1. Ngaa dapat gid naton pamatian ang paandam ni Jesus?

SANG nagtagna si Jesus parte sa katapusan nga mga adlaw, nagsiling man sia: “Mag-andam kamo nga ang inyo tagipusuon indi gid mabug-atan sang . . . mga kabalaka sa kabuhi.” (Luc. 21:34) Dapat gid naton pamatian ini nga paandam. Ngaa? Bangod tanan kita makaatubang gid sang mabudlay nga mga problema.

2. Ano nga mabudlay nga mga problema ang ginaatubang sang aton mga kauturan?

² Kon kaisa, nagadulungan ang mabudlay nga mga problema nga dapat naton atubangon. Binagbinaga ang masunod nga mga halimbawa. Ang isa ka Saksi nga si John * may malala nga balatian nga multiple sclerosis, kag grabe gid ang iya kasubo sang ginbiyaan sia sang iya asawa nga nakaupod niya sing 19 ka tuig. Sang ulihi, ang iya duha ka anak nga babayi nag-untat sa pag-alagad kay Jehova. Lain naman nga mga problema ang naatubang sang mag-asawa nga sanday Bob kag Linda. Pareho sila nga nadulaan sang trabaho, gani kinahanglan nila magsaylo sa gamay nga balay bangod indi na nila masarangan nga bayaran ang ila ginaistaran. Magluwas sa sini, ginsilingan si Linda sang doktor nga may balatian sia sa tagipusuon nga mahimo bangdan sang iya kamatayon, kag may isa pa sia ka balatian nga nagapaluya sang iya immune system.

3. Suno sa Filipos 4:6, 7, ano ang masaligan naton?

³ Makasalig kita nga nahangpan sang aton Manunuga kag mahigugmaon nga Amay, nga si Jehova, ang aton ginabatyag kon na-stress kita. Kag gusto niya nga buligan kita nga masarangan ang aton mga problema. (Basaha ang Filipos 4:6, 7.) Madamo sing mga halimbawa sa Pulong sang Dios nga nagapakita sang mga kabudlayan nga ginbatas sang iya mga alagad. Ginapakita  man sini kon paano sila ginbuligan ni Jehova sa mabudlay nga mga kahimtangan. Binagbinagon naton ang pila ka halimbawa.

4. Ano nga mga kabudlayan ang gin-atubang ni Elias, kag ano ang nabatyagan ni Elias nga ginhimo ni Jehova para sa iya?

⁴ Nag-alagad si Elias kay Jehova sa tion nga mabudlay ang kahimtangan kag nakaatubang sia sang mabudlay nga mga problema. Si Hari Ahab, nga isa sa mga nangin indi matutom nga hari sang Israel, nagpangasawa kay Jezebel, nga isa ka malaut nga sumilimba ni Baal. Bangod sa ila nga duha, nagdamo ang sumilimba ni Baal sa bilog nga pungsod kag ginpamatay nila ang madamo nga manalagna ni Jehova. Pero nakapalagyo si Elias. Nalampuwasan man niya ang grabe nga tiggulutom paagi sa pagsalig kay Jehova. (1 Hari 17:2-4, 14-16) Nagsalig man si Elias kay Jehova sang ginhangkat niya ang mga manalagna kag sumilimba ni Baal. Kag ginpalig-on niya ang mga Israelinhon nga alagaron si Jehova. (1 Hari 18:21-24, 36-38) Madamo nga beses nga nabatyagan ni Elias ang bulig ni Jehova sa sining mabudlay nga mga tion.

5-6. Suno sa 1 Hari 19:1-4, ano ang ginbatyag ni Elias, kag paano ginpakita ni Jehova nga palangga niya si Elias?

⁵ Basaha ang 1 Hari 19:1-4. Pero hinadlukan si Elias sang nagsiling si Rayna Jezebel nga patyon sia. Gani nagpalagyo sia sa Beer-seba. Nagluya gid ang iya buot amo nga “nangabay sia nga mapatay na lang sia.” Ngaa amo sini ang iya ginbatyag? Indi perpekto si Elias, kag “tawo man [sia] nga may balatyagon kaangay sa aton.” (Sant. 5:17) Mahimo nga grabe gid ang iya stress kag kakapoy. Mahimo nga naghunahuna si Elias nga wala sing pulos ang iya mga  panikasog para sa matuod nga pagsimba, nga wala man sing nagbag-o sa Israel, kag sia na lang ang nabilin nga nagaalagad kay Jehova. (1 Hari 18:3, 4, 13; 19:10, 14) Mahimo matingala kita sa reaksion sining matutom nga manalagna. Pero nahangpan ni Jehova si Elias.

⁶ Sang ginhambal ni Elias ang iya ginabatyag, wala sia gin-akigan ni Jehova. Sa baylo, ginbuligan niya si Elias nga magbakod liwat. (1 Hari 19:5-7) Sang ulihi, mainayuhon nga ginbuligan ni Jehova si Elias nga matadlong ang iya panghunahuna paagi sa pagpakita sang Iya tumalagsahon nga gahom. Dayon nagsiling si Jehova nga may ara pa sia 7,000 ka tawo sa Israel nga wala magsimba kay Baal. (1 Hari 19:11-18) Paagi sa iya mga ginhimo, ginpakita ni Jehova kay Elias nga palangga niya sia.

7. Bangod ginbuligan ni Jehova si Elias, ano ang ginapasalig sini sa aton?

⁷ Na-stress ka bala sa imo mga problema? Makapaumpaw gid mahibaluan nga nahangpan ni Jehova ang ginbatyag ni Elias! Nagapasalig ini sa aton nga nahangpan man niya ang aton mga ginabatyag bangod sang mga problema. Nahibaluan niya ang aton mga limitasyon, bisan ang aton mga ginahunahuna kag ginabatyag. (Sal. 103:14; 139:3, 4) Kon ilugon naton si Elias paagi sa pagsalig kay Jehova, buligan niya kita nga masarangan ang mga problema nga nagahatag sa aton sang stress.—Sal. 55:22.

8. Paano ka buligan ni Jehova nga masarangan ang stress?

⁸ Bangod sang stress, mahimo madulaan ka sing paglaum ukon maluyahan sing buot. Pero tandai nga buligan ka ni Jehova. Paano? Gusto niya nga isugid mo sa iya ang tanan mo nga kabalaka. Kag sabton niya ang imo pagpangabay sang bulig. (Sal. 5:3; 1 Ped. 5:7) Gani pirme ipangamuyo kay Jehova ang imo mga problema. Indi sia direkta nga magapakighambal sa imo pareho sa ginhimo niya kay Elias, pero buligan ka niya paagi sa iya Pulong, ang Biblia, kag paagi sa iya organisasyon. Ang mga kasaysayan nga mabasa mo sa Biblia makapaumpaw sa imo kag makahatag sa imo sing paglaum. Mapalig-on ka man sang imo mga kauturan.—Roma 15:4; Heb. 10:24, 25.

9. Paano kita mabuligan sang isa ka masaligan nga abyan?

⁹ Ginsilingan ni Jehova si Elias nga ihatag ang pila niya ka responsibilidad kay Eliseo. Paagi sa sini, ginhatagan ni Jehova si Elias sang masaligan nga abyan nga nakabulig gid sa iya sang nagluya ang iya buot. Kon isugid man naton sa aton masaligan nga abyan ang aton mga ginabatyag, mabuligan niya kita nga madaug ang pagluya sang buot. (2 Hari 2:2; Hulu. 17:17) Kon pamatyag mo daw wala ka sing masugiran nga abyan, mangamuyo kay Jehova nga buligan ka nga makakita sang hamtong nga utod nga makapalig-on sa imo.

10. Paano ang eksperiensia ni Elias nagahatag sa aton sing paglaum, kag paano kita mabuligan sang promisa sa Isaias 40:28, 29?

¹⁰ Ginbuligan ni Jehova si Elias nga masarangan ang stress kag maalagad sia sing matutom sa madamo nga tinuig. Ang eksperiensia ni Elias nagahatag sa aton sing paglaum. Kon kaisa, mahimo grabe gid ang aton stress nga pamatyag naton daw wala na kita sing kusog kag indi na kita makapamensar sing maayo. Pero, kon magsalig kita kay Jehova, hatagan niya kita sing kusog para padayon kita nga makaalagad sa iya.—Basaha ang Isaias 40:28, 29.

11-13. Ano ang epekto sang stress sa tatlo ka alagad sang Dios sang una?

¹¹ Ang pila ka karakter sa Biblia nakaeksperiensia man sang grabe nga stress. Halimbawa, grabe ang stress ni Hana bangod sang kahuy-anan nga indi sia makabata kag ginayaguta  pa sia sang iya karibal. (1 Sam. 1:2, 6) Bangod sini, nasubuan gid si Hana, gani naghilibion sia kag wala na sia gana nga magkaon.—1 Sam. 1:7, 10.

¹² May mga tion nga daw indi na masarangan ni Hari David ang stress. Hunahunaa ang mga kabudlayan nga iya gin-atubang. Nakonsiensia sia bangod sang madamo niya nga sala. (Sal. 40:12) Ang iya pinalangga nga anak nga si Absalom nagrebelde sa iya, kag ginpatay sang ulihi si Absalom. (2 Sam. 15:13, 14; 18:33) Kag ang isa sa pinakasuod nga mga abyan ni David nagluib sa iya. (2 Sam. 16:23–17:2; Sal. 55:12-14) Ginpabutyag ni David sa madamo niya nga salmo ang iya ginbatyag, pareho sang pagluya sang iya buot kag sang iya malig-on nga pagsalig kay Jehova.—Sal. 38:5-10; 94:17-19.

¹³ Sang ulihi, may isa ka salmista nga nahisa sa kabuhi sang mga malauton. Mahimo nga kaliwat sia sang Levinhon nga si Asaf, kag nag-alagad sia sa “balaan nga santuaryo sang Dios.” Bangod sang stress, nangin indi malipayon kag indi kontento ini nga salmista. Naghunahuna pa gani sia nga daw kulang ang mga pagpakamaayo nga nabaton niya kon ikumparar sa iya mga sakripisyo sa pag-alagad sa Dios.—Sal. 73:2-5, 7, 12-14, 16, 17, 21.

14-15. Ano ang matun-an naton sa tatlo ka halimbawa sa Biblia parte sa pagpangayo sang bulig kay Jehova?

¹⁴ Ining tatlo ka alagad ni Jehova nagsalig nga buligan niya sila. Hanuot nga ginpangamuyo nila kay Jehova ang ila mga kabalaka. Ginsugid nila sa iya ang tanan pati ang mga rason sang ila stress. Kag wala sila mag-untat sa pagkadto sa lugar diin masimba nila si Jehova.—1 Sam. 1:9, 10; Sal. 55:22; 73:17; 122:1.

¹⁵ Naluoy si Jehova sa ila gani ginbuligan niya sila. Bangod sang iya bulig, nangin malinong ang hunahuna ni Hana. (1 Sam. 1:18) Kag si David nagsulat: “Madamo ang kabudlayan sang  matarong, apang ginaluwas sia ni Jehova sa sini tanan.” (Sal. 34:19) Kag ang salmista nagsiling nga ‘gin-uyatan ni Jehova ang iya tuo nga kamot,’ ukon gintuytuyan sia paagi sa mahigugmaon nga laygay. Nag-amba sia: “Para sa akon, maayo nga magpalapit sa Dios. Ginhimo ko ang Soberanong Ginuong Jehova nga akon dalangpan.” (Sal. 73:23, 24, 28) Ano ang matun-an naton sa sini nga mga halimbawa? Kon kaisa, ma-stress kita bangod sang mabudlay nga mga problema. Pero masarangan naton ini kon pamalandungan naton kon paano ginbuligan ni Jehova ang iban, kon magsalig kita sa iya paagi sa pagpangamuyo, kag kon tumanon naton ang iya mga sugo.—Sal. 143:1, 4-8.

16-17. (a) Ngaa indi kita dapat magpalayo kay Jehova kag sa iya katawhan? (b) Paano kita mangin mabakod liwat?

¹⁶ Ining tatlo ka halimbawa nagatudlo sa aton sang isa pa ka importante nga leksion. Indi kita dapat magpalayo kay Jehova kag sa iya katawhan. (Hulu. 18:1) Si Nancy, nga nakaeksperiensia sang grabe nga stress sang ginbiyaan sia sang iya bana, nagsiling: “May mga tion nga gusto ko mag-isahanon lang kag indi ko gusto mag-istorya kay bisan sin-o. Pero, mas nasubuan ako kon ginahimo ko ini.” Nagbag-o ang ginabatyag ni Nancy sang ginpanikasugan niya nga buligan  ang iban nga may mga problema man. Nagsiling sia: “Ginapamatian ko sila samtang nagapabutyag sila sang ila mga kabalaka. Natalupangdan ko nga daw nagakalipatan ko ang akon mga problema kon ginapamensar ko kon paano ko sila mabuligan.”

¹⁷ Mangin mabakod kita liwat kon magtambong kita sa mga miting sang kongregasyon. Kon ara kita sa mga miting, ginahimo naton si Jehova nga aton “manugbulig kag manuglugpay.” (Sal. 86:17) Kon magtambong kita, ginapabakod niya kita paagi sa iya balaan nga espiritu, iya Pulong, kag iya katawhan. Paagi sa mga miting, “makapalig-unay” kita sa aton mga kauturan. (Roma 1:11, 12) Ang isa ka utod nga si Sophia nagsiling: “Si Jehova kag ang mga kauturan amo ang nagbulig sa akon nga makabatas. Importante gid sa akon ang aton mga miting. Natalupangdan ko nga kon masako ako sa ministeryo kag sa amon kongregasyon, mas masarangan ko ang stress kag wala ako masyado nagakabalaka.”

18. Kon nagluya ang aton buot, ano ang ihatag sa aton ni Jehova?

¹⁸ Kon nagluya ang aton buot, dumdumon naton nga si Jehova wala lang nagpromisa nga dulaon niya ang stress sa palaabuton, kundi buligan man niya kita nga masarangan ang stress subong. Hatagan niya kita sang “handum kag kusog” para masarangan naton ang pagluya sang buot kag ang pagbatyag nga wala na kita sing paglaum.—Fil. 2:13.

19. Ano ang ginapasalig sa aton sang Roma 8:37-39?

¹⁹ Basaha ang Roma 8:37-39. Ginapasalig kita ni apostol Pablo nga wala sing makapugong sa pagbaton naton sang gugma sang Dios. Paano naton mabuligan ang aton mga kauturan para masarangan nila ang stress? Binagbinagon sa masunod nga artikulo kon paano naton mailog si Jehova sa pagpakita sing kaluoy sa aton mga kauturan nga na-stress, kag kon paano naton sila mabuligan.