1, 2. (a) Ngaa nalipay subong ang katawhan sang Dios? (b) Paano mabuligan sang Cristianong mga ginikanan kag sang mga gulang ang mga pamatan-on nga mahangpan ang bawtismo?

“KILALA ko na ikaw sugod sang pagkatawo mo,” siling sang isa ka Cristianong gulang sa 12 anyos nga si Christopher, “kag nalipay ako nga magapabawtismo ka na. Pero may ipamangkot lang ako sa imo, ‘Ngaa luyag mo magpabawtismo?’” May rason ang pamangkot sang gulang. Siempre, nalipay gid kita kay linibo ka pamatan-on kada tuig ang nagapabawtismo sa bug-os nga kalibutan. (Man. 12:1) Pero luyag masiguro sang Cristianong mga ginikanan kag sang mga gulang sa kongregasyon kon bala ang desisyon sining mga pamatan-on kinabubut-on kag may basihan.

 ² Ginapakita sang Pulong sang Dios nga ang dedikasyon kag bawtismo amo ang panugod sang pagkabuhi subong Cristiano. Pakamaayuhon na sia ni Jehova pero pamatukan man sia ni Satanas. (Hulu. 10:22; 1 Ped. 5:8) Gani nagahinguyang sing tion ang Cristianong mga ginikanan nga tudluan ang ila kabataan kon paano mangin disipulo sang Cristo. Sa mga pamatan-on nga wala sing Cristianong mga ginikanan, mahigugmaon nga ginabuligan sila sang mga gulang sa kongregasyon para binagbinagon kon ano ang nadalahig para mangin disipulo. (Basaha ang Lucas 14:27-30.) Halimbawa, agod mahuman ang bilding, dapat may plano ini. Gani kinahanglan man ang pagplano sing maayo para makaalagad kay Jehova sing matutom “tubtob sa katapusan.” (Mat. 24:13) Pero paano masiguro sang mga pamatan-on nga maalagad nila si Jehova sa bug-os nila nga kabuhi? Binagbinagon naton ini.

3. (a) Daw ano ka importante ang bawtismo suno kay Jesus kag kay Pedro? (Mat. 28:19, 20; 1 Ped. 3:21) (b) Ano nga mga pamangkot ang binagbinagon naton, kag ngaa?

³ Pamatan-on ka bala? Nagaplano ka bala nga magpabawtismo? Maayo ini nga desisyon! Pribilehiyo gid nga mangin bawtismado nga Saksi ni Jehova. Dugang pa, dapat magpabawtismo ang mga Cristiano, kag importante ini para maluwas. (Mat. 28:19, 20; 1 Ped. 3:21) Kon magpromisa ka kay Jehova, handum mo gid nga tumanon ini kag mangin handa sa pagpabawtismo. Gani maayo nga binagbinagon mo ang tatlo ka pamangkot para mahibaluan mo kon handa ka na magpabawtismo. Amo ini ang mga pamangkot: (1) Hamtong na bala ako para magdesisyon? (2) Handum ko gid bala ini? (3) Nahangpan ko bala kon ano ang dedikasyon kay Jehova? Binagbinagon naton ini nga mga pamangkot.

4, 5. (a) Ngaa indi lang para sa may edad ang bawtismo? (b) Ano ang buot silingon sang Cristiano nga pagkahamtong?

⁴ Wala ginapakita sang Biblia nga indi puede magpabawtismo ang mga kabataan ukon mga pamatan-on. Ang Hulubaton 20:11 nagasiling: “Paagi sa iya mga buhat ginapakita sang bata kon bala husto kag matarong ang iya ginahimo.” Bisan pamatan-on pa ang isa, mahangpan na niya kon ano ang husto ukon indi kag makadedikar na sia sa iya Manunuga. Gani ang bawtismo importante kag nagakaigo para sa mga pamatan-on nga nakapakita nga hamtong na sia kag nakadedikar kay Jehova.—Hulu. 20:7.

⁵ Ano ang buot silingon sang pagkahamtong? Wala lang ini nagalakip sa pagdaku sang lawas. Ang Biblia nagasiling nga ang mga hamtong ‘nagahanas sang ila mga ikasarang sa paghangop nga makilala ang maayo kag malain.’ (Heb. 5:14) Gani ang mga hamtong nakahibalo kon ano ang husto sa pagtamod ni Jehova kag desidido nga himuon ini. Amo kon ngaa nga mabudlay sila kumbinsihon nga maghimo sing malain kag indi na kinahanglan nga piliton pa sila nga himuon ang matarong. Gani mapaabot naton nga ang nabawtismuhan nga mga pamatan-on magasakdag sang mga talaksan sang Dios bisan wala ang ila mga ginikanan ukon ang iban nga adulto.—Ipaanggid ang Filipos 2:12.

6, 7. (a) Ipaathag ang mga kabudlayan ni Daniel sa Babilonia. (b) Paano ginpakita ni Daniel nga hamtong sia?

⁶ Mapakita gid bala sang mga pamatan-on ini nga pagkahamtong? Binagbinaga ang halimbawa ni Daniel sa Biblia. Mahimo nga tin-edyer pa lang sia sang pilit sia nga ginpabulag sa iya mga ginikanan kag gindala sa Babilonia. Hinali lang nga nangin kaupod niya ang mga tawo nga tuhay sing mga ginapatihan. May problema pa gid si Daniel: Ginkabig sia nga espesyal sa Babilonia. Ang matuod, lakip sia sa mga pamatan-on nga pinili para mag-alagad sa hari! (Dan. 1:3-5, 13) May mga pribilehiyo si Daniel sa Babilonia nga indi gid niya matigayon sa Israel.

⁷ Ano ang reaksion sang pamatan-on nga si Daniel sa sini? Naengganyo bala sia sang katahom sang Babilonia? Ginbag-o bala sang iya bag-o nga palibot ang iya personalidad kag naguba ang iya pagtuo? Wala! Ang Biblia nagasiling nga samtang sa Babilonia, “nagdesisyon si Daniel nga indi niya pagdagtaan ang iya kaugalingon” sang bisan ano nga may labot sa butig nga pagsimba. (Dan. 1:8) Talalupangdon gid ang pagkahamtong ni Daniel!

8. Ano ang matun-an mo kay Daniel?

⁸ Ano ang matun-an mo kay Daniel? Amo nga ang hamtong nga pamatan-on malig-on sa iya mga panindugan. Indi sia pareho sa kameleon nga nagabag-o sang iya kolor suno sa iya palibot. Wala sia nagagawi nga daw abyan sang Dios sa Kingdom Hall pero abyan naman sang kalibutan kon yara sa eskwelahan. Sa baylo nga ginaanod-anod, malig-on sia kon ginatilawan ang iya pagtuo.—Basaha ang Efeso 4:14, 15.

9, 10. (a) Ano ang benepisyo kon binagbinagon sang pamatan-on kon paano niya gin-atubang ang mga pagtilaw sa iya pagtuo sining karon lang? (b) Ano ang buot silingon sang bawtismo?

⁹ Siempre bangod wala sing himpit nga tawo, nagasayop man kon kaisa ang mga pamatan-on kaangay sang mga adulto. (Man. 7:20) Pero kon nagaplano ka magpabawtismo, maayo nga analisahon mo kon daw ano ikaw ka desidido sa pagsunod sa mga talaksan ni Jehova. Paano mo mahibaluan ini? Pamangkuta ang imo kaugalingon, ‘Pirme ko bala ginasunod ang mga talaksan sang Dios?’ Binagbinaga kon paano mo gin-atubang ang mga pagtilaw sa imo pagtuo  sining karon lang. Ginpakita mo bala nga may ikasarang ka sa paghangop nga makilala ang maayo kag malain? Ano abi kon pareho kay Daniel, kabigon ka man nga espesyal sa kalibutan ni Satanas? Mahimo mo bala nga ‘mahantop sing padayon ang kabubut-on ni Jehova’ bisan pa nga ginasulay ka nga himuon ang supak sa kabubut-on sang Dios?—Efe. 5:17.

¹⁰ Ngaa ginpautwas naton ining prangka nga mga pamangkot? Buligan ka sini nga mahangpan mo kon ano gid ang bawtismo. Sa nasambit na, ang bawtismo nagasimbulo sang imo sinsero nga promisa kay Jehova. Nagpromisa ka nga higugmaon mo sia kag alagaron asta san-o sa bug-os mo nga tagipusuon. (Mar. 12:30) Ang tanan nga nabawtismuhan dapat determinado nga tumanon ang iya promisa.—Basaha ang Manugwali 5:4, 5.

11, 12. (a) Ano dapat ang siguraduhon sang nagaplano nga magpabawtismo? (b) Ano ang makabulig sa imo nga mahuptan ang husto nga pagtamod parte sa kahimusan ni Jehova sa pagpabawtismo?

¹¹ Ang Biblia nagasiling nga ang katawhan ni Jehova, lakip ang mga pamatan-on, “magahalad sing kinabubut-on sang ila kaugalingon” para mag-alagad sa iya. (Sal. 110:3) Gani dapat siguraduhon sang isa nga nagaplano sa pagpabawtismo nga handum gid niya ini. Mahimo nga dapat usisaon mo ang imo kaugalingon, ilabi na kon ginpadaku ka sa pamilya nga Saksi.

¹² Mahimo nakita mo pagligad sang mga tinuig nga madamo ang nabawtismuhan, lakip ang imo mga katubotubo kag bisan gani ang imo mga utod. Kon amo sini ang imo kahimtangan, ano ang dapat mo talupangdon? Dapat indi mo pagtamdon nga ang pagpabawtismo kinabatasan nga dapat himuon sang mga pamatan-on kon mag-abot sila sa husto nga edad. Paano mo masiguro nga husto ang pagtamod mo parte sa kahimusan ni Jehova sa pagpabawtismo? Panumduma pirme kon ngaa importante gid ini. Ang matuod, may pila ka maayo nga rason nga masapwan mo sa sini nga artikulo kag sa masunod.

13. Paano mo mahibaluan kon bala ang imo desisyon nga magpabawtismo kinabubut-on?

¹³ May mga paagi para mahibaluan mo kon kinabubut-on ang imo desisyon nga magpabawtismo. Halimbawa, mahibaluan sa imo mga pangamuyo kon handum mo gid nga alagaron si Jehova. Mahibaluan mo kon daw ano ka kasuod kay Jehova kon pirme ka nagapangamuyo kag kon espesipiko ang imo mga pangamuyo. (Sal. 25:4) Ang isa ka importante nga paagi nga ginasabat ni Jehova ang aton mga pangamuyo amo ang pagpatalupangod niya sang iya Pulong. Gani ang aton panikasog nga tun-an ang Biblia isa pa ka pamatuod nga luyag naton mangin suod kay Jehova kag alagdon sia sing kinabubut-on. (Jos. 1:8) Gani pamangkuta ang imo kaugalingon: ‘Espesipiko bala ang akon mga pangamuyo? Regular bala ang pagtuon ko sa Biblia?’ Kag kon ang imo Cristianong pamilya may Pangpamilya nga Pagsimba, pamangkuta ang imo kaugalingon: ‘Kinabubut-on bala ako nga nagapakigbahin sa sini?’ Ang imo sabat sa sini nga mga pamangkot magapakita kon bala ang imo desisyon nga magpabawtismo kinabubut-on.

14. Ano ang kinatuhayan sang dedikasyon sa bawtismo?

¹⁴ Mahimo magpalibog ang iban kon ano ang kinatuhayan sang dedikasyon sa bawtismo. Halimbawa, may nagasiling nga mga pamatan-on nga nakadedikar na sila kay Jehova pero indi pa sila handa magpabawtismo.  Husto bala ang ila panghunahuna? Ang pagdedikar nagakahulugan nga ginsilingan mo si Jehova nga luyag mo sia alagaron sing dayon. Ginapakita sang isa nga nakadedikar na sia kon magpabawtismo sia. Gani, ang bawtismo amo ang pagpakita sa mga tawo nga nakadedikar ka na kay Jehova paagi sa pangamuyo. Antes ka bawtismuhan, dapat nahangpan mo gid ang kahulugan sang dedikasyon.

15. Ano ang kahulugan sang dedikasyon?

¹⁵ Kon gindedikar mo ang imo kabuhi kay Jehova, indi na ikaw ang nagapanag-iya sini. Nagpromisa ka kay Jehova nga unahon mo ang iya kabubut-on sa imo kabuhi. (Basaha ang Mateo 16:24.) Dapat tamdon nga serioso ang tagsa ka promisa, ilabi na gid kon ang imo ginpromisahan amo si Jehova nga Dios! (Mat. 5:33) Pero paano mo mapakita nga ginpanghiwala mo ang imo kaugalingon kag iya ka na ni Jehova?—Roma 14:8.

16, 17. (a) Iilustrar kon ano ang buot silingon nga ginpanghiwala mo ang imo kaugalingon. (b) Ano gid ang buot silingon kon ang isa nagdedikar sang iya kaugalingon?

¹⁶ Sa pag-ilustrar, imadyina nga ginregaluhan ka sang imo abyan sing salakyan. Ginhatag niya sa imo ang rehistro kag nagsiling: “Regalo ko ini sa imo.” Pero ano abi kon nagsiling pa sia: “Diri lang sa akon ang yabi. Ako lang ang puede magdrayb sini.” Ano ang masiling mo sa sining “regalo”? Ano ang masiling mo sa nagregalo?

¹⁷ Gani hunahunaa kon ano gid ang ginapaabot ni Jehova sa isa nga nagdedikar sa iya, kag nagsiling sa iya: “Ginahatag ko ang akon kabuhi sa imo. Imo na ako.” Pero ano abi kon ang isa indi magtuman kay Jehova paagi sa pagdeyt sing tago sa indi tumuluo? Ano abi kon batunon niya ang obra nga magasablag sa iya ministeryo ukon pagtambong sa Cristianong mga miting? Indi bala pareho ini sa indi paghatag sang yabi sang salakyan? Ang nagdedikar sang iya kaugalingon kay Jehova daw pareho lang nga nagsiling: “Ikaw na ang nagapanag-iya sa akon. Kon ang imo ginapatuman tuhay sa gusto ko himuon, ang imo gusto amo pirme ang matuman.” Suno ini sa panimuot ni Jesus, nga sang diri sa duta nagsiling: “Nagpanaug ako halin sa langit agod himuon ang kabubut-on sang nagpadala sa akon kag indi ang akon.”—Juan 6:38.

18, 19. (a) Suno sa ginsiling nanday Rose kag Christopher, ngaa ang pagpabawtismo isa ka pribilehiyo nga nagaresulta sa mga pagpakamaayo? (b) Ngaa makasiling ka nga ang bawtismo isa ka pribilehiyo?

¹⁸ Gani ang bawtismo serioso nga desisyon nga indi mo dapat pagpakadiutayon ukon sang iban. Daku gid nga pribilehiyo nga magdedikar kag magpabawtismo. Ang mga pamatan-on nga nagahigugma kay Jehova kag nakahangop sang ila dedikasyon wala nagaduhaduha nga magpabawtismo. Wala man sila nagahinulsol sa ila desisyon. “Palangga ko si Jehova, kag nalipay gid ako sa pag-alagad sa iya,” siling sang tin-edyer nga si Rose nga nabawtismuhan na. “Sigurado gid ako sa akon desisyon nga magpabawtismo.”

¹⁹ Kag kamusta si Christopher, nga ginsambit sa umpisa sini nga artikulo? Ano ang iya ginbatyag kay nagpabawtismo na sia bisan 12 anyos pa lang sia? Nalipay gid sia kay ginhimo niya ini. Nangin regular payunir sia sang 17 anyos sia, nangin ministeryal nga alagad sang 18 anyos, kag subong nagaalagad na sia sa Bethel. Sia nagsiling: “Husto ang akon desisyon nga magpabawtismo. Nalipay gid ako nga mag-alagad kay Jehova kag sa iya organisasyon.” Kon nagaplano ka nga magpabawtismo, paano mo ini handaan? Binagbinagon ini sa masunod nga artikulo.