1-2. Ngaa daw pareho sa isa ka mataas nga bilding ang mga Cristiano? (1 Corinto 15:58)

 SANG 1978, isa ka mataas nga bilding nga may 60 ka panalgan ang ginpatindog sa Tokyo, Japan. Nagapalibog ang mga tawo kon paano masarangan sini nga bilding ang mga linog nga pirme nagakatabo sa sina nga siudad. Ano ang ginhimo sang mga engineer para masarangan sini nga bilding ang mga linog? Gindesinyo nila ini nga mangin mabakod pero flexible man. Buot silingon, masarangan sini nga pasundan ang pag-uyog sang duta kon maglinog. Daw pareho sa sini nga bilding ang mga Cristiano. Ngaa masiling naton ini?

² Importante gid nga mangin malig-on ang isa ka Cristiano, pero dapat mangin flexible man sia. Dapat mangin malig-on sia sa pagsunod sa mga kasuguan kag mga ginapatuman ni Jehova. (Basaha ang 1 Corinto 15:58.) “Handa [sia] sa pagtuman” kag wala sia nagakompromiso. Pero dapat man sia mangin “makatarunganon,” ukon flexible, kon kinahanglan ini ipakita sa isa ka sitwasyon. (Sant. 3:17) Kon malig-on pero makatarunganon ang isa ka Cristiano, malikawan niya nga mangin sobra ka estrikto kag malikawan man niya nga pabay-an lang ang indi husto nga ginahimo sang iban. Sa sini nga artikulo, binagbinagon naton kon paano kita mangin malig-on. Hibaluon man naton ang lima ka paagi nga ginagamit ni Satanas para mabudlayan kita nga mangin malig-on, kag kon paano naton madaug ang iya mga paagi.

3. Ano ang ginsugo sang Supremo nga Manughatag sing Kasuguan nga mabasa sa Binuhatan 15:28, 29?

³ Si Jehova ang aton Supremo nga Manughatag sing Kasuguan, kag mahapos hangpon ang mga kasuguan nga ginahatag niya sa iya katawhan. (Isa. 33:22) Halimbawa, ginsambit sang nagadumala nga  hubon sang unang siglo nga dapat mangin malig-on ang mga Cristiano sa sining tatlo ka butang: (1) indi sila dapat magsimba sa mga diosdios, kundi si Jehova lang ang dapat nila simbahon, (2) dapat nila kabigon nga sagrado ang dugo, kag (3) dapat nila tumanon ang sugo sang Biblia nga maglikaw sa seksuwal nga imoralidad. (Basaha ang Binuhatan 15:28, 29.) Subong, paano mapakita sang mga Cristiano nga malig-on sila sa pagtuman sa sining tatlo ka butang?

4. Paano naton mapakita nga si Jehova lang ang aton ginasimba? (Bugna 4:11)

⁴ Wala kita nagasimba sa mga diosdios, kundi si Jehova lang ang aton ginasimba. Ginsugo ni Jehova ang mga Israelinhon nga sia lang ang dapat nila simbahon. (Deut. 5:6-10) Kag sang ginsulay si Jesus sang Yawa, nagsiling si Jesus nga si Jehova lang ang dapat naton simbahon. (Mat. 4:8-10) Gani, wala kita nagasimba sa mga diosdios. Wala man naton ginaidolo ang mga tawo. Halimbawa, wala naton ginakabig nga daw mga dios ang bantog nga mga tawo pareho sang mga lider sang relihion, pulitiko, atleta, artista, ukon singer. Si Jehova lang nga amo ang ‘nagtuga sang tanan nga butang’ ang aton ginasimba kag sa iya lang kita nagadampig.—Basaha ang Bugna 4:11.

5. Ngaa ginatuman naton ang kasuguan ni Jehova parte sa kabuhi kag dugo nga ginakabig niya nga sagrado?

⁵ Ginatuman naton ang kasuguan ni Jehova parte sa kabuhi kag dugo nga ginakabig niya nga sagrado. Ngaa? Bangod nagsiling si Jehova nga ang dugo nagarepresentar sa kabuhi, kag ang kabuhi isa ka hamili nga regalo halin sa iya. (Lev. 17:14) Sang nagsiling si Jehova nga puede kaunon sang mga tawo ang karne sang mga sapat, ginsugo niya sila nga indi nila dapat pagkaunon ang dugo. (Gen. 9:4) Ginsulit niya ini nga sugo sang ginhatag niya sa Israel ang Mosaikong Kasuguan. (Lev. 17:10) Kag gintuytuyan niya ang nagadumala nga hubon sang unang siglo nga hatagan sang instruksion ang tanan nga Cristiano nga dapat ‘padayon sila nga maglikaw sa dugo.’ (Binu. 15:28, 29) Malig-on naton nga ginatuman ini nga sugo kon nagadesisyon kita parte sa mga paagi sang pagpabulong nga batunon naton. b

6. Ano ang dapat naton himuon para matuman naton ang sugo ni Jehova nga maglikaw sa seksuwal nga imoralidad?

⁶ Ginatuman gid naton ang sugo ni Jehova nga maglikaw sa seksuwal nga imoralidad. (Heb. 13:4) Ginlaygayan kita ni apostol Pablo nga dapat naton ‘patyon’ ang mga bahin sang aton lawas. Buot silingon, dapat manikasog gid kita para madula naton ang sala nga mga handum. Gani, ginalikawan naton nga magtan-aw ukon maghimo sang bisan ano nga posible magresulta sa seksuwal nga imoralidad. (Col. 3:5; Job 31:1) Kon ginasulay kita nga maghimo sing malain, ginasikway naton ini dayon kag ginadula naton ang bisan ano nga panghunahuna nga posible makaguba sang aton kaangtanan sa aton Dios.

7. Ano ang ginapanikasugan gid naton nga himuon, kag ngaa?

⁷ Gusto ni Jehova nga ‘kinabubut-on ang aton pagtuman’ sa iya. (Roma 6:17) Para gid pirme sa aton kaayuhan ang iya mga ginapatuman, kag indi puede bag-uhon ang iya mga kasuguan. (Isa. 48:17, 18; 1 Cor. 6:9, 10) Ginapanikasugan gid naton nga mapalipay si Jehova kag ginailog naton ang panimuot sang salmista nga nagsiling: “Nagdesisyon na ako nga tumanon ang imo mga pagsulundan sa tanan nga tion, samtang nagakabuhi ako.” (Sal. 119:112) Pero, ginatinguhaan ni Satanas nga mabudlayan kita nga mangin malig-on. Ano ang iya mga paagi?

8. Paano ginagamit ni Satanas ang paghingabot para mabudlayan kita nga mangin malig-on?

⁸ Direkta nga paghingabot. Para mabudlayan kita nga mangin malig-on, ginagamit sang Yawa ang direkta nga paghingabot para paluyahon ang  aton buot. Gusto niya nga ‘tukbon’ kita, ukon gub-on ang aton kaangtanan kay Jehova. (1 Ped. 5:8) Sang unang siglo, ginpahog, ginsakit, kag ginpatay ang mga Cristiano bangod nakita sang mga nagapamatok nga malig-on gid sila. (Binu. 5:27, 28, 40; 7:54-60) Ginagamit gihapon ni Satanas ang paghingabot asta subong. Makita naton ini nga nagakatabo sa Russia kag sa iban pa nga mga pungsod. Magluwas nga mapintas nga ginahingabot ang aton mga kauturan sa sini nga mga lugar, madamo pa gid nga sarisari nga paghingabot ang ila naeksperiensiahan.

9. Maghatag sing halimbawa sang indi direkta nga paghingabot.

⁹ Indi direkta nga paghingabot. Magluwas sa direkta nga paghingabot, nagagamit man si Satanas sang “tuso nga mga pahito.” (Efe. 6:11) Binagbinaga ang halimbawa sang isa ka brother nga si Bob. Naospital sia kay kinahanglan sia operahan, kag indi ini isa ka simple nga operasyon. Ginsilingan niya ang mga doktor nga indi gid sia magpatughong sang dugo bisan ano pa ang matabo. Ginrespeto sang doktor nga magaopera kay Bob ang iya desisyon. Pero sang gab-i antes sang operasyon, sang nakapauli na ang pamilya ni Bob, ginkadtuan sia sang anesthesiologist ukon doktor nga nagaanestisya sa pasyente. Ginsilingan niya si Bob nga mapreparar lang sila sang dugo engkaso kinahanglan ini, pero labanlaban nga indi man ini magamit. Posible nahunahuna sang doktor nga basi magbag-o ang pensar ni Bob kon wala ang iya pamilya. Pero malig-on si Bob, kag nagsiling sia nga indi gid sia magpatughong sang dugo bisan ano pa ang matabo.

10. Paano kita maimpluwensiahan sang panghunahuna sang mga tawo nga nagabalewala sang mga kasuguan ni Jehova? (1 Corinto 3:19, 20)

¹⁰ Ang panghunahuna sang mga tawo nga nagabalewala sang mga kasuguan ni Jehova. Kon ilugon naton ang panghunahuna sini nga mga tawo, posible gid nga balewalaon man naton si Jehova kag ang iya mga kasuguan. (Basaha ang 1 Corinto 3:19, 20.) Sa masami, “ang kaalam sini nga kalibutan” nagaimpluwensia sa mga tawo nga indi pagtumanon ang Dios. Sang una, may pila ka Cristiano sa Pergamo kag sa Tiatira nga naimpluwensiahan sang mga tawo sa sini nga mga siudad. Mga imoral ini nga mga tawo kag nagasimba sila sa mga diosdios. Prangka nga ginlaygayan ni Jesus ining duha ka kongregasyon bangod ginakunsinti nila ang seksuwal nga imoralidad. (Bug. 2:14, 20) Subong, posible nga piliton kita sang mga tawo nga patihan ang ila sala nga mga panghunahuna. Posible nga silingan kita sang mga miembro sang aton pamilya kag sang aton mga kilala nga sobra sa aton ka estrikto, kag puede lang nga indi naton pagtumanon ang mga kasuguan ni Jehova. Halimbawa, posible magsiling sila nga daan na katama ang sugo sang Biblia nga maglikaw sa seksuwal nga imoralidad, gani indi na importante kon bala ginasunod naton ini ukon wala.

11. Kon malig-on kita, ano ang indi naton dapat paghimuon?

¹¹ Kon kaisa, posible mahunahuna naton nga daw indi masyado maathag ang mga instruksion nga ginahatag ni Jehova. Posible pa gani nga masulay kita nga ‘magpasobra sa mga butang nga nasulat na.’ (1 Cor. 4:6) Amo ini ang sala sang mga lider sang relihion sang panahon ni Jesus. Gindugangan nila ang Kasuguan sang ila kaugalingon nga mga pagsulundan, gani binudlayan gid ang ordinaryo nga mga tawo. (Mat. 23:4) Maathag ang mga instruksion nga ginahatag sa aton ni Jehova paagi sa iya Pulong kag paagi sa iya organisasyon. Wala kita sing rason nga dugangan ini nga mga instruksion. (Hulu. 3:5-7) Gani, wala kita nagapasobra sa mga butang nga nasulat sa Biblia ukon nagahimo sang mga kasuguan para sa aton mga kauturan parte sa personal nga mga butang.

12. Paano ginagamit ni Satanas ang “wala sing pulos nga daya”?

¹² Mga pagpangdaya. Ginagamit ni Satanas ang “wala sing pulos nga daya” kag ang “nahauna nga mga butang sang kalibutan” para patalangon ang mga tawo kag gub-on ang ila paghiusa. (Col. 2:8) Sang unang siglo, nalakip sa sini ang mga pilosopiya nga nabase sa panghunahuna sang mga tawo,  ang mga ginatudlo sang mga Judiyo nga wala nabase sa Kasulatan, kag ang panudlo nga dapat kuno tumanon sang mga Cristiano ang Mosaikong Kasuguan. Nagpatalang ini sa mga tawo kay nagpahilayo ini sa ila kay Jehova nga amo ang ginahalinan sang matuod nga kaalam. Subong, ginagamit ni Satanas ang media kag ang social network para magpalapta sang mga impormasyon nga wala sing basihan, pareho sang mga conspiracy theory kag mga fake news nga ginasakyan sang mga pulitiko. Madamo sa sini nga mga impormasyon ang nabatian naton sa tion sang COVID-19 nga pandemic. c Grabe nga kabalaka ang nabatyagan sang mga tawo nga nagpati sa sining indi matuod nga mga impormasyon, pero wala ini mabatyagan sang mga Saksi ni Jehova nga namati sa mga instruksion sang aton organisasyon.—Mat. 24:45.

13. Ngaa indi kita dapat magpatublag?

¹³ Mga tublag. Dapat kita magpokus sa “mas importante nga mga butang.” (Fil. 1:9, 10) Kon matublag kita, posible mausik ang aton madamo nga tion kag kusog. Kon himuon naton nga pinakaimportante sa aton kabuhi ang mga butang nga pirme naton ginahimo, pareho sang pagkaon, pag-inom, paglingawlingaw, kag pag-obra, posible matublag kita. (Luc. 21:34, 35) Madamo man kita sang mabatian nga mga balita adlaw-adlaw parte sa mga protesta kag mga isyu sa pulitika. Dapat naton siguraduhon nga indi kita matublag sang sini nga mga isyu. Kon matublag kita, posible may dampigan kita sa aton hunahuna. Ginagamit ni Satanas ining tanan nga paagi nga ginbinagbinag naton kay gusto niya nga mabudlayan kita nga himuon ang husto. Binagbinagon naman naton kon paano naton madaug ang iya mga paagi para makapabilin kita nga malig-on.

14. Ano ang isa ka paagi nga makabulig sa aton nga magdampig pirme kay Jehova?

¹⁴ Pamalandungi kon ngaa gindedikar mo ang imo kabuhi kay Jehova kag kon ngaa nagpabawtismo ka. Ginhimo mo ini kay gusto mo nga magdampig kay Jehova. Dumduma kon ano ang nagkumbinsi sa imo nga ang imo ginatun-an amo gid ang kamatuoran. Bangod natun-an mo ang sibu nga ihibalo parte kay Jehova, nagdayaw ka gid sa iya kag ginhigugma mo sia bilang imo Amay sa langit.  Dayon nagbakod ang imo pagtuo kag napalig-on ka nga maghinulsol. Gin-untatan mo ang paghimo sang mga butang nga ginadumtan ni Jehova kag ginhimo mo ang mga butang nga nagapalipay sa iya. Gani nangin malinong ang imo hunahuna bangod narealisar mo nga ginpatawad ka na sang Dios. (Sal. 32:1, 2) Nag-attend ka sa mga miting sang kongregasyon kag ginsugid mo sa iban ang dalayawon nga mga butang nga imo natun-an. Bilang isa ka dedikado kag bawtismado nga Cristiano, nagalakat ka na subong sa dalan nga nagapadulong sa kabuhi, gani himua gid ang imo bug-os nga masarangan nga magpabilin sa sini nga dalan.—Mat. 7:13, 14.

15. Ngaa importante ang pagtuon kag ang pagpamalandong?

¹⁵ Tun-i ang Pulong sang Dios kag pamalandungi ini. Kon madalom ang mga gamot sang isa ka kahoy, mabakod ini kag indi ini dali matumba. Kon madalom man nga nakapanggamot sa Pulong sang Dios ang aton pagtuo, mangin mabakod kita. Samtang nagadaku ang kahoy, nagadalom man kag nagapangalapkap ang mga gamot sini. Sing kaanggid, kon nagatuon kita kag nagapamalandong, nagadalom man ang aton paghangop sa Pulong sang Dios. Gani mas mangin mabakod ang aton pagtuo kag mas mangin kumbinsido kita nga ang paagi sang Dios amo gid ang pinakamaayo. (Col. 2:6, 7) Pamalandungi kon paano naproteksionan ang mga alagad ni Jehova sang una paagi sa iya mga instruksion kag mga laygay. Halimbawa, nagpokus gid si Ezequiel sang nakita niya sa isa ka palanan-awon nga ginatakus sing maayo sang isa ka anghel ang templo. Napalig-on gid si Ezequiel sa sini nga palanan-awon, kag nagatudlo ini sa aton nga masimba naton si Jehova sa husto nga paagi kon tumanon naton ang iya mga kasuguan. d (Ezeq. 40:1-4; 43:10-12) Kon magpain kita sang tion para tun-an kag pamalandungan ang madalom nga mga butang sa Pulong sang Dios, makabenepisyo man kita.

16. Paano naproteksionan si Bob sang iya malig-on nga tagipusuon? (Salmo 112:7)

¹⁶ Palig-una ang imo tagipusuon. Nagsiling si Hari David nga indi gid sia mag-untat sa paghigugma kay Jehova. Nag-amba sia: “Malig-on ang akon tagipusuon, O Dios ko.” (Sal. 57:7) Masarangan man naton nga palig-unon ang aton tagipusuon kag magsalig sing bug-os kay Jehova. (Basaha ang Salmo 112:7.) Binagbinaga kon paano ini  nakabulig kay Bob nga ginsambit kaina. Sang ginpabalo sia nga may ipreparar nga dugo engkaso kinahanglan ini, nagsiling sia dayon nga kon may gamay lang nga posibilidad nga matughungan sia sang dugo, magua sia sa ospital. Sang ulihi, nagsiling si Bob, “Wala gid ako nagduhaduha kon ano ang himuon ko, kag wala ako nabalaka sa posible nga matabo.”

17. Ano ang matun-an naton sa eksperiensia ni Bob? (Tan-awa man ang piktyur.)

¹⁷ Malig-on si Bob. Ngaa? Bangod antes pa sia naospital, madugay na niya nga ginhimo ang iya desisyon nga indi gid magkompromiso. Una, gusto gid niya nga malipay si Jehova sa iya. Ikaduha, gintun-an niya sing maayo ang Biblia kag ang aton mga publikasyon nga nabase sa Biblia parte sa pagkasagrado sang kabuhi kag dugo. Ikatlo, kumbinsido sia nga para gid sa iya kaayuhan ang pagsunod sa mga kasuguan ni Jehova. Mapakita man naton nga malig-on ang aton tagipusuon bisan ano pa nga mga pagtilaw ang aton maeksperiensiahan.

18. Paano ginapakita sang halimbawa ni Barak nga dapat kita magsalig kay Jehova? (Tan-awa ang piktyur sa kober.)

¹⁸ Magsalig kay Jehova. Binagbinaga si Barak. Nagmadinalag-on sia bangod nagsalig sia sa instruksion ni Jehova. Sadto nga tion, wala sing taming ukon bangkaw ang mga Israelinhon. Pero ginsugo ni Jehova si Barak nga magpakig-away sia sa mga Canaanhon. Madamo sing armas ang mga Canaanhon kag ginapangunahan sila ni Sisera. (Huk. 5:8) Ginsilingan sang manalagna nga si Debora si Barak nga magdulhog sia sa bukid. Dayon magkadto sia sa patag nga lugar para didto magpakig-away kay Sisera kag sa iya 900 ka kangga. Kabalo si Barak nga may bentaha ang mga kangga sa patag nga lugar, pero gintuman niya ang instruksion sa iya. Samtang nagadulhog ang mga soldado halin sa Bukid Tabor, nagpaulan si Jehova sing mabaskog. Gani naguot sa lutak ang mga kangga ni Sisera, kag ginpadaug ni Jehova si Barak. (Huk. 4:1-7, 10, 13-16) Kon magsalig kita kay Jehova kag sa mga instruksion nga ginahatag niya paagi sa iya organisasyon, buligan man niya kita nga mangin madinalag-on.—Deut. 31:6.

19. Ngaa dapat mo gid panikasugan nga magpabilin nga malig-on?

¹⁹ Samtang nagakabuhi pa kita sa sini nga sistema, dapat padayon kita nga magpanikasog nga mangin malig-on. (1 Tim. 6:11, 12; 2 Ped. 3:17) Kabay pa nga indi gid kita magpaapekto sa direkta nga mga paghingabot, sa indi direkta nga mga paghingabot, sa panghunahuna sang mga tawo nga nagabalewala sang mga kasuguan ni Jehova, sa mga pagpangdaya, kag sa mga tublag. (Efe. 4:14) Sa baylo, magpabilin kita nga malig-on, mangin matutom kita kay Jehova, kag tumanon naton pirme ang iya mga kasuguan. Pero, dapat man kita mangin makatarunganon. Parte sa sini, si Jehova kag si Jesus ang aton pinakamaayo nga mga halimbawa. Binagbinagon naton ini sa masunod nga artikulo.