1. Ano ang dapat himuon sang isa ka tawo antes niya umpisahan ang pagpaobra sing balay?

 IMADYINA ang isa ka tawo nga gusto magpaobra sing balay. May napensaran na sia nga klase sang balay nga gusto niya. Mabakal na bala sia dayon sang mga materyales kag umpisahan ang pagpaobra? Indi. Antes niya umpisahan ang pagpaobra, may dapat sia anay himuon kag importante gid ini. Dapat niya sumahon kon pila tanan ang magasto niya para ipaobra ang balay. Ngaa? Bangod dapat niya mabal-an kon bala may bastante sia nga kuarta nga ipahuman sa sini. Kon nasuma niya ini sing maayo antes niya umpisahan ang pagpaobra, mahimo gid nga mapahuman niya ang iya bag-o nga balay.

2. Suno sa Lucas 14:27-30, ano ang dapat mo hunahunaon sing maayo antes ka magpabawtismo?

² Gusto mo na bala magpabawtismo bangod sang imo gugma kay Jehova kag bangod luyag mo sia pasalamatan? Kon huo, may dapat ka man anay himuon pareho sa tawo nga gusto magpaobra sing balay. Ngaa masiling naton ini? Talupangda ang ginsiling ni Jesus sa Lucas 14:27-30. (Basaha.) Ginbinagbinag ni Jesus ang dapat himuon sang isa para mangin disipulo niya. Dapat handa kita sa bisan ano man nga “gasto,” ukon dapat handa kita magsakripisyo kag batason ang mga kabudlayan. (Luc. 9:23-26; 12:51-53) Gani antes ka magpabawtismo, dapat mo hunahunaon sing maayo ang tanan nga posible mo maeksperiensiahan kon mangin disipulo ka sang Cristo. Kon himuon mo ini, mangin mas handa ka nga mag-alagad sa Dios sing matutom bilang bawtismado nga Cristiano.

3. Ano ang binagbinagon naton sa sini nga artikulo?

³ Dapat ka gid bala magpabawtismo bilang disipulo sang Cristo bisan pa may mga sakripisyo kag kabudlayan nga dapat mo batason? Huo! Kon magpabawtismo ang isa, madamo nga pagpakamaayo  ang mabaton niya subong kag sa palaabuton. Binagbinagon naton ang pila ka importante nga pamangkot parte sa bawtismo. Makabulig ini sa imo nga masabat ang pamangkot nga, “Handa na bala ako nga magpabawtismo?”

4. (a) Ano ang buot silingon sang pagdedikar kay Jehova? (b) Ano ang buot silingon sang “ipanghiwala” ang kaugalingon nga mabasa sa Mateo 16:24?

⁴ Ano ang dedikasyon? Antes ka mabawtismuhan, dapat ka anay magdedikar kay Jehova. Mahimo mo ini paagi sa pagpangamuyo sing hanuot sa iya kag pagsiling sa iya nga gamiton mo ang imo bilog nga kabuhi sa pag-alagad sa iya. Kon ginadedikar mo ang imo kabuhi sa Dios, ‘ginapanghiwala’ mo ang imo kaugalingon. (Basaha ang Mateo 16:24.) Si Jehova na ang nagapanag-iya sa imo, kag isa gid ini ka hamili nga pribilehiyo. (Roma 14:8) Ginasilingan mo sia nga sugod subong, himuon mo na nga pinakaimportante sa imo kabuhi ang pag-alagad sa iya, indi ang imo kaugalingon. Ang imo dedikasyon isa ka panaad ukon serioso nga promisa sa Dios. Wala kita ginapilit ni Jehova nga himuon ini nga panaad. Pero kon nagpanaad kita, gusto niya nga tumanon gid naton ini.—Sal. 116:12, 14.

5. Ano ang kaangtanan sang dedikasyon sa bawtismo?

⁵ Ano ang kaangtanan sang dedikasyon sa bawtismo? Wala sing may nakahibalo sang nagdedikar ka kay Jehova. Pero ang pagpabawtismo makita sang iban nga tawo, nga masami ginahimo sa tion sang asembleya ukon kombension. Kon magpabawtismo ka, ginapakita mo sa iban nga nakadedikar ka na kay Jehova. b Gani paagi sa pagpabawtismo, mabal-an sang iban nga ginahigugma mo si Jehova nga imo Dios sa bug-os mo nga tagipusuon, kalag, hunahuna, kag kusog kag handa ka nga alagaron sia sa bilog mo nga kabuhi.—Mar. 12:30.

6-7. Suno sa 1 Pedro 3:18-22, ano ang duha ka rason ngaa dapat gid magpabawtismo?

⁶ Dapat gid bala magpabawtismo? Binagbinaga ang ginasiling sang 1 Pedro 3:18-22. (Basaha.) Ang arka amo ang pamatuod nga may pagtuo si Noe. Sing kaanggid, ang imo bawtismo amo ang nagapamatuod sa mga tawo nga nagdedikar ka na kay Jehova. Pero dapat gid bala magpabawtismo? Huo. Ginsambit ni Pedro kon ngaa. Una, ‘nagaluwas ini sa aton.’ Ang bawtismo makaluwas sa aton kon napakita na naton paagi sa aton mga buhat nga nagatuo kita kay Jesus kag nagapati kita nga napatay sia para sa aton, ginbanhaw sia para magkabuhi sa langit, kag ara sia subong “sa tuo sang Dios.”

⁷ Ikaduha, ang bawtismo makahatag sa aton sing “maayo nga konsiensia.” Kon magdedikar kita sa Dios kag magpabawtismo, umpisa ini sang aton pinasahi nga kaangtanan sa iya. Kon sinsero kita nga nagahinulsol kag nagatuo kita sa gawad, patawaron sang Dios ang aton mga sala. Nagaresulta ini sa maayo nga konsiensia.

8. Ano dapat ang imo panguna nga rason sa pagpabawtismo?

⁸ Ano dapat ang imo panguna nga rason sa pagpabawtismo? Sang gintun-an mo sing maayo ang Biblia, madamo ka sing natun-an parte kay Jehova, sa iya personalidad, kag sa iya mga pamaagi. Nalipay ka gid sa imo mga natun-an kag napalig-on ka sini nga higugmaon gid sia. Ang imo gugma kay Jehova amo dapat ang panguna nga rason sa imo desisyon nga magpabawtismo.

9. Ano ang buot silingon sang pagbawtismo sa ngalan sang Amay kag sang Anak kag sang balaan nga espiritu nga mabasa sa Mateo 28:19, 20?

⁹ Ang isa pa ka rason sa pagpabawtismo amo ang mga kamatuoran sa Biblia nga imo natun-an kag ginpatihan. Binagbinaga ang ginsiling ni Jesus sang nagsugo sia nga tudluan ang mga tawo para mangin disipulo niya. (Basaha ang Mateo 28:19, 20.) Suno kay Jesus, dapat sila magpabawtismo “sa ngalan sang Amay kag sang Anak kag sang balaan nga espiritu.” Ano ang  buot silingon sini? Dapat mo patihan sing bug-os ang mga kamatuoran nga ginatudlo sang Biblia parte kay Jehova, sa iya Anak nga si Jesus, kag sa balaan nga espiritu. Gamhanan gid ini nga mga kamatuoran nga sarang makatandog sang imo tagipusuon. (Heb. 4:12) Binagbinagon naton ang pila sini.

10-11. Ano nga mga kamatuoran parte sa Amay ang imo natun-an kag ginpatihan?

¹⁰ Hunahunaa ang ginbatyag mo sang natun-an mo ini nga mga kamatuoran parte sa Amay: Ang iya “ngalan amo si Jehova,” sia “ang Labing Mataas sa bug-os nga duta,” kag sia lamang “ang matuod nga Dios.” (Sal. 83:18; Isa. 37:16) Sia ang aton Manunuga, kag “si Jehova ang kaluwasan.” (Sal. 3:8; 36:9) May ginhimo sia para maluwas kita sa sala kag kamatayon, kag ginhatagan niya kita sang paglaum nga mabuhi sing wala sing katapusan. (Juan 17:3) Ang imo dedikasyon kag bawtismo magapakilala sa imo bilang isa ka Saksi ni Jehova. (Isa. 43:10-12) Mangin bahin ka sang bug-os kalibutan nga pamilya nga nagasimba sa Dios. Ang mga bahin sang sini nga pamilya nalipay nga tawgon sa ngalan sang Dios kag ginapakilala nila sia sa iban.—Sal. 86:12.

¹¹ Daku gid ang imo kalipay sang nahangpan mo ang ginatudlo sang Biblia parte sa Amay! Sang ginpatihan mo ining hamili nga mga kamatuoran, gusto mo na magdedikar kay Jehova kag magpabawtismo.

12-13. Ano nga mga kamatuoran parte sa Anak ang imo natun-an kag ginpatihan?

¹² Ano ang ginbatyag mo sang natun-an mo ang masunod nga mga kamatuoran parte sa Anak? Si Jesus ang ikaduha nga pinakaimportante nga persona sa uniberso. Sia ang aton Manuggawad. Kinabubut-on niya nga ginhatag ang iya kabuhi para sa aton. Kon ginapakita naton paagi sa aton mga buhat nga nagatuo kita sa gawad, mapatawad ang aton mga sala, mangin abyan naton ang Dios, kag may paglaum kita nga mabuhi sing wala sing katapusan. (Juan 3:16) Si Jesus ang aton Mataas nga Saserdote. Gusto niya kita buligan para mabaton naton ang mga benepisyo sang gawad kag para may maayo kita nga kaangtanan sa Dios. (Heb. 4:15; 7:24, 25) Bilang Hari sang Ginharian sang Dios, sia ang gamiton ni Jehova para pakabalaanon ang Iya ngalan, dulaon ang kalautan, kag mabaton sang katawhan ang wala sing katapusan nga mga pagpakamaayo sa Paraiso sa palaabuton. (Mat. 6:9, 10; Bug. 11:15) Si Jesus ang aton huwaran. (1 Ped. 2:21) Nangin halimbawa sia sa aton sa paggamit sang iya kabuhi sa paghimo sang kabubut-on sang Dios.—Juan 4:34.

¹³ Sang ginpatihan mo ang ginatudlo sang Biblia parte kay Jesus, ginhigugma mo ang pinalangga nga Anak sang Dios. Ini nga gugma nagpalig-on sa imo nga gamiton ang imo kabuhi sa paghimo sang kabubut-on sang Dios, pareho sa ginhimo ni Jesus. Bangod sini, gusto mo na magdedikar kay Jehova kag magpabawtismo.

14-15. Ano nga mga kamatuoran parte sa balaan nga espiritu ang imo natun-an kag ginpatihan?

¹⁴ Ano ang ginbatyag mo sang natun-an mo ang masunod nga mga kamatuoran parte sa balaan nga espiritu? Ang balaan nga espiritu indi isa ka dios, kundi aktibo nga puersa sang Dios. Gingamit ni Jehova ang balaan nga espiritu para tuytuyan ang mga tawo nga nagsulat sang Biblia, kag ini nga espiritu nagabulig sa aton nga mahangpan ang Biblia kag iaplikar ang aton nabasahan. (Juan 14:26; 2 Ped. 1:21) Paagi sa espiritu ni Jehova, ginahatagan niya kita sang “gahom nga labaw sa kinaandan.” (2 Cor. 4:7) Ang espiritu nagahatag sa aton sang kaisog nga mabantala ang maayong balita, mabatuan ang mga pagsulay, madaug ang pagluya sang buot, kag mabatas ang mga pagtilaw. Nagabulig ini sa aton nga mapakita ang dalayawon nga mga kinaiya nga “ginapatubas sang espiritu.” (Gal. 5:22) Maalwan nga ginahatag sang Dios ang iya espiritu sa mga nagasalig sa iya kag sinsero nga nagapangayo sini sa iya.—Luc. 11:13.

¹⁵ Makapalig-on gid mabal-an nga ang mga sumilimba ni Jehova makasalig nga buligan sila  sang balaan nga espiritu sa ila pag-alagad sa Dios! Sang ginpatihan mo ang mga kamatuoran nga imo natun-an parte sa balaan nga espiritu, gusto mo na magdedikar sa Dios kag magpabawtismo.

16. Ano na ang mga natun-an naton?

¹⁶ Importante gid ang imo desisyon nga magdedikar sa Dios kag magpabawtismo. Natun-an naton nga dapat handa kita magsakripisyo kag batason ang mga kabudlayan. Pero mas madamo ang pagpakamaayo nga mabaton mo sangsa mga sakripisyo. Ang bawtismo makaluwas sa imo, kag makahatag sa imo sing maayo nga konsiensia. Ang panguna nga rason sa imo desisyon nga magpabawtismo amo dapat ang imo gugma kay Jehova nga Dios. Dapat mo man patihan sing bug-os ang mga kamatuoran nga natun-an mo parte sa Amay, sa Anak, kag sa balaan nga espiritu. Pagkatapos naton mabinagbinag ini tanan, ano na ang sabat mo sa pamangkot nga, “Handa na bala ako nga magpabawtismo?”

17. Ano ang dapat himuon sang isa antes sia magpabawtismo?

¹⁷ Kon pamatyag mo handa ka na nga magpabawtismo, mahimo gid nga may mga ginhimo ka na para mangin maayo ang imo kaangtanan kay Jehova. c Bangod sang imo regular nga pagtuon sang Biblia, nakilala mo sing maayo si Jehova kag si Jesus. Nagbakod ang imo pagtuo. (Heb. 11:6) Nagsalig ka sing bug-os sa mga promisa ni Jehova nga mabasa sa Biblia, kag nagpati ka nga ang imo pagtuo sa halad-gawad ni Jesus makaluwas sa imo sa sala kag kamatayon. Naghinulsol ka sa imo mga sala, buot silingon, nasubuan ka gid bangod sang mga nahimo mo nga malain, kag nangayo ka sing kapatawaran kay Jehova. Ginbag-o mo ang imo kabuhi, buot silingon, gin-untatan mo na ang mga ginahimo mo nga malain sang una kag ginpanikasugan mo nga mahamuot ang Dios sa imo pagkabuhi. (Binu. 3:19) Gusto mo gid nga isugid sa iban ang parte sa imo pagtuo. Nakalipikar ka nga mangin indi bawtismado nga manugbantala kag nag-upod ka sa kongregasyon sa pagbantala. (Mat. 24:14) Importante gid ini tanan. Kag bangod ginhimo mo na ini, ginapabugal ka ni Jehova kag nalipay gid sia sa imo.—Hulu. 27:11.

18. Ano pa ang dapat mo himuon antes ka mabawtismuhan?

¹⁸ Antes ka mabawtismuhan, may dapat ka anay himuon. Natun-an naton kaina nga dapat ka magdedikar sa Dios. Sa imo personal nga pangamuyo, hanuot nga ipabutyag sa iya ang imo promisa nga gamiton mo ang imo kabuhi sa paghimo sang iya kabubut-on. (1 Ped. 4:2) Dayon pabal-a ang koordenitor sang hubon sang mga gulang nga gusto mo magpabawtismo. Pangabayon niya ang pila ka gulang nga magpakig-istorya sa imo. Indi ka dapat makulbaan kay istoryahon ka nila. Dumduma nga kilala ka na sining mahigugmaon nga mga utod kag palangga ka nila. Rebyuhon nila sa imo ang panguna nga mga panudlo sang Biblia nga imo natun-an. Siguraduhon nila nga nahangpan mo ini nga mga panudlo kag kabalo ka kon daw ano ka importante ang dedikasyon  kag bawtismo. Kon magdesisyon sila nga handa ka na, pabal-on ka nila nga puede ka na magpabawtismo sa nagahilapit nga asembleya ukon kombension.

19-20. Ano ang dapat mo himuon pagkatapos mo magpabawtismo, kag paano mo ini mahimo?

¹⁹ Ano ang dapat mo himuon pagkatapos mo magpabawtismo? d Dumduma nga ang dedikasyon isa ka panaad kag gusto ni Jehova nga tumanon mo gid ini. Gani pagkatapos mo magpabawtismo, dapat mo tumanon ang imo ginpromisa sang nagdedikar ka sa Dios. Paano mo ini mahimo?

²⁰ Magpabilin nga suod sa inyo kongregasyon. Kon bawtismado ka na nga Cristiano, bahin ka na sang Cristianong “paghiliutod.” (1 Ped. 2:17, footnote) Daw mga pamilya mo na ang mga kauturan sa kongregasyon. Gani magtambong sing regular sa mga miting para magbakod ang pagpakig-abyan mo sa ila. Basaha kag pamalandungi ang Pulong sang Dios adlaw-adlaw. (Sal. 1:1, 2) Pagkatapos mo mabasa ang pila ka bersikulo sa Biblia, magpain sing tion para pamalandungan ang imo nabasa. Mapalig-on ka sini nga iaplikar ang imo mga natun-an. ‘Magpadayon sa pagpangamuyo.’ (Mat. 26:41) Ang imo hanuot nga mga pangamuyo magapasuod sa imo kay Jehova. ‘Padayon nga unaha ang pagpangita sa Ginharian.’ (Mat. 6:33) Mahimo mo ini kon himuon mo nga prioridad ang pagbantala. Kon regular ka sa imo pagministeryo, magapabilin nga mabakod ang imo pagtuo, kag posible nga mabuligan mo ang iban nga makabaton man sing paglaum nga mabuhi sing wala sing katapusan.—1 Tim. 4:16.

21. Ano ang mga pagpakamaayo kon magpabawtismo ka?

²¹ Ang pagdedikar kay Jehova kag pagpabawtismo amo ang pinakaimportante nga desisyon nga mahimo mo sa imo kabuhi. Kon pamensaron ang mga sakripisyo kag kabudlayan nga maeksperiensiahan mo, dapat ka bala gihapon magpabawtismo? Huo! Ang bisan ano nga kabudlayan sa sining daan nga kalibutan “umalagi [lang] kag mamag-an.” (2 Cor. 4:17) Pero kon magpabawtismo ka, mangin mas malipayon ang kabuhi mo subong kag may paglaum ka nga mabaton ang “matuod nga kabuhi” sa palaabuton. (1 Tim. 6:19) Gani, palihug hunahunaa sing maayo kag ipangamuyo kon ano ang imo sabat sa pamangkot nga, “Handa na bala ako nga magpabawtismo?”