“NAPALIG-ON gid ako sang kaayo nga ginpakita sang mga kauturan,” siling ni Lisa. * Amo ini ang ginsiling niya nga una nga nagpalig-on sa iya nga magtuon parte sa kamatuoran. Pareho man sa sini ang naeksperiensiahan ni Anne. Nagsiling sia, “Sang primero, nagtuon ako parte sa kamatuoran bangod sang kaayo nga ginpakita sang mga Saksi, indi bangod sang ila ginatudlo.” Subong, nalipay gid ini nga mga sister sa pagbasa sang Biblia kag sa pagpamalandong sa sini. Pero daku gid ang nabulig sa ila sang kaayo nga ginpakita sa ila.

Paano kita makapakita sang kaayo nga nagapalig-on sa iban? Binagbinagon naton ang duha ka paagi nga mapakita naton ini: paagi sa aton ginahambal kag paagi sa aton ginahimo. Dayon, binagbinagon naton kon sin-o ang dapat naton pakitaan sang kaayo.

Suno sa Hulubaton kapitulo 31, ginasunod sang maayo nga asawa “ang kasuguan sang kaayo” paagi sa iya ginahambal. (Hulu. 31:26) Base sa sini nga “kasuguan,” nagadesisyon sia kon paano sia maghambal kag kon ano ang iya ihambal. Dapat man sundon sang mga bana kag amay ini nga “kasuguan” paagi sa ila ginahambal. Kabalo ang kalabanan nga mga ginikanan nga kon masakit sila maghambal sa ila bata, indi maayo ang epekto sini sa iya kag posible nga indi sia mamati sa ila. Pero kon maghambal sila sing mainayuhon, mas mamati sa ila ang ila bata kag mas mahapos sia magtuman sa ila.

May bata ka man ukon wala, ano ang himuon mo para makahambal ka sing mainayuhon? Makabulig sa aton ang ginasiling sang una nga bahin sang Hulubaton 31:26: “Ginatikab niya ang iya baba sa kaalam.” Buot silingon, dapat kita mangin maalam kon nagapamensar kita sang aton ihambal kag kon paano naton ini ihambal. Makabulig gid kon pamangkuton naton ang aton kaugalingon, ‘Ang akon bala ihambal makapaakig sa iban, ukon makapakalma ini sa ila?’ (Hulu. 15:1) Gani maayo gid kon mamensar kita anay antes kita maghambal.

Ang isa pa ka hulubaton nagasiling: “Ang paghambal nga wala ginahunahuna sing maayo kaangay sang buno sang espada.” (Hulu. 12:18) Kon hunahunaon naton ang posible nga epekto sa iban sang aton ihambal kag sang paagi sang aton paghambal, mapalig-on kita sini nga indi magpadasudaso sa paghambal. Para masunod naton “ang kasuguan sang kaayo,” indi kita dapat maghambal sang makasakit sa iban. (Efe. 4:31, 32) Indi kita dapat maghunahuna kag maghambal sang indi maayo. Sa baylo, hunahunaon naton kon ano ang makapalig-on kag maghambal kita sing mainayuhon. Parte sa sini, nagpakita si Jehova sang maayo nga halimbawa sang ginpasalig niya ang iya alagad nga si Elias nga nahadlok sadto. Ang anghel nga nagarepresentar kay Jehova naghambal sa “kalma kag mahinay nga tingog.” (1 Hari 19:12) Pero mapakita naton ang kaayo indi lamang paagi sa paghambal sing mainayuhon. Dapat man naton ipakita ang kaayo paagi sa aton ginahimo. Paano?

Ginailog naton si Jehova kon nagapakita kita sang kaayo paagi sa aton ginahambal kag ginahimo. (Efe. 4:32; 5:1, 2) Parte sa kaayo nga ginpakita sang mga Saksi, amo ini ang ginsiling ni Lisa nga ginsambit kaina: “Sang gulpi lang ginsilingan ang amon pamilya nga dapat na kami maghalin sa amon ginaistaran, duha ka mag-asawa  sa kongregasyon ang nag-day off sa ila trabaho para buligan kami nga mag-impaki. Ginhimo nila ini bisan wala pa ako sadto naga-Bible study.” Bangod sini nga kaayo, napalig-on si Lisa nga magtuon parte sa kamatuoran.

Nagpasalamat man si Anne, nga ginsambit sa umpisa sini nga artikulo, sa kaayo nga ginpakita sa iya sang mga Saksi. Nagsiling sia: “Bangod sang akon naeksperiensiahan sa mga tawo sa kalibutan, ginadudahan ko ang mga tawo. Nabudlayan ako magsalig sa ila.” Nagsiling pa sia: “Sang nakilala ko ang mga Saksi, wala ako salig sa ila. Napamangkot ko, ‘Ngaa nagapakita sila sa akon sang kaayo?’ Pero sang nakita ko nga matuod gid ang kaayo nga ginapakita sang naga-Bible study sa akon, nagsalig ako sa iya.” Ano ang maayo nga resulta sini? “Sang ulihi, nagpokus na ako sa akon pagtuon.”

Napalig-on gid si Lisa kag si Anne sa pagpalangga kag sa kaayo nga ginpakita sang mga kauturan, kag nangin interesado sila nga tun-an ang kamatuoran. Bangod sang kaayo nga ginpakita sang kongregasyon sa ila, nabuligan sila nga magsalig kay Jehova kag sa iya katawhan.

Naandan na sang iban nga maghambal sing mainayuhon kag magyuhum bangod amo ini ang ila gindak-an. Dalayawon ang mga tawo nga matinahuron bangod sang ila kultura ukon bangod batasan na nila ini. Pero kon nagapakita kita sang kaayo bangod lang sini nga mga rason, posible nga wala naton ginailog ang kaayo sang Dios.—Ipaanggid ang Binuhatan 28:2.

Ang matuod nga kaayo isa ka kinaiya nga ginapatubas sang balaan nga espiritu sang Dios. (Gal. 5:22, 23) Gani kinahanglan naton ang balaan nga espiritu para mapakita ang matuod nga kaayo. Kon nagapakita kita sang kaayo, ginailog naton si Jehova kag si Jesus. Ginapakita sini nga palangga naton si Jehova. Para mailog naton si Jesus, dapat importante sa aton ang kaayuhan sang iban. Ginapakita naton ang kaayo bangod palangga naton si Jehova nga Dios kag ang aton isigkatawo. Gani ang aton kaayo halin gid sa aton tagipusuon kag nalipay sa sini ang Dios.

Daw kahapos lang pakitaan sang kaayo ang mga nagpakita man sa aton sang kaayo ukon ang mga kilala naton. (2 Sam. 2:6) Mapakita naton ini kon pasalamatan naton sila. (Col. 3:15) Pero ano abi kon pamatyag naton indi bagay pakitaan sang kaayo ang isa ka tawo?

Binagbinaga ini: Si Jehova ang pinakamaayo nga halimbawa sa pagpakita sang wala tupong nga kaayo, kag may importante kita nga matun-an sa iya Pulong kon paano niya ginpakita ini nga kinaiya. Madamo nga beses nga mabasa sa Cristianong Griegong Kasulatan ang ekspresyon nga “wala tupong nga kaayo.” Ini nga ekspresyon nagapatuhoy sa kaayo nga ginapakita sa isa nga indi bagay pakitaan sini. Paano kita ginapakitaan sang Dios sang kaayo?

Ginapakitaan ni Jehova sang kaayo ang tanan nga tawo paagi sa paghatag sa ila sang ila mga kinahanglanon para mabuhi sila. (Mat. 5:45) Ang matuod, antes pa naton makilala si Jehova, ginpakitaan na niya kita sang kaayo. (Efe. 2:4, 5, 8) Halimbawa, ginhatag niya para sa tanan nga tawo ang iya pinakamaayo, nga amo ang iya bugtong nga Anak. Nagsiling si apostol Pablo nga ginhatag ni Jehova ang gawad “suno sa kabuganaan sang iya wala tupong nga kaayo.” (Efe. 1:7) Kag bisan pa makahimo kita sang sala kag mapasubo naton si Jehova, padayon niya kita nga ginagiyahan kag ginatudluan. Malulo niya ini nga ginahimo paagi sa iya panudlo kag mga pulong nga daw pareho sa “talithi” nga nagatupa sa hilamon. (Deut. 32:2) Indi gid naton sia mabayaran sa tanan nga kaayo nga ginapakita niya sa aton. Kag kabalo kita nga kon wala nagpakita si Jehova sang kaayo sa aton, wala gid kita sang paglaum sa palaabuton.—Ipaanggid ang 1 Pedro 1:13.

Dalayawon gid kag makapalig-on ang kaayo ni Jehova. Gani dapat naton panikasugan nga ilugon si Jehova paagi sa pagpakita pirme sang kaayo kada adlaw, kag indi kita magpili kon sin-o lang ang pakitaan naton sini. (1 Tes. 5:15) Kon pirme kita nagapakita sang kaayo, daw pareho kita sang kalayo nga makahatag sang kainit sa matugnaw nga tiempo. Mapaumpawan naton ang aton pamilya, mga kauturan, mga kaupod sa trabaho, mga kaeskwela, kag mga kaingod.

Hunahunaa ang maayo nga resulta sa inyo pamilya ukon sa kongregasyon kon magpakita ka sang kaayo paagi sa imo ginahambal kag ginahimo. Posible nga may isa ka utod sa inyo kongregasyon nga kinahanglan gid buligan sa iya ulubrahon sa balay kag sa iya ugsaran. Ukon basi kinahanglan niya ang bulig sa mga hilikuton nga pirme niya ginahimo pareho sang pagpamalaklon. Kag kon nagabantala ka kag may maistorya ka nga nagakinahanglan sang bulig, puede mo man sia buligan.

Kabay pa nga ilugon naton si Jehova kag pirme naton sundon “ang kasuguan sang kaayo” paagi sa aton ginahambal kag ginahimo.