) Makasigurado gid kita nga perpekto ang paghukom nga himuon sang aton mahigugmaon nga Amay sa langit sa kada tawo bangod maalam sia, matarong, kag maluluy-on.​—Sant. 2:13.

17. Ano ang binagbinagon naton sa masunod nga artikulo?

¹⁷ Bangod sa sining bag-o nga paghangop, masiling naton nga hilingagawon na gid katama ang aton pagbantala nga hilikuton. Ngaa masiling naton ini? Kag ano ang nagapalig-on sa aton nga mangin mapisan sa pagbantala sang maayong balita? Binagbinagon naton ini sa masunod nga artikulo.