1. Ano ang natalupangdan sang madamo nga interesado kon naga-attend sila sa aton mga miting? (Tan-awa man ang piktyur.)

 IMADYINA nga may isa ka mag-asawa nga nag-attend sa miting sa pinakauna nga tion sa Kingdom Hall sang mga Saksi ni Jehova. Gin-abiabi sila sing maayo sang mga kauturan kag nakita nila nga nagahigugmaanay gid ang mga kauturan. Nagdayaw gid sila sa sini. Samtang nagapauli sila, ginsilingan sang asawa ang iya bana, ‘Lain gid ang mga Saksi ni Jehova, kag nanamian ako sa ila.’

2. Ngaa nag-untat ang iban sa pag-alagad kay Jehova?

² Dalayawon gid ang gugma nga makita sa katawhan ni Jehova. Pero, indi perpekto ang mga Saksi ni Jehova. (1 Juan 1:8) Gani samtang ginakilala pa gid naton ang aton mga kauturan, posible gid nga makita naton ang ila indi maayo nga mga kinaiya. (Roma 3:23) Makapasubo nga may mga nag-untat sa pag-alagad kay Jehova bangod sa nakita nila nga indi maayo nga mga kinaiya sang iban.

3. Paano makilala ang matuod nga mga sumulunod ni Jesus? (Juan 13:34, 35)

³ Tan-awa liwat ang teksto nga ginbasihan sini nga artikulo. (Basaha ang Juan 13:34, 35.) Paano makilala ang matuod nga mga sumulunod sang Cristo? Wala nagsiling ang Biblia nga dapat perpekto sila. Sa baylo, makilala sila paagi sa ila gugma. Isa ini ka klase sang gugma nga nagapalig-on sa ila nga magsakripisyo para sa isa kag isa. Talupangda man nga wala nagsiling si Jesus: ‘Paagi sini mahibaluan ninyo nga mga disipulo ko kamo.’ Sa baylo, nagsiling sia: “Paagi sini mahibaluan sang tanan nga mga disipulo ko kamo.” Ginapakita sang ginsiling ni Jesus nga paagi sa ila gugma sa isa kag isa, indi lang ang iya mga disipulo ang makakilala sa iya  matuod nga mga sumulunod kundi pati man ang mga indi bahin sang Cristianong kongregasyon.

4. Ano ang posible ipamangkot sang iban parte sa matuod nga mga Cristiano?

⁴ Posible nagapalibog ang iban nga mga indi Saksi ni Jehova: ‘Ngaa gugma ang basihan para makilala ang matuod nga mga sumulunod ni Jesus? Paano ginpakita ni Jesus nga ginahigugma niya ang iya mga apostoles? Kag paano naton mailog ang halimbawa ni Jesus?’ Maayo gid kon pamalandungan sang mga Saksi ang sabat sa sini nga mga pamangkot. Kon himuon naton ini, mapalig-on kita nga ipakita pa gid ang gugma ilabi na kon naglain ang aton buot bangod sa ginhimo nga sala sang iban.—Efe. 5:2.

5. Ipaathag ang ginsiling ni Jesus sa Juan 15:12, 13.

⁵ Nagsiling si Jesus nga makilala ang iya mga sumulunod paagi sa isa ka pinasahi nga klase sang gugma. (Basaha ang Juan 15:12, 13.) Talupangda nga ginsugo sila ni Jesus: “Maghigugmaanay kamo kaangay sang paghigugma ko sa inyo.” Ano ang buot silingon sini? Ginpaathag ni Jesus nga amo ini ang gugma nga handa magsakripisyo. Kon may amo sini nga gugma ang isa ka Cristiano, handa sia nga ihatag ang iya kabuhi para sa iya utod kon kinahanglan niya nga himuon ini. b

6. Paano ginapakita sang Pulong sang Dios nga importante gid ang gugma?

⁶ Ginatudluan kita sang Pulong sang Dios nga importante gid ang gugma. Ari ang pila ka teksto nga paborito sang madamo nga tawo: “Ang Dios gugma.” (1 Juan 4:8) “Higugmaa ang imo isigkatawo subong sang imo kaugalingon.” (Mat. 22:39) “Ang gugma nagatabon sang madamo nga sala.” (1 Ped. 4:8) “Ang gugma wala sing katapusan.” (1 Cor. 13:8) Maathag sa sini nga mga teksto kag sa iban pa nga mga teksto nga importante  gid nga ipakita naton ining dalayawon nga kinaiya.

7. Ngaa indi gid masarangan ni Satanas nga tudluan ang mga tawo nga maghigugmaanay kag maghiusa?

⁷ Madamo nga tawo ang nagapamangkot: ‘Paano ko makilala ang matuod nga relihion? Ang tanan nga relihion nagasiling nga sila ang nagatudlo sang kamatuoran, pero lainlain ang ila ginatudlo parte sa Dios.’ Naghimo si Satanas sang madamo nga indi matuod nga mga relihion, gani nabudlayan ang mga tawo nga makilala ang matuod nga relihion. Pero indi gid niya masarangan maghimo sang kongregasyon sang mga Cristiano sa bilog nga kalibutan kag tudluan sila nga maghigugmaanay. Si Jehova lang ang makahimo sini bangod sa iya nagahalin ang matuod nga gugma. Ang mga may espiritu lang ni Jehova kag ang iya lang mga ginapakamaayo ang may matuod nga gugma sa isa kag isa. (1 Juan 4:7) Amo ini ang rason kon ngaa nagsiling si Jesus nga makilala ang iya matuod nga mga sumulunod paagi sa ila gugma sa isa kag isa.

8-9. Ano ang reaksion sang madamo nga tawo sang natalupangdan nila ang gugma sang mga Saksi ni Jehova sa isa kag isa?

⁸ Suno gid sa gintagna ni Jesus, nakilala sang madamo nga tawo ang iya matuod nga mga sumulunod paagi sa matuod nga gugma nga ginapakita nila sa isa kag isa. Halimbawa, nadumduman sang isa ka brother nga si Ian ang iya natalupangdan sang nag-attend sia sa pinakauna nga tion sa isa ka kombension. Ginhiwat ini sa isa ka sports stadium malapit sa ila. Mga pila ka bulan antes sini, ara man sia sa sini nga stadium para magtan-aw sang hampang. Nagsiling sia: “Tuhay gid ini nga kombension. Ang mga Saksi matinahuron kag mahipid mamayo, kag mabuot ang ila mga kabataan.” Nagsiling pa sia: “Labaw sa tanan, daw kontento sila kag malipayon—ang butang nga gusto ko gid mabatyagan. Wala gid ako sang madumduman nga pamulongpulong sina nga adlaw, pero indi ko gid malimtan ang paggawi sang mga Saksi.” c Ginapakita naton ini nga paggawi bangod ginahigugma naton ang isa kag isa. Bangod palangga naton ang aton mga kauturan, ginapakitaan naton sila sang kaayo kag ginarespeto naton sila.

⁹ Amo man sini ang natalupangdan sang isa ka brother nga si John sang nag-attend sia sa mga miting sang kongregasyon. Nagsiling sia: “Nagdayaw gid ako sa ila pagkamainabyanon kag . . . daw mga santo sila. Ang ila matuod nga gugma nagkumbinsi sa akon nga nasapwan ko na ang matuod nga relihion.” d Ginapamatud-an sini nga mga eksperiensia nga ang katawhan ni Jehova amo gid ang matuod nga mga Cristiano.

10. Sa ano nga sitwasyon may kahigayunan kita nga ipakita nga ginahigugma naton ang aton mga kauturan? (Tan-awa man ang footnote.)

¹⁰ Ginsambit kaina nga indi perpekto ang aton mga kauturan. Kon kaisa, may masiling sila ukon mahimo nga posible magpalain sang aton buot. e (Sant. 3:2) Sa sini nga mga sitwasyon, may kahigayunan kita nga ipakita nga ginahigugma naton sila paagi sa aton reaksion. Parte sa sini, ano ang matun-an naton sa halimbawa ni Jesus?—Juan 13:15.

11. Ano nga indi maayo nga kinaiya ang ginpakita nanday Santiago kag Juan? (Tan-awa man ang piktyur.)

¹¹ Wala ginhunahuna ni Jesus nga indi makahimo sang sala ang iya mga sumulunod. Sa baylo, mahigugmaon niya sila nga ginbuligan nga madula ang ila indi maayo nga mga kinaiya para malipay sa ila si Jehova. Isa ka bes, may ginhimo ang duha niya ka apostoles nga sanday Santiago  kag Juan. Ginsilingan nila ang ila iloy nga pangabayon si Jesus nga hatagan sila sang importante nga posisyon sa Ginharian. (Mat. 20:20, 21) Ginapakita sini nga bugalon sanday Santiago kag Juan kag gusto nila nga mangin mas importante sila sangsa iban.—Hulu. 16:18.

12. Sanday Santiago kag Juan lang bala ang nagpakita sang indi maayo nga kinaiya? Ipaathag.

¹² Indi lang sanday Santiago kag Juan ang nagpakita sang indi maayo nga kinaiya sadto nga tion. Talupangda ang reaksion sang iban pa nga apostoles: “Sang mahibaluan ini sang napulo ka disipulo, naakig sila sa mag-utod.” (Mat. 20:24) Posible nga nagbaisay sanday Santiago, Juan, kag ang iban pa nga apostoles. Posible nga nagsiling ang iban nga apostoles: ‘Ngaa nagapangabay kamo sang importante nga posisyon sa Ginharian? Mas maayo bala kamo sangsa amon? Kamo lang bala ang nagpangabudlay upod kay Jesus? Nagakabagay man kami hatagan sang importante nga posisyon.’ Ano man ang ila ginhunahuna ukon ginsiling, wala nila mapakita ang gugma kag kaayo sa isa kag isa sadto nga tion.

13. Ano ang ginhimo ni Jesus sang nagbaisay ang iya mga apostoles? (Mateo 20:25-28)

¹³ Ano ang ginhimo ni Jesus? Wala niya gin-akigan ang iya mga apostoles. Wala sia nagsiling nga mangita sia sang mga apostoles nga mas maayo, mas mapainubuson, kag magapakita pirme sang gugma sa isa kag isa. Sa baylo, mapinasensiahon niya sila nga gin-istorya bangod kabalo sia nga gusto nila himuon ang husto. (Basaha ang Mateo 20:25-28.) Bisan pa indi amo ini ang pinakauna ukon pinakaulihi  nga tion nga nagbaisay ang mga apostoles kon sin-o ang pinakamataas sa ila, pirme gihapon sila ginapakitaan ni Jesus sang gugma.—Mar. 9:34; Luc. 22:24.

14. Ano nga kultura ang gindak-an sang mga apostoles ni Jesus?

¹⁴ Sigurado gid nga nahangpan ni Jesus nga naimpluwensiahan ang iya mga apostoles sang ila gindak-an nga kultura. (Juan 2:24, 25) Gintudluan sang mga lider sang relihion ang mga tawo nga panikasugan nila nga mangin mataas ang ila posisyon para respetuhon sila sang iban. (Mat. 23:6; ipaanggid ang artikulo nga “Ang Sinagoga—Diin Nagwali si Jesus kag ang Iya mga Disipulo” sa Abril 1, 2010, nga Ang Lalantawan, p. 16-18.) Ginahunahuna man sang Judiyo nga mga lider sang relihion nga mas maayo sila sangsa iban. f (Luc. 18:9-12) Nahangpan ni Jesus nga posible nakaimpluwensia ini nga panghunahuna sa pagtamod sang mga apostoles sa ila kaugalingon kag sa iban. (Hulu. 19:11) Wala ginhunahuna ni Jesus nga indi gid makahimo sang sala ang iya mga disipulo, kag mapinasensiahon sia sa ila kon makahimo sila sang sala. Kabalo sia nga gusto nila himuon ang maayo. Gani mapinasensiahon niya sila nga gintudluan nga indi nila dapat pagtinguhaan nga mangin mas maayo sangsa iban, kundi dapat sila mangin mapainubuson kag pakitaan nila sang gugma ang iban.

15. Ano ang matun-an naton sa natabo kanday Santiago, Juan, kag sa iban pa nga apostoles?

¹⁵ Madamo kita sang matun-an sa natabo kanday Santiago, Juan, kag sa iban pa nga apostoles. Sala ang ginhimo nanday Santiago kag Juan sang nangabay sila nga hatagan sila sang importante nga posisyon sa Ginharian. Pero may sala man ang iban pa nga apostoles kay naguba ang ila paghiusa bangod sa ila reaksion. Pero, ginpakitaan ni Jesus sang kaayo kag gugma ang tanan nga 12 ka apostoles. Ano ang matun-an naton sa sini? Dapat naton binagbinagon indi lang ang ginhimo sang iban kundi pati man ang aton reaksion sa ila nahimo nga sala. Ano ang makabulig sa aton? Kon naglain ang aton buot sa isa ka utod, pamangkuton naton ang aton kaugalingon: ‘Ngaa nagalain gid ang akon buot sa iya ginhimo? Ginapakita bala sini nga may ara ako sang indi maayo nga kinaiya nga dapat dulaon? Posible ayhan nga may problema ang utod nga nagpalain sang akon buot? Bisan pa pamatyag ko may rason ako nga maglain ang akon buot sa iya, puede ayhan nga palampason ko na lang ini kag pakitaan sia sang gugma?’ Kon pirme naton ginapakitaan sang gugma ang iban, ginapamatud-an naton nga matuod kita nga mga sumulunod ni Jesus.

16. Ano pa ang matun-an naton sa halimbawa ni Jesus?

¹⁶ Matun-an man naton sa halimbawa ni Jesus nga dapat naton tinguhaan nga hangpon ang aton mga kauturan. (Hulu. 20:5) Indi kita pareho kay Jesus nga makabasa sang tagipusuon. Pero puede kita mangin mapinasensiahon sa aton mga kauturan. (Efe. 4:1, 2; 1 Ped. 3:8) Mas mahapos ini himuon kon kilalahon naton sila sing maayo. Binagbinagon naton ang isa ka halimbawa.

17. Paano nakabenepisyo ang isa ka manugtatap sang sirkito sang ginkilala niya sing maayo ang isa ka utod?

¹⁷ Nadumduman sang isa ka manugtatap sang sirkito nga nag-alagad sa East Africa ang isa ka brother sa isa ka kongregasyon didto. Sang primero, abi niya suplado ini nga brother. Ano ang ginhimo sang manugtatap sang sirkito? Nagsiling sia: “Sa baylo nga likawan ang brother, ginkilala ko sia sing maayo.” Bangod sa iya  ginhimo, nabal-an niya kon ano ang nakaimpluwensia sa personalidad sang brother. Nagsiling pa sia: “Nabal-an ko nga grabe ang pagpanikasog sang brother para mabag-o niya ang iya personalidad kag daku na ang iya ginbag-o. Bangod sini, nagdayaw gid ako sa iya. Nangin suod kami nga mag-abyan.” Gani kon panikasugan naton nga hangpon ang aton mga kauturan, mas mahapos para sa aton nga pakitaan sila sang gugma.

18. Kon naglain ang aton buot sa isa ka utod, ano ang mga puede naton ipamangkot sa aton kaugalingon? (Hulubaton 26:20)

¹⁸ Kon kaisa, posible nga gusto naton istoryahon ang utod nga nagpalain sang aton buot. Pero, mas maayo kon pamangkuton anay naton ang aton kaugalingon: ‘Nabal-an ko gid bala ang mga detalye parte sa natabo?’ (Hulu. 18:13) ‘Ginhungod gid bala niya ang iya ginhimo?’ (Man. 7:20) ‘May nahimo bala ako sang una nga daw pareho man sa iya nahimo?’ (Man. 7:21, 22) ‘Kon istoryahon ko sia, posible ayhan nga maglala pa gid ang problema?’ (Basaha ang Hulubaton 26:20.) Kon hatagan naton sang tion ang pagpamalandong sa sini nga mga pamangkot, mapalig-on kita sang aton gugma sa aton utod nga palampason na lang ang natabo.

19. Ano ang gusto mo nga himuon?

¹⁹ Bilang grupo, ginapamatud-an sang mga Saksi ni Jehova nga sila ang matuod nga disipulo ni Jesus. Kon ginapakitaan naton sang gugma ang aton mga kauturan bisan pa may mga kakulangan sila, ginapamatud-an sang kada isa sa aton nga matuod kita nga mga sumulunod ni Jesus. Kon nagapakita kita sang gugma nga handa magsakripisyo, ginabuligan naton ang iban nga makilala ang matuod nga relihion kag posible nga mag-upod sila sa aton sa pagsimba kay Jehova, ang Dios sang gugma. Kabay pa nga padayon naton nga ipakita ang gugma nga nagapakilala sa matuod nga mga Cristiano.