1. Halin sa ginsuguran, ano ang makita sa mga hilikuton sang Dios?

HALIN sa ginsuguran sang pagpanuga, maathag ang paghiusa. Ginalaragway subong kaalam, ang una nga tinuga sang Dios nagsiling: “Yara na ako sadto sa tupad [ni Jehova] subong batid nga manugpangabudlay. Ako gid ang iya kalipay sa adlaw-adlaw.” (Hulu. 8:30) Nagbuligay ang Amay kag Anak, kag nakatuga sila sang nagkalainlain nga kabuhi sa aton palibot. Makita sa mga hilikuton sang Dios ang pagbuligay. Makita naton ini sa paghimo sang arka sa panahon ni Noe; sa pagtakod, paghukas, kag pagsaylo sang tabernakulo samtang nagalakbay ang katawhan sang Dios sa kamingawan; kag bisan sa pagtokar sang mga instrumento sa musika kag sa pag-amba para dayawon si Jehova sa iya templo. Ini tanan nagadepende sa pagbuligay.—Gen. 6:14-16, 22; Num. 4:4-32; 1 Cron. 25:1-8.

2. (a) Ano ang talalupangdon sa Cristianong kongregasyon sang una? (b) Ano nga mga pamangkot ang sabton naton?

² Ining pagbinuligay makita man sa Cristianong kongregasyon sang una sa idalom sang ulo sini nga si Jesucristo. Ginpaathag ni apostol Pablo nga bisan pa ang kada hinaplas nga Cristiano  may “nanuhaytuhay nga dulot” kag nagapakigbahin sa “nanuhaytuhay nga ministeryo” kag “nanuhaytuhay nga buluhaton,” ang tanan “isa lang ka lawas.” (Basaha ang 1 Corinto 12:4-6, 12.) Kamusta naman subong? Paano kita nahiusa sa pagbantala sang maayong balita? Kag paano kita makabulig sa kongregasyon kag sa aton pamilya?

3. Ano ang palanan-awon ni apostol Juan?

³ Sang hingapusan sang unang siglo C.E., may palanan-awon si apostol Juan parte sa pito ka anghel, nga ang kada isa nagpatunog sang trumpeta. Sang ginpatunog sang ikalima nga anghel ang iya trumpeta, nakita ni Juan nga nahulog ang “isa ka bituon” sa duta halin sa langit. Ang “bituon” may ginakaptan nga yabi kag ginbuksan niya ang buho sang kadadalman. Nagtub-ok ang aso, kag halin sa sini may naggua nga mga apan. Wala ginhalitan sang simbuliko nga mga apan ang mga tanom kundi ang “mga tawo lamang nga wala sing marka sang Dios sa ila agtang.” (Bug. 9:1-4) Nahibaluan ni Juan nga grabe manghalit ang panong sang apan. Indi bala nga ginsalakay sang mga apan ang Egipto sang panahon ni Moises? (Ex. 10:12-15) Ang simbuliko nga mga apan nga nakita ni Juan nagalaragway sa hinaplas nga mga Cristiano nga nagabantala sang matigdas nga mga mensahe sang paghukom ni Jehova. Kaupod nila subong ang minilyon nga may paglaum sa duta. Indi katingalahan nga bangod sang aton nahiusa nga pagbantala, nagaluya ang impluwensia sang bug-os kalibutan nga emperyo sang butig nga relihion nga ginagamit ni Satanas!

4. Ano ang dapat himuon sang katawhan sang Dios, kag paano lamang nila ini mahimo?

⁴ Dapat ibantala sang katawhan ni Jehova ang “maayong balita” sa bug-os nga duta antes sang katapusan sini nga sistema. (Mat. 24:14; 28:19, 20) Nagalakip ini sang pag-agda kay “bisan sin-o nga ginauhaw” nga mag-inom sang “tubig sang kabuhi nga wala sing bayad.” (Bug. 22:17) Bilang mga miembro sang Cristianong kongregasyon, paano kita magmadinalag-on sa paghimo sini? Paagi lamang sa paghiusa kag pagbuligay.—Efe. 4:16.

5, 6. Paano kita nahiusa sa pagbantala sang maayong balita?

⁵ Para madamo ang mabantalaan sang maayong balita sang Ginharian, dapat mangin organisado kita. Amo kon ngaa makabaton kita sing mga panuytoy. Ining mga panuytoy gikan sa mga kongregasyon sa bug-os nga duta nagabulig sa aton nga mahiusa sa aton hilikuton. Pagkatapos sang aton miting sa pag-alagad sa latagon, nagabantala dayon kita sang mensahe sang Ginharian sa katawhan. Ginapalapnag naton ang mensahe paagi sa pagsugid sini kag paagi sa minilyon ka publikasyon nga ginbase sa Biblia. Nagapakigbahin ka bala sa espesyal nga mga kampanya sa pagbantala? Kon ginahimo mo ini, lakip ka sa minilyon nga nahiusa sa pagsugid sang mensahe sang “anghel nga nagalupad sa tunga sang kalangitan,” nga ginsambit sa Bugna 14:6.

⁶ Makalilipay gid nga basahon sa Tuigan nga Libro ang aton kabilugan nga pagpanghikot! Nahiusa man kita sa pagpanagtag sang mga imbitasyon sa rehiyonal, pinasahi, kag internasyonal nga mga kombension. Sa sining mga pagtilipon, nagapamati kita sang makapalig-on nga mga pamulongpulong base sa Kasulatan kag nagatan-aw sang mga drama kag mga pasundayag. Ginapadaku sining mga bahin ang mahigugmaon nga pangabay sang Dios nga alagdon sia sing bug-os. Nahiusa man kita sa pagsaulog sang kamatayon ni Jesus. Bangod ginaapresyar naton ang wala tupong nga kaayo sang Dios kag ginatuman ang sugo ni Jesus, kada tuig  dungan kita nga nagatipon kon magtunod ang adlaw kon Nisan 14. (1 Cor. 11:23-26) Kag makatambong man ang indi mga Saksi. Pila ka semana antes sang Memoryal, ginatinguhaan naton nga maagda ang madamo sa aton teritoryo para magtambong sa sining importante nga okasyon.

7. Bangod sang aton tingob nga pagpanghikot, ano ang aton mahimo?

⁷ Daw indi matalupangdan ang mahimo sang isa lang ka apan. Sing kaanggid, daw indi man matalupangdan ang pagpanghikot sang kada isa sa aton. Pero bangod sang aton tingob nga pagpanghikot, minilyon ang ginabuligan naton sa pagdayaw kag pagpadungog kay Jehova! Pero indi lang ini ang paagi nga makabulig kita sa paghiusa sang katawhan sang Dios.

8, 9. (a) Ano nga ilustrasyon ang gingamit ni Pablo para ipakita nga dapat nahiusa ang mga Cristiano? (b) Paano kita makabulig sa kongregasyon?

⁸ Sa sulat ni Pablo sa mga taga-Efeso, ginpadaku niya nga dapat organisado ang kongregasyon kag dapat “mangin hamtong kita sa tanan nga paagi.” (Basaha ang Efeso 4:15, 16.) Ano ang makabulig sa kada isa sa aton nga mahimo ini? Gingamit ni Pablo subong halimbawa ang lawas sang tawo para ipakita nga dapat kita nahiusa kag nagasunod kay Jesucristo, nga amo ang ulo sang kongregasyon. Ginsambit sang apostol ang pagbuligay sang “tagsa ka lutalutahan nga nagapanghikot sing maayo.” Paano kita tanan, bata ukon tigulang, mabakod ukon maluya, makabulig sa paghiusa kag espirituwalidad sang kongregasyon?

⁹ Ang isa ka paagi amo nga dapat magpasakop kita kag magtahod sa mga gulang nga gintangdo ni Jesus nga maghatag sing panuytoy sa kongregasyon. (Heb. 13:7, 17) Mahimo nga indi ini mahapos kon kaisa. Pero makapangayo kita sang panuytoy sang Dios. Buligan kita sang iya aktibo nga puersa nga sakdagon gid ang mga kahimusan sa kongregasyon. Gani kon daw nabudlayan kita kon kaisa nga sundon ang kahimusan, dapat naton dumdumon nga kon mapainubuson kita nga nagasunod, maayo ang epekto sini sa paghiusa sang kongregasyon. Mangin hamtong pa gid kita sa pagpakita sang gugma kon ginahimo naton ini.

10. Paano makabulig ang mga ministeryal nga alagad nga mahiusa ang kongregasyon? (Tan-awa ang piktyur sa umpisa sini nga artikulo.)

¹⁰ Ginaapresyar gid ang bulig sang mga ministeryal nga alagad para mahiusa ang kongregasyon. Bisan ano man ang pangidaron sining mga utod, nagasakripisyo sila sa pagbulig sa tanan. Halimbawa, ginabuligan nila ang mga gulang para siguraduhon nga may bastante kita nga publikasyon para sa ministeryo. Ginaatipan man nila ang regular nga pagtinlo kag pagmentinar sang Kingdom Hall, kag ginaabiabi nila ang mga bisita nga nagatambong sa aton mga miting. Kon nagabulig kita sa ila, ginabuligan naton nga mangin matawhay ang pagpanghikot sang kongregasyon.—Ipaanggid ang Binuhatan 6:3-6.

11. Ano ang mabulig sang mga bataon para mahiusa ang kongregasyon?

¹¹ Madamo sang hamtong nga utod ang tinuig na nga may responsibilidad sa kongregasyon. Pero bangod sang edad, mahimo nalimitehan na ang ila ikasarang gani dapat may pila ka pagbag-o. Makabulig gid ang bataon nga mga kauturan kay bisan wala pa sila sing eksperiensia, mabuligan sila nga mag-uyat sing dugang nga mga responsibilidad kon hanason sila. Makalilipay gid kon manikasog ang mga ministeryal nga alagad nga mangin kalipikado sa pagkagulang! (1 Tim. 3:1, 10) Ang pila ka gulang nga bataon pa nag-uswag asta nga  nangin manugtatap sang sirkito kag nag-alagad sa mga kauturan sa madamo nga kongregasyon. Nalipay bala kita sa kinabubut-on nga pagbulig sang bataon nga mga kauturan?—Basaha ang Salmo 110:3; Manugwali 12:1.

12, 13. Paano makabuligay ang tanan nga miembro sang pamilya?

¹² Binagbinagon naman naton kon paano kita makabulig sa paghiusa sang aton pamilya. Natalupangdan sang madamo nga nagabakod ang kaangtanan sang mga lamharon kag tigulang kon may makapalig-on nga Pangpamilya nga Pagsimba kada semana. Sa sining makalilipay nga tinion, espirituwal nga mga butang ang aton ginahambalan, amo nga nagapahiusa pa gid ini sa pamilya. Ang pagpraktis sa pag-alagad sa latagon makabulig sa pamilya nga makahanda sing maayo sa pagbantala. Kag nangin suod pa ang mga miembro sang pamilya kon magkomento sila parte sa Pulong sang Dios, kay tanan sila nagahigugma sa isa lang ka Dios kag luyag nila nga himuon ang iya kabubut-on.

¹³ Paano mapakita sang mag-asawa nga nagabuligay sila sa pagdayaw kay Jehova? Kon ang mag-asawa matutom nga mga alagad ni Jehova, nalipay sila kay nahiusa sila sa sini. Sanday Abraham kag Sara, Isaac kag Rebeca, Elkana kag Hana nagpakita sang ila pagpalangga sa ila tiayon. Dapat amo man sini ang aton himuon. (Gen. 26:8; 1 Sam. 1:5, 8; 1 Ped. 3:5, 6) Magapahiusa ini sa aton kag sa aton tiayon kag mangin suod pa kita sa aton Amay sa langit.—Basaha ang Manugwali 4:12.

14. Kon wala nagaalagad kay Jehova ang imo bana ukon asawa, ano ang mahimo mo para magbakod ang inyo pag-asawahay?

¹⁴ Dapat likawan sang mga Cristiano nga magpagota sing sampihakan upod sa mga indi tumuluo. (2 Cor. 6:14) Pero paano ang mga utod nga indi Saksi ang tiayon? Ang pila nga nagaalagad sa Dios subong minyo na sang nakatuon sila sang kamatuoran, kag ang ila tiayon indi Saksi. Pero bisan amo sini, makabulig gihapon sa paghiusa sang pamilya ang pagsunod sa mga prinsipio sa Biblia. Lakip sa sini amo ang pagbulig asta sa masarangan sang isa nga wala nagakompromiso. Mahimo nga mabudlay ini, pero hunahunaa kon ano ang mangin resulta. Mabudlay man ang pagsunod sa mga prinsipio sa Biblia kon ang tiayon magpalayo sa kongregasyon. Natabo ini sa Cristiano nga si Mary. Nagaalagad sila sadto sang iya bana nga si David kay Jehova, pero sang nagligad nga mga 25 ka tuig, wala na magtambong sa mga miting sang kongregasyon si David. Padayon nga nagtambong sa mga miting kag mga kombension si Mary kag gintinguhaan niya nga sundon ang mga prinsipio sa Biblia sa ila puluy-an, lakip ang pagtudlo sa ila anom ka kabataan. Sang magdalagku na ang ila kabataan kag nagbiya sa ila puluy-an, puerte gid ang kamingaw ni Mary. Pero nagsugod sa pagbasa si David sang mga magasin nga ginabilin ni Mary sa iya. Sang ulihi, nagtambong na sia sa Kingdom Hall, kag ginatigan-an sia sang iya seis anyos nga apo nga lalaki sing pulungkuan. Kon indi makatambong si David, ginahambalan sia sang iya apo, “Lolo, wala ka kaina sa Kingdom Hall.” Malipayon na nga nagaalagad subong si David kay Jehova, kag nalipay gid si Mary kay magkaupod na sila.

15. Paano mabuligan sang may edad na nga mga mag-asawa ang mga bataon?

¹⁵ Bangod ginahingabot ni Satanas ang mga pamilya subong, importante nga magbinuligay ang tanan nga minyo nga alagad sang Dios sa ila pag-asawahay. Bisan daw  ano ka na kadugay nga minyo, pamensari kon ano ang imo mismo masiling ukon mahimo para mapalig-on ang inyo pag-asawahay. Mahimo gani buligan sang mga may edad na ang mga bataon nga miembro sang kongregasyon parte sa sini. Puede mo kon kaisa maupod sa inyo pangpamilya nga pagsimba ang bataon nga mag-asawa. Makita sang mga bataon nga bisan ano kadugay ang pag-asawahay, importante gihapon ang pagpalangga kag paghiusa.—Tito 2:3-7.

16, 17. Ano ang ginalauman sang nahiusa nga mga alagad sang Dios?

¹⁶ Imadyina ang mga Israelinhon sang panahon sang Biblia nga nagadayaw kay Jehova sa iya templo sa Jerusalem kon may kapiestahan. Nagahanda sila sa paglakbay, nagasakdaganay samtang nagalakbay, kag pag-abot nila sa templo, nahiusa sila sa pagsimba. Para mahimo ini, dapat sila magbinuligay. (Luc. 2:41-44) Samtang padayon kita nga nagalakbay pakadto sa bag-ong kalibutan, dapat man kita nahiusa kag nagabinuligay. Kinahanglan naton ang padayon nga pagpanikasog para himuon ini. Dapat mo bala pauswagon pa gid ang imo mga panikasog?

¹⁷ Hunahunaa kon ano nga mga pagpakamaayo ang matigayon naton! Ginsikway na naton ang indi paghiusa kag kagamo nga makita sa sining sistema sang mga butang. Nasaksihan naton subong ang katumanan sang mga tagna nanday Isaias kag Miqueas, nga ang katawhan sang Dios nahiusa nga nagataklad sa “bukid ni Jehova.” (Isa. 2:2-4; basaha ang Miqueas 4:2-4.) Ginpataas gid ang aton pagsimba “sa ulihi nga bahin sang mga adlaw.” Pero daku pa gid ang aton kalipay kon ang tanan na nga katawhan nahiusa kag nagabinuligay!